Ikalakalu ya Jipoxolo 5:1-42
5 Sayi diyala amwixana Ananiya, kumoxi ni muhatu wê Safídya, a sumbisa o kibhela kyâ.
2 Ku kitadi kiki, mwene wa swekaku mbandu, o muhatu wê wa k’ijidile. O mbandu ya mukwá, mwene wa ibheka ku jipoxolo.
3 Maji Phetele wa mwibhwidisa: “Ananiya, mukonda dyahi Satanaji wa kufunyisa kutanga makutu ku nzumbi ikôla ni kusweka o mbandu ya kitadi kya kibhela?
4 O kibhela ki kya kutokalele ande dya ku kisumbisa? Kyoso ki wa kisumbisa, k’eye wejidile se ihi i weji bhanga ni kitadi? Mukonda dyahi waxinganeka ku muxima wé kubhanga o kima kiki? Eye wa nganala o athu, maji Nzambi, kana.”
5 Kyoso kyevu o maka enyá, Ananiya wabu bhoxi, yu wafu. Oso evu o maka enyá, akexile ni wôma wavulu.
6 Bhenyobho, o minzangala a muzangula, a muvungu mu milele, anga a mwambata bhukanga, ya a mufundu.
7 Kyoso kyabhiti ola jitatu, o muhatu wa Ananiya wabokona. Mwene kejidile yoso yabhitile.
8 Phetele wa mwibhwidisa: “Ngitangele hanji, kiyadi kyenu o kibhela mwa kisumbisa mu kitadi kiki?” Mwene wa mu tambwijila: “Kyene mwene ki twa kisumbisa.”
9 Phetele wa mwibhwidisa: “Mukonda dyahi kiyadi kyenu mwabakana kupolovala o nzumbi ya Jihova? Talesa! O athu afundu mwadi wé ala bhu mwelu, éne we anda kwambata bhukanga.”
10 Mu kithangana kyenyókyo mwene wabu bhu inama ya Phetele, yu wafu. Kyoso o minzangala kyabokona, a musange wafu, ene anga a mwambata bhukanga, ya a mufundu bhu mbandu ya mwadi wê.
11 Athu oso mu kilunga ni oso evu o ima yiyi, akala ni wôma wavulu.
12 O jipoxolo we asulukile mu kubhanga isumwa ni madiwanu avulu mwaxaxi ka mundu, enyoso anga akala mu dyongeka mu tembulu mu mbalanda ya Solomá.
13 O athu amukwá exile ni hele ya kudyongeka ni maxibulu, maji o mundu wakexile muzwela kyambote yalungu ni ene.
14 Anga kukala athu avulu, mayala ni ahatu axikana Ngana, akexile we mudyongeka nawu.
15 Katé mwene ni jihaxi, akexile mu jitula bhukanga, mu ikoka, ni ku jizekesa bhu tuhama ni bhu ipoya, phala kyoso Phetele kyeji bhita, o kizuzumbya kyê kya atule.
16 Mundu wavulu we wakexile mutunda mu jimbanza ja zukamene mu Jeluzaleme, akexile mubheka o jihaxi ni yó akexile mwazumisa ku jinzumbi jayibha. Enyoso akexile mwasaka.
17 Mu kyenyiki, o mukunji wadikota ni oso akexile n’ê, yó atokalele ku kibuka kya Jisadusewu, exile ni difuba dyavulu.
18 Ene akwata* o jipoxolo, a ate mu kaleya ka mbanza.
19 Maji mu usuku o anju ya Jihova yajikula o mabhitu a kaleya, ya a ambata bhukanga, ya atangela:
20 “Ndenu, mu dilondekese mu tembulu, musuluke mu kubokela o mundu o njimbu yoso yalungu ni mwenyu wakezaku.”
21 Kyazubha kwívwa o izwelu yiyi, mu kimene-mene abokona mu tembulu, anga amateka kulonga.
Kyoso o mukunji wadikota ni yó akexile-n’ê kyabhixila, ene adyongeka kumoxi ni adyakime a kifuxi kya Izalayele, anga atumina kubheka o jipoxolo jakexile mu kaleya.
22 Kyoso o alangidi kyabhixila mu kaleya, kasange o jipoxolo. Kyenyiki, ene avutuka, ya a atangela, exi:
23 “Twasange o kaleya kojike kyambote, o alangidi emanene bhu myelu, maji kyoso ki twa kajikula, ki tusange-mu muthu.”
24 Kyoso kyevu o maka enyá, o kabhitangu ka tembulu ni akunji a makota adiwana kyavulu, akexile mu dibhwidisa se ihi dingi yeji bhita.
25 Maji kwabhixila muthu wa atangela, wixi: “Talesenu! O mayala u mwatele mu kaleya ala mu tembulu ni kulonga o mundu!”
26 O kabhitangu wayi mwatakana kumoxi ni alangidi, maji ka abhange kima kyayibha, mukonda akexile ni wôma wa kwabuba ni matadi ku mundu.
27 Kyenyiki a abheka, ya atula bhu pholo ya adyakime a mundu ni ya mukunji. O mukunji wadikota wa atangela:
28 “Twa mifidisa kyá phala ki mulonge mu dijina didi, maji enu mwezalesa Jeluzaleme ni ulongelu wenu, enu mwamesena kubheka o manyinga ma diyala didi kuthandu dyetu.”
29 Phetele ni jipoxolo ja mukwá atambwijila: “Twatokala tu tumaka Nzambi kala nguvulu yetu, kana o athu.
30 O Nzambi ya jitata jetu wafukununa Jezú ku madifundu, yó mwa mujibha mu ku mu phaphela ku taka.*
31 Nzambi wa muzangeleka ku mbandu yê ya kadilu kala Mutwameni wa Betakota ni Mubhuludi, phala akwa Izalayele adyele o ituxi yâ, n’a tambule o muloloki.
32 Etu twala tu jimbangi ja ima yiyi, ni nzumbi ikôla we, yatumikisa Nzambi kwa yó a mutumaka kala nguvulu.”
33 Kyoso kyevu o maka enyá, njinda ya akwata, a mesenene kwajibha.
34 Maji sayi Falizewu a mwixana Ngamadiyele, wabalumuka mwaxaxi ka adyakime a dyongekele. Mwene wexile mulongexi wa Kijila, a muximanene kyavulu kwala o mundu. Mwene watumu kutubhula o jipoxolo tu ithangana.
35 Mwene anga wa atangela: “Enu mu akwa Izalayele, dilangyenu ni ima i mwamesena kubhanga ku mayala yá.
36 Mu kifika, sayi diyala a mwixanene Tewúda, wexile muthu wafuma. Hama jiwana ja mayala adibundile ni mwene. Maji a mujibha, o athu oso akexile ku mukayela amwangana, o yoso yeji bhanga yabhu.
37 Kyoso ki kwabhiti izuwa, kwamoneka we Juda mukwa Ngalileya, mu kithangana kya athu ku disonekesa, mwene waswinisa athu avulu ku mukayela. O diyala didi we wafu, oso akexile mu mukayela amwangana.
38 Mukonda dya kiki, ngi mi tangela kwila, o mayala yá ki mudite nawu, maji ehenu-wu, ayá. Mukonda se o kikalakalu kiki kyatokala ku athu, kyanda bhwa,
39 maji se kyatokala kwa Nzambi, enu ki mwanda tena ku kibhwisa. Maji se musuluka mu kubhanga kiki, mwa musota kubhânga ni Nzambi.”
40 Mu kyenyiki, ene axikina o itendelesu ya mwene, ya atumu kwixana o jipoxolo. Kyazubha kwabeta ni jixikote a afidisa kuzwela mu dijina dya Jezú, anga a eha.
41 Ene atundu mu Inzo ya Kufundisa ni kusanguluka, mukonda a amono kwila afwama kwa sebhulula mukonda dya dijina dya Jezú.
42 Izuwa yoso, mu tembulu, nzo ni inzo, asulukile ni kulonga ni kuboka o njimbu yambote yalungu ni Kidistu Jezú, sé kufula.
