Aaperaat — angut maniguuttoq

Aaperaap ullup kiatseruttornerani tupermi isaariaani alanngumiinnini iluarusuutigaa. Niaqqi massisikkamiuk takulerpai angutit pingasut takunikuunngisani ungasissumit aggersut. * Takugamigit ingerlaannaq arpalluni parsiarpai, tikikkamigillu qasuersaarniassammata neriniassammatalu alanngeqqullugit kimigiiserfigai. “Nerisassaminernik” tuneriarlugit, ingerlaannaq iffiamik qalarlaamik, punnermik, immummik neqimillu aqinnersiukkamik nerisassiuutilerpai. Aaperaap tikeraat sassaallerfigigamigit inoroorsaarnerujussuarmik ersersitsiinnarnani aamma maniguunnermik ilumoortumik ersersitsivoq. — 1 Mosesi 18:1-8.

MANIGUUNNEQ SUUA? Tassaavoq makitasuujunerup pingaakujuttuunerullu akerlia. Maniguuttup nassuerutigisarpaa inuit allat arlaatigut imminit pingaarnerusut. (Filippimiut 2:3) Allat siunnersuutaannik tusaaniartarpoq allaallu suliassat inuit allat iluaqutigisassaat nakernaatsut suliariumasarlugit.

MANIGUUNNINI QANOQ ERSERSIPPAA? Aaperaap nuannaarluni allat kiffartuuttarpai. Eqqaaneqareersutut tikeraat pingasut takugamigit isumagipallappai. Nulia Sara ingerlaannaq nerisassiulerpoq. Malugiulli nerisassiornermi aamma kina iliuuseqartuusoq: Tikeraanik parsiaasoq tassaavoq Aaperaat, taannaavoq nerisassanik neqeroortuusoq, taannaavoq arpalluni nersutaatit ilaannik toqutassamik toqqaasoq, taannaavorlu tikeraanut nerisassiaminnik sassaalliisoq. Angutip maniguuttup taassuma suliassat tamaasa kiffaminut suliassiissutiginagit suliassat ilaat nammineq suliarai. Isumaqanngilaq allanik kiffartuussinissaminut pingaarpallaarluni.

Aaperaap oqartussaaffigisami siunnersuutaat tusarnaartarpai. Aaperaap Sarallu oqaloqatigiinneri ikittuinnaat Biibilimi oqaluttuarineqarput. Oqaluttuanili marlunni erserpoq Aaperaap Sara tusarnaariarlugu isumaa naapertorlugu iliuuseqartoq. (1 Mosesi 16:2; 21:8-14) Oqaluttuat taakku aappaanni allassimavoq Sarap siunnersuutaa  aallaqqaammut ‘Aaperaap ajuusaarutigeqigaa’. Jehovalli Sarap siunnersuutaa pitsaanerarlugu oqaloqatigereermani Aaperaat maniguulluni akuersiinnarpoq siunnersuullu malillugu iliuuseqarluni.

SUNIK ILINNIARFIGISINNAAVARPUT? Ilumoorluta maniguuttuugutta nuannaarluta allat kiffartuutissavavut. Allat inuunerat ilorrisimaarnarnerulersinniarlugu iliuuserisarput sunaluunniit nuannaarutigissavarput.

Aamma maniguuttuulluta ersersissinnaavarput allat siunnersuutaannut tusarnaariaasitsigut. Eqqarsaat uagut nammineq isumassarsiarinnginnerinnaa pissutigalugu itigartinnagu allat oqaaserisaat tusarnaarutsigik silatusaassaagut. (Ussatit 15:22) Taamatut ammasumik isiginnittaaseqarneq ingammik allanut oqartussaaffillit iluaqutigisinnaavaat. “Paasisimavara nakkutilliisuulluartoq toqqissisimalersitsisartoq inuit uummammiugisaminnik oqaatiginnissinnaalersillugit,” sulisunik nakkutilliisoq misilittagaqarluartoq Johnimik atilik oqarpoq. Ima nangippoq: “Maniguuttuusariaqarpoq sulisut nakkutigisat suleriaatsimik ajunnginnerusumik isumassarsisinnaasut nassuerutigissagaanni. Kinaluunniit — aamma nakkutilliisoq — isumassarsiatsialannik isumassarsisutuaasinnaanngilaq.”

Allat siunnersuutaannik tusaaniartarnikkut suliassanillu allat iluaqutigisassaannik pissanganannginnerusunik suliaqarnikkut Aaperaat ilaaraangatsigu Jehovap iluarisaatut iliortarpugut. Biibilimimi ima allassimavoq: “Guutip makitasuut akerartorpai, qanilaartulli saammaattarpai.” — 1 Petrusi 5:5.

[Quppernerup ataani ilanngussaq]