ហេតុអ្វីព្រះមានអង្គការរបស់លោក?
សូមរៀនពីបណ្ដាំរបស់ព្រះ
ហេតុអ្វីព្រះមានអង្គការរបស់លោក?
អត្ថបទនេះលើកឡើងនូវសំណួរមួយចំនួនដែលអ្នកប្រហែលជាធ្លាប់សួរ ហើយបង្ហាញចម្លើយដែលអ្នកអាចអានពីគម្ពីររបស់អ្នក។ សាក្សីព្រះយេហូវ៉ានឹងរីករាយពិភាក្សាចម្លើយទាំងនេះជាមួយនឹងអ្នក។
១. ហេតុអ្វីព្រះបានរៀបចំជនជាតិអ៊ីស្រាអែលឲ្យទៅជាប្រជាជាតិមួយ?
ព្រះបានរៀបចំកូនចៅរបស់អាប្រាហាំឲ្យទៅជាប្រជាជាតិមួយ។ លោកបានហៅប្រជាជាតិនោះថា អ៊ីស្រាអែល ហើយបានឲ្យពួកគេមានភារកិច្ចការពារការគោរពប្រណិប័តន៍ពិត និងគម្ពីរបរិសុទ្ធដែលជាបណ្ដាំរបស់លោក។ (ទំនុកតម្កើង ១៤៧:១៩, ២០) អាស្រ័យហេតុនេះ មនុស្សគ្រប់ជាតិសាសន៍បានទទួលប្រយោជន៍។—សូមអាន លោកុប្បត្តិ ២២:១៨
ព្រះបានជ្រើសរើសជនជាតិអ៊ីស្រាអែលឲ្យធ្វើជាសាក្សីរបស់លោក។ ពេលពួកគេស្ដាប់បង្គាប់ព្រះ ពួកគេបានទទួលប្រយោជន៍ពីច្បាប់របស់លោក។ (ចោទិយកថា ៤:៦) យើងអាចដឹងថែមទៀតអំពីព្រះពិត ដោយសិក្សាប្រវត្ដិរបស់ជនជាតិអ៊ីស្រាអែល។—សូមអាន អេសាយ ៤៣:១០, ១២
២. ហេតុអ្វីគ្រិស្តសាសនិកពិតបានត្រូវរៀបចំឡើងជាអង្គការមួយ?
យូរៗទៅ ព្រះយេហូវ៉ាលែងពេញចិត្តនឹងជនជាតិអ៊ីស្រាអែល ហើយលោកបានរើសយកក្រុមជំនុំគ្រិស្តសាសនិកជំនួសប្រជាជាតិនោះ។ (ម៉ាថាយ ២១:៤៣; ២៣:៣៧, ៣៨) កាលពីមុន ជនជាតិអ៊ីស្រាអែលជាសាក្សីរបស់ព្រះ។ សព្វថ្ងៃនេះ គ្រិស្តសាសនិកពិតបម្រើជាសាក្សីព្រះយេហូវ៉ា។—សូមអាន សកម្មភាព ១៥:១៤, ១៧
លោកយេស៊ូបង្រៀនអ្នកកាន់តាមលោកឲ្យធ្វើការជាក្រុមដើម្បីធ្វើជាសាក្សីបញ្ជាក់អំពីព្រះយេហូវ៉ា ហើយបង្រៀនមនុស្សគ្រប់ជាតិសាសន៍ឲ្យទៅជាអ្នកកាន់តាមលោក។ (ម៉ាថាយ ១០:៧, ១១; ២៤:១៤; ២៨:១៩, ២០) កិច្ចការនេះកំពុងឈានដល់ទីបញ្ចប់។ ជាលើកដំបូងដែលព្រះយេហូវ៉ាបានបង្រួបបង្រួមមនុស្សរាប់លាននាក់ពីគ្រប់ប្រជាជាតិឲ្យមានសាមគ្គីភាពក្នុងការគោរពប្រណិប័តន៍ពិត។ (ការបើកបង្ហាញ ៧:៩, ១០) លោកយេស៊ូបានណែនាំគ្រិស្តសាសនិកពិតឲ្យធ្វើការជាក្រុមដើម្បីពួកគេអាចលើកទឹកចិត្តគ្នានិងអាចជួយគ្នាទៅវិញទៅមកដែរ។ នៅទូទាំងពិភពលោក ពួកគេមានកម្មវិធីសិក្សាគម្ពីរដូចគ្នានៅកិច្ចប្រជុំរបស់ពួកគេ។—សូមអាន ហេប្រឺ ១០:២៤, ២៥
៣. តើសាក្សីព្រះយេហូវ៉ានៅសម័យនេះបានចាប់ផ្ដើមមានតាមរបៀបណា?
អង្គការសាក្សីព្រះយេហូវ៉ាដែលមាននៅសម័យនេះបានចាប់ផ្ដើមបង្កើតឡើងក្នុងទសវត្សរ៍នៃឆ្នាំ១៨៧០។ ក្រុមតូចមួយនៃនិស្សិតគម្ពីរបានចាប់ផ្ដើមរកឃើញសេចក្ដីពិតក្នុងគម្ពីរដែលបាត់បង់ជាយូរមកហើយ។ ពួកគេបានដឹងថាលោកយេស៊ូរៀបចំក្រុមជំនុំគ្រិស្តសាសនិកឲ្យផ្សព្វផ្សាយ។ ដូច្នេះ ពួកគេបានចាប់ផ្ដើមកិច្ចផ្សព្វផ្សាយអំពីរាជាណាចក្រនៅប្រទេសនានា។ នៅឆ្នាំ១៩៣១ ពួកគេបានយកឈ្មោះថា សាក្សីព្រះយេហូវ៉ា។—សូមអាន សកម្មភាព ១:៨; ២:១, ៤; ៥:៤២
៤. សព្វថ្ងៃនេះ តើសាក្សីព្រះយេហូវ៉ាបានត្រូវរៀបចំឡើងយ៉ាងដូចម្ដេច?
នៅសតវត្សរ៍ទី១ ក្រុមជំនុំគ្រិស្តសាសនិកនៅប្រទេសជាច្រើនបានទទួលប្រយោជន៍ពីគណៈអភិបាលដែលទទួលស្គាល់លោកយេស៊ូជាប្រមុខនៃក្រុមជំនុំ។ (សកម្មភាព ១៦:៤, ៥) ស្រដៀងគ្នាដែរ សព្វថ្ងៃនេះ សាក្សីព្រះយេហូវ៉ាទទួលស្គាល់លោកយេស៊ូជាប្រមុខរបស់ពួកគេ។ (ម៉ាថាយ ២៣:៩, ១០) ពួកគេក៏ទទួលប្រយោជន៍ពីការណែនាំពីគណៈអភិបាលនៃអ្នកចាស់ទុំដែលមានបទពិសោធន៍ ដែលផ្ដល់ការលើកទឹកចិត្តនឹងការណែនាំសម្រាប់ក្រុមជំនុំជាង១០០.០០០។ ក្នុងក្រុមជំនុំនីមួយៗ បុរសដែលមានគុណសម្បត្ដិគ្រប់គ្រាន់បម្រើជាអ្នកចាស់ទុំឬអ្នកត្រួតពិនិត្យ។ បុរសទាំងនេះថែទាំហ្វូងចៀមរបស់ព្រះ។—សូមអាន ពេត្រុសទី១ ៥:២, ៣
សាក្សីព្រះយេហូវ៉ាបានត្រូវរៀបចំដើម្បីផ្សព្វផ្សាយដំណឹងល្អនិងបង្រៀនមនុស្សឲ្យក្លាយទៅជាអ្នកកាន់តាមលោកយេស៊ូ។ ដើម្បីជួយមនុស្សគ្រប់ទីកន្លែង ពួកគេបកប្រែ បោះពុម្ព ហើយចែកសៀវភៅសម្រាប់សិក្សាគម្ពីរជាង៥០០ភាសា។ ដូចពួកសាវ័កដែរ ពួកគេផ្សព្វផ្សាយពីផ្ទះមួយទៅផ្ទះមួយ។ (សកម្មភាព ២០:២០) ពួកគេស្នើសុំសិក្សាដោយផ្ទាល់ជាមួយនឹងអ្នកដែលស្រឡាញ់ស្មោះចំពោះសេចក្ដីពិត។ ដោយហេតុថា រាស្ត្រព្រះយេហូវ៉ាផ្ដោតអារម្មណ៍ទៅលើការធ្វើឲ្យព្រះពេញចិត្ត និងការជួយអ្នកឯទៀត ពួកគេជាអង្គការមួយដែលសប្បាយរីករាយ។—សូមអាន ទំនុកតម្កើង ៣៣:១២; សកម្មភាព ២០:៣៥
ដើម្បីទទួលព័ត៌មានបន្ថែម សូមមើលជំពូកទី១៩នៃសៀវភៅនេះតើព្រះគម្ពីរពិតជាបង្រៀនយ៉ាងណា? ដែលបានត្រូវបោះពុម្ពផ្សាយដោយសាក្សីព្រះយេហូវ៉ា។
