Siunertaqarluartumik inuuneq maanna naassaanngitsumullu

INUUNERUP siunertavia maannangaaq paasisinnaavat. Qanoq ilillutit? Najoqqutassiat pitsaasut Guutip oqaasiani Biibilimiittut maleruarnerisigut. Taakkua ilaat misissoriartigit.

NAJOQQUTASSIAQ BIIBILIMEERSOQ: Kunngi Salomo ima allappoq: “Inuk iluanaarnerussagaluarpoq nerillunilu imeruni suleruloornermini pissarsiani inuulluutigalugit.” — OQALUUSSISARTUP OQAASII 2:24.

Sulilluarnermik nuannaarutiginnissinnaasutut pinngortitaavugut. Ilungersunangaartunik atugaqaraluarlutit inuunermi maannangaaq nalerisimaalersinnaavutit eqiasuillutit unneqqarillutillu sulinikkut.

NAJOQQUTASSIAQ BIIBILIMEERSOQ: “Tunisineq pilluarnarneruvoq tigusinermit.” — APUSTILIT SULIAAT 20:35.

Inuppassuit allanik ikiuinertik — assersuutigalugu atoruminaatsorsiortunik ikiuinermut piffissamik nukinnillu atuinertik — assut nalerisimaarnarisarpaat, aamma misigisarput inuunerminnik siunertaqarlualersitsisartoq. Kunngi Salomo ima allappoq: “Ajunngitsuut nigorsimatinniaqinagu atorfissaqartitsisumit, ikiuissallutit sapinngikkaangavit.” — Ussatit 3:27.

Ralph tamatumunnga tunngatillugu maligassaalluarpoq. Soraarninngoreerami nuliamisut piffissaq tamaat oqaluussisartunngorpoq. Qaammatit tamaasa nalunaaquttap-akunnerpassui oqaluussinermut atortarpaat, Biibili pillugu allanik ilinniartitsineq ulapputigalugu. Ralph ima oqarpoq: “Unnukkut angerlaraangatta qasusarpugut utoqqaliartornerput pissutigiinnarnagu,  aammali Ataatatsinnut qilammiusumut kiffartornermi nukitsinnik tamanik atuisimanerput pissutigalugu. Taamatut qasulluni nuanneqaaq!” Taanna nulianilu nuannaarput allanik ikiuinissaq inuunerminni pingaarnerpaatikkamikku.

NAJOQQUTASSIAQ BIIBILIMEERSOQ: “Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.” — USSATIT 17:17.

Kisimiinngikkaanni aliasuutit ajornartorsiutillu naammagalugit atorneqarsinnaanerusarput. Tuluk isumaliutersortartoq Francis Bacon allappoq qanimut ikinnguteqanngitsunut “silarsuaq inoqajuitsutut ittoq”. Ilumoortunik ikinnguteqarneq — aamma nammineq ikinngutaalluarneq — inuunermik artornannginnerulersitsisarpoq; nuannerlunilu nalerisimaarnarsinnaavoq.

NAJOQQUTASSIAQ BIIBILIMEERSOQ: “Pilluarput anersaakkut pisariaqartitaqarnerminnik miserratiginninngitsut.” — MATTHÆUSI 5:3, NV.

Jiisusip matumani erseqqissarpaa Guutip neriorsuutaasa eqquunnerat misigisinnaajumallugu pisariaqartoq — tassa ‘anersaakkut pisariaqartitaqarnermik’ paasinninneq. Uumasutut innata uagut inuunerup siunertaanik paasinninnissarput inunnguutsitsinnik pisariaqartipparput. Jehovap Guutip kisimi tamatuminnga pisariaqartitsinerput matussusersinnaavaa, matussusertarpaalu oqaatsini, Biibili, aqqutigalugu. Soorlu allaaserisap matuma siuliani sammigipput, Guutip nunarsuaq sumik siunertaqarfigineraa Biibilimi paasinarsisinneqarpoq. Tassani paasitinneqarpugut sooq maaniinnersugut, sooq taama naalliunnartoqartigisoq, aamma Guutip sumik piumaffigineraatigut. Siunertaqarluartumik nalerisimaarnartumillu inuusinnaassagutta sallusuissutinik Biibilimiittunik tamakkuninnga paasinninnissarput pingaaruteqarpoq. Biibilimik atuaqqissaarnissamut piffissaqarniartartut paasisatillu malillugit inuusut pilluartuupput. Sooq? Tamakku iluaqutigalugit Pinngortitsisitsinnut, ‘Guutimut pilluartumut’, Jehovamut anngigisaarukkiartorlutillu attaveqarluarnerujartortaramik. — 1 Timotheusi 1:11.

NAJOQQUTASSIAQ BIIBILIMEERSOQ: “Pinngortitsisit eqqaamaniaruk . . . ullut ajortut nalliutinnginneranni ukiullu ima oqaatigisavit pilinnginneranni: ‘Taakku nuannarinngilakka!’” — OQALUUSSISARTUP OQAASII 12:1.

Kunngip Salomop inuusuttunut, alianartunik inuunermi nalaanneqarsinnaasunik akueriuminaatsitsisinnaasunut, siunnersuutaa tamatsinnut atorsinnaavoq. Pinngortitsisoq illit inuuninni pingaarnerpaatiguk. Taamaalilluni inuunerit siunertaqarlualissaaq. Inuunermut ima isiginnittaaseqarniaqinak: “Nerillutalu erngutiinnarniarta, aqagu toqussagatta!” (1 Korinthimiut 15:32) Guuti inuuninni salliukkukku ‘pilluarlutit inuussaatit’, soorlu Oqaluussisartup oqaasii 8:12-imi taama allassimasoq.

 Arnap Wendimik atillip tamatuma ilumoornera paasisimavaa. Inuusuttuulluni qatanngutini arnaq peqatigalugu Spaniamiut oqaasiinik ilinniarpoq Dominikanske Republikimut, nutaarsiassamik nuannersumik Biibilimeersumik oqaluussissutiginnittussanik pisariaqartitsiffiunerusumut, nuussinnaaniassagamik. “Pisariaqartitsiffiusumi kiffartorumalluta pilliuterpassuaqarpugut, tasamaniinnerpulli inuunitsinni nuannernerpaavoq. . . . Pilluaqquneqaatigisavut pilliutigisimasatsinnik soqutaajunnaarsitsilluinnarput.”

Guutimik ilumoorfiginninneq inuunermik siunertaqarlualersitsisarpoq

Jehovamut attaveqarlualerniarlutit iliuuseqaruit illit inuunerit immikkut ittumik siunertaqarlualissaaq. Qanoq? Saatanip Adami Evalu Guutip naalakkersuineranut pikitsitsisiinnarnagit inuit tamaasa misilinneqarnerminni Guutimik ilumoorfiginnittuarsinnaannginnerarpai. (Jobi 1:9-11; 2:4) Saatanip sallutuneranik uppernarsaaqataasinnaavutit! Qanoq ilillutit? Guutimik ilumoorfiginninnikkut, taassuma najoqqutassiaanik maleruaanikkut Jehovallu kisimi suup ajunngitsuuneranik suullu ajortuuneranik aalajangiisinnaatitaaneranik akuerinninninnik ersersitsinikkut. — Saqqummersitat 4:11.

Eqqortumik iliorusukkutta imaassinnaavoq misilinneqarnerit naammagalugit atortariaqarivut. Misilinneqarnerit inuunitsinnik siunertaqarluarunnaarsitsissappat? Takorlooriartigu uagutsinnut akeraasoq ajuissoq ikinngutitsinnik ilaquttatsinnilluunniit ingutsisoq. Ingunneqartoq illersorutsigu akeraasullu illersuinerput pissutigalugu ajornartorsiortippatigut, taava imaappa siunertaqarluartumik inuusinnaanngitsugut? Soorunami naamik! Tamanna pissutigalugu akerlilersorneqarnerput ajorinavianngikkaluarparput. Guutimik ilumoorfiginnittuarnermut tunngatillugu aamma taamaappoq. Maanna pissutsit ajortut atuutsillugit ilumoorfiginninnerput Guutip uummataanik nuannaartitsisarpoq. — Ussatit 27:11.

Siunertaqarluartumik inuuneq — naassaanngitsumik

Taamaattumik Guuti taassumalu siunertaa pillugu ilinniarniarlutit sapinngisat tamaat iliuuseqarnissat anguniagariuk. Jiisusi Kristusi ima oqarpoq: “[Inuuneq] naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” (Johannesi 17:3) Guutip nunarsuarmut aallaqqaammulli siunertani naammassippagu inuit aalajaatsut Jehovap imminnut aallaqqaammulli siunertarisimasaa — nunarsuarmi paratiisiusumi ‘inuuneq naassaanngitsoq’ — misigisinnaassavaat. Taamanikkussamut inuuneq siunertaqarluarlunilu nalerisimaarnangaassaaq. — Tussiaat 145:16.

Ilisimasassat pingaarutillit Jiisusip eqqartugai sumi paasineqarsinnaagamik? Guutip oqaasiani isumassarsiarititaasumi, Biibilimi. Paasisaqarnerunissannut ikiorneqarusukkuit atuagassiamik matuminnga saqqummiisut allaffiginissaannut nangaassanngilatit. Taakkua Biibilimi sorpiaat ajoqersuutigineqarnerannik paasinninnissamut ikiorneqarnissat isumagerusuppaat.