‘Anersaap inerititaa’ Guutimik naalannarsisitsivoq
‘Anersaap inerititaa’ Guutimik naalannarsisitsivoq
“Inerititaqarluarnissigut . . . Ataataga naalannarsissaaq.” — JOHANNESI 15:8.
1, 2. (a) Allanik qiimmassaanissamut nakussatsitsinissamullu sunik periarfissaqarpugut? (b) Tunissut Jehovameersoq suna taassumunnga kiffartorluarsinnaanerulissutigissavarput?
PISIMASUT marluk uku eqqarsaatigeriakkit: Arnap kristumiup qatanngut arnaq inuusuttoq isumakuluuteqarpasissoq maluginiarpaa. Oqaluusseqatiginissaanik isumaqatigiissuteqarfigaa. Pulaagassaminnukartillutik oqaloqatigiinnerminni qatanngutip arnap inuusuttup isumakuluutigisani oqaluttuarilerpai. Ullormi tamatumani kingusinnerusukkut qatanngutip arnap inuusuttup taassuma Jehova qinunikkut qutsavigaa qatanngummit arnamit inersimalluartumit soqutigineqarsimanini pillugu; tamannarpiaq pisariaqartissimavaa. Sumiiffimmi allami aappariit nunami allameereerlutik uteqqammerput, tassanilu oqaluussineq ulapputigisimavaat. Katerisimaartoqarnerani taakkua angorniorlutik misigisalikkersaarneranni qatanngut angut inuusuttoq tusarnaaqqissaarpoq. Ukiualuit tamatuma kingorna ajoqersuiartortitatut aallarniarluni poortuitilluni aappariit taakkua oqaluttuaat ajoqersuiartortitanngorniarluni aalajangissutigisani eqqarsaatigai.
2 Pisimasut taakku pillugit atuartillutit immaqa eqqaasaqarputit ilinnut ajunngitsumik sunniuteqarsimasumik imaluunniit illit ajunngitsumik sunniuteqarfigisimasannik. Soorunami ataasiaannarluni oqaloqatigiilaarneq allap inuuneranik qaqutiguinnaq allannguisarpoq, ullulli tamaasa periarfissaqartarpugut allanik qiimmassaallutalu nakussatsitsinissatsinnut. Takorlooriaruk piginnaaninnik pissutsinnillu pitsanngorsaaniarlutit arlaannik iliuuseqarsinnaasutit qatanngutinnut iluaqutaanerulissutigisannik Guutimillu iluaqutigineqarnerulissutigisannik. Nuannissagaluaqaaq, ilaa? Jehovap tunissuteqarfigaatigut taamatorpiaq uagutsinnut sunniuteqartartumik — tassa anersaaminik illernartumik! (Lukasi 11:13) Guutip anersaava inuunitsinnut sunniuteqarnerujartuinnartilluni pissuserineqartussanik nuannersunik uagutsinni ineriartortitsisarpoq Guutimut kiffartornitsinnik sutigut tamatigut pitsanngorsaasunik. Tunissutisiatta nuannerluinnassusia! — Atuakkit Galatiamiut 5:22, 23. *
3. (a) ‘Anersaap inerititaanik’ ineriartortitsinitsigut qanoq ililluta Guutimik naalannarsisitsisarpugut? (b) Apeqqutit suut sammissavavut?
3 Pissuserineqartussat anersaap illernartup uagutsinni ineriartortittagai Jehovap Guutip, anersaap illernartup pilerfiata, kinaassusianik ersersitsisarput. (Kolossemiut 3:9, 10) Kristumiut Guutimik ilaarsiniartariaqarnerannut pissutaasoq pingaarneq Jiisusip oqaatigimisaarpaa. Apustilini ima oqarfigai: “Inerititaqarluarnissigut . . . Ataataga naalannarsissaaq.” * (Johannesi 15:8) ‘Anersaap inerititaanik’ ineriartortitsigaangatta tamatuma kinguneri oqaloriaatsitsinni iliuutsitsinnilu erseqqittarput, tamannalu Guutimut unnersiutiginnissutaasarpoq. (Matthæusi 5:16) Anersaap inerititaa Saatanip silarsuaanut sunniuteqartumit qanoq allaanerua? Anersaap inerititaa qanoq ililluta ineriartortissinnaavarput? Sooq tamatuminnga ineriartortitsinissaq unamminiarnartuusinnaava? Apeqqutit taakku akineqassapput anersaap inerititaanut ilaasut eqqaaneqartut pingasut siulliit — asanninnerup, nuannaarnerup eqqissinerullu — sammineranni.
Asanninneq najoqqutassiamik qutsinnerusumik tunngavilik
4. Jiisusip ajoqersukkani asanninnermik qanoq ittumik ersersitsinissaannik ilinniartippai?
4 Asanninneq anersaap illernartup inerititarisartagaanut ilaasoq asanninnermit silarsuarmi nalinginnaasumit allaanerulluinnarpoq. Sooq? Najoqqutassiamik qutsinnerusumik tunngaveqarami. Jiisusip assigiinngissutaasoq tamanna qaqqami oqaluutsimini erseqqissarpaa. (Atuakkit Matthæusi 5:43-48). Maluginiaqquaa ajortuliortuugaluartulluunniit namminneq pineqartarnermissut allanik pinnittartut. Asanninneq taama ittoq ilumoortumik pilliuteqarnerunavianngilaq; kiffartuuteqatigiinnerinnaavoq. Uagut ‘Ataatatsinnut qilanniittumut qitornaajumagutta’ allaanerusariaqarpugut. Allanit pineqartarnitsitut allanik pinniinnartarata uagut allat Jehovap isiginnittaasiatut isigisariaqarpavut Jehovallu taakkuninnga pinnittarneratut pisarlugit. Jiisusilli peqqusisimaneratut qanoq ililluta akeqqatsinnik asannissinnaagatta?
5. Uagutsinnik malersuisut qanoq ililluta asannittuliorfigisinnaavavut?
5 Oqaluttuaq Biibilimiittoq una eqqarsaatigeriaruk: Paulusi Silasilu Filippimi oqaluussitillutik tigusaapput, iperartugaallutik inissiamullu ilorlerpaamut parnaarussaallutik, isigaallu qisummut kiggitsivimmut aalajangerneqarput. Immaqa aamma parnaarussanik paarsisumit ajortumik pineqarput. Nunap sajunnerata kingunerisaanik ilimaginngisaminnik iperagaagamik qanoq pippat? Parnaarussanik paarsisumik akiniaasinnaalernertik nuannaarutigaat? Naagga. Taassuminnga ilumoorlutik isumassuinertik — imminut pilliutigeriaannaallutik asanninnertik — kajumississutigalugu taassuma iluaqutissaanik iliuuseqapallapput, parnaarussanik paarsisoq taassumalu inoqutai uppertunngornissaannut periarfissillugit. (Apustilit Suliaat 16:19-34) Ullutsinni qatanngutitta ilarpassui tamatumunnga assingusumik iliuuseqarsimapput ‘qinuginnittunik’, imaluunniit malersuisunik, ‘pilluaqqusinermikkut’. — Romamiut 12:14.
6. Qanoq ililluta qatanngutivut imminut pilliutigeriaannaalluta asannittuliorfigisinnaavavut? (Takuuk ungalusaq qupp. 23-miittoq).
6 Uppeqatitsinnik asanninnerput suli sakkortuneruvoq. “Uagut qatanngutivut pillugit inuunerput tunniuttariaqarparput.” (Atuakkit 1 Johannesi 3:16-18). Amerlanertigulli qatanngutitsinnut asannittuliorniarluta taamarsuaq iliuuseqartigisariaqarneq ajorpugut. Qatanngutitta mamiatsaatigisaanik oqaaseqarlutaluunniit iliuuseqarsimagutta asannittuliorsinnaavugut eqqisseqatigileqqinniarlugit siulliulluta iliuuseqarnitsigut. (Matthæusi 5:23, 24) Taavami uagut ajuallatsinneqarutta? Uagut isumakkeerfiginneriaannaasarpugut, imaluunniit ilaannikkut puttarsisaqaqqajaasarpugut? (Tussiaat 86:5) Qamannga pisumik asanninneq anersaap illernartup uagutsinni ineriartortissimasaa allat kukkussutaasa annertunngitsut isiginngitsuusaarnissaannut, imaluunniit ‘matoornissaannut’, iluaqutigisinnaavarput, isumakkeerfiginnilluta ‘soorlu Jehovap uagut isumakkeerfigigaatigut’. — Kolossemiut 3:13, 14; 1 Petrusi 4:8.
7, 8. (a) Inoqatitsinnik asanninnerput Guutimik asanninnitsinnut qanoq attuumassuteqarpa? (b) Qanoq ililluta Jehovamik asanninnerulersinnaavugut? (Takuuk asseq ataaniittoq).
7 Imminut pilliutigeriaannaalluta qatanngutitsinnik asanninnerput qanoq ililluta ineriartortissinnaavarput? Guutimik asanninnerulerniarnitsigut. (Efesosimiut 5:1, 2; 1 Johannesi 4:9-11, 20, 21) Piffissaq Biibilimik atuarluta, eqqarsaatiginneqqissaarluta taassumunngalu qinulluta Jehovap ilaginissaanullusooq atortagarput qiimmassaatigisarparput taamaalillutalu Ataatatsinnik qilammiusumik asanninnerulissutigisarlutigu. Guutimulli attaveqarlualernissamut piffissaqartariaqarpugut.
8 Assersuuteqariarta. Takorlooriaruk ullormut nalunaaquttap-akunnerani ataasiinnarmi Guutip oqaasianik atuartoqarsinnaallunilu eqqarsaatiginneqqissaartoqarsinnaallunilu Jehovamut qinusoqarsinnaasoq. Nalunaaquttap-akunnera ataaseq taanna annaanaveersaarlugu piffissaq Jehovap ilaginissaanut immikkoortissimasat akornuserneqartinnaveersaassagaluarpat, ilaa? Soorunami Guutimut qinunikkut palligutsaalineqarsinnaanngilagut, aamma amerlanersatta qaqugukkulluunniit piumalleraangamik Biibili atuarsinnaavaat. Taamaakkaluartorli imaassinnaavoq imminut piumaffigisariaqartugut ulluinnarni sammisassarpassuit piffissamut Guutip ilaginissaanut immikkoortissimasatsinnut akornutaaleqqunagit. Illit ullut tamaasa Jehovamut qanillinissamut sapinngisamik sivisunerpaamik piffissalertarpit?
“Nuannaarlusi Anersaami Illernartumi”
9. Nuannaarnerup anersaap illernartup ineriartortittagaata suna ilisarnaatigaa?
9 Anersaap inerititaata ilisarnaatigisaasa maluginiarnartut ilagaat allanngujuitsuunera. Anersaap inerititaanut ilaasoq sammisassarput tulliuttoq, nuannaarneq, tamatumunnga erseqqissaataavoq. Nuannaarneq naasumut avatangiisini naleqquppasinngikkaluartuniluunniit naajartorsinnaasumut assersuunneqarsinnaavoq. Nunarsuarmi tamarmi Jehovamut kiffarpassuaqarpoq ‘annikilliungaaraluarlutik oqaatsimik ilassinnittunik nuannaarlutik Anersaami Illernartumi.’ (1 Thessalonikamiut 1:6) Allat atugarliorlutilluunniit arlaatigut annaasaqartarput. Jehovalli taakku anersaani atorlugu nuannaarlutik pinertusaarsinnaanngortittarlugillu kamaginnissinnaanngortittarpai. (Jaaku 1:2, 3) Taamatut nuannaarneq sumit aallaaveqarpa?
10. Nuannaarnitsinnut suna aallaaviusarpa?
10 ‘Pisuussutinit allanngujasunit’ Saatanip silarsuaani neqeroorutigineqartartunit allaanerusumik anersaakkut erlinnartuutit Jehovamit pisartakkavut naleqartuartuupput. (1 Timotheusi 6:17; Matthæusi 6:19, 20) Jehovap silarsuarmi nuannaarfiusumi naassaanngitsumik siunissaqalernissamik neriuutissippaatigut. Aamma nuannaarutigaarput silarsuaq tamakkerlugu qatanngutigiissuarnut kristumiunut ilaanerput. Nuannaarnerpulli pingaarnerpaamik Guutimut attaveqarnitsinnik tunngaveqarpoq. Daavip, qimaasutut inuusariaqarsimagaluarluni erinarsorluni Guutimik ima unnersiutiginnittup, misigisimaneratut misigivugut: “Ilumoorsutsit [pitsaaneruvoq] inuunermit. Qarluma erinalimmik unnersiutigissavaatsit, massami nersuummik unnersiutigissavakkit inuunera tamaat, assakkalu qullartikkumavakka illit atinni.” (Tussiaat 63:4, 5) Annikillioraluaraangattaluunniit qamuuna nuannaangaalertarpugut Guutimik unnersiutiginnerusulerluta.
11. Sooq Jehovamut nuannaarluta kiffartornissarput pingaaruteqarpa?
11 Paulusip kristumiut ima kajumissaarpai: “Naalakkami tipaatsuttuinnaritsi! Oqaqqippunga: Tipaatsugitsi!” (Filippimiut 4:4) Uagut kristumiutut nuannaarluta Jehovamut kiffartornissarput sooq pingaaruteqarpa? Akerleriissut Saatanip Jehovap kisimi oqartussaaneranut tunngatillugu pilersitaa pissutigalugu. Saatani Guutimut kajumilluni uummammillu pisumik kiffartorumasoqannginneraavoq. (Jobi 1:9-11) Uagut pisussaanerput piinnarlugu nuannaarnatalu Jehovamut kiffartoraluarutta qujaniarluta pilliutivut ilaannakuussagaluarput. Taamaattumik tussiaasiortup kajumissaarutaa una malinniarlugu ilungersorpugut: “[Jehova] kiffartorfigisiuk tipaatsuummik erinarsorlusi, sassaritsi kiinaata saanut qiimmattarlusi!” (Tussiaat 100:2) Uummatikkut nuannaarluni kajumillunilu kiffartorneq Guutimik naalannarsisitsisarpoq.
12, 13. Eqqarsaatit misigissutsillu nikallornartut akiorniarlugit susinnaavugut?
12 Piviusorli mannaavoq: Ilaannikkut Jehovamut kiffaasut aalajaakkaluartulluunniit nikallortarput isumalluartuarumallutillu akiuuttariaqartarlutik. (Filippimiut 2:25-30) Pissutsinik taama ittunik atugaqartilluta suna iluaqutigisinnaavarput? Efesosimiunut allakkani 5:18, 19-imi ima allassimavoq: “[Anersaamit] peqangaalersinneqaritsi. . . . Tussiutit, unnersiutiginnissutit tussiutaasallu atorlugit, uummammillu pisumik [Jehova] tussiarfigalugulu nipilersorfigisiuk.” Siunnersuut tamanna qanoq malissinnaavarput?
13 Misigissutsit nikallornartut artorsaatigigaangatsigit Jehova ikioqqulluta qinnuigisarsinnaavarput isumalluarnartunik eqqarsaateqarniarsariitigaluta. (Atuakkit Filippimiut 4:6-9). Ilaasa paasisimavaat erinarsuutinik Naalagaaffilersaarutinik tusarnaarlutik niperujoortarnertik isumagissaalernissaminnut nuannersunillu eqqarsaateqalernissaminnut iluaqutaasartoq. Qatanngutip angutip sakkortuumik misiligaanermini nikallorlunilu isumatsattup eqqaamavaa qanoq iliorsimanerluni. “Qamannga pisumik Jehovamut qinujuarnerma saniatigut erinarsuutit Naalagaaffilersaarutit ikittunnguit alanngaarnissaat ilinniarpara. Jehovamut unnersiutiginnissutinik tusarnersunik taakkuninnga nipituumik nipikitsumilluunniit erinarsortarnera qamuuna eqqississutigisarpara. Tamatuma nalaani aamma atuagaq Kom nær til Jehova * saqqummersinneqarpoq. Taanna ukiup tulliuttup ataatsip ingerlanerani marloriarlunga atuarpara. Uummatinnut tarnutitut katsorsaataasutut ippoq. Nalunngilara Jehova ilungersorninnik pilluaqqusisoq.”
“Eqqissineq ataqatigiissutigalugu”
14. Eqqissinerup anersaamit illernartumit ineriartortinneqartartup suna maluginiarnaqutigaa?
14 Ataatsimeersuarnitsinni nunanit tamalaanit peqataaffigineqartartuni nunanit kulturinillu assigiinngitsorpassuarneersut naapeqatigiittarput qatanngutiminnillu kristumiunik peqateqarnertik nuannaarutigisarlugu. Ataatsimeersuarnerni taakkunani ullumikkut Guutip innuttaasa eqqisseqatigiinnerat — aap, silarsuaq tamakkerlugu ataasiussuseqarnerput — uppernarsarneqartarpoq. Ilagiit kristumiut avataanniittut tupaallattarput takugaangamikku inuit akerariissangatinnaraluartut ‘eqqissineq ataqatigiissutigalugu anersaakkut ataasiussuseq ilungersorlutik aalajangiusimaniaraat.’ (Efesosimiut 4:3) Taakkua ilarpassuisa ajugaaffigisariaqarsimasaat eqqarsaatigalugit ataasiussuseq tamanna maluginiarnarpoq.
15, 16. (a) Petrusi qanoq tunuliaqutaqarpa, aamma sooq tamanna taassumunnga unamminiarnarsimava? (b) Jehovap Petrusi isiginnittaatsiminik allannguinissaanut qanoq ikiorpaa?
15 Inuit nunanit kulturinillu assigiinngitsuneersut ataasiussuseqalersinnissaat unamminiarnartuuvoq. Taamatut ataasiussuseqalerumalluni suut ajugaaffigisariaqartarnersut paasisaqarfigiumallugu ukiuni hundredelinni siullerni apustilip Petrusip maligassiaa sammilaariartigu. Taassuma Guutimik nalusunut kipineqanngitsunut isiginnittaasia oqaasiini ukunani erserpoq: “Nalunngilarsi inuiannit takornartanit pisut ilaginissaat pulaarnissaalluunniit juutiusumut ajornartitaasoq. Guutilli paasitippaanga inuk kinaasorluunniit illernanngitsumik mingunnartumilluunniit taassanngikkiga.” (Apustilit Suliaat 10:24-29; 11:1-3) Taamanikkut nalinginnaasumik isiginnittaaserineqartumut naapertuuttumik Petrusi peroriartorsimagunarpoq upperalugu Mosesip inatsisai naapertorlugit taamaallaat juuteqatiminik asanninnissani pisussaaffigalugu. Taassumunnga pissusissamisoorluinnarsimagunarpoq Guutimik nalusunik akeqqatut uumissortariaqartutut isiginninnissaq. *
16 Takorlooriaruk Petrusi Corneliusip illuanut iserami qanoq misigisimasimassanersoq. Inuup Guutimik nalusunik isiginerluisimasuugaluartup taakkununnga “eqqissineq” qaqugumulluunniit ‘ataqatigiissutigilersinnaavaa’? (Efesosimiut 4:3) Aap, ullualuit tamatuma siorna Guutip anersaavata Petrusip uummataa ammarsimavaa isiginnittaasianik allannguisinnaanngortillugu paqumisukkunnaarsinnaanngortillugulu. Takorruukkami Jehovap Petrusi erseqqissaavigaa nammineq, tassa Jehovap, inunnut isiginnittaatsini taakkua amiisa qalipaataannit inuiaassusiannilluunniit sunnerneqarneq ajortoq. (Apustilit Suliaat 10:10-15) Taamaattumik Petrusip Corneliusi ima oqarfigisinnaasimavaa: “Ilumut paasilerpara Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.” (Apustilit Suliaat 10:34, 35) Petrusi isummaminik allannguivoq, ‘qatanngutigiissuillu tamaasa’ (NV) ataasioqatigilluinnalerpai. — 1 Petrusi 2:17.
17. Guutip innuttaasa ataasiussuseqarnerat sooq maluginiarnarpa?
17 Petrusip misigisaa ullumikkut Guutip innuttaasa maluginiarnartumik allanngortarnerannik paasinninnissamut iluaqutigaarput. (Atuakkit Esaja 2:3, 4). Inuit millionillit “inuiaqatigiinnit naggueqatigiinnillu inuiannillu immikkullu oqaasilinnit tamanit pisut” eqqarsartaatsitik ‘Guutip piumasaanut ajunngitsumut, iluarinartumut naammalluinnartumullu’ naleqqussarsimavaat. (Saqqummersitat 7:9; Romamiut 12:2) Taakkua ilarpassui Saatanip silarsuaanit uumissuiffiullunilu akerariiffiullunilu avissaartuuffiusumit sunnertisimasimapput. Guutilli oqaasianik atuaqqissaartarnermikkut anersaallu illernartup ikiuineratigut ‘eqqissinartunik noqqaassutiginninneq’ ilikkarsimavaat. (Romamiut 14:19) Taakkua maannakkut ataasiussuseqarnerat Guutimik naalannarsisitsivoq.
18, 19. (a) Qanoq ililluta ilagiinni eqqissinermik ataasiussusermillu tamatta immikkut siuarsaaqataasinnaavugut? (b) Allaaserisami tulliuttumi suna sammissavarput?
18 Qanoq ililluta Guutip innuttaani eqqissinermik ataasiussusermillu tamatta immikkut siuarsaaqataasinnaavugut? Ilagiit ilarpassuini inoqartarpoq nunamit allamit tamaanga nuussimasunik. Allanik ileqqoqarput immaqalu uagut oqaatsitsinnik oqalunnatik. Ilisarisimallualerniartarpavut? Guutip oqaasiani taamaaliornissamut kajumissaarneqarpugut. Paulusi ilagiinnut Romamiittunut, juutertaqarlutillu juutiunngitsoqartaqartunut, ima allappoq: “Akuereqatigiigitsi soorluttaaq Missiarsip akuerigaatsigut Guutip naalannaatissaanik.” (Romamiut 15:7, NV) Illit najukkanni ilagiinni inoqarpa ilisarisimallualerniarsinnaasannik?
19 Anersaaq illernartoq inuunitsinni sunniuteqarnerulersikkumallugu sunik allanik iliuuseqarsinnaavugut? Allaaserisami tulliuttumi tamanna misissussavarput anersaallu inerititaanut ilaasut sinneri sammissallutigit.
[Quppernerup ataani ilanngussat]
^ imm. 2 Galatiamiut 5:22, 23, NV: “Anersaalli inerititaa tassa asanninneq, nuannaarneq, eqqissineq, kamaginninneq, inussiarnissuseq, ajunngissuseq, upperneq, saamaneq, imminut naalakkersinnaaneq. Taamaattunut inatsisit assortuinngillat.”
^ imm. 3 Inerititaqarneq Jiisusip eqqaasaa ‘anersaap inerititaanut’ ‘qarlullu inerititaannut’ tunngassuteqarpoq. ‘Qarlut inerititaat’ tassa kristumiut Guutip naalagaaffia pillugu tusarliussamik oqaluussissutiginninnermikkut Guutimut pilliutaat qujaniutit. — Hebræerit 13:15.
^ imm. 13 Jehovap Nalunaajaasuinit saqqummersinneqartoq.
^ imm. 15 Mosesimik allakkat pingajuini 19:18-imi ima allassimavoq: “Inuiaqatinnut akinialerituussanngilatit puttarsisaqarnalluunniit. Tullit ilittut asassavat.” Juutit upperisarsiornikkut siuttuisa oqariartaatsit ‘inuiaqat’ aamma ‘tulleq’ juutinuinnaq tunnganerarpaat. Mosesip inatsisaani piumasaqaatigineqarpoq Israelikkut inuiaqatigiinnit allanit avissaaqqajuarnissaat. Ukiuni hundredelinni siullerni juutit upperisarsiornikkut siuttuisa juutiunngitsut tamaasa akeqqatut innuttullu ataasiakkaatut uumissorneqartussatut isigaat, Mosesilli inatsisaani isuma tamanna tapersersorneqanngilaq.
Qanoq akissavit?
• Qatanngutivut qanoq ililluta imminut pilliutigeriaannaalluta asannittuliorfigisinnaavavut?
• Sooq nuannaarluta Jehovamut kiffartornissarput pingaaruteqarpa?
• Ilagiinni eqqissinermik ataasiussusermillu qanoq ililluta siuarsaaqataasinnaavugut?
[Atuaqqissaarnermi apeqqutit]
[Qupp. 23-mi ungalusaq]
“Taakku kristumiuupput ilumoortut”
Detlef Garbep atuakkiaani Zwischen Widerstand und Martyrium — Die Zeugen Jehovas im “Dritten Reich”-imi (Akiuunnerup martyritullu naalliutsitaanerup akornanni — Naalagaaffiit Pingajuanni Jehovap Nalunaajaasui) juutip tigusaasup inuusuttup tigusanut inissiarsuarmut Neuengammemiittumut pigami Jehovamullu nalunaajaasunik naapitseqqaarami misigisani ima oqaluttuarai:
“Uagut juutit Dachauimeersuusugut tigusanut inissiarsuit ilaannut pisugullu juutit allat pigisatik tamaasa toqqortorpaat avitseqatiginnginniassagamisigut. . . . Tigusanut inissiarsuarnut pinngikkallaratta ikioqatigiittarpugut. Maanili tamatta navianartorsiortilluta kikkut tamarmik imminut annaannissartik kisiat eqqarsaatigaat, allat tamaasa puiorlugit. Takorlooriarulli Biibilimik Atuaqqissaartartut qanoq iliortut. Tamatuma nalaani erngup aqqutaanik iluarsaassillutik suleruloortariaqarput. Issippoq, ullorlu naallugu imermi nillaarissumi naloraartarput. Kialuunniit paasisinnaanngilaa tamanna qanoq ilillutik naammagalugu atorsinnaaneraat. Taakku Jehovamit nakussatsinneqarnerartarput. Timiusat agguagarsiarisartakkatik pisariaqartilluinnarpaat, uagutsitummi kaapput. Qanorli pippat? Timiusaatitik tamaasa katersorpaat, affaat namminneq tigullugit affaallu uppeqatiminnut Dachauimit tikeqqammersunut tunniullugit. Aamma taakku kunillugit tikilluaqquaat. Nerinnginnerminni qinupput. Qinoreeramik tamarmik nuannaarpasillutillu eqqissisimarpasipput. Kaakkunnaarnerarput. Taava eqqarsalerpunga: Taakku kristumiuupput ilumoortut.” — Qupp. 440.
[Qupp. 21-mi assiliartat]
Illit ullut tamaasa suliassat allat alalaarlugit Jehovamut qanillinissamut piffissalertarpit?
