Jiisusip sumik ilinniartikkaatigut

Ilaqutariittut inuuneq pillugu

Aappariinnermut isiginnittaaseq qanoq ittoq ilaqutariinnik pillualersitsisarpa?

Aappariinneq aaqqissuussaavoq illernartoq. Jiisusi avinneq akuerisaanersoq pillugu aperineqarami ima oqarpoq: “Atuarsimanngilisiuk pileqqaarneranniit Pinngortitsisup angut arnarlu pinngortikkai oqarlunilu: ‘Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq?’ Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai. . . . Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.” (Matthæusi 19:4-6, 9) Aappariit Jiisusip siunnersuutaa malippassuk imminnullu ilumoorfigeqatigiippata ilaqutariinniittut tamarmik toqqissisimassallutillu nuannaassapput.

Sooq Guutimik asanninneq ilaqutariinni pillualersitsisarpa?

Jiisusi ima oqarpoq: “‘[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu.” Inatsisit annersaata tullia suua? Ima nangippoq: “Tullit ilittut asassavat.” (Matthæusi 22:37-39) Tamatumunnga ilaapput qanigisatit — ilaquttatit. Tassa ilaqutariittut pilluarnissaq Guutimut ajunngitsumik attaveqarnermik tunngaveqarpoq, Guutimummi asanninnerput kajumississutigalugu asaqatigiissaagut.

 Uiusut nuliaasullu qanoq ilillutik imminnut pillualersissinnaappat?

Uiusut Jiisusip maligassiaa malikkunikku nuliatik pillualersissavaat. Jiisusi ilagiinnut, assersuutaasumik nuliaminut, asanninnermini imminut pilliutigeriaannaavoq. (Efesosimiut 5:25) Jiisusi ima oqarpoq: ‘Inuup Ernera tikiutinngilaq kiffartorfigeqqulluni, namminerli kiffartussalluni.’ (Matthæusi 20:28) Isumassukkaminut qalliunianngisaannarlunilu naakkittaatsuunngilaq. Kisiannili ‘nukissaqalersittarpai’. (Matthæusi 11:28, NV) Taamaattumik uiusut oqartussaassusertik inussiarnersumik atortariaqarpaat ilaqutariinniittut tamarmik iluaqutissaannut.

Aamma nuliaasut Jiisusip maligassiaa iluaqutigisinnaavaat. Biibilimi ima allassimavoq: ‘Kristusip Guuti niaqoraa.’ Aamma allassimavoq ‘arnap angut niaqorigaa’. (1 Korinthimiut 11:3) Jiisusip Guutimut naalatsigitinnini imminut nikanarsaataasutut isiginngilaa. Ataatani ataqqingaarpaa. Jiisusi ima oqarpoq: ‘Tamatigut iluarisaanik iliortarpunga.’ (Johannesi 8:29) Nuliaasoq Guutimik asanninnini ataqqinninninilu pissutigalugit uimi siulersuineranut naalatsigitittoq ilaquttaminik nuannaalersitseqataangaarsinnaavoq.

Angajoqqaat Jiisusip meeqqanut isiginnittaasia qanoq ilinniarfigisinnaavaat?

Jiisusip meeqqat piffissaqarfigisarpai eqqarsaataallu misigissusiilu soqutigalugit. Biibilimi ima allassimavoq: “[Jiisusip] meerannguit imminut qaaqquai oqarlunilu: ‘Meerannguit uannut qaaginnarlit.’” (Lukasi 18:15, 16) Ilaanni meeqqat Jiisusimut uppernerminnik ersersitsisut inersimasunit isornartorsiorneqarput. Kisianni Jiisusip meeqqat nersualaarlugillu inersimasut ima oqarfigai: “Imaattut atuanngisaannarpisigit: ‘Naalungissat miluttullu qarninit erinalimmik unnersiutigineqarnissat piareersarpat’?” — Matthæusi 21:15, 16.

Meeqqat Jiisusi sumik ilinniarfigisinnaavaat?

Jiisusi anersaakkut ittunik soqutigisaqartuugami meeqqanut maligassaalluarpoq. Jiisusi aqqaneq-marlunnik ukioqartoq ‘naalaffimmi ajoqersuisut akornanni [nassaarineqarpoq] taakku tusarnaarai aperisarlugillu’. Qanoq kinguneqarpa? “Tusarnaartut tamarmik ilisimassusia akissutaalu ajasoorutigeqaat.” (Lukasi 2:42, 46, 47) Jiisusilli ilisimasaqarnini makitasuunnguutiginngilaa. Angajoqqaaminut ataqqinninnissaminut kajumississutigaa. Biibilimi ima allassimavoq: ‘Taakkununnga naalatsigitittuarpoq.’ — Lukasi 2:51, NV. (wp09 11/01-E)

Amerlanerusunik paasissutissaqarpoq atuakkami Biibilimi sorpiaat ajoqersuutigineqarpat?-mi * kapitali 14-imi

[Quppernerup ataani ilanngussaq]