Jehovamit ilisarisimaneqarpit?

“[Jehovap] pigisani ilisimavai.” — 2 TIMOTHEUSI 2:19.

1, 2. (a) Jiisusi sunik ulapputeqarpa? (b) Apeqqutit suut eqqarsaatigisariaqarpavut?

ILAANNI farisiiarip Jiisusi saaffigaa aperalugulu: “Inassut suna inatsisini annerua?” Jiisusi akivoq: ‘Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ (Matthæusi 22:35-37) Jiisusi Jehovamut asanningaarpoq. Aammattaaq Jiisusip inooriaatsimigut ersersippaa Jehovamit qanoq isigineqarnini eqqarsaatigalugu. Taamaattumik Jiisusip toqussi sioqqullugu nalunaarsinnaasimavoq Guutip aalajaalluni inassutaanik malinnittutut ilisarisimagaani, ima oqarluni: “Ataatama inassutai maleruarikka asannissusianiittuarlungalu.” — Johannesi 15:10.

² Ullumikkut amerlaqaat Guutimik asanninneraasut. Soorunami uagut aamma Guuti asavarput. Tassungali atatillugu apeqqutit pingaaruteqartut uku eqqarsaatigeqqissaartariaqarpavut: ‘Guutimit ilisimaneqarpunga, imaluunniit ilisarisimaneqarpunga? Qanoq Jehovap isigaanga? Guutimit pigineqartutut ilisarisimaneqarpunga?’ (2 Timotheusi 2:19) Eqqarsaatigiuk qanoq tupinnartigisoq silarsuarmi kinaassusilik pingaarnerpaajusoq qanimut ilisarisimalluarsinnaallugu.

3. Sooq inuit ilaat Jehovamit pigineqarsinnaasorinngillat, taamatullu eqqarsartaaseqarnaveersaarnissamut suna iluaqutigissavarput?

³ Jehovamilli asannikkaluartulluunniit Guutimut ikinngutaasinnaanertik upperiuminaatsittarpaat. Ilaat imminut ajukkuttarput, taamaattumillu Jehovamit pigineqarsinnaasorinngillat. Nuanneqaaq nalunagu Jehovap uagutsinnut allatorluinnaq isiginnittaaseqarnera. (1 Samueli 16:7) Apustilip Paulusip uppeqatini kristumiut ima allaffigai: “Kinaluunniit Guutimik asannittoq taassumannga ilisimaneqarpoq.” (1 Korinthimiut 8:3) Guutimit ilisimaneqarumaguit, imaluunniit ilisarisimaneqarumaguit, taassuminnga asanninnissat pingaaruteqartupilussuuvoq. Makku eqqarsaatigeriakkit: Sooq atuagassiaq una atuartarpiuk? Sooq uummatikkut tarnikkullu isumakkullu iluunngarlutit nukitillu tamakkerlugit Jehovamut kiffartorniarlutit ilungersorpit? Inuunerit Jehovamut tunniulluinnarsimagukku kuisissimaguillu, sooq taamaaliorniarlutit aalajangerpit? Biibilimi allassimavoq Jehovap inuit qanoq uummammioqarnersut nalunngikkaa inuillu ‘erlinnangaartutut’ isigisani imminut ‘kajungilersittarai’, imaluunniit ikinngutigiumasarai. (Haggaji 2:7, NV; atuaruk  Johannesi 6:44). Taamaattumik Jehovamut kiffartorputit taassuma kajungilersissimammatit. Taassuma imminut kajungilersissimasani aalajaattuarpata imminiiginnanngisaannassavai. Guutip taakku erlinnangaartutut isigai, aamma asasupilussuuai. — Tussiaat 94:14.

4. Sooq Jehovamut ikinngutaanitta qanoq erlinnartiginera eqqaamajuartariaqarparput?

⁴ Jehovamit kajungilersinneqarsimagatta taassuma asanninneraniittuarnissarput sulissutigiuartariaqarparput. (Atuakkit Judasi 20, 21). Eqqaamajuk Biibilimi ersersinneqartoq Guutimit qimagukkiartuaartoqarsinnaasoq imaluunniit allaat taassuminnga tunussisoqarsinnaasoq. (Hebræerit 2:1; 3:12, 13) Assersuutigalugu apustilip Paulusip Timotheusimik allakkat aappaanni 2:19-imi allassimasut allanngitsiarlugit Hymenæusi Filetusilu eqqaavai. Angutit marluk taakku Jehovamut kiffartortuusimassapput kingusinnerusukkut sallusuissummiikkunnaarsimasut. (2 Timotheusi 2:16-18) Jehovamut ikinngutaanitta  qanoq erlinnartiginera eqqaamajuartariaqarparput.

5. (a) Pissuserineqartussat suut Guutip iluarai? (b) Suut maanna sammissavavut?

⁵ Jehovamit ilisarisimaneqarumagutta pissuserineqartussat aalajangersimasut pissuserisariaqarpavut. (Tussiaat 15:1-5; 1 Petrusi 3:4) Pissuserisariaqakkatsinnut ilaapput upperneq maniguunnerlu. Angutit marluk upperlutillu maniguunnertik pissutigalugu Jehovamit asaneqartut maligassiaat sammissavavut. Aamma angut makitasuujunini pissutigalugu Guutimit ajattorneqartoq pillugu misissuissaagut. Taakkua oqaluttuarineqarnerannik misissuinerput paasisaqarfigilluarsinnaavarput.

Uppissusilinnut Ataataasoq

6. (a) Aaperaap Jehovap neriorsuutaanik upperinninnini qanoq ersersippaa? (b) Jehovap Guutip Aaperaat qanoq isigaa?

⁶ Aaperaat Jehovamut ‘uppertuuvoq’. Allaat ‘uppertunut tamanut ataataasumik’ taaneqarpoq. (1 Mosesi 15:6; Romamiut 4:11) Aaperaat uppernini pissutigalugu nunamut ungasissumiittumukarumalluni angerlarsimaffimmi, ikinngutimi, suliffimmi pigisamilu qimannissaannut piumassuseqarpoq. (1 Mosesi 12:1-4; Hebræerit 11:8-10) Aaperaat upperluartuarpoq. Upperluartuunera erseqqissivoq Jehovamit ernerminik Iisaamik pilliutiginneqquneqarami naalammat. (Hebræerit 11:17-19) Aaperaat Jehovap neriorsuutaanik upperinninnerminik ersersitsivoq, taamaattumillu Guutip taanna immikkut ittutut isigaa. Ikinngutimisut asavaa. — Atuakkit Jaaku 2:22, 23.

7. Aaperaap Jehovap neriorsuutaanut tunngatillugu suna nalunngilaa, tamatuminngalu upperinninnini qanoq ersersippaa?

⁷ Jehovap Aaperaat neriorsorpaa taassuma kinguaavi akeqqamik ‘isaaffiinik tiguaassasut’ “sioqqatullu sissamiittutut” amerlatigilerumaartut. (1 Mosesi 22:17, 18) Neriorsuutit taakku inuunermi nalaani eqquutiginngikkaluartut Aaperaat Jehovamut upperluartuarpoq. Nalunngilaa Guutip neriorsuutai tamatigut eqquuttartut, tamatuminngalu upperinninnera inooriaasiani erserpoq. (Atuaruk Hebræerit 11:13). Uagut Aaperaap upperneratut uppissuseqartutut Jehovamit ilisimaneqarpugut?

Uppernerit ersersiguk Jehovap iliuuseqarnissaa utaqqillugu

8. Inuit amerlanersaat sunik kissaatigingaagaqartarpat?

⁸ Imaassinnaavoq arlaannik kissaatigingaagaqartugut. Aappartaarusunneq, meerartaarusunneq peqqissoorusunnerlu nalinginnaalluinnarput. Ilarpassuattali kissaatigisatik pinngitsoorsinnaavaat. Kissaatigingaagarput massakkut pisinnaanngikkutsigu qanoq iliussaagut? Pissutsini taama ittuni iliuutsivut qanoq upperluartiginitsinnut ersiutaasinnaapput.

9, 10. (a) Inuit ilaat piumasatik perusullugit susimappat? (b) Jehovap neriorsuutiminik eqquutsitseriaasia pillugu qanoq misigivit?

 ⁹ Guutip siulersuineranut naapertuutinngitsumik iliuuseqarluni kissaatigisanik piniarsarineq sianiilliornerussaaq. Taamaaliorneq Jehovamut ikinngutaajunnaassutigisinnaavarput. Assersuutigalugu ilaat aalajangersimapput najoqqutassianut Biibilimiittunut naapertuutinngitsumik katsorsartinniarlutik. Allat ilaquttaminnut ilagiilluunniit ataatsimiinnerinut najuunnissaminnut piffissaarussutigisaminnik suliffittaarsimapput. Ilaat Jehovamut kiffartunngitsumik asannilersoorfiginnillutik sammisaqalertarput. Kristumiu taama iliorpat, taava oqartoqarsinnaava Jehovamit ilisarisimaneqarumalluni ilumut iliuuseqartoq? Jehova qanoq misigisimassagaluarpa Aaperaat imminut neriorsuutigineqartunut tunngatillugu utaqqisinnaajunnaarsimasuuppat? Aaperaammi Jehovap iliuuseqarnissaa utaqqinagu ilorrisimaarnartumik inuujumalluni tusaamasaalerumallunilu nammineq iliuuseqarniarsarisimasuuppat? (Naleqqiuguk 1 Mosesi 11:4) Jehovamit ilisarisimaneqartuarlunilu iluarisaajuarsimassagaluarpa?

¹⁰ Illit sunik kissaatigingaagaqarpit? Jehovap kissaatigisannik ilinnut tunniussinissaata utaqqinissaanut naammattumik uppissuseqarpit? Taanna neriorsuivoq ‘pinngortitat tamaasa kissaatigisaannik’ tuniumaarlugit. (Tussiaat 145:16) Imaassinnaavoq Jehovap neriorsuutaasa ilaat kissaatigisatsitut eqquutiaartiginngitsut. Aaperaap upperneratut uppissuseqarnitsinnik ersersitsisumik inooriaaseqartuarutta Jehovap puiornavianngilaatigut. Akissarsisikkumaarpaatigut. — Hebræerit 11:6.

Maniguunnerup makitanerullu assigiinngissutaat

11. Kora sunik immikkut pisinnaatitaaffeqarsimasinnaava, tamannalu taassuma Guutimut isiginnittaasia pillugu suna erserpa?

¹¹ Mosesi Koralu assigiinngilluinnarput Jehovap aaqqissuussaanik aalajangigaanillu ataqqinninneq eqqarsaatigalugu. Taakkua iliuusii Jehovap taakkununnga isiginnittaasianut aalajangiisuupput. Kora Levikkuuvoq Kehatimut kinguaajusoq. Taassuma Jehovap Israelikkut Immakkut Aappalaartukkut aniguisinniarlugit iliuuserisimasai takusimagunarpai. Aamma Jehovap qaqqap Sinajip eqqaani Israelikkunnut naalasseriitsunut eqqartuussutaanik naammassinneqataasimagunarpoq, aamma angerutsip illerfianik akiaqataasarsimagunarpoq. (2 Mosesi 32:26-29; 4 Mosesi 3:30, 31) Qularnanngitsumik ukiorpassuarni Jehovamik ilumoorfiginnittuusimavoq, taamaattumillu Israelikkut ilarpassuinit ataqqisaasimagunarpoq.

12. Kora makitanini pissutigalugu sugami Guutimut attaveqarunnaarpa?

¹² Nunalli neriorsuutigisap tungaanukartillutik Korap Jehovap Israelikkunnik siulersueriaasia isornartoqartilerpaa. Allannguerusulerpoq. Taava angutit 250-it allat Koramut ilaliupput. Qularatik isumaqarput Jehovamit ilisarisimaneqarlutillu akuerisaallutik. Taakkua Mosesi Aronilu ima oqarfigaat: “Sualuppallaaleqaasi! Ilagiinnut ilaasut pinngitsoqarnatik illernartuupput, [Jehovalu] akornanniippoq.” (4 Mosesi 16:1-3) Oqaasiinit iliuusiinillu erserpoq makitasuujullutillu imminut tatigivallaartut. Mosesip taakku ima oqarfigai: “[Jehovap] ilisimalersinniarpaa kikkut piginerlugit.” (Atuaruk 4 Mosesi 16:5). Aqaguani unnukkut Kora pikitsitseqataalu tamarmik toqoreersimapput. — 4 Mosesi 16:31-35.

13, 14. Mosesip maniguuttuunini qanoq ililluni ersersippaa?

¹³ Mosesi Koramit allaanerulluinnarluni ‘inunnit nunarsuarmiittunit tamanit anneruniajuinnerpaavoq’. (4 Mosesi 12:3) Taassuma anneruniajuitsuunini maniguuttuuninilu ersersippaa Jehovamit peqquneqarnermisorluinnaq iliortarnermigut. (2 Mosesi 7:6; 40:16) Biibilimi takussutissaqanngilaq Mosesip Jehovap pissutsinik iliuuseqarfiginneriaasia pillugu isumaqataanngittuaannarsimaneranut imaluunniit Jehovap ilitsersuussutaanik malinnittariaqarnini pillugu kamalertarsimaneranut. Assersuutigalugu Jehova toqqup naapeqatigiittarfiup qanoq sananeqarnissaa pillugu annikitsualuit ilanngullugit ilitsersuivoq. Ilaatigut ilitsersuussutigaa annoraamernit qanoq qalipaateqassanersut qarsorsallu ulissuarnik katigussutissat qassiussanersut.  (2 Mosesi 26:1-6) Guutip peqatigiissortaani nakkutilliisuusup arlaannut tunngatillugu suminiarannguit tamaasa ilanngussorlugit ilitsersorpatit imaassinnaavoq nikallortutit. Jehovali nakkutilliisuuvoq naammalluinnartoq. Taassuma kiffani suliassittarpai, qularutiginngilluinnarpaalu suliarilluassagaat. Annikitsualuit tamaasa ilanngullugit ilitsersuinissaminut pissutissaqarluartarpoq. Mosesip Jehova uumitsaatinngisaannarpaa, aamma eqqarsarneq ajorpoq Jehovap nikagigaani sunnguit tamaasa ilanngullugit ilitsersormani. Mosesi Jehovamit kiffaanngissuseerutitaasutut misigisimanngilaq. Mosesip sanaqataasut Jehovap peqqusineratorluinnaq ilioqquai. (2 Mosesi 39:32) Ila maniguussusia! Mosesip nalunngilaa Jehovap tamanna suliarigaa tamatumalu suliarinissaanut Jehovap atuinnaraani.

¹⁴ Mosesi pakatsinissaminut pissutissaqaraluaraangamiluunniit maniguuttarpoq. Assersuutigalugu inuit imissaqannginnertik naammagittaalliutigilermassuk Mosesi kamattupilussuanngorpoq Jehovalu naalannarsisinngitsoorlugu. Tamatuma kingunerisaanik Jehovap Mosesi oqarfigaa Israelikkunnik nunamut neriorsuutigisamut siulersuinavianngitsoq. (4 Mosesi 20:2-12) Mosesip Aronillu Israelikkut naammagittaalliornerat ukiorpassuarni naammagittarlutik tusarnaartarsimavaat. Maannalu Mosesi pisimasumi tamatumani kukkugami sivisuumik qilanaarisimasani misiginngitsuulerpaa! Mosesi qanoq piva? Soorunami pakatsivoq, maniguullunili Jehovap aalajangigaanik akuerinnippoq. Nalunngilaa Jehova ‘naapertuilluartuusoq’. (5 Mosesi 3:25-27; 32:4) Ullumikkut Mosesi eqqarsaatigigaangatsigu Jehovamit ilisarisimaneqartutut eqqarsaatigisarparput. — Atuakkit 2 Mosesi 33:12, 13.

Jehovamut naalatsigitissagaanni maniguunnissaq pisariaqarpoq

15. Korap makitasaarnera qanoq ilinniutigisinnaavarput?

¹⁵ Jehovamit akuerisaasinnaavugut aatsaat taassuma peqatigiissortaani allannguutit akuerisarutsigit. Aamma Jehovap ilagiinni aqutsisuutitai ataqqisariaqarpavut. Aqutsisut taakku arlaannik aalajangiigaangatta ilagiinnulluunniit tunngatillugu allannguuteqaraangata taava uagut qanoq isummertarpugut? Namminissarsiornertik pissutigalugu Kora taassumunngalu ilaliuttut Guutimut ikinngutaajunnaarput. Pingaarniartuupput uppernikillutillu. Korap Mosesi  utoqqartut aalajangigassanik tamanik nammineq aalajangiisartutut isigaa. Jehovaliuna Israelikkunnik siulersuisuusoq. Korap tamanna puioramiuk inuit Guutimit atorneqartut ilumoorfiginngilai. Korap Jehovap iliuuseqarnissaa utaqqisimasariaqaraluarpaa, Jehovami pissutsinik paasinninnissamut ikiuisinnaavoq allanngortittariaqavissunillu allannguisinnaalluni. Kora ilumoorfiginninngimmat, ullumikkut uagut taanna ilumoorfiginnilluni Jehovamut kiffartortutut eqqarsaatiginagu, makitanini pissutigalugu Jehovamut naalanngitsutut eqqarsaatigisarparput.

16. Mosesip maniguunnermigut maligassiaa qanoq iluaqutigisinnaavarput?

¹⁶ Koramut pisimasut ullumikkut utoqqaanertanut ilagiinniittunullu allanut mianersoqqussutaapput. Jehovap iliuuseqarnissaanut utaqqisinnaajumalluta Jehovallu ilagiinnik siulersuisussatut toqqagaanut naalassinnaajumalluta maniguuttariaqarpugut. Erseqqippa Mosesitut maniguutsigalutalu anneruniajuitsigisugut? Paasillugulu akueraarput taakku Jehovap ilagiinnik siulersuinissamut atugarigai, aamma taakkua unnersuussutaat malillugit iliortarpugut? Pakatsigaangatta misigissutsivut aqussinnaasarpavut? Taamaappat Jehovamit akuerisaassaagut. Maniguuttuugutta naalattaruttalu Jehovap erlinnartutut isigissavaatigut.

Jehovap pigisani ilisarisimavai

17, 18. Jehovamit iluarisaajuarnissatsinnut suna iluaqutigisinnaavarput?

¹⁷ Jehovap asasaasa ikinngutigiumasaasalu maligassiaannik eqqarsaatiginninneq iluaqutigissavarput. Aaperaat Mosesilu uagutsitulli naammalluinnanngitsuullutillu kukkusarput. Taamaakkaluartorli Jehovap taakku ikinngutimisut, pigisamisut, isigai. Koramulli pisimasunit erserpoq Jehovamik tunussisoqarsinnaasoq taassumunngalu ikinngutaajunnaartoqarsimasoq. Silatusaassaagut tamatta imminut ima aperigutta: ‘Jehovap uanga qanoq isigaanga? Oqaluttuat Biibilimeersut taakku sumik ilinniarfigisinnaavakka?’

¹⁸ Jehovap kiffaminik aalajaatsunik pigisamisut isiginninneranik ilisimaarinninnerit tuppallersaatigingaarsinnaavat. Uppernerit nakussatsinniarlugu maniguunnermillu ineriartortitsiniarlutit iliuuseqartuarit. Taamaalioruit Guutimit suli iluarisaanerulissaatit. Jehovamit ilisarisimaneqarneq immikkut pisinnaatitaaffiuvoq nalissaqanngitsoq. Taassumannga akuerisaasut maanna pilluarlutik inuupput, siunissamilu nuanningaartunik pilluaqqussutisiumaarput. — Tussiaat 37:18. (w11 09/15-E)

Eqqaamavigit?

• Jehovamit ilisarisimaneqarneq qanoq paasisariaqarpa?

• Aaperaap uppernera qanoq ilaarsinnaaviuk?

• Mosesi sumik ilinniarfigisinnaavarput, Korallu iliuusii qanoq ilinniutigisinnaavavut?

[Atuaqqissaarnermi apeqqutit]

[Assiliartaq 29-mi assiliartaq]

Aaperaap pisimaneratut upperaarput Jehovap neriorsuutini tamaviisa eqquutitissagai?

[Assiliartaq 31-mi assiliartaq]

Kora maniguuttuunnginnami siulersortikkusunngilaq

[Assiliartaq 32-mi assiliartaq]

Illit maniguullutit unnersuussutigineqartut malillugit iliortartutut Jehovamit ilisarisimaneqarpit?