“Se eye uxikina kwila o Bibidya mak’â Nzambi, kiki kilombolola kwila Nzambi wene muzwela n’etu. . . . Se o ima ilonga o ngeleja yê yala ni valolo yavulu ku mwenyu wê, kiki kilombolola kwila [o Bibidya] yosoneke mu ukexilu wene muzwela o athu.” Kyene kyambe o mesene ngana Alan S. Duthie mu divulu dyê mu dimi dya Kingileji ni dyambu: Bible Translations and How to Choose Between Them.

Oso azolo Nzambi ni muxima woso axikina mu maka enya. Ene axikina ni kidi kyoso kwila, “O Mikanda yoso Ikôla yatundu kwa Nzambi, yene yafwama phala kulonga, phala kubazela o itondalu, phala kuyukisa yabhengalala, ni kwijidisa wendelu wambote.” (2 Timote 3:16) O Bibidya ki divulu ngó dyokulu. Maji o mak’â Nzambi, “ala ni mwenyu ni kutena,” kwa kubatula o maka a moneka ku myenyu ya athu mu kizuwa ni kizuwa. (Jihebelewu 4:12) Phala o atangi kutendela ni kubelesela o milongi ya divulu didi dikôla, dyene atokala kudilungulula mu ukexilu wene muzwela o athu lelu, phala athu a maukexilu oso atene kuditendela kyambote.

Oso azolo o Mak’â Nzambi anda sanguluka mu kutambula o Bibidya Mikanda ya Ngeleku mu Kimbundu. O Jimbangi ja Jihova abhana o ngolokela ya Bibidya yiyi yolungulule mu ukexilu wabhebhuluka kala kyene muzwela o athu, mu kizuwa kya 21 ya mbeji ya Kamoxi ka 2021. O Bibidya yiyi a ilungulula mu ukexilu wabhebhuluka, ni kidi kyoso, phala athu atendele dingi kyambote o njimbu ya Nzambi mu dimi dya [Kimbundu] m’ukulu ndenge. Eye nange utena kudibhwidisa, nanyi walungulula o Bibidiya yiyi yakatunda?

Sumbala o Bibidya Mikanda ya Ngeleku a ilungulula ngó kindala phala o athu azwela o dimi dya [Kimbundu], maji yeneku kyá tundé ku muvu wa 1950. Ku muvu wenyó, o Sociedade Torre de Vigia de Bíblias e Tratados abhana o Bibidya yiyi mu dimi dya Kingileji. Ku mivu yavulu o kisangela kiki, kyene mubhanga o kikalakalu kiki kya ku imprimila ji Bibidya. O Mulangidi wa 15 wa mbeji ya Katutu wa 1950, mu kingileji wambe: “O kibuka kya athu alungulula o Bibidya, kamesena kudilondekesa ku athu. Ene kamesena kwila o athu ejiya o majina mâ, kikale kindala, kikale kyoso kyanda fwa. O Bibidya yatokala iximanesa o Nzambi ya kidi, wene ku mwenyu.”

O Bibidya Tradução do Novo Mundo, yatenena a ibhana ku muvu wa 1961. Sumbala o majina a alunguludi ka atumbula katé mu izuwa ya lelu, ki kwabhingi kukala ni jiphata ja lungu ni ene ni kikalakalu kyoso kyabhange. O dijimbulwilu dya Bibidya ya 2013 dyambe: “Mu kwijiya o njimbu yakatunda yala mu Bibidya, ki twa lungulula ngó o Bibidya ni ufiyele woso kala kyexile o mikanda yokulu, maji twa lungulula we mu ukexilu wabhebhuluka ki ubhonzo ku utendela.”

Kate lelu abhange kya 243 a mazunda a jipokya ja Bibidya Tradução do Novo Mundo, kikale ya tenena mba mu jimbandu, mu 211 a madimi. Kyebhi kyadivu o atangi avulu?

Bibidya Izelesa o Dijina dya Nzambi

Jezú walongo o maxibulu mê kusamba: “Tat’etu wene mu dyulu dijina dyé adizelese.” (Matesu 6:9) O Bibidya ilondekesa o dijina dya Nzambi Jihova mu 7.000 ya jiveji ndenge. (Makatukilu 3:15; Jisálamu 83:18) Kyoso kyafu o jipoxolo ja Jezú, o athu mu kilunga kya Jikidistá amateka we kukala ni kifwa kyayibha kyexile nakyu o Jijudé kya kudituna kutambula o dijina dya Nzambi. (Ikalakalu 20:29, 30; 1 Timote 4:1) O asoneki akwa Ngelexa amateka kukatula o dijina Jihova mu Mikanda Ikôla, ya asoneka-mu o majina kala “Nzambi” ni “Ngana.”

O Kibuka kyalungulula o Bibidya Tradução do Novo Mundo, avutukisa mu kusoneka o dijina dya Jihova mu Mikanda ya Ngeleku, * dyene dimoneka mu 237 a jiveji. O kuvutukisa kusoneka o dijina didi, kikima kyatundu mu kilunji kyâ, maji ene atokwesa kyambote o ima. Mu kifika, o divulu dya Luka 4:18 ditumbula o izwelu yala mu divulu dya Izaya 61:1. Mu Mikanda ya dyanga ya Hebalayiku, o dijina dya Jihova dimoneka mu velusu yiyi ya divulu dya Izaya. Mukonda dya kiki, mu Bibidya Tradução do Novo Mundo, o divulu dya Luka 4:18 a disoneka kiki: “O nzumbi ya Jihova yala kuthandu dyami, mukonda mwene wa ngi undu phala kuboka o njimbu yambote ku jingadyama.”

O Bibidya yiyi yanda kwatekesa o atangi kwijiya kwila, Jihova Nzambi, kasokela ni mon’ê umoxyelele Jezú Kidistu. Mu kifika Jibibidya javulu alungulula kiki o divulu dya Matesu 22:44: “O Ngana wambela Ngana yami.” (Versão Rei Jaime) Maji nanyi wamuzwela kwa nanyi? Mu kidi, o velusu yiyi itumbula o izwelu yala mu divulu dya Jisálamu 110:1, mu moneka o dijina dya Jihova mu mikanda ya dyanga mu dimi dya Hebalayiku. O Bibidya Tradução do Novo Mundo, ilungulula o divulu dya Matesu 22:44 mu ukexilu yu: “Jihova watangela Ngana yami.” Mu velusu yiyi tutena kumona kwila Jihova Nzambi waditungula kwa Mon’ê. (Máluku 13:32; Nzwá 8:17, 18; 14:28) Se twamesena kubhuluka twatokala kwijiya kwila Jihova ni Jezú kasokela. O divulu dya Ikalakalu ya jipoxolo 2:21 dyamba: “Woso udikola mu dijina dya Jihova, wanda bhuluka.”

O alunguludi akalakala ni mwanyu woso phala kulungulula o Mikanda ya Ngeleku, ni ufiyele woso, ni mu ukexilu wabhebhuluka kala kyene mu zwela o athu mu izuwa ya lelu. Mu kifika o alunguludi a Bibidya Tradução do Novo Mundo, a bhange yoso phala kulungulula o ilombolwelu ya izwelu ya dimi dya Ngeleku. Mu madimi avulu ene muzwela lelu, o athu ene mutumbula o izwelu phala kulombolola o kithangana kya kizwelu mba verbu, kifwa kithangana kyokulu mba passado, kithangana kya lelu mba presente ni kithangana kya hádya mba futuro. Mu dimi dya Ngeleku o izwelu mba jiverbu, jilondekesa we se o kima akibhange kakithangana ngó, se azubha kya kukibhagna, mba kyanda suluka. Mu kifika tala o izwelu yala mu mukanda wa Kolose 4:2. O kizwelu “kukolokota” mu dimi dya Ngeleku, kilombolola kusuluka ni kubhanga kima. O mukanda yu wamba kiki: “Kolokotenu mu kusamba, mu kubhanga kiki mu aluka ni kusakidila Nzambi.” Kyene we kimoxi, o divulu dya Matesu 7:7 dyamba: “Kolokotenu mu kubhinga, n’a mi bhane, kolokotenu mu kusota, ni musange, kolokotenu mu kuphupha n’a mi jikwile.”—Matesu 7:7; Loma 1:32; 6:2; Ngalásya 5:15.

O Bibidya Mikanda ya Ngeleku mu dimi dya [Kimbundu] yene o mbandu ya dyanga. A mubhanga yoso phala kulungulula o Bibidya yatenena, mu kithangana kyatokala. O kwila o athu anda tanga o Bibidya yiyi mu dimi dya [Kimbundu] atena kudyelela kwila a ilungulula ni kidi kyoso ni mu ukexilu wabhebhuluka kala o Bibidya mu dimi dya Kingileji?

Kyene mwene. Mukonda o Kibuka Kya Utuminu kya Jimbangi ja Jihova, akayela kyambote o kikalakalu kyoso kyabhange o alunguludi. Ni unjimu woso ene asolo kibuka kya athu phala kulungulula o Bibidya. (Jisabhu 11:14) Kyenyiki asokejeka ibuka ya mukwa mu ngongo yoso phala kulungulula o Jibibidya. O Mbonge ya Jimbangi ja Jihova ya sokejeka kibuka akixana Kibuka kya Sidivisu kya Kulungulula. O kibuka kiki, kikwatekesa o ibhindamu ya ibuka ya mukwa yala mu ngongo yoso, mu kutambwijila o ibhwidisu ibhanga o alunguludi, ni kusokejeka o ji Bibidya Tradução do Novo Mundo mu madimi avulu. Abhange we programa ya jikomputadolo a ixana (Sistema de Tradução da Torre de Vigia) phala kukwatekesa o kikalakalu kya alunguludi. O programa yiyi ikwatekesa kumona kyebhi o Bibidya ya Kingileji kya lungulula o izwelu ya Hebalayiku ni ya Ngeleku. Kiki kikwatekesu kyadikota phala o alunguludi kusola o izwelu yatokala mu madimi mâ. Ejiya-kyu kwila, phala kubhanga o kikalakalu kya kulungulula o alunguludi abhanga nguzu yavulu. Maji o jikomputadolo jikwatekesa kyavulu o kibuka kya kulungulula o Bibidya kukumbidila o mbambe ya kulungulula o Tradução do Novo Mundo ni kidi kyoso ni mu ukexilu wabhebhuluka kala o Bibidya ya Kingileji.

Twa mu kuswinisa kutanga o Bibidya Mikanda ya Ngeleku. Eye utena ku itanga bhukaxi ka internete mba bhukaxi ka JW Library, utena we ku ibhinga mu kilunga kimoxi kya Jimbangi ja Jihova mu dyembu dyê. Eye we wanda sanguluka mu kutanga o jimbandu ja kamukwa ja Bibidya yiyi: Ya bhebhuluka, yosoneke mu ukexilu ki ibhonzo ku itanga; wanda sanga-mu o mbandu milongi yala mu divulu. Mbandu yiyi yanda kukwatekesa kwijiya o maka ala mu divulu ni ku kukwatekesa kusanga ni lusolo lwoso o jivelusu ji wawabhela dingi. O kima kyabeta kota o kwijiya kwila, eye utena kutanga o Bibidya yiyi ni kidyelelu kya kwila, o mak’â Nzambi a alungulula ni kidi kyoso ni mu ukexilu wabhebhuluka, kala kyene muzwela o athu mu kizuwa ni kizuwa.

Dilombolwelu: Mu mbandu yiyi tusanga-mu o ilombolwelu ya izwelu yavulu yotumbule mu Bibidya.