Saatanip naalakkersueriaasia iluatsinnavianngilaq

‘Iluanngitsoq atugarliortussaavoq.’ — OQALUUSSISARTUP OQAASII 8:13.

1. Ajortut qanittukkut eqqartuunneqarumaarnerannik ilisimanninneq sooq tuppallersaataava?

SIUSINNERUSUKKUT kingusinnerusukkulluunniit inuit ajortut akisussaatinneqarumaarput. Iliuuserisimasaminnut akisussaatinneqarumaarput. (Ussatit 5:22; Oqaluussisartup oqaasii 8:12, 13) Tamanna nalunagu tuppallersaataavoq, ingammik naapertuilluarnermik nuannarisaqartunut naapertuilluanngitsunillu misigisaqarsimasunut ajortunillu naalliutsinneqarsimasunut. Ajortut akisussaatinneqartussat pingaarnersaat tassaavoq ajussutsimut ataataasoq, Saatani Diaavulu. — Johannesi 8:44.

2. Sooq Edenimi akerleriissutinngortoq aalajangiiffigineqartinnagu piffissaq sivisooq ingerlasariaqarsimava?

² Saatanip, nammineq pingaaruteqassutsiminik  ingasattumik eqqarsaatiginnittup, Naatsiivimmi Edenimi inuit siulliit Jehovap naalakkersueriaasianik ajattuisippai. Tamatuma kingunerisaanik inuit siulliit marluk Saatani Jehovap eqqortumik oqartussaassusianut pikitsitseqatigilerpaat ajortilinngorlutillu. (Romamiut 5:12-14) Soorunami taakkua ataqqinninngitsuliornerat pikitsitsinerallu qanoq kinguneqarumaarnersoq Jehovap nalunngilaa, kingunerineqanngitsoortussaanngitsorli tamanna pinngortitanut sianissusilinnut tamanut erseqqilluinnartariaqarpoq. Taamaattumik akerleriissut aalajangiiffigineqartinnagu pikitsitsisullu kukkulluinnarnerat erseqqilluinnalersinnagu piffissaq sivisooq ingerlaqqaartariaqarpoq.

3. Naalakkersueriaatsit inuit pilersitaat qanoq isigaavut?

³ Inuit Jehovamit siulersorneqarumannginnamik namminneq naalakkersueriaatsinik pilersitsisariaqarput. Apustili Paulusi uppeqatiminut Romamiittunut allappoq ‘naalakkersuisunut qullersarisaminnut’ naalatsigitittariaqartut. Paulusip nalaani ‘naalakkersuisut’ pingaarnerpaamik tassaapput naalakkersuisut Romamiut kaasarimit Neromit, ukiumit 54-imiit 68-imut Kr.in.king. naalakkersuisumit, siulersorneqartut. Paulusi allappoq naalakkersuisut taakku ‘atuuttuusut Guutip atulersitarigai’. (Atuakkit Romamiut 13:1, 2). Paulusi taama allammat imaappa taanna inuit naalakkersuinerannik Guutip naalakkersueriaasianinngarnit tapersersuinerusoq? Naamerluinnaq. Una piinnarpaa Jehova naalakkersueriaatsinik inuit pilersitaannik akuerinnitsillugu kristumiut ‘Guutip aaqqissuussineranik’ ataqqinnissasut naalakkersuisunillu taakkuninnga akuerinnissasut.

Aqqut ajunaarnermut sammisoq

4. Nassuiaruk sooq inuit naalakkersueriaasiat pinngitsoorani iluatsinngitsuussasoq.

⁴ Inuit naalakkersueriaasii Saatanimit sunnerneqarsimasut pinngitsooratik iluatsinngitsuussapput. Sooq? Pissutaasut ilaat tassaavoq naalakkersueriaatsit taakku ilisimassusermik Guutimeersumik tunngaveqannginnerat. Jehova kisimi naammalluinnartumik ilisimassuseqarpoq. Taamaattumik pitsaanerpaamik qanoq naalakkersuisoqarsinnaanera pillugu tutsuiginartumik uagutsinnik siunnersuisinnaasutuaavoq. (Jeremia 8:9; Romamiut 16:27) Inuttut namminneq misilinneqarnerminnik kukkunerminnillu amerlanertigut ilinniarfiginnittariaqartartutut pinnani, Jehovap nalunngittuaannarpaa aaqqiissutitut suna pitsaanerpaanersoq. Taamaattumik naalakkersueriaaseq sunaluunniit taassuma siulersuineranut naapertuutinngitsoq iluatsinngisaannassaaq. Tamannaannaq pissutigalugu — tamatumunnga tunngatillugu pissutiginiarneqartoq ajortoq eqqaassanngikkaanni — Saatanip naalakkersueriaasiata allaanerusup, tassa inuit iluaqutigalugit naalakkersuinerata, iluatsinnginnissaa aallaqqaammulli qularnaappoq.

5, 6. Suna pissutigalugu Saatani Jehovamik akerlilersuilerpa?

⁵ Inuk silappaarissoq amerlanertigut suliassamik pinngitsoorani iluatsinngitsoortussamik suliaqarnaveersaartarpoq. Suliassarli taamaattoq suliarileruniuk naggataatigut kukkusimanini nassuerutigisariaqassavaa. Oqaluttuarisaanermi uppernarsineqaqattaarsimavoq Pinngortitsisumik ajugaqanngitsumik akerlilersuineq iluaqutaanngitsoq. (Atuaruk Ussatit 21:30, 1990). * Saatanili imminut pingaartorsuutilluni makitallunilu Jehovamik tunussivoq. Taamaalilluni aqqutikkut ajunaarnermuinnaq sammisukkoorniarluni piaaraluni aalajangerpoq.

⁶ Saatanip soqqusaatsuunera kingusinnerusukkut ersersinneqarpoq naalakkersuisumit Babylonimiuusumit pingaakujulluni ima oqarsimasutut oqaluttuarineqartumit: “Qilammut pavunnassaanga napparlugu tappavani issiavissaarsuara Guutip ulloriaasa qulaanni; issiavississaanga qaqqami guutit katisimasarfianni avanersuaq ittumi, qullassallunga nuissat qulaannut, Qutsinnerussaartoq assigilerlugu.” (Esaja 14:13-15) Naalakkersuisup taassuma silatusaarnani suliariniagaralua iluatsinngilaq, aamma Babylonimi kunngit kinguaariit nikanarsaataasumik nungupput. Taamatuttaaq Saatani taassumalu silarsuaa qanittukkut piuneerussaallutik ajorsarluinnassapput.

Sooq Jehovap tamakkua tamarmik atuunnissaat akuerigaa

7, 8. Jehovap ajortut atuunnissaannik akuerinnikkallarnerata iluaqutissartaasa ilaannik eqqaasaqarit.

⁷ Inuit ilaat immaqa eqqarsassapput sooq Jehovap inuit Saatanimik illersuilernissaat  naalakkersueriaatsimillu allaanerusumik pinngitsoorani iluatsinnavianngitsumik toqqaanissaat pinngitsoortissimannginneraa. Tassami taanna Guutiugami ajugaqanngitsoq qularnanngivissumik tamanna pinngitsoortissinnaagaluarpaa. (2 Mosesi 6:3) Taamaaliornaveersaarporli. Jehova ilisimassutsini tunngavigalugu aalajangerpoq piffissaq sivisunerusoq eqqarsaatigalugu pitsaanerpaassasoq inuit pikitsitsinerannut akuliutinngikkallaruni. Naggataatigut qularnarunnaarsinneqassaaq Jehova naalakkersuisuusoq naapertuilluarlunilu asannittoq, aamma inuit ilumoorfiginnittut taassuma aalajangigaa iluaqutigiumaaraat.

⁸ Eqqarsaatigeriaruk inuit Saatanimik itigartitsisimasuugunik Guutillu naalakkersuineranut naalatsigitikkumanngisimanngitsuugunik erloqqissutit qanoq amerlatigisut pinngitsoorsimassagaluaraat! Jehovalli inuit naalakkersuinissaannik akuerinnikkallarniarluni aalajangernera iluaqutissartaqarpoq. Eqqortuliorusuttut paasilluarsimavaat Guutimut naalanneq taassuminngalu tatiginninneq silatusaarnerusut. Ukiuni hundredelinni qaangiuttuni inuit naalakkersueriaatsinik assigiinngitsorpassuarnik misileraasimapput, taakkuali arlaannaalluunniit piukkunnarsimanngilaq. Tamanna Jehovap kiffaasa Jehovap naalakkersueriaasiata pitsaanerpaaneranik upperinninnerulissutigisimavaat. Ilumoorpoq Jehovap Saatanip naalakkersuinerata ajortup atuunnissaanik akuerinninnera inuit, aamma Guutimut kiffartortut aalajaatsut, naalliuuteqarnerannik kinguneqartoq. Ajortulli atuunnerannik akuerinnikkallarnera aamma pallorfiginnittunut aalajaatsunut iluaqutissartaqarpoq.

Pikitsitsineq Jehovap naalannarsisinneqarneranik kinguneqartoq

9, 10. Nassuiaruk Saatanip naalakkersuinera Jehovamut qanoq kinguneqartoq.

⁹ Jehovap inuit Saatanimut naalatsigitinnissaannik namminnerlu naalakkersuinissaannik akuerinninnera Jehovap naalakkersueriaasianik tutsuiginarunnaarsitsisimanngilluinnarpoq. Oqaluttuarisaanermi paasinarsivoq Jeremiap isumassarsisitaalluni inuit namminneq naalakkersuisinnaannginnerat pillugu allagaasa eqqortuunerat. (Atuaruk Jeremia 10:23, NV). * Aammattaaq Saatanip pikitsitsineratigut Jehova pissusiminik ajunngitsunik suli erseqqinnerusumik ersersitsinissamut periarfissaqalerpoq. Qanoq ililluni?

¹⁰ Saatanip kingunipiloqartumik naalakkersueriaaseqarnera pissutigalugu Jehovap pissusii naammalluinnartut suli erseqqinnerungaalersimapput. Taamaalilluni taanna kiffaminit suli nersorneqarnerulerpoq. Aap, tupinnaraluartumik Saatanip naalakkersueriaasia Jehovap ataqqinartinneqarneranik  kinguneqarsimavoq. Tamanna Jehovap kisimi oqartussaassutsimi taamatut unammillerneqarneranut pitsaalluinnartumik periarneranut erseqqissaataavoq. Tamanna paasiuminarsarniarlugu Jehovap pissusii sammilaarsinnaavavut takullugulu Jehovap Saatanip ajortumik naalakkersuinerata atuunnissaanik akuerinninnermigut pissusimi suli amerlanerusutigut ersersinneqarnissaat qanoq isumagisimaneraa.

11. Jehovap asanninnera qanoq erserpa?

¹¹ Asanninneq. Biibilimi allassimavoq ‘Guuti tassaasoq asanninneq’. (1 Johannesi 4:8) Pingaarnerpaamik Guutip inummik pinngortitsinera Guutip asanninneranut ersiutaavoq. Aamma tupinnangaartumik pinngortinneqarsimanerput mianerinningaalersitsisoq Guutip asanninneranut takussutissaavoq. Jehovap aamma inuit alianaatsumik, pilluarnissaannut pisariaqartunik tamanik peqareersumik, angerlarsimaffeqarnissaat asannilluni isumagaa. (1 Mosesi 1:29-31; 2:8, 9; Tussiaat 139:14-16) Ajussuserli silarsuarmi atuutilerniariartoq Jehovap asanninnini allatigut ersersippaa. Qanoq? Apustili Johannesi naapertorlugu Jiisusi ima oqarpoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” (Johannesi 3:16) Guuti ajortilinnik utertitsiniarluni ernituaminik nunarsuarmut aallartitsinerminit suli maluginiarnarnerusumik inuiannut asannittuliorsinnaasimava? (Johannesi 15:13) Taamatut nuanningaartumik asannittuliornera aamma maligassaalluarpoq. Jiisusip pisarsimaneratut, inuit Guutip imminut pilliutigeriaannaalluni asanninneranik ulluinnarni ersersitsinissamut periarfissaqalerput. — Johannesi 17:25, 26.

12. Jehovap pissaanera qanoq ililluni erserpa?

¹² Pissaaneq. Guuti ajugaqanngitsoq kisimi inuunermik pilersitsinissamut pissaaneqarpoq. (Saqqummersitat 11:17; Tussiaat 36:10) Inuk inunngornermini pappiaqqatullusooq allaffigineqarsimanngitsutut ippoq. Inuk toqugaangat pappiaraq taanna inuup taassuma aalajangigarisimasaanik, iliuuserisimasaanik misilittagaanillu ukiuni taassuma inuuffiini inuttut pissusianik ilusilersuisimasunik ‘immersorneqarsimasarpoq’. Paasissutissat taakku Jehovap eqqaamasinnaavai. Piffissanngorpat Jehovap inuk taanna uummarteqqissinnaavaa toqunnginnermini nammineq inuttut pissuseqarsimaneratorpiaq aamma inooriaaseqarsimaneratorpiaq pissuseqartillugulu inooriaaseqartillugu. (Johannesi 5:28, 29) Taamaalilluni Jehovap toqu toqusimasunik makititsinissamut pissaaneqarnerminik ersersitsinissamut periarfissaqalissutigaa, inuit toqusarnissaat aallaqqaammulli siunertaminut ilaanngikkaluartoq. Aap, Jehova ilumut ‘Guutiuvoq Ajugaqanngitsoq’.

13. Jiisusip pilliutaa Jehovap naapertuilluarneranut naammalluinnartumut qanoq ersiutaava?

¹³ Naapertuilluarneq. Jehova salluneq ajorpoq, aamma naapertuilluanngitsumik iliorneq ajorpoq. (5 Mosesi 32:4; Titusi 1:2) Ilumuussutsimut naapertuilluarnermullu najoqqutassiat qutsinnerpaat aalajangiusimajuaannarpai, taamaaliornini imminut ajoqutaarpasikkaluaraangalluunniit. (Romamiut 8:32) Jehovap ernermi asangaakkami nappakkami anniartitaaffimmi Guutimik mitalliisutut ilumuunngitsutut isigineqarluni toqunera anniaatigingaarsimassavaa! Inunnilli naammalluinnanngitsunik asannikkami Jehova taamatut naalliunnartumik pisoqarnissaanik akuerinninnissamut piumassuseqarpoq. Taamaaliorporlu naapertuilluarnermut najoqqutassiaminik naammalluinnartumik aalajangiusimannikkumalluni.  (Atuakkit Romamiut 5:18-21). Silarsuaq naapertuilluannginnermik ulikkaartoq Jehovap naapertuilluarnermut tunngatillugu maligassaalluarnerpaanerminik ersersitsinissamut periarfissaqalissutigaa.

14, 15. Jehovap ilisimassutsini erinitsajuissutsinilu asseqanngitsut qanoq ersersissimavai?

¹⁴ Ilisimassuseq. Adami Evalu ajortulioriiginnartut Jehovap taakkua pikitsitsinerata kingunipiluinik qanoq iluarsiiumaarnini paasinarsisippaa. (1 Mosesi 3:15) Taassuma taamatut iliuuseqapallannera kiffaminullu siunertaminik paasinarsisitsiartuaarnera ilisimassuseqarneranut ersiutaapput. (Romamiut 11:33) Suulluunniit Guutip naammasserusutaminik pitsaasumik naammassinninnissaanik akornusiisinnaanngillat. Silarsuarmi sorsuffiullunilu kinguaassiuutitigut inuunerluffiusumi, silatusaanngiffiullunilu naalanngiffiullunilu naakkittaaffiusumi aamma kinaassusersiorfiullunilu ilumoortuusaarfiusumi Jehova ilisimassutsip piviusup suuneranik pinngortitaminut ersersitsinissamut periarfissaqarluarsimavoq. Ajoqersugaq Jaaku ima allappoq: “[Ilisimassuseq] pavannga pisoq pingaarnerpaamik minguitsuuvoq, tamatumalu saniatigut eqqissinermik nuannarisaqartuuvoq, saamasuulluni, ilakkuminartuullunilu, nallittuingaartuulluni, ajunngitsunik inerititaqarluni, kinaassusersiortuunani unneqqarissuullunilu.” — Jaaku 3:17.

¹⁵ Erinitsajuissuseq kamaginninnerlu. Jehovap erinitsajuissusia kamaginninneralu erseqqissimassanngikkaluarput taanna inuit naammalluinnanngissutaannik, ajortuliaannik kukkussutaannillu naammaginniinnarsimanngitsuuppat. Jehovap ukiuni tusindilinni kajumilluni naammaginniinnarsimaneranit erserpoq nuanningaartut tamakkua taassuma pissuserilluinnarai, tamannalu qujamasuutigingaartariaqarparput. Apustilip Petrusip eqqortumik allassimaneratut ‘Naalakkatta erinitsajuissusia annassutissatsitut’ isigisariaqarparput. — 2 Petrusi 3:9, 15.

16. Sooq Jehovap isumakkeerfiginnikkumanera nuannaarutaangaartarpa?

¹⁶ Isumakkeerfiginnikkumaneq. Tamatta ajortiliuvugut, tamattalu kukkusaqattaartarpugut. (Jaaku 3:2; 1 Johannesi 1:8, 9) Jehovap kajumilluni ‘isumakkeerfiginnittuartarnera’ qujamasuutigingaarsinnaavarput! (Esaja 55:7) Eqqarsaatigiuk, ajortilittut naammalluinnanngitsutut inunngorsimanerput pissutigerpiarlugu, Guutip kukkunivut pillugit isumakkeerfigigaangatigut tamatuminnga qamannga pisumik nuannaarutiginninnissamut periarfissaqartartugut. (Tussiaat 51:7, 11, 19) Jehovap pissusia qamuuna atortinnartoq nammineq misigigaangatsigu taassuminnga asanninnerulertarpugut aamma allanik pinninnermut tunngatillugu taassuma maligassiaanik malinninnissamut kajumissisarpugut. — Atuaruk Kolossemiut 3:13.

Sooq silarsuaq manna napparsimasoq

17, 18. Saatanip naalakkersueriaasia sutigut iluatsissimanngila?

¹⁷ Ukiut hundredellit ingerlaneranni Saatanip silarsuarmik aaqqissuussinera — taassuma naalakkersueriaasia — iluatsinngitsoortuarpoq. 1991-imi aviisimi The European-imi ima allassimasoqarpoq: “Silarsuaq napparsimava? Aap, assut, kisianni  . . . Guutip pisuussutiginngilaa — inuit-uku silarsuarmik nappaateqalersitsisut.” Tamanna ilumuungaarami! Saatanip sunniineratigut siuaasatta siulliit Jehovap naalakkersuinera tunullugu inuit naalakkersuinerat qinerpaat. Taamaalillutik naalakkersueriaatsimik iluatsinngitsoortussamik pilersitsipput. Inuit silarsuarmi tamarmi anniaatigalugillu erloqqissutigisaat, taakkua naalakkersuinerata tataannartumik nappaateqalersimaneranut, tassa iluatsinngitsoorluinnarsimaneranut, takussutissaapput.

¹⁸ Saatanip naalakkersueriaasia namminissarsiorusulersitsivoq. Namminissarsiornerulli asanninneq, Jehovap naalakkersueriaasianut tunngaviusoq, ajugaaffigisinnaanngisaannarpaa. Saatanip naalakkersueriaasia iluatsissimanngilaq. Patajaatsuulersitsinanilu toqqissisimalersitsinanilu pillualersitsisimanngilaq. Jehovap naalakkersueriaasia pitsaanerpaavoq! Naalakkersueriaasiata pitsaanerpaaneranut ullumikkut uppernarsaatissaqarpugut? Aap, tamanna allaaserisami tulliuttumi sammissavarput.

[Quppernerup ataani ilanngussat]

Naalakkersuineq pillugu uku sumik ilinniarfigaavut?

• Romamiut 13:1, 2

• Ussatit 21:30, 1990

• Jeremia 10:23, NV

• Kolossemiut 3:13

[Atuaqqissaarnermi apeqqutit]

[Qupp. 24-mi assiliartat]

Saatanip naalakkersuinera inuiannut iluaqutaasimanngisaannarpoq

[Suminngaanneernerat]

Asseq: U.S. Army

Asseq: WHO; P. Almasy

[Qupp. 25-mi assiliartaq]

Jehova toqusunik makititsinissamut pissaaneqarpoq

[Qupp. 26-mi assiliartaq]

Jehovap asanninnera naapertuilluarneralu ernerata pilliutaanit erserput