តើមនុស្សជាច្រើនភ័យខ្លាចអ្វីខ្លះ?
តើមនុស្សជាច្រើនភ័យខ្លាចអ្វីខ្លះ?
«យើងមិនចាំបាច់ជាអ្នកកាន់សាសនាទេទើបគិតថា អនាគតមនុស្សជាតិឆ្ពោះទៅដល់សេចក្ដីអន្តរាយ»។—ស្ទេវិន អូលារី សាស្ដ្រាចារ្យពីសកលវិទ្យាល័យនៃរដ្ឋកាលីហ្វ័រញ៉ាខាងត្បូង *
តើលោកអ្នកយល់ស្របនឹងពាក្យសម្ដីរបស់សាស្ដ្រាចារ្យនេះឬទេ? អត្ថបទបន្តបន្ទាប់នឹងពិនិត្យមើលមូលហេតុខ្លះៗដែលមនុស្សភ័យខ្លាចចំពោះអនាគត។ ប៉ុន្តែអត្ថបទទាំងនេះក៏នឹងបញ្ជាក់ដែរនូវមូលហេតុដែលលោកអ្នកអាចមានទំនុកចិត្តថា ជីវិតទាំងឡាយនៅផែនដីនឹងមិនមានទីបញ្ចប់ទេ។ ទោះជាលោកអ្នកនឹងអានហេតុការណ៍ពិតដែលនឹងធ្វើឲ្យលោកអ្នកព្រួយបារម្ភក៏ដោយ តែមានមូលហេតុត្រឹមត្រូវឲ្យលោកអ្នកមានសុទិដ្ឋិនិយមអំពីអនាគត។
សង្គ្រាមនុយក្លេអ៊ែរនៅតែគំរាមកំហែងពិភពលោកយ៉ាងខ្លាំង។ នៅឆ្នាំ២០០៧ ព្រឹត្ដិបត្ររបស់អ្នកវិទ្យាសាស្ត្រផ្នែកបរមាណូបានព្រមានថា៖«ឥឡូវនេះអាចមានគ្រោះថ្នាក់ដែលពិភពលោកមិនបានប្រឈមមុខតាំងពីគេទម្លាក់គ្រាប់បែកបរមាណូជាលើកដំបូងនៅក្រុងហ៊ីរ៉ូស៊ីម៉ានិងណាកាសាគី[ក្នុងប្រទេសជប៉ុន]»។ (Bulletin of the Atomic Scientists) ហេតុអ្វីមានការព្រួយបារម្ភដូច្នេះ? ព្រឹត្ដិបត្រនោះបានរាយការណ៍ថា នៅឆ្នាំ២០០៧នៅមានអាវុធនុយក្លេអ៊ែរជាង២៧.០០០គ្រឿង ហើយក្នុងចំណោមអាវុធទាំងនោះមានអាវុធ២.០០០គ្រឿងដែលគេ«បម្រុងទុកសម្រាប់បាញ់ក្នុងតែពីរបីនាទីប៉ុណ្ណោះ»។ ប្រសិនបើគេធ្វើឲ្យអាវុធមួយចំនួនតូចទាំងនោះផ្ទុះក៏ដោយ ក៏នៅតែមានមហន្តរាយយ៉ាងធំដែរ!
តាំងពីពេលនោះមក តើការគំរាមកំហែងនៃសង្គ្រាមនុយក្លេអ៊ែរបានចុះថយឬទេ? សៀវភៅប្រចាំឆ្នាំ២០០៩នៃវិទ្យាស្ថាននៅក្រុងស្តុកខលសម្រាប់ស្រាវជ្រាវអំពីសន្ធិសញ្ញាអន្តរជាតិដើម្បីសន្ដិភាពបានរៀបរាប់ថា មហាអំណាចនុយក្លេអ៊ែរដែលលេចធ្លោជាងគេពោលគឺប្រទេសចិន បារាំង រូស៊ី រាជាណាចក្រអង់គ្លេស និងសហរដ្ឋអាម៉េរិក ប្រទេសទាំងនេះ«បានបម្រុងទុកអាវុធនុយក្លេអ៊ែរថ្មីៗ ឬបានប្រកាសប្រាប់ថាពួកគេមានបំណងធ្វើដូច្នេះ»។ (SIPRI Yearbook 2009) * ប៉ុន្តែ សៀវភៅប្រចាំឆ្នាំនោះអះអាងថាមិនមានតែប្រទេសទាំងប្រាំនោះប៉ុណ្ណោះទេដែលមានអាវុធនុយក្លេអ៊ែរ។ អ្នកស្រាវជ្រាវបានប៉ាន់ស្មានថាប្រទេសឥណ្ឌា ប៉ាគីស្ថាន និងប្រទេសអ៊ីស្រាអែលមានគ្រាប់បែកនុយក្លេអ៊ែរពី៦០ទៅ៨០គ្រឿង។ សៀវភៅប្រចាំឆ្នាំនោះក៏បានចែងទៀតថា ចំនួនសរុបនៃអាវុធនុយក្លេអ៊ែរនៅទូទាំងពិភពលោកគឺ៨.៣៩២គ្រឿង ដែលអាវុធទាំងនោះបានត្រូវទុកបម្រុងជាស្រេចសម្រាប់បាញ់!
ការប្រែប្រួលធាតុអាកាសនៃផែនដីនាំមកនូវមហន្តរាយ។ ព្រឹត្ដិបត្ររបស់អ្នកវិទ្យាសាស្ត្រផ្នែកបរមាណូដែលបានត្រូវរៀបរាប់ខាងលើនេះបានចែងថា៖ «គ្រោះថ្នាក់ដែលមកពីការប្រែប្រួលធាតុអាកាសគឺជិតស្មើនឹងគ្រោះថ្នាក់ដែលមកពីអាវុធនុយក្លេអ៊ែរ»។ (Bulletin of the Atomic Scientists) អ្នកវិទ្យាសាស្ត្រដែលគេគោរពដូចជាស្ទេវិន ហោឃីងដែលជាអតីតសាស្ដ្រាចារ្យនៅសកលវិទ្យាល័យខេមប្រីច និងម៉ាថិន រ៉ីសដែលជាប្រធាននៃមហាវិទ្យាល័យទ្រីនីធីនៃសកលវិទ្យាល័យខេមប្រីច ក៏បានព្រមានស្រដៀងគ្នានេះដែរ។ ពួកគេគិតថាការប្រើមិនត្រឹមត្រូវនូវបច្ចេកវិជ្ជា និងការប៉ះពាល់ដល់បរិស្ថានដោយសារសកម្មភាពរបស់មនុស្ស ប្រហែលនាំឲ្យជីវិតនៅផែនដីប្រែប្រួលជាអចិន្ត្រៃយ៍ ឬនាំឲ្យអារ្យធម៌សាបសូន្យទៅ។
ទំនាយអំពីអវសានកាលនៃពិភពលោកធ្វើឲ្យមនុស្សរាប់លាននាក់ព្រួយបារម្ភ។ ប្រសិនបើលោកអ្នកចុចពាក្យ«ទីបញ្ចប់នៃពិភពលោក» និងឆ្នាំ«២០១២»ក្នុងគេហទំព័រស្រាវជ្រាវមួយតាមអ៊ីនធឺណិត លោកអ្នកនឹងឃើញគេហទំព័ររាប់រយដែលប៉ាន់ស្មានអំពីទីបញ្ចប់នៅឆ្នាំនោះ។ ហេតុអ្វី? ពីព្រោះយោងទៅតាមប្រតិទិនបុរាណរបស់ជនជាតិម៉ាយ៉ា ដែលគេហៅថា«ការរាប់ដ៏វែង»មួយ បានគណនាថាចប់នៅឆ្នាំ២០១២។ មនុស្សជាច្រើនភ័យខ្លាចថានេះជាទីសម្គាល់ដែលបញ្ជាក់ពីទីបញ្ចប់នៃអារ្យធម៌ដែលមានសព្វថ្ងៃនេះ។
មនុស្សជាច្រើនដែលកាន់សាសនាជឿថា គម្ពីរបង្រៀនថាផែនដីនឹងត្រូវបំផ្លាញចោល។ ពួកគេមានអារម្មណ៍ថា ព្រះនឹងយកអ្នកជឿដ៏ស្មោះត្រង់ទៅស្ថានសួគ៌ ហើយទុកមនុស្សឯទៀតឲ្យរងទុក្ខនៅផែនដីដែលក្រឡាប់ចាក់ ឬទម្លាក់មនុស្សចូលទៅក្នុងស្ថាននរក។
តើគម្ពីរពិតជាចែងថាផែនដីនឹងត្រូវខូចខាតទាំងស្រុង ឬបំផ្លាញចោលឬទេ? សាវ័កយ៉ូហានបានព្រមានថា៖ «កុំជឿគ្រប់ទាំងបណ្ដាំដែលហាក់ដូចជាមកពីព្រះឡើយ។ ប៉ុន្តែ ចូរពិសោធមើលថា តើបណ្ដាំនោះមកពីព្រះឬមិនមែន»។ (យ៉ូហានទី១ ៤:១) ជាជាងជឿដោយងងឹតងងល់នូវអ្វីៗដែលអ្នកឯទៀតនិយាយ ជាការល្អឲ្យអ្នកបើកគម្ពីរ ហើយឃើញដោយផ្ទាល់ភ្នែកនូវអ្វីដែលគម្ពីរចែងអំពីទីបញ្ចប់នៃពិភពលោក។ អ្វីៗដែលគម្ពីរបង្រៀនប្រហែលជាធ្វើឲ្យលោកអ្នកភ្ញាក់ផ្អើលមែន!
[កំណត់សម្គាល់]
^ វគ្គ 2 ពីអត្ថបទ«សេចក្ដីអន្តរាយនៅពេលថ្មីៗនេះនាំឲ្យមនុស្សទាយអំពីអវសានកាលនៃពិភពលោក» បោះពុម្ពផ្សាយនៅថ្ងៃទី១៩ ខែតុលា ឆ្នាំ២០០៥ នៅគេហទំព័ររបស់MSNBC។
^ វគ្គ 5 សេចក្ដីរាយការណ៍ក្នុងសៀវភៅប្រចាំឆ្នាំ២០០៩នៃវិទ្យាស្ថាននៅក្រុងស្តុកខលសម្រាប់ស្រាវជ្រាវអំពីសន្ធិសញ្ញាអន្តរជាតិដើម្បីសន្ដិភាព (SIPRI Yearbook 2009) បានត្រូវនិពន្ធដោយបុគ្គលបីនាក់។ ទី១គឺសាណិន ខាល ដែលជាអ្នកស្រាវជ្រាវម្នាក់និងប្រធានផ្នែកគម្រោងអាវុធនុយក្លេអ៊ែរនៃកម្មវិធីរបស់SIPRIសម្រាប់ការគ្រប់គ្រងនិងទប់ស្កាត់អាវុធ។ ទីពីរគឺវីតាលី ហ្វេដេឆងខូ ជាអ្នកស្រាវជ្រាវម្នាក់ក្នុងកម្មវិធីរបស់SIPRIសម្រាប់ការគ្រប់គ្រងនិងទប់ស្កាត់អាវុធ។ ទី៣គឺហែន គ្រិស្ដិនសិន ជានាយកផ្នែកគម្រោងព័ត៌មាននុយក្លេអ៊ែរនៅសហព័ន្ធនៃអ្នកវិទ្យាសាស្ត្រទ្វីបអាម៉េរិក។
[អ្នកផ្ដល់សិទ្ធិឲ្យប្រើរូបភាពនៅទំព័រ៤]
Mushroom cloud: U.S. National Archives photo; hurricane photos: WHO/League of Red Cross and U.S. National Archives photo
