Nalunngereerpiuk?

Biibili eqqarsaatiginagu Jiisusip ilumut inuusimaneranut sunik uppernarsaatissaqarpa?

▪ Oqaluttuarisaanermik ilisimatuut kristumiuunngitsut arlallit Jiisusip kinguninnguagut inuusut taanna eqqaavaat. Taakkua Cornelius Tacitus, Romamiut kaasereqarnerata oqaluttuarisaaneranik allattoq, ilagaat. Ukiumi 64-imi Romami ikuallannersuaq pillugu Tacitus allappoq kaasari Nero ajunaarnersuarmut tamatumunnga akisussaasuunerarneqartoq. Tacitusip eqqaavaa Nerop inuit eqimattakkuutaat inunnit nalinginnaasumik kristumiunik taaneqartartut pisuutinniarai. Tacitus ima allappoq: “Inuit taakku Kristusi, Tiberiusip naalakkersuinerata nalaani Pontiusi-Pilatusimit toqutaasoq, ateqaatigaat.” — Cornelius Tacitus’s Årbøger.

Aamma oqaluttuarisaanermik ilisimatuup juutip Flaviusip Josefusip Jiisusi eqqaavaa. Allaatigisami Festusip, Romamiut Judæami naalagaatitaata, toquneranit (ukiup 62-ip missaani) taassumalu kingoraartaata, Albinusip, ivertinneqarneranut pisimasut pillugit oqaluttuarfiusumi, Josefusip eqqaavaa palasiunerup Ananusip (Annasip) “Sanhedrinimi eqqartuussisut qaaqqugai, angullu Jaakumik atilik, Jiisusip Kristusimik taagorneqartup qatanngutaa allallu taakkununnga sassartillugit.” — Jewish Antiquities, XX, 200 (ix, 1).

Sooq Jiisusi Kristusimik taagorneqarpa?

▪ Iivangkiiliuni oqaluttuarineqarpoq inngili Gabrieli Mariamut saqqummerami naartulernissaa nalunaarutiginiarlugu oqarfigigaa ernertaassani Jiisusimik atsissagaa. (Lukasi 1:31) Taamanikkut juutit akornanni ateq taanna nalinginnaavoq. Oqaluttuarisaanermik ilisimatuup juutiusup Josefusip inuit 12-it Jiisusimik atillit Biibilimi eqqartorneqanngitsut eqqaavai. Mariap ernera “Nazaretimioq”-mik taagorneqarpoq, taamaalilluni uppernarsarneqarpoq Jiisusi Nazaretimeersuusoq. (Markusi 10:47) Aamma “Kristusi”-tut, imaluunniit Jiisusitut Kristusitut, ilisimaneqarpoq. (Matthæusi 16:16) Taaguut taanna qanoq isumaqarpa?

Oqaaseq “Kristusi”, grækerisut Christosʹ aamma oqaaseq hebræerisooq Masjīʹach (Missiarsi) isumai assigiipput. Oqaatsit taakku isumaqarput “Tanitaq”. Jiisusi sioqqullugu oqaaseq taanna allanut tunngatillugu eqqortumik atorneqartarsimavoq. Assersuutigalugu Mosesi, Aroni aamma kunngi Daavi tamarmik tanitatut eqqartorneqarput. Tassa Guutimit toqqagaapput akisussaaffeqartussatut oqartussaassutsimillu atuinissamut. (3 Mosesi 4:3; 8:12; 2 Samueli 22:51; Hebræerit 11:24-26) Jiisusi, Missiarsi siulittuutaasoq, Jehovamut sinniisuusut pingaarnersaraat. Taamaattumik taaguutigitinneqartoq “Kristusi Guutip uumasup ernera” naleqqulluinnarpoq. — Matthæusi 16:16; Danieli 9:25.

[Qupp. 12-mi assiliartaq]

Flaviusip Josefusip assinga titartagaq