O Mukanda wa Kayadi wa Phetele 3:1-18
3 Enu akwetu, phange jami jakazola, yú o mukanda wa kayadi kya u nga mu mi sonekena, kala ki ngabhange mu mukanda wa dyanga, nga mu midimuna bhukaxi ka ilembalesu, o uhete wenu wa kuxinganeka kyambote,
2 phala mu lembalale o maka azwelele* o jipolofeta mukulu, ni kitumu kya mi bhanene Ngana ni Mubhuludi wetu, bhukaxi ka jipoxolo jenu.
3 Kya dyanga ijiyenu-kyu kwila, mu izuwa isukidilaku, kwanda moneka akwa kuxongwena ni izwelu yâ ya kulokalala, ene anda bhanga kiki kala kituma o jihânji jâ.
4 Ene anda zwela: “Mwene kambe kwila weji tukuluka? Mu kiki-phe yu kwebhi? Tundé o thembu kyafu o jikuku jetu, ima yoso yalé kala kya ibhange Nzambi, tundé kudimatekenu.”
5 Mukonda ene adijimba mu lwelu o kidi kiki: M’ukulu kwexile dyulu ni ixi bhukanga dya menya ni bhukaxi ka menya kala kyazwela Nzambi,
6 bhukaxi ka kizwelu kiki, o mundu wa izuwa yenyoyo, a ubwika mu ku ubobesa mu menya.
7 Bhukaxi ka kizwelu kyenyiki, o dyulu ni ixi yalaku kindala, yobhake phala ku ibwikisa ni túbhya. A ibhake katé mu kizuwa kya kufundisa ni kya kubwikisa o athu ayibha.
8 Maji, phange jami jakazola, ki mujimbe o kidi kiki: Phala Jihova, kizuwa kimoxi, kyedi kala midi ya mivu, o midi ya mivu yedi kala kizuwa kimoxi.
9 Jihova kene mulaleka ku kumbidila o ikanenu yê, kala kyene mubanza athu akamukwa, maji mwene wa mikwatela mwanyu, mukonda mwene kamesena kwila kukala muthu ufwa. Maji wamesena kwila athu oso adyela o ituxi yâ.
10 O kizuwa kya Jihova, kyanda kwiza kala kiza o mwiyi. Mu kizuwa kyenyókyo, o maulu ma ka jimuka ni lusolo* mukonda dya kutema kwavulu, o ima yoso anda ijikinisa, o ixi ni ibhangelu yoso yala-mu, anda itungununa.
11 Kuma o ima yoso yiyi aka ibwikisa, xinganekenu se mwafwama mukala mu athu akidifwa kyahi. Mwa tokala mukala mu athu ala ni wendelu wazele, ni kubhanga ima iximanesa Nzambi.
12 Kyoso kimuya ni kukingila ni kuxinganeka* o kizuwa kya Jihova, o maulu anda kwabwika ni túbhya, o ima yanda jikinisa mukonda dya kutema kwavulu.
13 Maji etu twakingila maulu ma ubhe ni ixi ya ubhe kala kya kanena Nzambi, mwenyomo mwanda kala o kuyuka.
14 Kyenyiki jiphange jami jakazola, kuma mwa mukingila o ima yoso yiyi, bhangenu yoso phala mwene amisange ni kutululuka, sé dixaka, sé kikuma.
15 Ku mbandu ya mukwa, ijiyenu-kyu kwila, o mwanyu wa Ngana yetu, wamibhana kithangana kya kubhuluka, kala kya mi sonekena o phange yetu ya kazola, Phawulu, bhukaxi ka unjimu wamubhana Nzambi.
16 Mwene wazwela yalungu ni ima yiyi, kala kyene mubhanga mu mikanda yê yoso. Maji, sayi ima yasoneka-mu, yabhonzo ku itendela. O yó akambe kwijiya, kala ni kixikanu kyakolo, amulonga o maka mu ukexilu wengi, kala kyene mubhanga kya ni jimbandu ja mukwa ja Mikanda Ikôla. Mu kubhanga kiki, a mu disotela o kibwikilu kyâ.
17 Kyenyiki jiphange jami jakazola, kuma mwa dyanga kya kwijiya o ima yiyi, dilangyenu phala ka mi jimbidise ku makutu ma athu abhukumuka, phala o kixikanu kyenu kyakolo kikizoze.
18 Maji endenu-phe ni kukula mu ngalasa ya Nzambi, ni mu kwijiya kwa Ngana yetu ni Mubhuludi, Jezú Kidistu. Mwene atambule o fuma kikale lelu, katé ku hádya ni hádya. Kyene.
