Timuutiusimut 2. 4:1-22
4 Guutip Kristusillu Jiisusip, inuusunik toqusunillu Kunngeqarfimmini kunngisut eqqartuussiumalluni saqqummertussap, saavanni ilumoorlunga peqquakkit:
2 Oqaaseq ulluni atugarissaarfiusuni erloqinartorsiorfiusunilu aallussilluarlutit oqaluussissutigiuaruk. Ilinniartitsilluarnikkut naammagittangaarlutit oqaaqqissaarisarit, sukannersumik mianersoqqusisarit kajumissaarisarlutillu.
3 Ullummi ilinniartitsissummik ineriartornartumik* tusarumanngiffiusut nalliukkumaarput. Inuit piumasamittut iliorlutik ilinniartitsisunik tusarusutaminnik ilinniartitsisartunik ujartuisalissapput.
4 Ilumoortoq tusarnaarunnaarlugu oqaluttuanut ilumuunngitsunut tusarnaalissapput.
5 Illilli tamatigut silatusaartassaatit, erloqinermi pinertusaartassaatit, iivangkiiliulersaartutut suliuassaatit* peqqissaarlutillu kiffartussallutit.
6 Viinnisummi pilliutissatut kuineqareerpunga, qanittukkullu iperagaassaanga.
7 Ajunngitsoq sorsuutigisimavara, arpaliunneq naammassivara, uppertuarsimavunga.
8 Maannamiit naapertuilluartuutitaasutut Naalakkamit, eqqartuussisumit naapertuilluartumit, niaqoruserneqarnissara utaqqivara. Ulloq nalliuppat uanga taama akissarsisiinnarnanga saqqummernissaminut qilanaartut tamaasa akissarsisissavai.
9 Sapinngisannik ornipallanniarsarissavarma.
10 Demassimmi nalitsinni pissutsit* nuannarigamigit* qimallunga Tessaluunikamut aallarpoq, Kreskensi Galaatiamut Tittusilu Dalmaatiamut.
11 Lukkarsip kisimi najorpaanga. Makkorsip kiffartornermi ikiungaartarmanga ilagalugu ornissavarma.
12 Tykikorsili Efesossimut aallartippara.
13 Uliguaq Troassimi Kaapusikkunni qimatara allakkallu imusat, pingaartumik pergamentit,* nassarigit.
14 Kanngussammik saffiuup Alexanderip ajorluinnartumik pivaanga. Iliuutsini naapertorlugit Jehovamit pillarneqarumaarpoq.
15 Tusarliussatsinnut akerlilersuingaartuummat aamma illit mianersorfigissavat.
16 Eqqartuussivimmi siullermeerlunga imminut illersorama kialuunniit tapersersoriartunngilaanga, tamarmilli qimappaannga. Neriuppunga Guutimit akisussaatinneqassanngitsut.
17 Naalakkalli najorpaanga, aamma oqaluussilluarniassagama inuiaqatigiillu tamarmik tusarlerneqarniassammata pissatsippaanga. Løvillu qarnanit annaanneqarpunga.
18 Naalakkap ajortunit tamanit annaatissavaanga Kunngeqarfimminullu qilammiittumut pisillunga aniguisissallunga. Taanna qaqugorsuarmut kipisuitsumillu ataqqinarsisinneqarli. Amen.
19 Priska Akviilalu aamma Oniisifoorusip illuaniittut inuulluaqqutikkigit.
20 Erastusi Korintimiiginnarpoq, Trufiimusili napparsimammat Miletimi qimappara.
21 Ukiortinnagu sapinngisannik orninniarsarissavarma.
Eubulusi, Puudensi, Liinusi, Claudia qatanngutillu tamarmik inuulluaqqusipput.
22 Qanortoq eqqortumik isiginnittaaseqarnerit pissutigalugu Naalakkap najorilisit. Ajunngisaangaarnerata najorilisi.
Ilanngussat
^ Imalt.: “peqqissinartumik; iluaqutaasumik”.
^ Imalt.: “nutaarsiassat nuannersut oqaluussissutigiuassavatit”.
^ Nassuiaatit takukkit.
^ Nutsiinn.: “asagamigit”.
^ Tassa allakkat imusat amiusut.
