PAULUSIP kristumiunngorami Guutip naalagaaffianik nutaarsiassaq nuannersoq piumassuseqaqaluni oqaluussissutigaa, tamannalu pissutigalugu maanna — nammineq akerlilersuisuusimasoq taanna — peqqarniitsumik akerlilersorneqarpoq. Apustili qasusuitsoq taanna arlaleriarluni ungasissumut angalavoq Guutip naalagaaffianik, Guutip inuiannut aallaqqaammulli siunertaanik naammassinnittussamik, nutaarsiassaq nuannersoq oqaluussissutiginiarlugu.

Paulusip oqaluussiartorluni angalaqqaarnermini Lystramiitilluni angut inunnguutsiminit nukillaarsimasoq ajorunnaarsippaa. Inuit suaartalerput Paulusi angalaqataalu Barnaba guutiunerarlugit. Angutit marluk taakkua inuit imminnut pilliiumasut unitseqqarpaat. Paulusimulli akeraasunit sunnerneqarlutik inuit taakkua Paulusi ujaqqanik milloorpaat toqusimasorileramikkulu qimallugu. Paulusip saassunneqarnini anigorpaa kingusinnerusukkullu illoqarfimmut tamatumunnga uterluni ajoqersukkat nakussatsinniarlugit kajumissaarniarlugillu.

Kristumiut juutiusut ilaat uppertut juutiunngitsut Mosesip inatsisaasa ilaannik maleruaasariaqarnerarlugit tunngavilersuipput. Paulusip isumaqatigiinngissutigineqartoq apustilinut utoqqaanertanullu Jerusalemimiittunut saqqummiuppaa. Angutit taakku Allakkani Illernartuni allassimasunik eqqarsaatiginnilluareerlutik Guutillu anersaavanit siulersorneqarlutik ilagiit allaffigaat oqaaqqissaarlugillu guutipilussioqqunagit, aammik aaverneqarsimanngitsullu neqaanik nereqqunagit kinguaassiuutitigullu inuunerloqqunagit. Peqqussutit taakku ‘pisariaqarput’, taakkuninngali maleruaajumalluni Mosesip inatsisaanik malinninnissaq pisariaqanngilaq. — Apustilit Suliaat 15:28, 29.

Paulusi aappassaanik oqaluussiartorluni angalanermini Berøamut, maanna Grækenlandiusumut, tikeraarpoq. Juutit taavanimiut oqaaseq kajumeqalutik ilassivaat, ullut tamaasa Allakkat Illernartut misissortarlugit ilinniartitsissutigisai ilumut taamaannersut paasiniartarlugu. Aamma taavani akerlilersorneqarnini pissutigalugu ingerlaqqittariaqarpoq, matumuuna Athenimut. Paulusi Athenimiunut ilinniarluarsimasunut sunniuteqarluartumik oqalugiarpoq periaaserinnermut, naliliisinnaassuseqarnermut oqalulluarnermullu tunngatillugu maligassaalluartumik.

Pingajussaanik oqaluussiartorluni angalanermi kingorna Paulusi Jerusalemiliarpoq. Naalaffimmiitillugu juutit ilaat uivertorsuanngorput taanna toqukkusullugu. Romamiut sakkutuui akuliupput Paulusilu killisiorlugu. Romami ilasiaagami, kingusinnerusukkut Romamiut naalagaatitaannut Feliximut imminut illersorpoq. Juutit Paulusimik unnerluutiginnissutitik uppernarsarsinnaanngilaat. Paulusip juutinut pisinneqaqqunani Festusi, Romamiut naalagaatitaat alla, ima oqarfigaa: “Kaasarimut suliassanngortippunga!” Festusilu akivoq: “Kaasarimut pissaatit.” — Apustilit Suliaat 25:11, 12.

Paulusi umiarsuarmik Italialiaanneqarpoq eqqartuussisunut sassartinneqassalluni. Angalanerminni tamatumani umiugamik qeqertami Maltami ukiisariaqarpoq. Kiisami Romamut apuukkami ukiuni marlunni illumi attartukkamiippoq. Apustili aallussilluartuartoq sakkutuunit nakkutigineqaraluarluni pulaartuni tamaasa Guutip naalagaaffia pillugu oqaluussiffigiuarpai.

— Tunngavigineqartut: Apustilit Suliaat 11:22–28:31.