Naggatissaq qanilliartortillugu Jehova tatigiuk

“Jehova tamatigut tatigisiuk.” — ESAJA 26:4, NV.

1. Guutip kiffaasa inuillu silarsuarmiittut suna assigiinngissutigaat?

SILARSUARMI inuuffigisatsinni inuit millionillit nalulersimavaat kina tatigissanerlugu aamma suna tutsuigissanerlugu. Tamatumunnga immaqa pissutaavoq pakatsisinneqartuartarnerat aliasuutissinneqartuartarnerallu. Jehovalli kiffaanut tunngatillugu taamaanngilluinnarpoq. Taakkua ilisimassusermit Guutimeersumit siulersorneqaramik nalunngilaat tatigisaqarsinnaallutik silarsuarmit matumannga tamatumanilu ‘naalagartanit’ pitsaanerusumik. (Tussiaat 146:3) Jehova tatigalugu inuunertik siunissartillu taassumunnga tunniuppaallusooq, taassumannga asaneqarnertik oqaatsiminillu eqquutitsiuaannarnera ilisimaaralugu. — Romamiut 3:4; 8:38, 39.

2. Josva Guutip tatiginartuunera pillugu qanoq oqarpa?

² Itsaq Josvap uppernarsarpaa Guutip tatiginartuunera. Toqungajalerluni nunaqqatini ima  oqarfigai: “[Tamassi] uummatissigut tarnissigullu ilisimassavarsi ajunngitsut [Jehovap] Guutissi ilissinnut oqaatigisaasa ilaat ataasinnguarluunniit qammuinnarsimanngitsoq. Tamarmik piviusunngorsimapput, oqaaseq ataasiinnarluunniit maangaannarsimanngilaq.” — Josva 23:14.

3. Guutip aqqa taanna pillugu sumik ersersitsiva?

³ Jehovap neriorsuutini eqquutitittarpai kiffaminik asanninnini piinnarnagu, aammali nammineq aqqi, “sunngorusunnera naapertorlugu taamaalissaanga”-mik (NV) isumalik, pillugu. (2 Mosesi 3:14; 1 Samueli 12:22) Guutip aqqata isumaa pillugu J.B. Rotherham Biibilimik nutsikkami, The Emphasized Bible-p, aallaqqaasiutaani nassuiaavoq Guutip aqqata isumaa tassaasoq Guuti neriorsuutini eqquutitikkumallugit sunngorsinnaasorluunniit. Aqqa tusaraangatsigu eqqaasarparput oqarnermisut tamatigut iliortartoq. Iliuuserisariaqakkani qaqugukkulluunniit sumiluunniillu iliuuserisinnaavai. Artugaqanngilaq. Guuti atermi isumaa naapertorlugu iliortuaannassaaq.

4. (a) Esaja 26:4-mi qanoq kajumissaarneqarpugut? (b) Allaaserisami matumani suna sammissavarput?

⁴ Imminut ima aperigit: ‘Jehova ima ilisarisimalluartigaara taassuminnga tatiginnilluinnarlunga? Jehovap pissaaneqarnera qularutiginagu siunissamut isumalluarpunga?’ Esaja 26:4-mi ima allassimavoq: “Jehova tamatigut tatigisiuk, tassami Jah, Jehova, qaarsoraarput qaqugumulluunniit aalassassanngitsoq.” (NV) Ilumoorpoq Guuti Biibilip nalaani ilaannikkut pisarsimanermisut ullumikkut inuit inuunerannut tupinnartuliornikkut akuliunneq ajortoq. ‘Qaarsuummalli qaqugumulluunniit aalassassanngitsoq’ “tamatigut” tatigisinnaavarput. Guutitta tatiginartup kiffani aalajaatsut ullumikkut qanoq ikiortarpai? Qanoq ikiuisarnersoq misissoriartigu. Ussernartunik akiuinissamut ikioqqugaangatta nakussatsittarpaatigut; soqutiginninngitsoqaraangat akerlilersorneqaraangattaluunniit annertoqqusersortarpaatigut; aamma isumakuluuteqaraangatta napatittarpaatigut. Jehovap pingasutigut taakkunatigut uagutsinnik ikiuisarneranik misissuitilluta, eqqarsaatigiuk illit qanoq ilillutit taanna tatiginerulersinnaanerit.

Eqqunngitsuliornissamut ussernartorsioraangavit Guuti tatigisaruk

5. Guutimik tatiginninnitsinnut misilinneqaataanerpaasinnaasoq suua?

⁵ Jehovamik tatiginnittoqarsinnaavoq taassuma paratiisi makititsisoqarnissaalu — pisussat qilanaarisavut — pillugit neriorsuutaanut tunngatillugu. Taassumali ileqqussatigut najoqqutassiaanut tunngatillugu taassuminnga tatiginninneq, taassuma aqqutigeqqusaanik najoqqutassiaanillu maleruaanerup eqqortuliorneruneranik nuannaarutaanerpaasussaaneranillu qularutiginninngilluinnarneq, allarluinnaavoq. Kunngi Salomo ima oqaaqqissaarivoq: “[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.” (Ussatit 3:5, 6) Maluginiakkit oqaatsit “sumiikkaluaraangavilluunniit” aamma “ingerlavissatit”. Aap, inooriaatsitsinni tamarmi — kristumiutut neriuutitsinniinnaanngitsoq — Guutimik tatiginninnerput takuneqarsinnaasariaqarpoq. Ussernartorsioraangatta taamatut tatiginninnerput qanoq ersersittarsinnaavarput?

6. Ajortunik eqqarsaateqarnaveersaarnissarput qanoq ililluta aalajangiusimanerulersinnaagatsigu?

⁶ Ajortunik tunussineq eqqarsaatini aallartittarpoq. (Atuakkit Romamiut 8:5; Efesosimiut 2:3). Ajortunilli eqqarsaateqarnaveersaarnissaq qanoq ililluni aalajangiusimanerulerneqarsinnaagami?  Periaatsit tallimat uku atorneqarsinnaapput: 1. Qinunikkut Guutimut ikioqqugit. (Matthæusi 6:9, 13) 2. Jehovamut naalanngitsut naalattullu Biibilimi oqaluttuarineqartut eqqarsaatigeqqissaakkit. Taava maluginiaruk naggataatigut qanoq pinersut. * (1 Korinthimiut 10:8-11) 3. Eqqarsaatigiuk ajortuliorneq illit nammineq asasavillu eqqarsartaatsikkut misigissutsikkullu qanoq ajoqutigisinnaagissi. 4. Eqqarsaatigiuk Guuti qanoq misigisarnersoq kiffami ilaat ingasattumik ajortulioraangat. (Atuaruk Tussiaat 78:40, 1990). * 5. Takorlooruk Jehova uummatimigut qanoq nuannaartigisarnersoq kiffaq ilumoorfiginnittoq ajortunik itigartitsilluni eqqortuliortoq takugaangamiuk, kikkunnit tamanit ilisimaneqaraluarpat ilisimaneqanngikkaluarpalluunniit. (Tussiaat 15:1, 2; Ussatit 27:11) Illit Jehovamik tatiginninnerit ersersissinnaavat eqqortuliorlutit.

Soqutiginninngitsoqaraangat akerlilersuisoqaraangallu Guuti tatigisaruk

7. Jeremia qanoq misilinneqarpa, ilaannikkullu qanoq misigisarpa?

⁷ Qatanngutitta ilarpassui sumiiffinni oqaluussinissap ilungersunartorujussuuffiani kiffartorput. Pruffiiti Jeremia sumiiffimmi taama ittumi — Judap ulluini kingullerni eqqissiviilliorfiusuni — kiffartorpoq. Ullut tamaasa uppernikkut misiligaasarpoq naalalluni Guutip eqqartuussutaanik oqaluussissutiginnittarami. Allaat ilaanni allattaata aalajaatsup Barukip qasulluinnarnini naammagittaalliutigaa. (Jeremia 45:2, 3) Jeremia nikallorpa? Ilaanni isumatsassimangaarami ima oqarpoq: “Perloqqunarsili ulloq inunngorfiga . . . Soormi illissamit anisimanerpunga erloqinartut naalliunnartullu kisiisa atugassarissagukkit ullukkalu naajartussallugit kanngusuttuarlunga!” — Jeremia 20:14, 15, 18.

8, 9. Jeremia 17:7, 8-mi aamma Tussiaat 1:1-3-mi allassimasunut naapertuuttumik inerititaqarluartuarniarluta qanoq iliortariaqarpugut?

⁸ Jeremiali uniinnanngilaq. Jehovamik tatiginnittuarpoq, tamannalu pissutigalugu pruffiitip aalajaatsup Jehovap oqaasiisa Jeremia 17:7, 8-miittut eqquunnerat nammineq misigaa: “Pilluaqqunarsili inuk [Jehovamik] tatiginnittoq taassumanilu qimarnguffissarsiortoq. Taassuma assigissavaa orpik kuunnguup killingani ikkunneqarsimasoq, sorlai kuunnguamut anngussimasut, annilaangalissanngitsoq aasap kiassua nalliuppat, uummaajuaannartunik pilutaqartoq, ernumalissanngitsoq panernersuaqarnerani, inerititaarutinngisaannassasorlu.”

⁹ Orpittut paarnalittut naggorissutut ‘kuunnguup killingani ikkunneqarsimasutut’ imaluunniit naatsiivittut paarnalittut imerterneqartuartutut Jeremia ‘inerititaqartuarpoq’. Inunnit guutiitsunit mitallersunit avatangiisiminiittunit sunnerneqartinngilaq. “Kuunnguup” inuunartup pilerfianik aalajangiusimannippoq Jehovallu imminut oqaasii tamaasa maleruarlugit. (Atuakkit Tussiaat 1:1-3; Jeremia 20:9) Jeremia uagutsinnut, ingammik oqaluussiffigiuminaatsumi kiffartortunut, maligassaalluarpoq. Illit oqaluussiffigiuminaatsumi kiffartoruit Jehova tatigilluinnartuaruk. Taassuma illit ‘aterminik nassuerutiginnittuarnissannut’ pinertusaarsinnaalersissavaatit. — Hebræerit 13:15.

10. Sunik pilluaqqussutisiaqarpugut, imminullu qanoq aperisariaqarpugut?

¹⁰ Jehovap ulluni kingullerni makkunani ajornartorsiutit naammagalugit atornissaannut ikiorniarluta anersaakkut avatangiisini inerititaqangaarfiusuniinnissarput isumagaa. Ilaatigut Guutip oqaasianik tamarmik, maannakkut oqaatsinut assigiinngitsorpassuarnut eqqoqqissaartumik nutsikkamik, peqarsinnaanngortippaatigut. Inussiaqatigiit aalajaallutillu silatuut aqqutigalugit anersaakkut inuussutissanik naammangaartunik pilersuivoq. Aamma uppeqaterpassuaqartippaatigut ataatsimiinnerni ataatsimeersuarnernilu uagutsinnik tapersersuisartunik. Aaqqissuussai tamakku atorluartarpigit? Atorluaasartut tamarmik “uummammik iluunngaannit qiimmattassapput”. Guutimut naalakkumanngitsut ‘uummatimikkut naalliunnermik nilliassapput nimaarlutillu isumatsannerminni’. — Esaja 65:13, 14.

Isumakuluuteqaraangavit Guuti tatigisaruk

11, 12. Silarsuarmi ajornartorsiutit eqqarsaatigalugit piviusumik ilisimassuseqarnermut suna ersiutaassava?

¹¹ Siulittuutigineqartutut ajornartorsiutit inuiaat  misigisartagaat maanna amerligaluttuinnarput. (Matthæusi 24:6-8; Saqqummersitat 12:12) Qarsutsinersuaqaraangat inuit nalinginnaasumik qutsinnerusumut, soorlu qaqqanut illulluunniit qaavinut, majuarlutik qimaasarput. Silarsuarmi ajornartorsiutit ingasatsikkaluttuinnartillugit inuit millionillit taamatut iliorpullusooq. Niuernikkut, politikkikkut, upperisarsiornikkulluunniit aaqqissuussat imaluunniit ilisimatusarnerup teknologiilluunniit neqeroorutigisinnaasaat, ‘qutsinnerusorinartut’, qimaaffigisarpaat. Taakkuali ilaannaalluunniit toqqissisimalissutigisinnaanngilaat. (Jeremia 17:5, 6) Jehovalli kiffai isumannaatsumik qimarnguissaqarput — tassa Jehova, ‘qaarsuusoq qaqugumulluunniit aalassassanngitsoq’. (Esaja 26:4, NV) Tussiaasiortoq ima allappoq: “[Jehova] kisimi tassaavoq qaarsora annatsitsisigalu, pallittaalisara.” (Atuakkit Tussiaat 62:7-10). Qaarsoq taanna qanoq ililluta qimarnguigisinnaavarput?

¹² Jehova qimarnguigisarparput oqaasianik, inuit ilisimassusiannut amerlanertigut akerliusartumik, eqqumaffiginninnitsigut. (Tussiaat 73:23, 24) Inuit ilisimassusiannik tutsuiginnittut immaqa ima oqarumassapput: ‘Ataasiaannarlutit inuusussaavutit; inuunerit sapinngisannik atorluarniaruk.’ ‘Suliffinni qaffassarniarit!’ ‘Aningaasarpassuaateqalerniarniarit!’ ‘Pisiortorsuataarniarit!’ ‘Angalaniarit; misigisassarsiorniarit!’ Ilisimassuserli Guutimeersoq siunnersuummut matumunnga naapertuuppoq: “[Silarsuarmik] atuisut tamakkiisumik atuinngitsutut [issapput]; silarsuarmimi matumani pisartut allanngorarput.” (1 Korinthimiut 7:31, NV) Taamatuttaaq uagut Jiisusip kajumissaarpaatigut Jehovamik pallorfiginninnitsinnik pingaarnerpaatitsiuaqqulluta, taamaalilluta ‘pisuussutinik qilammiittunik’ (NV) katersissaagut, tappavani isumannaalluinnartumiissammata. — Matthæusi 6:19, 20.

13. Johannesip allagai siulliit 2:15-17-imi allassimasut eqqarsaatigalugit imminut qanoq aperisariaqarpugut?

¹³ ‘Silarsuarmut’ ‘taassumalu piinut’ illit isiginnittaatsinnit erserpa Guutimik tatiginnilluinnartutit? (1 Johannesi 2:15-17) Jehovap pilluaqqussutai, Guutip naalagaaffianut kiffartorneq taamatullu kiffartornermi immikkut pisinnaatitaaffiit silarsuup neqeroorutaanit pingaarnerutippigit? (Filippimiut 3:8) ‘Isivit tappissuutinnissaa’ ilungersuutigaajuk? (Matthæusi 6:22, NV) Soorunami Guutip kissaatiginngilaa isumaalliornissat akisussaassuseqanngitsumillu iliornissat, ingammik ilaqutaqaruit isumassugassannik. (1 Timotheusi 5:8) Kissaatigaa kiffami imminik — Saatanip silarsuaanik nungujartortumiunngitsoq — tatiginnilluinnarnissaat. — Hebræerit 13:5.

14-16. Kristumiut ilaasa ‘isiminnik tappissuutitsinertik’ Jehovamillu pallorfiginninnerminnik pingaarnerpaatitsinertik qanoq iluaqutigisimavaat?

¹⁴ Assersuuteqariarta. Richard Ruthilu pingasunik nukangasunik meeraqarput. Richard ima oqarpoq: “Qamannga pisumik misigaanga Jehovamut kiffartornermi iliuuseqarnerusinnaallunga. Ilorrisimaarluta inuuvugut, misigaangali piffissaq sinneruttuinnaq Guutimut kiffartornermut atortarlugu. Jehovamut qinunikkut tamanna saqqummiutereerlugu naatsorsuusioreerlutalu Ruthilu isumaqatigiippugut suliffinni ittuusoq aperissagiga sapaatip-akunneranut ulluni sisamaannarni sulisalersinnaanerlunga — nunatsinni aningaasatigut ajornartorsiortoqaraluartoq. Akuerisaavunga, qaammallu ataaseq qaangiutinngitsoq taamatut sulisalerpunga.” Richard maanna qanoq misigiva?

¹⁵ Ima oqaluttuarpoq: “Siornatigornit 20 procentimik aningaasarsiakinnerulerpunga, maannali ullut ilaquttama ilaginerinut meeqqannillu ilinniartitsininnut perorsaaninnullu atortakkakka ukiumut ullunik 50-inik amerlipput. Piffissaq kiffartornermut atortagara marloriaatinngortissinnaasimavara, Biibilimik atuaqqissaaqatigisartakkama amerlassusii pingasoriaatinngortissinnaasimallugit  ilagiinnilu akisussaaffeqarnerulersinnaasimallunga. Meeqqallu eqqarsaatigalugit ikiuutaanerusinnaalerama Ruth ikiorti-pioneriullattaasinnaasimavoq. Taamatut sulisarsinnaatillunga taamatut suliuarnissara aalajangiusimavara.”

¹⁶ Roy Petinalu, imminni suli najugaqartumik panillit, piffissaq tamaat kiffartulersinnaaniassagamik siornatigutut sulitigiunnaarsimapput. Roy ima oqaluttuarpoq: “Uanga sapaatip-akunneranut ullut pingasut sulisarpunga, Petinalu sapaatip-akunneranut ullut marluk sulisarpoq. Aamma illumiit inissiamut, isumagiuminarnerujussuarmut, nuuppugut. Ernertaarlutalu panissaannginnitsinni pioneriuvugut, pioneritullu anersaaqarunnaanngisaannarpugut. Taamaammat qitornavut inersimasunngormata piffissaq tamaat kiffartoqqilerpugut. Kiffartornermi pilluaqqussutisiavut aningaasanut qanorluunniit amerlatigigaluartunut naleqqiunneqarsinnaanngillat.”

Uummatit ‘eqqissinermut Guutimit pisumut’ paaritiguk

17. Inuunermi nalorninartoqaraluartoq illit Biibili qanoq tuppallersaatigaajuk?

¹⁷ Arlaannattaluunniit naluaa aqagu qanoq pisoqassanersoq, “suut tamarmik periarfissatigut nalaatsornertigullu pisarmata”. (Oqaluussisartup oqaasii 9:11, 1990) Aqagussamili pisussanik ilisimanninnginneq ullumi qamuuna eqqissiunnaarutigisariaqanngilarput, inuit Guutimut qanittumik attaveqannginnertik pissutigalugu toqqissisimanngitsut pisarnerattut. (Matthæusi 6:34) Apustili Paulusi ima allappoq: “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.” — Filippimiut 4:6, 7.

18, 19. Guutip qanoq tuppallersartarpaatigut? Nassuiaruk.

¹⁸ Qatannguterpassuit misilinneqarnerminni Jehovamit qamuuna eqqissisimatinneqarsimapput. Qatanngut arnaq ima oqaluttuarpoq: “Nakorsap pilattaasartup annilaangasaarlunga aalersortinnissannut akuersitinniarsarisaqattaarpaanga. Ilaatigut ima oqarfigeqqaarpaanga: “Soormiaasiit aalersortikkumanngitsutit?” Taamatut oqarfigimmanga, aamma kingusinnerusukkut, Jehovamut nipaatsumik qinuvunga, taassumalu qamuuna eqqissisimatittarpaanga. Misigaanga qaarsutut aalajaatsigalunga. Aakilliornera pissutigalugu sanngiikkaluarlunga aalajangiusimasara Biibili tunngavigalugu paasiuminartumik nassuiarsinnaavara.”

¹⁹ Ilaannikkut Guutip uppeqatitsinnit pisariaqartitatsinnik ikiorneqarlutalu tuppallersarneqarnissarput piffissarluunniit eqqorlugu anersaakkut inuussutissaqarnissarput isumagisarpaa. Qularnanngitsumik qatanngut ima oqartoq tusarsimassavat: “Allaaserisaq taanna tassa pisariaqartilluinnagara! Soorlu uanga eqqarsaatigalunga allataq!” Pissutsit atukkavut qanorluunniit ikkaluarpata imaluunniit pisariaqartitavut suugaluarpata Jehovap asannittuliorfigissavaatigut tatigigutsinni. Taassumami ‘savaatigaatigut’ ‘aterminillu taagorneqartilluta’ (NV). — Tussiaat 100:3; Johannesi 10:16; Apustilit Suliaat 15:14, 17.

20. Saatanip silarsuaa nungutitaappat Jehovap kiffai sooq aarlerinaatsumik najugaqassappat?

²⁰ ‘Ullormi Jehovap kamaffissaani’ qanilliartorasuartumi Saatanip silarsuaani tutsuigineqartut tamarmik aserugaassapput. Kuulti, sølvi nalillillu allat toqqissisimalersitsisinnaanngilluinnassapput. (Sefania 1:18; Ussatit 11:4) Jehova, ‘qaarsoq qaqugumulluunniit aalassassanngitsoq’, qimarnguigineqarsinnaasutuaassaaq. (Esaja 26:4, NV) Taamaattumik taassuminnga tatiginnilluinnarnerput ersersitsigu aqqutigeqqusaasigut naapertuilluartutigut naalalluta saqiuarnitsigut, soqutiginninngitsoqarlunilu akerlilersuisoqaraluartoq Guutip naalagaaffia pillugu tusarliussamik oqaluussissutiginninnitsigut isumakuluutittalu tamaasa taassumunnga tunniunnerisigut. Taamaaliortarutta ‘aarlerinaatsumik najugaqassaagut eqqissillutalu inuussalluta perlussanik aarlerigisaqarnata.’ — Ussatit 1:33.

[Quppernerup ataani ilanngussat]

Uku nassuiarsinnaavigit?

Qanoq ililluta Guutimik tatiginnissinnaavugut

• eqqunngitsuliornissamut ussernartorsioraangatta?

• soqutiginninngitsoqarlunilu akerlilersuisoqaraangat?

• isumakuluuteqaraangatta?

[Atuaqqissaarnermi apeqqutit]

[Qupp. 17-mi assiliartaq]

Guutip najoqqutassiaanik aalajangiusimanninneq pilluarnarpoq

[Qupp. 19-mi assiliartaq]

“Jah, Jehova, qaarsoraarput qaqugumulluunniit aalassassanngitsoq”