Jiisusip sumik ilinniartikkaatigut

Kristusimik malinninneq qanoq paasisariaqarpa?

Jiisusi imminut uppertunngortoqaraangat amerlanertigut ima kajumissaarisarpoq: “Malinnga!” (Matthæusi 9:9; 19:21) Jiisusimik malinninneq, tassa kristumiuuneq, qanoq paasisariaqarpa? Tamatumunnga tunngatillugu apeqqutit pingaarutillit pingasut sammeriartigit.

Allanik qanoq pinnittariaqarpugut?

▪ Jiisusimut ajoqersugaasup allanik qanoq pinnittarnissaq pillugu siunnersuutit malittariaqarpai. Assersuutigalugu Jiisusi ima oqarpoq: “Inunnut qanorluunniit iliorfigeqqugussi ilississaaq taamatut iliorfigisigit.” Ajuallatsinneqaruimmi? Jiisusip ajoqersukkani ima oqarfigai: ‘Inuit isumakkeerfiginngikkussigit, taava aamma Ataatassi unioqqutitsinissinnik isumakkeerfigissanngilaasi.’ — Matthæusi 6:15; 7:12.

Jiisusip aappallit ima siunnersorpai: “Tusarparsi oqartoqarsimasoq: ‘Allasiussanngilatit’. Uangali oqarfigaassi: Kialuunniit allap nulia pilerigalugu isigiguniuk taanna uummatimigut allasiorfigereerpaa.” Kristumiup ilumoortup isummani uummatinilu Jiisusip ajoqersuutaanit sunnerneqartittarpai. — Matthæusi 5:27, 28.

Kristumiut ilumoortut inunnik allanik ikiuiniarlutik namminneq ilorrisimaarnissartik tunulliuttarpaat. Jiisusi imminut pilliutigeriaannaavoq. Assersuutigalugu ilaanni Jiisusi apustiliilu oqaluussiartorlutik angalanerminni qasunartorujussuusinnaasumi allaat nerinissaminnut piffissaqanngillat. Taamaattumik Jiisusip taakku umiatsiaamik inoqanngitsumukaqatigai qasuersaarsinnaaniassagamik. Inuilli tusarpaat sumukarnersoq, arpallutillu siuarput. Biibilimi ima oqaluttuarineqarpoq: “Jiisusi niugami inuppassuit takuai, nalligingaalerpaalu savatut paarsisoqanngitsutut immata; amerlasuunillu ajoqersulerpai.” (Markusi 6:30-34) Akornutissaqaleraluaraangavilluunniit Guutip ilinnut iliuusereqqusaatut iliortarnikkut Jiisusi ilaarsinnaavat.

 Sooq allat nutaarsiassaq nuannersoq pillugu oqaluttuuttariaqarpavut?

▪ Jiisusip ajoqersukkani nutaarsiassamik nuannersumik oqaluussissutiginninnissaannik ilinniartippai. Apustilini ima oqarfigai: “Oqaluussiartoritsi ima: Qilaap Naalagaaffia qanillivoq!” (Matthæusi 10:7) Tusarliussaq Jiisusip ajoqersugaanit oqaluussissutigineqartoq pingaaruteqangaarpoq, Jiisusimi Guutimut qinunermini ima oqarpoq: ‘Inuuneq naassaanngitsoq tassaavoq ilinnik, ilumut kisimi Guutiusumik, ilisimanninneq.’ — Johannesi 17:3.

Jiisusip suliassaq ajoqersukkami millionillit suleqataaffigisassaat siulittuutigaa. Ima oqarpoq: ‘Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu.’ (Matthæusi 24:14) Illit Guutip naalagaaffia pillugu paasisaqarsimaguit Biibilimilu allassimasut upperigukkit qularnanngitsumik allat paasisatit pillugit oqaluttuukkusussavatit. Jiisusimut ajoqersuganngortut ilarpassuisa eqqarlitik siulliullugit Guutip naalagaaffia pillugu oqaluttuuppaat. — Johannesi 1:40, 41.

Sooq kuisittariaqarpugut?

▪ Jiisusi kuussuarmi Jordanimi kuisikkami qinunermini ima oqarsimagunarpoq: ‘Tikiuppunga piumasat malillugu iliorumallunga, Guuti.’ (Hebræerit 10:7) Guutip piumasaatut iliorusukkuit illittaaq kuisittariaqarputit. Jiisusi ima peqqussuteqarpoq: ‘Inunnik inuiannit tamaneersunik ajoqersuganngortitsigitsi kuillugit.’ — Matthæusi 28:19, NV.

Kuisinneq sunik akisussaaffittaqarlunilu pilluaqqussutissartaqarpa? Jiisusimut ajoqersukkat kuisimasut tarnikkut iluunngarlutik Guuti kiffartorfigaat. Guutip inatsisaa imaattoq Jiisusip issuarpaa: “[Jehova] Guutit asassavat uummatikkut iluunngarlutit tarnikkullu iluunngarlutit.” (Matthæusi 22:37) Aamma ima oqarpoq: “Uannik malinnikkumasoq imminut isumakkiissaaq.” (Matthæusi 16:24) Kuisinneq imminut isumakkeernermut, imaluunniit imminut naaggaarnermut, Guutimullu tunniulluinnarnermut assersuutaavoq. Guutimut taamatut immikkut ittumik attaveqartut taanna qinnuigisinnaavaat ajortuliaminnik isumakkeerfigeqqullutik ilerasuuteqannginniassagamik. — 1 Petrusi 3:21. (wp10 05/01-E)

Amerlanerusunik paasissutissaqarpoq atuakkami matumani Biibilimi sorpiaat ajoqersuutigineqarpat?-mi kapitali 18-imi. Jehovap Nalunaajaasuinit saqqummersinneqartoq.