Missiarsip tikiunnissaanik ilimasupput

“Inuit pisussamik ilimasoqigamik tamarmik eqqarsaataannarmikkut apeqqutaatippaat Johannesi Kristusiunersoq.” — LUKASI 3:15.

1. Inngilip savanik paarsisut nuannersumik sumik tusarliivigai?

UNNUAAVOQ, savanillu paarsisut narsaatini savaatiminnik paarsipput. Tassanngaannaq Jehovap inngiliata taakku saqqummerfigai, Guutillu naalannassusianit qaammarfigineqarput! Ersilerput, inngililli tusarliussaa nuannersoq una tusarnaarpaat: “Erseqinasi! Takuat, tipaatsunnartumik tusarlissavassi tipaatsungaarutissassinnik inuit tamarmik pissaannik: Ullumi ilissinnut erniuvoq annaassisoq Daavip illoqarfiani; taanna Kristusiuvoq, Naalagaq.” Naalungiaq inngilip eqqartugaa tassaavoq taanna Kristusinngortussaq, imaluunniit Missiarsinngortussaq. Inngilip savanik paarsisut oqaluttuuppai naalungiaq taanna illoqarfimmi qanittumiittumi nersutit nerisarfianniittoq. Taava qilammiorpassuit saqqummeriasaarput Jehovamik ima unnersiutiginnillutik: “Naalannarsili Guuti qutsinnermi nunarsuarmilu! Eqqissineq pili inunnut Guutip nuannarisaanut!” — Lukasi 2:8-14.

2. “Missiarsi” qanoq isumaqarpa, inuillu qanoq nalunngissinnaavaat kina Missiarsiunersoq?

² Savanik paarsisut eqqarsarsimassapput taanna ilumut Missiarsiunersoq. Nalunngilaat “Missiarsi”, imaluunniit “Kristusi”, hebræerisut “tanitaq”-mik isumaqartoq. (2 Mosesi 29:5-7) Savanilli paarsisut taakkua qanoq ilillutik qulakkeersinnaagamikku aamma qanoq ilillutik allat qularunnaarsissinnaagamikkit naalungiaq taanna Jehovap Missiarsiusussatut toqqagarigaa? Siullermik, siulittuutit Allakkaniittut misissoqqissaartariaqarpaat, taava siulittuutit taakku meeqqap taassuma inuunerani eqquunnersut maluginiartariaqarpaat.

Sooq inuit Missiarsip tikiunnissaanik ilimasuppat?

3, 4. Danieli 9:24, 25-mi siulittuutigineqartoq qanoq ililluni eqquuppa?

³ Ukiorpassuit tamatuma kingorna  Johannesi Kuisisoq oqaluussisalerpoq. Taassuma oqaasii iliuuserisaalu pissutigalugit inuppassuit eqqarsalerput taanna Missiarsiunersoq. (Atuaruk Lukasi 3:15). Biibilimili sapaatit-akunneri 70-it pillugit siulittuuteqarpoq, taannalu iluaqutigalugu inuit paasisinnaavaat Missiarsi qaqugu tikiutissanersoq. Siulittuut imaappoq: “Sapaatit akunneri arfineq marlunnik qulillit [70-it] unioqqunnaveersitaapput innuttannut . . . Oqaaseq oqaaserineqarpat Jerusalemi kingumut qarmaqqullugu, tassanga Missiarsimut siulersuisumut naassapput sapaatit akunneri arfineq marluk [7-it], aammattaaq sapaatit akunneri arfinilinnik qulillit marlullu [62-it].” (Danieli 9:24, 25, 1900) Biibilimik misissueqqissaartartut isummersimapput sapaatit-akunnerisa ullui taakku ukiunngortitaasut. Tassa sapaatit-akunneri taakku tamarmik immikkut ukiunik arfineq-marlunnik sivisussuseqarput. Revised Standard Version naapertorlugu Danieli 9:24-mi ima allassimavoq: “Sapaatit-akunnerisa ullui ukiunngortitat 70-it aalajangersarneqarput.”

⁴ Ullumikkut Jehovap innuttaasa nalunngilaat sapaatit-akunneri 69-it Danieli 9:25-mi eqqaaneqartut tassaasut ukiut 483-it, taakkulu ukiumi 455-imi Kr.in.si. aallartittut. Taamaalinerani Persiamiut kunngiata Artaxerxesip Nehemia peqquaa Jerusalemimik qarmaaqqeqqullugu. (Nehemia 2:1-8) Ukiut 483-it taakku ukiumi 29-mi naapput Jiisusi kuisillunilu anersaamik illernartumik taninneqarmat taamaalillunilu Missiarsinngormat. — Matthæusi 3:13-17. *

5. Siulittuutit suut sammissavavut?

⁵ Biibilimi Missiarsi pillugu allarpassuarnik siulittuuteqarpoq taassuma inunngorneranut, meeraaneranut kiffartorneranullu tunngatillugu eqquuttunik. Taakkua ilaat allaaserisami matumani sammissavavut. Tamanna Biibilimik upperinninnitsinnut nakussatsissutaassaaq, aamma uppernarsissavarput Jiisusi ilumut tassaasoq Missiarsi sivisuumik utaqqisaq.

Inunngornissaa meeraaneralu pillugit siulittuutit

6. Mosesimik allakkanik siullerni 49:10-mi siulittuutigineqartoq qanoq eqquuppa?

⁶ Missiarsi Israelikkunni Judap naggueqatigiissortaanit pissasoq. Jaakup toqunngitsiarluni ernini pilluaqquai, Judalu ima oqarfigaa: “Piissanngilaq Judamit kunngip tigumiaa ajaappiarluunniit nalunaaqut isigaasa akornannit tikiutserlugu naalagaasussaq — taanna inuiaat naalassavaat.” (1 Mosesi 49:10) Juutit ajoqersuisui isumaqartuaannarsimapput Jaakup Judamut oqaasii taakku Missiarsimut tunngassuteqartut. Jaakulli oqaasii qanoq paasisariaqarpat? Matumani Jaakup angut kunngip tigumiaanik ajaappiamilluunniit tigumiartoq eqqartorpaa. Tassa imaappoq, angut taanna kunngiusinnaatitaallunilu inunnut oqartussaassuseqarsinnaatitaasoq. Siulittuummit tamatumannga erserpoq kunngi, naalakkersuinissamut pisinnaatitaasoq, taanna Judap naggueqatigiissortaaneersuusariaqartoq. Judami kunngi siulleq tassaavoq kunngi Daavi. Jaakulli siulittuutaani kunngi naassaanngitsumik naalakkersuisussaq eqqartorneqarpoq. Jiisusi suli inunngunngitsoq inngilip Gabrielip Maria ima oqarfigaa: “Guutillu [Jehovap] tunissavaa ataataata Daavip issiavissaarsuanik; Jaakukkunnut kunngiussaaq naassaanngitsumik, naalagaassusialu atajuaannassaaq.” (Lukasi 1:32, 33) Jiisusi Judamut Daavimullu kinguaajuvoq. Aamma Jiisusi kunngiusinnaatitaanissaq pillugu Daavip kinguaavinit Jehovamit neriorsorneqartutuaavoq. Taamaammat Jiisusi Kristusi taannaasimassaaq Mosesimik allakkani siullerni 49:10-mi eqqaaneqartoq. — Matthæusi 1:1-3, 6; Lukasi 3:23, 31-34.

7. Missiarsip inunngornissaa pillugu siulittuut qanoq eqquuppa?

⁷ Missiarsi Betlehemimi inunngussasoq. Pruffiiti Mika ima allappoq: “Illit Betlehemi, Efrata, Judap eqqarleriissortaanni mikisuuvutit. Ilinnit piumaarpoq Israelimi naalaganngortussaq; aallaaveqarpoq qangarsuarmit, itsarsuarmit.” (Mika 5:1) Siulittuummi tamatumani paasitinneqarpugut Missiarsi Betlehemimi inunngussasoq. Illoqarfik taanna Efratamik taaguuteqarsimasoq Judamiippoq. Mariali, Jiisusip anaanaa, taassumalu  uia Josefi illoqarfimmi allami, tassa Nazaretimi, najugaqarput. Jiisusi inunngungajalersoq Romami naalakkersuisup inunnik kisitsisoqarnissaa peqqussutigimmagu Betlehemimut uterput, tassanilu Jiisusi inunngorpoq. (Matthæusi 2:1, 5, 6) Taamaattumik Jiisusi siulittuutigineqartutorpiaq inunngorpoq!

8, 9. Missiarsip inunngornissaanut tunngatillugu suna siulittuutigineqarpa, inunngorneratalu kingorna qanoq pisoqartussaava?

⁸ Missiarsi arnamit inuusuttumit, imaluunniit niviarsiamit, ernertaarineqassasoq. (Atuaruk Esaja 7:14). Esaja 7:14-imi siulittuutigineqarpoq “arnaq inuusuttoq” (imaluunniit quppernerup ataani ilanngussaq naapertorlugu “niviarsiaq”) ernertaassasoq. Oqaaseq “niviarsiaq” Rebekkamut suli katissimanngitsumut tunngatillugu aamma atorneqarpoq. (1 Mosesi 24:16, 43) Matthæusi isumassarsisitaalluni allappoq siulittuut tamanna Jiisusip inunngorneranut tunngatillugu eqquuttoq. Iivangkiiliumik allattut Matthæusi Lukasilu allapput Maria niviarsiaasoq Guutillu anersaavatigut illernartukkut naartulersoq. — Matthæusi 1:18-25; Lukasi 1:26-35.

⁹ Missiarsip inunngornerata kingorna meeqqanik toqoraasoqarumaartoq. Pisimasumut tamatumunnga assingusumik pisoqarpoq Missiarsip inunngornera ukiunik hundredelinnik sioqqullugu. Egyptenimi Faraop peqqussutigaa nukappiaqqat inoorlaat hebræerit tamarmik kuussuarmut Nilenimut iginneqarnissaat. (2 Mosesi 1:22) Jeremia 31:15, 16-imi siulittuutigineqarpoq ‘Rakelip qitornani upissagai peerussimammata’. Taassuma upinnera Ramamisut ungasitsigisumi, Benjaminikkut nunaanni Jerusalemip avannaatungaaniittumi, tusarsaavoq. Matthæusi allappoq siulittuut tamanna eqquuttoq kunngi Herodesi peqqusimmat nukappiaqqat inoorlaat Betlehemimiittut tamarmik toqunneqassasut. (Atuakkit Matthæusi 2:16-18). Takorlooriaruk inuit qanoq aliasungaartigisimassasut!

10. Siulittuut Hosea 11:1-imiittoq qanoq eqquuppa?

¹⁰ Missiarsi Egyptenimit qaaqquneqassasoq. (Hosea 11:1) Jiisusi kunngimit Herodesimit anigueqqullugu inngilip Josefi Marialu Jiisusilu Egypteniliaqquai. Tassaniipput “Herodesi toqutserlugu, tassa [Jehovap] pruffiitikkut oqaaserisaa eqquuteqqullugu, oqarmat: ‘Ernera Egyptenimit qaaqquara.’” (Matthæusi 2:13-15) Soorunami Jiisusi inunngornermini meeraanerminilu pisunik aqutsisinnaasimassanngilaq.

Missiarsi kiffartulerpoq!

11. Kina Missiarsimik aqqutissiuussisuua?

¹¹ Missiarsi aqqutissiuunneqassasoq. Malaki allappoq “pruffiiti Elia” aqqutissiuisuussasoq, inuit uummataat Missiarsip tikiunnissaanut piareersarlugit. (Atuakkit Malaki 3:23, 24). Jiisusip nammineq Johannesi Kuisisoq Eliatut ittuunerarpaa. (Matthæusi 11:13, 14) Markusi nassuiaavoq Johannesi Esajap siulittuisimaneratorluinnaq aqqutissiuussisuusoq. (Esaja 40:3; Markusi 1:1-4) Jiisusip Johannesi peqqunngilaa taamatut piareersaaqqullugu. Guutimuna inuit Missiarsip kinaaneranik paasinninnissaat kissaatigigamiuk Johannesi toqqaraa Eliap suliaanut assingusumik suliaqartussatut Missiarsimillu tikilluaqqusinissamut piareersaasussatut.

12. Missiarsi Guutimit immikkut ittumik sumik suliassinneqarpa?

¹² Missiarsi Guutimit immikkut ittumik suliassinneqartussaasoq. Jiisusi Nazaretimi, illoqarfimmi peroriartorfimmini, synagogimiitilluni Esajap allagai imusat mapperpai imalu allassimasut atuarlugit: “[Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq piitsunut tusarliuteqqullugu, torlulaatigeqqullugu parnaarussat iperagaanissaat tappiitsullu tappissinissaat, nanertugaasullu aniguiseqqullugit torlulaatigeqqullugulu [Jehovap] ukiua saammaassivik.” Jiisusi ilumut Missiarsiugami eqqortumik ima oqarsinnaasimavoq: “Oqaatsit allakkaniittut tusakkasi ullumikkut eqquupput.” — Lukasi 4:16-21.

13. Jiisusip Galilæami kiffartornissaa qanoq siulittuutigineqarpa?

¹³ Missiarsip Galilæami kiffartornissaa siulittuutigineqarpoq. Esaja “Zebulonip nunaa Naftalillu nunaa” “Galilæalu Inuiaqatigiit najugaat” pillugit siulittuivoq. Ima allappoq: “Inuiaat taarsiorlutik angalaartut qaamasorsuaq takussavaat;  qaamasup qinngorfigai taarsiorfimmi najugaqartut.” (Esaja 8:23–9:1) Jiisusi Galilæami kiffartulerpoq illoqarfimmi Kapernaumimi najugartilluni. Tamaani inuit Zebulonip nunaaneersut Naftalillu nunaaneersut anersaakkut qaammarsaavigineqarnertik nuannaarutigaat. (Matthæusi 4:12-16) Jiisusi Galilæamiitilluni qaqqami oqalugiarpoq, apustilini toqqarlugit siullerpaamillu tupinnartuliorluni. Aamma Jiisusi makititaanermi kingorna tamaani ajoqersukkanut 500-nit amerlanerusunut saqqummerpoq. (Matthæusi 5:1–7:27; 28:16-20; Markusi 3:13, 14; Johannesi 2:8-11; 1 Korinthimiut 15:6) Taamaammat Esajap siulittuutaa eqquuppoq Jiisusi ‘Zebulonip nunaani Naftalillu nunaani’ oqaluussimmat. Aamma Jiisusip Guutip naalagaaffia pillugu nutaarsiassaq nuannersoq oqaluussissutigaa Israelimi sumiiffinni allani.

Missiarsi pillugu siulittuutit suli allat

14. Tussiaat 78:2 qanoq eqquuppa?

¹⁴ Missiarsi assersuusiortassasoq. Tussiaasiat ilaanni Asafi ima erinarsorpoq: “Qanera ammarniarpara assersuutinik oqalullunga, oqaaseriniarpakka nalorsitsaarutit itsarnitsat.” (Tussiaat 78:2) Matthæusip paasitippaatigut siulittuut tamanna qanoq eqquunnersoq. Jiisusi ilinniartitsigaangami assersuusiortuaannarpoq. Jiisusip inuit Guutip naalagaaffia pillugu ilinniartinniarlugit siinuppip naatsiiassartaanik seernarsaammillu assersuusiornera Matthæusip ima allaatigaa: “[Tamatigut] assersuutit atorlugit oqaluffigisarpai eqquuteqqullugu pruffiitikkut oqaaserisaq imaattoq: Qanera ammarniarpara assersuutitigut oqalullunga, saqqummiunniarparalu silarsuup tunngavileqqaarneranit isertugaq.” (Matthæusi 13:31-35) Jiisusip assersuusiai Jehova pillugu sallusuissummik paasinninnissamut inuppassuarnit iluaqutigineqarput.

15. Esaja 53:4-mi siulittuutigineqartoq qanoq eqquuppa?

¹⁵ Missiarsi inunnik ajorunnaarsitsisassasoq. Esaja ima siulittuivoq: “Taassuma uagut nappaativut imminiitilerpai, anniaativullu nammappai.” (Esaja 53:4) Matthæusi allappoq Jiisusi Petrusip sakianik napparsimasumik ajorunnaarsitsereerluni allanittaaq ajorunnaarsitsimmat tamakku pisut “eqquuteqqullugu pruffiitikkut Esajakkut oqaaserisaq imaattoq: Taassuma anniaativut imminut pisippai, nappaativullu nammappai.” (Matthæusi 8:14-17) Tamatuma oqaluttuarineqarnera Jiisusip peqqiilliortunik ajorunnaarsitsineranik oqaluttuarpassuit ilaannaraat.

16. Esaja 53:1-imi allassimasut Jiisusimut tunnganerannut uppernarsaataasumik apustili Johannesi qanoq allappa?

¹⁶ Jiisusi ajunngitsuliungaaraluartoq Missiarsiunera inuppassuarnit upperineqanngilaq. (Atuaruk Esaja 53:1). Apustilip Johannesip siulittuut tamanna eqquussimanerarpaa, ima allakkami: “Naak isigitillutik amerlaqisunik nalunaaqutiliortaraluartoq upperfiginngilaat, pruffiitip Esajap oqaaserisai uku eqquutissammata: [Jehova], kiap upperaa tusarliussarput? Kimut [Jehovap] talia saqqummersinneqarpa?” (Johannesi 12:37, 38) Aamma Paulusip kiffartornerata nalaani inuit ikittuinnaat Jiisusi pillugu nutaarsiassaq nuannersoq upperaat. — Romamiut 10:16, 17.

17. Tussiaat 69:5-imi siulittuutigineqartoq qanoq eqquuppa?

¹⁷ Inuit pissutissaqaratik Missiarsimik uumissuissasut. (Tussiaat 69:5) Jiisusi ima oqarpoq: “Suliat allamit suliarineqarsimanngitsut taakkua akornanni suliarisimanngikkaluarukkit ajortuliaqassanngikkaluarput; maannali suliakka takusimagaluarlugit uanga Ataatagalu uumissorpaatigut. Taamali pisoqarsimavoq oqaaseq inatsisaanni allassimasoq una eqquuteqqullugu: ‘Pissutissaqaratik uumigaannga.’” (Johannesi 15:24, 25) ‘Inatsisit’ matumani eqqaaneqartut tassaapput Allakkat taamanikkut allanneqareersimasut. (Johannesi 10:34; 12:34) Iivangkiiliuni allassimasut Jiisusip inuppassuarnit, ingammik juutit upperisarsiornikkut siuttuinit, uumissorneqarsimaneranut uppernarsaataapput. Aamma Jiisusip apustilini ima oqarfigai: “Silarsuup . . . uumigaanga suliami ajortuunera nalunaajaatigigakku.” — Johannesi 7:7.

18. Allaaserisami tulliuttumi suna sammissavarput?

¹⁸ Ukiuni hundredelinni siullerni Jiisusimut ajoqersukkat qularutiginngilaat Jiisusip Missiarsiunera. Nalunngilaat Missiarsi pillugu  siulittuutit Allakkani Hebræerisuuniittut Jiisusip eqquutitikkai. (Matthæusi 16:16) Allaaserisami matumani paasivarput Jiisusip inunngornissaa meeraaneralu kiffartorneralu pillugit siulittuutit eqquussimasut. Missiarsi pillugu siulittuutit suli allarpassuit allaaserisami tulliuttumi sammissavavut. Siulittuutit taakku eqqarsaatigeqqissaartarutsigit qularutiginngilluinnalissavarput Jiisusi tassaasoq Jehovap Missiarsiusussatut toqqagaa.

[Quppernerup ataani ilanngussaq]

Qanoq akissavit?

• Jiisusip inunngornissaa pillugu siulittuutit suut eqquuppat?

• Kia Missiarsi aqqutissiuuppaa?

• Tussiaat 53-imi siulittuutigineqartut qanoq eqquuppat?

[Atuaqqissaarnermi apeqqutit]