តើអ្នកចង់សួរព្រះអំពីអ្វី?
តើអ្នកចង់សួរព្រះអំពីអ្វី?
មនុស្សនៅជុំវិញផែនដី មានសំនួរសំខាន់ៗជាច្រើនអំពីជីវិត។ ចុះអ្នកវិញយ៉ាងណាដែរ?មនុស្សជាច្រើនបានសួរសំនួរដល់អ្នកបង្ហាត់បង្រៀនខាងសាសនា តែពុំបានទទួលចម្លើយដែលធ្វើឲ្យគេគាប់ចិត្តនោះទេ។ មនុស្សឯទៀតបានសញ្ជឹងគិតអំពីសំនួរទាំងនេះដោយខ្លួនឯង។ មនុស្សខ្លះបានអធិស្ឋានរកការណែនាំ។ តើអ្នកពិតជាមានលទ្ធភាពអាចទទួលចម្លើយពីព្រះអំពីរឿងផ្សេងៗដែលធ្វើឲ្យអ្នកមានអំពល់ឬទេ?ក្នុងចំណោមសំនួរទាំងប៉ុន្មានដែលមនុស្សជាច្រើនបានមានប្រសាសន៍ថាគេចង់សួរព្រះ គឺមានដូចតទៅ៖
ឱព្រះអង្គអើយ! តើទ្រង់ពិតជាអ្នកណា?
ទស្សនៈដែលមនុស្សមានអំពីព្រះ បានទទួលអានុភាពពីទំនៀមទំលាប់ ពីសាសនារបស់មាតាបិតាគេ និងប្រហែលជាគេសម្រេចចិត្តជ្រើសរើសដោយខ្លួនឯង។ មនុស្សខ្លះប្រើព្រះនាមមួយសំរាប់ព្រះ ហើយអ្នកខ្លះទៀតហៅទ្រង់ជាព្រះតែម្ដង។ តើរឿងនេះពិតជាសំខាន់ឬទេ? តើមានព្រះដ៏ពិតតែមួយអង្គ ដែលប្រាប់យើងនូវអត្តសញ្ញាណនិងព្រះនាមរបស់ទ្រង់ឬទេ?
ហេតុអ្វីក៏មានទុក្ខវេទនាច្រើនម្ល៉េះ?
ប្រសិនបើការឥតបើគិតឬការប្រព្រឹត្តអំពើអសីលធម៌ ធ្វើឲ្យមានបញ្ហាដល់សុខភាព ឬក៏ធ្វើឲ្យមនុស្សម្នាក់ចុះក្រ គាត់ប្រហែលជាត្អូញត្អែរថាស្ថានការណ៍របស់គាត់គឺមិនល្អទេ។ ប៉ុន្តែ គាត់ប្រហែលជាដឹងនូវមូលហេតុដែលគាត់រងទុក្ខវេទនានោះដែរ។
ប៉ុន្តែ មនុស្សជាច្រើនបានរងទុក្ខវេទនាយ៉ាងខ្លាំង មិនមែនដោយកំហុសរបស់គេទេ។ អ្នកខ្លះមានជំងឺដង្កាត់ដ៏ធ្ងន់ធ្ងររ៉ាំរ៉ៃ។ អ្នកខ្លះទៀតប្រឈមមុខនឹងឧបសគ្គដែលហាក់ដូចជាមិនអាចពុះពារបាន ដើម្បីឲ្យមានកន្លែងរស់នៅ និងអាហារគ្រប់គ្រាន់សំរាប់ក្រុមគ្រួសាររបស់គេ។ មនុស្សរាប់សិបលាននាក់គឺជាអ្នករងគ្រោះដោយបទឧក្រិដ្ឋ សង្គ្រាម អំពើឃោរឃៅដែលមានជាទូទៅ មហន្តរាយធម្មជាតិ ឬភាពអយុត្ដិធម៌ដែលបណ្ដាលមកពីអាជ្ញាធរ។
ជាការគួរឲ្យយល់មែន ដែលមនុស្សជាច្រើនសួរថា៖ ‹ហេតុអ្វីក៏ស្ថានភាពបែបនេះទៅជាមានពាសពេញដូច្នេះ? ហេតុអ្វីក៏ព្រះអនុញ្ញាតឲ្យមានសេចក្ដីទុក្ខវេទនាទាំងនេះ?›។
ហេតុអ្វីខ្ញុំមានជីវិតរស់នៅ? តើអ្វីជាគោលបំណងនៃជីវិត?
សំនួរទាំងនេះធម្មតាគឺផុសឡើងដោយសារមនុស្សម្នាក់មានចិត្តអន្ទះអន្ទែង ពីព្រោះកិច្ចការដែលគេប្រព្រឹត្តរៀងរាល់ថ្ងៃឥតនាំឲ្យមានការគាប់ចិត្តដ៏ពិតនោះទេ។ មនុស្សជាច្រើនមានអារម្មណ៍បែបនេះមែន។ មនុស្សរាប់សិបលាននាក់ទៀតជឿថា វិថីជីវិតរបស់បុគ្គលម្នាក់គឺបានកំណត់ទុកដោយព្រះ។ តើពិតជាដូច្នេះឬទេ? ប្រសិនបើព្រះប្រាកដជាមានគោលបំណងដ៏ពិសេសសំរាប់អ្នក អ្នកច្បាស់ជាចង់ដឹងណាស់ មែនទេ?
ក្នុងចំណោមគ្រប់សៀវភៅទាំងអស់ក្នុងពិភពលោកនេះ គឺមានសៀវភៅមួយដែលចែងយ៉ាងច្បាស់ថា ត្រូវបានព្រះបណ្ដាលឲ្យតែង។ ហើយជាសារដែលពិតជាមកពីព្រះសំរាប់មនុស្សទាំងអស់ សៀវភៅនេះមានច្រើនភាសាជាងសៀវភៅឯទៀតឆ្ងាយណាស់។ សៀវភៅនេះគឺព្រះគម្ពីរបរិសុទ្ធ។ នៅក្នុងសៀវភៅនេះ ព្រះដែលបង្កើតផ្ទៃមេឃនិងផែនដី ទ្រង់បង្ហាញថាទ្រង់ជាអ្នកណា ហើយព្រះនាមទ្រង់ជាអ្វី។ តើអ្នកស្គាល់ព្រះនាមទ្រង់ជាអ្វីទេ? តើអ្នកដឹងថាព្រះគម្ពីរចែងថាព្រះទ្រង់ជាបុគ្គលបែបណាឬទេ? តើអ្នកដឹងថាព្រះគម្ពីរចែងថាព្រះតម្រូវអ្វីពីអ្នកឬទេ?
[អ្នកផ្ដល់សិទ្ធិឲ្យប្រើរូបភាពនៅទំព័រ២]
COVER: Chad Ehlers/Index Stock Photography
[អ្នកផ្ដល់សិទ្ធិឲ្យប្រើរូបភាពនៅទំព័រ៣]
Mountain: Chad Ehlers/Index Stock Photography