Meeqqat Guuti pillugu kikkunnit ilinniartinneqassappat?

“Ajoqersugaq ajoqersortiminit annerunngilaq; kisianni kinaluunniit ilinniarnermini inersimasoq ajoqersortimisut issaaq.” — LUKASI 6:40.

ANGAJOQQAAT ilaat qitornaminnik Guuti pillugu ilinniartitsinissaminnut piukkunnanngitsutut misigipput. Immaqa isumaqarput ilinniartitsisuulluarnissaminnut ilinniagakippallaarlutik upperisalluunniit pillugit ilisimasakippallaarlutik. Taamaattumik ilinniartitaanissaat atuarfimmut palasimulluunniit isumagitittarpaat.

Kikkulli meeqqanik upperisarsiorneq ileqqussallu pillugit ilinniartitsilluarsinnaaneruppat? Eqqarsaatigiuk tamanna pillugu Biibilimi qanoq allassimasoqarnersoq, misissueqqissaartartullu paasisaannut naleqqiuguk.

Ataataasoq qanoq akisussaaffeqarpa?

Biibilimi allassimasoq: “Ataataasusilu, qitornasi kamatseqinasigit, perorsarsigilli anusinngorsartarlugit oqaaqqissaartarlugillu Naalakkamit pisumik.” — Efesosimiut 6:4.

Misissueqqissaartartut paasisaat: Ataataasup qularutiginngilluinnarlugu upperisaqarnini qanoq iluaqutigaa? 2009-mi allaaserisami Fathers’ Religious Involvement and Early Childhood Behavior-imi ima allassimavoq: “Angutit upperisarsioqatigiinni pimoorussinertik ataataalluarnerunissaminnut iluaqutigisarpaat. Upperisarsiorneq inunnut ataasiakkaanut annertoqqutaallunilu  aqutsisuuvoq, upperisarsiornerlu aqqutigalugu ajoqersuutit najoqqutassiallu pineqartarput.”

Biibili naapertorlugu meeqqap perorsarneqarnerani ilinniartinneqarneranilu ataataasoq pingaaruteqangaarpoq. (Ussatit 4:1; Kolossemiut 3:21; Hebræerit 12:9) Ullumikkulli Biibili suli atorsinnaava? 2009-mi University of Floridamit saqqummersinneqarpoq ataataasut qitornaminnut sunniuteqarnerat pillugu allaaserisaq; misissueqqissaartartut paasisimavaat meeraq perorsaaqataasumik ataataqartoq misiginneqataanerullunilu imminut tatiginerusartoq. Nukappiaqqat pissuserinnerusarput niviarsiaqqallu eqqarsartaatsikkut misigissutsikkullu peqqinnerusarput. Ilaana, Biibilimi siunnersuutit ullumikkut atorluarsinnaaqaat.

Anaanaasup akisussaaffia qanoq pingaaruteqartigaa?

Biibilimi allassimasoq: ‘Anaanavit ajoqersuussutai sumiginnarnagit.’ — Ussatit 1:8.

Misissueqqissaartartut paasisaat: 2006-imi USA-mi saqqummersumi Handbook of Child Psychology-mi ima allassimavoq: “Anaanaasut qitornatik mikisut ataataasuninngarnit agguaqatigiissillugu 65 procentimiit 80 procentimut qanimut attaveqarfiginerusarpaat, nunanilu allarpassuarni aamma taamaappoq.” Attaveqarluarneq taamaattoq pissutaalluni anaanaasup isiginnittaasia, oqaasii iliuusiilu meeqqap ineriartorneranut sunniuteqangaartarput.

Angajoqqaat Guuti pillugu ilumoortoq qitornaminnik ilinniartitsigaangata meeqqat minnerpaamik naleqangaartunik marlunnik tunissutisisarput. Siullermik, meeqqat Ataatartik qilammiusoq ikinngutigilersinnaavaat, ikinngutigiinneq inuunertik naallugu iluaqutigisinnaasartik. Aappassaanik, anguniakkat pingaarutillit anguniarlugit uiusoq nuliaasorlu qanoq suleqatigiittartut meeqqat angajoqqaamik maligassiaannit ilikkartarpaat. (Kolossemiut 3:18-20) Allat ikiuisinnaapput, angajoqqaalli namminneq Guuti pillugu taassumalu kissaataa malillugu ilaqutariinniittut qanoq suleqatigiinnissaat pillugu qitornamik ilinniartinnissaat akisussaaffigaat.

Angajoqqaalli qitornatik qanoq ilinniartissavaat? Ilinniartitseriaatsit sorliit pitsaanerpaappat?