Nukappiarannguaq assilissami takuuk. Kiserliorpasillunilu erserpasippoq, ilaa? Illimmi, taamatut misiginikuuit? — Tamatta ilaannikkut taamatut misigisarpugut. Aamma Biibilimi Jehovamut ikinngutaasut ersillutillu kiserliortutut misigisartut oqaluttuarineqarput. Taakkua ilagaat Elia. Elia pillugu paasisaqariarta.

Itsaq Jiisusi suli inunngunngitsoq Elia Israelimi inuuvoq. Akabi taamani Israelimi kunngiuvoq Jehovamik pallorfiginninngitsoq. Akabip nuliatalu Jezabelip Guuti ilumoortoq pallorfiginagu guutipiluk Ba’ali pallorfigaat. Taamaattumik Israelimiut amerlanersaasa Ba’ali pallorfigilerpaat. Dronningi Jezabeli ajortorujussuuvoq. Elia Jehovamillu pallorfiginnittut allat tamaasa toqutsikkusuppai! Nalunngiliuk Elia qanoq iliortoq? —

Elia qimaarsuataarpoq! Inoqajuitsumukarpoq ungasissumut tassanilu qaarusummi  toqqorluni. Sooq taamaaliorsoraajuk? — Aap, ersigami. Kisianni Elia ersisariaqanngilaq. Nalunnginnamiummi Jehovap ikiorsinnaagaani. Eliap siornatigut takoreerpaa Jehova qanoq pissaaneqartigisoq. Ilaanni Jehovap Eliap qinnutaa akisimavaa inneq qilammeersoq pilersillugu. Taamaammat soorunami Jehovap Elia ikioqqissinnaavaa!

Elia qaarusummiittoq Jehovap oqaluuppaa aperalugulu: ‘Tamaani suit?’ Elia isumaqarpoq Jehovamik pallorfiginnittut allat tamarmik toqunneqartut. Taamaattumillu Jehova ima akivaa: ‘Uanga kisiartaallunga suli pallorfigivakkit. Toqunniarneqarama ersivunga kisimiillungalu.’ Kisianni Jehovap Elia ima oqarfigaa: ‘Naamik, kisimiinngilatit. Uannik suli pallorfiginnittut 7000-iupput. Sapiitsuugit, suli suliassaqartippakkit!’ Isumaqarpit Elia taamatut oqarfigineqarami nuannaalersoq? —

Elia pillugu oqaluttuaq qanoq ilinniarfigisinnaaviuk? — Ersisariaqarnallu kiserliortutut misiginngisaannassaatit. Jehovamik ilinnillu asannittunik ikinnguteqarputit. Aamma Jehova pissaaneqangaarpoq, tamatigullu ikiorumaarpaatit! Jehovap tamatigut najorumaaraatit nuannaarutigaajuk? —