Mukanda wa Phetele 5:1-14
5 Kyenyiki, kuma eme wami ngi kafunga, eme ngatale o hadi yatalele Kidistu, ni kwila ngibhanga mbandu ku fuma yanda londekesa Nzambi, nga mubhana o kitendelesu kiki ku tufunga twoso ala mwaxaxe kenu:
2 Ingenu o kilunga kya Nzambi ki mwa mutambula konda, enu mwa musidivila kala mu tufunga,* kana ni kijijidiku maji ni vondadi yoso bhupholo ya Nzambi. Kana ni nganyu ya xidi maji ni kisangusangu kyoso.
3 Kimukale mutumina ni undanda kwa yó ala undundu wa Nzambi, maji mubhana phangu yambote ku kilunga.
4 Kyoso-phe o kafunga kadikota kyanda tukuluka, enu mwanda tambula o kijinga kyafuma kikamba kulela.
5 Kyene we kimoxi, enu mu minzangala beleselenu o adyakime. Kyenyiki ditalatalenu ni kulenduka mukonda Nzambi ka sanguluka ni akwa kudizangeleka maji ulondekesa o ngalasa yê ku athu alenduka.
6 Kyenyiki, ditululyenu bhoxi dya lukwaku lwa kutena lwa Nzambi, phala mwene a mizangeleke mu kithangana kyatokala.
7 Hele* yenu yoso xilenu-yu Nzambi, mukonda mwene wene mu milanga.
8 Jikulenu o mesu, mudilange! Kuma o nguma yenu Dyabhu, unyunga mu jimbandu jenu kala hoji ya muzuma mu kusota woso umudya.
9 Zokenu ni Dyabhu, mu difikidile mu kixikanu, mu kwijiya kwila o jiphaxi ji mwa mudibhana naju, jene jimoxi ni ja mudibhana naju o jiphange jenu mu ngongo yoso.
10 Maji kyoso kimwanda zubha kutala hadi mu ka kithangana, o Nzambi mukwa ngalasa, wa mixana mu fuma yê yakalelaku kumoxi ni Kidistu, wanda zubha o ku milonga. Mwene wanda mi swinisa, wanda mikolesa ni ku mi kolokotesa.
11 O kutena kukale kwa mwene katé ku hádya ni hádya. Kyene!
12 Bhukaxi ka Sidivanu* phangyami yafiyele, nga mu mi sonekena o kamukanda kaka phala ku mi swinisa ni ku mi ijidisa o ngalasa ya kidi ya Nzambi, mu dikwatenene mu maka enyá.
13 O muhatu* wala ku Babilonya amusolo we kwa Nzambi kala enu, wa mitumikisa umenekenu, monami Máluku wa mitumikisa we o umenekenu.
14 Dimenekenenu ni jinzobole ja henda.
Kalenu ni kutululuka enu enyoso mwala mu akayedi a Kidistu.
Footnotes
^ Mba, “mukukilanga ni henda yoso.”
^ Mba, “maka menu moso, ibhindamu.”
^ A mwixana we Sila.
^ O izwelu mu dimi dya Ngeleku mu velusu yiyi, yamba yalungu ni muhatu, o muhatu mwenyu ulombolola o kilunga kyala ku Babilonya.
