ព្រះឲ្យពរដល់អ្នកដែលជួយមនុស្សឯទៀត
មនុស្សជាច្រើនក្នុងពិភពលោករស់នៅដោយខ្វះអាហារនិងទីជម្រក។ អ្នកខ្លះរស់នៅដោយគ្រាន់តែសង្ឃឹមលើអនាគតប៉ុណ្ណោះ។ ព្រះពេញចិត្តពេលយើងជួយអ្នកឯទៀត ហើយលោកនឹងឲ្យពរដល់យើង។
អ្វីដែលគម្ពីរបរិសុទ្ធចែង
«អ្នកណាដែលមានចិត្តអាណិតចែកដល់ពួកទាល់ក្រ នោះឈ្មោះថាថ្វាយឲ្យព្រះយេហូវ៉ាខ្ចី ទ្រង់នឹងតបស្នងសងគុណអ្នកនោះវិញ»។—សុភាសិត ១៩:១៧
តើការជួយអ្នកឯទៀតមានន័យយ៉ាងណា?
លោកយេស៊ូបានលើកឧទាហរណ៍អំពីបុរសម្នាក់ដែលបានត្រូវចោរប្លន់ ហើយបានត្រូវទុកចោលឲ្យដេកស្លាប់នៅតាមផ្លូវ។ (លូកា ១០:២៩-៣៧) មានមនុស្សម្នាក់បានឈប់ ហើយជួយបុរសនោះ ទោះជាគាត់មានជាតិសាសន៍ផ្សេងពីគ្នាក៏ដោយ។
បុរសចិត្តល្អនេះមិនត្រឹមតែដាក់ថ្នាំនិងរុំរបួសឲ្យបុរសនោះប៉ុណ្ណោះទេ តែគាត់ក៏បាននាំបុរសនោះទៅផ្ទះសំណាក់ដើម្បីសម្រាកព្យាបាលរបួសរបស់គាត់ដែរ។
តើយើងរៀនអ្វីពីឧទាហរណ៍នេះ? លោកយេស៊ូបង្ហាញថា យើងគួរជួយអ្នកដែលត្រូវការជំនួយ។ (សុភាសិត ១៤:៣១) គម្ពីរបរិសុទ្ធបង្រៀនថា ព្រះនឹងបំបាត់ចោលភាពក្រីក្រនិងទុក្ខវេទនាមិនឲ្យមានទៀត។ យើងប្រហែលឆ្ងល់ថា តើលោកនឹងធ្វើដូច្នោះតាមរបៀបណា ហើយពេលណា? អត្ថបទក្រោយនឹងពិភាក្សាអំពីពរដែលព្រះបានត្រៀមទុកសម្រាប់អ្នក។
