Kala Kyasoneka Nzwá 11:1-57
11 Sayi diyala amwixana Lázalu, wakatele. Mwene wexile mukwa Betanya, o sanzala mwa tungile Madiya ni phang’yê Málata.
2 Madiya yú, mwéne wa lundwile o máji ma dizumba kwa Ngana, yu wa mu kondona o inama ni ndemba yê. O Lázalu wakatele, wexile phang’yê.
3 O jiphange jê atumikisa njimbu kwa Jezú, exi: “Ngana, kamba dyé dya kazola wakate.”
4 Kyoso Jezú kyevu o njimbu yiyi, mwene wambe: “O kukata kuku ki kukata kwa kufwa, maji kwa kufumanesa Nzambi, phala o Mon’a Nzambi atambule-ku fuma.”
5 Jezú wazolele Málata, Madiya ni Lázalu.
6 Kyoso mwene kyevu kwila Lázalu wakate, mwene waxala izuwa iyadi bhu kididi bhwa kexile.
7 Jezú anga wambela o maxibulu mê: “Tuyenu dingi mu Judeya.”
8 O maxibulu a mu vutwila: “Mesene,* ki kubhiti luwa thembu yavulu, akwa Judeya amesenene ku kububa ni matadi, kwene dingi ku wandaya?”
9 Jezú wa atambwijila, wixi: “O dikumbi kidyene mu mwika mu kwinyi ni kiyadi kya ji-ola? Se muthu wendela mu mwanya, mwene katena kudibhukana, mukonda umona o mukengeji wa ngongo yiyi.
10 Se muthu wenda mu usuku, mwene wanda dibhukana, mukonda momwê kimwala mukengeji.”
11 Kyazubha kuzwela o ima yiyi, mwene wambe dingi: “Kamba dyetu Lázalu wayi kukilu, maji eme nga muya kwenyóko phala ku mu phaphumuna.”
12 Kyenyiki, o maxibulu a mwambela, exi: “Ngana, se mwene wayi kukilu, wanda disanza.”
13 Jezú wakexile muzwela yalungu ni kufwa kwa Lázalu, maji ene abanzele kwila, wakexile muzwela yalungu ni kilu.
14 Kyenyiki, Jezú wa ajimbulwila kyambote, wixi: “Lázalu wafu.
15 Maji mukonda dyenu, eme nga sanguluka, kuma ki nga kexile-bhu, phala muxikane. Maji tuyenu ku mu tala.”
16 Kyenyiki Tomé, a mwixanene we Jingongo, wambela o maxibulu ni akwâ: “Twendyenu phala tufwile kumoxi ni mwene.”
17 Jezú kyabhixila, a mutangela kwila, Lázalu wakexile kyá izuwa iwana mu mbila.
18 O sanzala ya Betanya ya zukamene ni mbanza ya Jeluzaleme, dikanga dyê dyexile jikilómetulu jitatu.*
19 Anga Jijudé javulu ayile mu konda o malamba a Málata ni Madiya, mukonda dya kufwa kwa phang’yâ.
20 Málata kyevu kwila, Jezú wakexile mu kwiza, mwene wayi mu disanga-nê. Maji Madiya waxikamene m’onzo.
21 Málata wambela Jezú, wixi: “Ngana, se wakexile-bhu, phang’yami hinu kafu.
22 Né kindala, ngejiya kwila, yoso i ubhinga kwa Nzambi, Nzambi u kubhana-yu.”
23 Jezú wa mwambela: “Phang’yé wanda fukunuka.”
24 Málata wa mu vutwila, wixi: “Ngejiya kwila mwene wanda balumuka mu difukunukinu dya kizuwa kya kà suka-ku.”
25 Jezú wa mutangela: “Éme ngi difukunukinu ni mwenyu. Woso u ngixikana, né mwene se ufwa, wanda vutuka ku mwenyu.
26 Woso wala ku mwenyu, anga u ngixikana, kanda fwa dingi. O kwila uxikina mu maka yá?”
27 Mwene wa mu tambwijila, wixi: “Kyene mwene Ngana, nga xikina kwila, éye u Kidistu, o Mon’a Nzambi, yó a mu kanene kwiza mu ngongo.”
28 Kyazubha kuzwela o ima yiyi, mwene wayi, wexana phang’yê Madiya bhu mbandu, anga u mwambela, wixi: “O Mesene weza. Mwene wa mu kwixana.”
29 Kyoso Madiya kya k’ivu, wabalumuka ni lusolo, yu wayi mu disanga-nê.
30 Jezú kabokwene luwa mu sanzala, maji wakexile hanji bhu kididi bhwa mu sangele Málata.
31 O Jijudé akexile m’onzo ni Madiya mu mu konda o malamba kya mono kwila mwene wabalumuka ni lusolo, a mukayela, mukonda abanzele kwila, mwene wakexile muya bhu mbila phala kudila.
32 Kyoso Madiya kyabhixila bhu kididi bhwa kexile Jezú, yu wa mu mono, wafukama bhu inama yê, wixi: “Ngana se eye wakexile-bhu, phang’yami hinu kafu.”
33 Jezú kyamono Madiya ni Jijudé eza-nê kumoxi amudila, henda ya mu kwata,* anga ukala ni kikote ku muxima.
34 Mwene wa ebhwidisa: “Mwa mutula kwebhi?” Ene a mu tambwijila, exi: “Ngana, zá utale.”
35 Jezú anga udila.
36 Mukonda dya kiki, o Jijudé ambe: “Talenu! Mwene wa muzolele kyavulu!”
37 Maji, amoxi mudyâ, akexile muzwela, exi: “Se o diyala didi watena kujikula o mesu a kifofo, mukonda dyahi kafidisa Lázalu kufwa?”
38 Kyenyiki, Jezú henda ya mu kwata dingi, wayi bhu mbila. O mbila yiyi, yakexile mu dibánda. Bhu mwelu axitile-bhu ditadi.
39 Jezú wambe: “Katulenu o ditadi.” Málata, phange ya difundu, wa mwambela: “Ngana, mwene nange wa mu nuha kyá kyayibha, mukonda kwabhiti kyá izuwa iwana.”
40 Jezú wa mwibhwidisa: “Eme ki ngi kutangela kwila, se uxikana, wanda mona o fuma ya Nzambi?”
41 Ene akatula o ditadi, Jezú anga ubhetula o mesu ku dyulu, yu wambe: “Tata, nga kusakidila mukonda wang’ivu.
42 Eme ngejiya kwila, wene mu ng’ivwa jinga, maji ngazwela mukonda dya mundu wemana bhenyabha, phala ene axikine kwila, éye wa ngi tumikisa.”
43 Kyazubha kuzwela o ima yiyi, mwene wadikola ni dízwi dya swina, wixi: “Lázalu, tunda bhu kanga!”
44 Lázalu anga utunda. O inama ni maku mê o nyinge ni milele, o pholo yê yófute ni milele. Jezú wa atangela: “Mu nyingununyenu o milele, n’ende.”
45 Jijudé javulu ayile mukunda Madiya, mu kumona o kima kyabhangele Jezú, a muxikana.
46 Maji sayi athu mudyâ, ayi ku Jifalizewu mwatangela o kima kyabhangele Jezú.
47 O akunji a makota ni Jifalizewu, adyôngeka, ya ambe, exi: “Kuma o diyala didi wa mubhanga madiwanu avulu, ihi i twanda bhanga?
48 Se tu mwehela kiki, athu enyoso anda muxikana. O akwa Loma, anda kwiza ni ku tu tambula o kididi* kyetu ni ixi yetu.”
49 Kyenyiki sayi muthu mudyâ, amwixana Kayafa, wexile o mukunji wa dikota ku muvu wenyó, wa ambela: “Enu ki mwejiya kima.
50 Ki mwa tongoloka kwila kyeji betakota se muthu umoxi ufwila o mundu, muveji dya kifuxi kyoso ku kibwikisa?”
51 Kyenyiki, mwene kazwela o ima yiyi mu ibanzelu yê ngó. Kuma mwéne wexile o mukunji wadikota ku muvu wenyó, wakanene kwila Jezú weji fwila o kifuxi.
52 Kafwila ngó o kifuxi, maji phala kwongeka we mu kibuka kimoxi, o an’a Nzambi a mwanganene.
53 Tundé mu kizuwa kyenyókyo, ene akexile musota ndunge phala ku mujibha.
54 Mukonda dya kiki, Jezú kexile mu dilondekesa dingi ku Jijudé, mwene watundu kwenyóko, yu wayi ku kididi kya zukamene ni kikangalakata, mu mbanza a ixanene Efalayime, anga ukala kwenyóko ni maxibulu mê.
55 O Fesa ya Phasu ya Jijudé ya zukamene, athu avulu atundile mu jisanzala, abande mu Jeluzaleme ande dya kizuwa kya Phasu, phala kudizelesa, kala kituma o Kijila.
56 O athu akexile musota Jezú. Mu tembulu akexile mu dibhwidisa: “Ihi i mu banza? O kwila mwene kanda kwiza mu fesa?”
57 O akunji a makota ni Jifalizewu, abhanene kitendelesu ku athu kwila, woso wejidile bhwoso bhwakexile Jezú, atokalele kwatangela phala ene ku mukuta.*
Footnotes
^ Mu Ngel.: “Labi.”
^ Mu Ngel.: “15 kya jistádyu.”
^ Mu Ngel.: “u kumba mu nzumbi.”
^ O kididi kiki, o tembulu.
^ Mba, “ku mu kwata.”
