•   “O ixi ya China yambe kwila o muvu yú o ixi yakukutile kyavulu ni kwila yiyi yene o veji ya katatu itwamono dingi o ima kubhita.”—The Guardian, mu kizuwa kya 7 ya Katutu, 2022.

•   “Mu mivu itanu yandakayelaku, mbandu ya África yanda kukuta kyavulu.”—UN News, mu kizuwa kya 26 ya Kakwinyi, 2022.

•   “O mbandu ya Europa ndenge yandakala mukilwezu kya ku kukuta kwa ixi, kiki nange kyene o ku kukuta kwandabeta dingi kota mu 500 a mivu.”—BBC News, mu kizuwa kya 23 ya Kakwinyi, 2022.

 Jingijiye javulu jambe kwila o ku kukuta kuku kwa ixi kwanda suluka ni katé mwene ni kudibandekesa dingi. O kwila sayi kidyelelu yalungu ni hádya? Ihi yamba o Bibidya?

 O Bibidya yakanena kwila mu izuwa yetu:

•   “Mu ididi yavulu . . . mwanda kala we nzala.”—Luka 21:11.

 O ku kukuta kwa ixi yandabheka nzala. O ku kukuta, kwandabheka nzala, hadi ni kalunga, kikumbidilu kya polofesiya ya Bibidya.—Dijingunwinu 6:6, 8.

 O Bibidya ilondekesa se mukonda dyahi o ku kukuta kwa ixi kwamudibandekesa dingi. Tala:

•   ‘Muthu katena kwendesa né ngó, o makanda mê-mwène.’—Jelemiya 10:23.

 Kiki kilombolola kwila o athu katena kuditunda kyambote mukwendesa “o makanda [mâ]-mwène.” O kusola kwâ kwayibha kwene mubhekesa ku kukuta kwa ixi ni kukamba menya.

•   Jingijiye javulu jixikina kwila o ikalakalau ya athu yene mubhekesa o kutema mu ngongo ni kubandekesa o ku kukuta ku mundu woso.

•   O ibhangelu ya athu akwa lwimbi ni yó abhana o itumu se kuxinganeka kuhádya, ene muzanga o ima, kuxidisa o ixi ni kukalakala kyayibha sé unjimu ni imbamba ya ngongo. Mukonda dya kiki twamuxala se menya.

 Maji o Bibidya ibhana kidyelelu.

 O Bibidya yakanena kwila Nzambi wandabatula o maka alungu ni kukamba menya. Kyebhi kyene?

1.  1. “Kithangana kyabhixila kya kubwikisa yó ene mu bwikisa o ixi, ” kala kya kanena Nzambi. (Dijingunwinu 11:18) Mwene wandazubha o ima yoso ibhangesa kukamba menya, o athu ayibha, o akwa lwimbi ni ni yó ene mubwikisa o ixi.—2 Timote 3:1, 2.

2.  2. “O ixi ya kukuta ya kà di-bhanga izanga ya menya.” (Izaya 35:1, 6, 7) Nzambi wanda yudika o ima yoso ibheka o ku kukuta ni kukitula o ngongo mu palayízu mwandakala menya avulu.

3.  3. “Ixi u izungila, u itekela; usweka jimbongo javulu mu mavu”. (Jisálamu 65:9) Ni mabesá a Nzambi, o ixi yoso yandakala ni nzungile ya kudya ni menya azele phala o athu aso.