Jiisusip pisimaneratut ’Diaavulu akiorsiuk’

„Diaavulu akerartorsiuk [akiorsiuk, NV], taava ilissinnit qimaassaaq.“ — JAAKU 4:7.

1. Jiisusip nunarsuarmi akerlilersorneqarumaarnini pillugu suut nalunngilai?

JIISUSIP KRISTUSIP nalunngilaa Diaavulumit akerlilersorneqassalluni. Guutimmi pulateriaarsuk, taamaalillunilu pinngortitaq anersaajusoq ajortoq pikitsitsiumatooq pulateriaarsuk atorlugu oqaluttoq, ima oqarfigaa: „Akerariissikkumaarpassi illit arnarlu [Jehovap peqatigiissortai qilammiittut], illit kinguaassat taassumalu kinguaassaa. Taassuma [Jiisusip Kristusip] niaqqut aserortissavaa, illillu taassuma kimmia aserortissavat.“ (1 Mosesi 3:14, 15, NV; Saqqummersitat 12:9) Jiisusip kimmiata aserorterneqartussaanera maani nunarsuarmi peqqarniitsumik toqunerata taassumunnga ataavartumik ajoqutaasussaannginneratut paasisariaqarpoq, Jehovammi taanna qilammi naalannassutsimut makitikkumaarmagu. Pulateriaarsuulli niaquata aserorterneqartussaanera Diaavulup toqumik kinguneqartussamik saassunneqarnerminit aniguisinnaanngisaannassaneratut paasisariaqarpoq. — Atuakkit Apustilit Suliaat 2:31, 32; Hebræerit 2:14.

2. Sooq Jehovap qularutiginngilaa Jiisusi Diaavulumik akiuisinnaassasoq?

² Jehovap qularutiginngilaa Jiisusip nunarsuarmiinnermini suliassaminik naammassinnikkumaarnera Diaavulumillu akiuiumaarnera. Sooq Jehovap tamanna taama qularutiginngitsigisinnaavaa? Ukiorparpassuit tamatuma siorna Jiisusi qilammi pinngortikkamiuk, malinnaaffigisimagamiuk, aamma nalunnginnamiuk ’suliortoq’ (1900) „pinngortitaanilu tamani erniusut siullersaat“ taanna naalallunilu aalajaatsuusoq. (Ussatit 8:22-31; Kolossemiut 1:15) Taamaattumik Guutip Jiisusi nunarsuarmut aallartikkamiuk Diaavululu taassuminnga toqumut allaat  misiliinissaanut akuerigamiuk qularutiginngilaa ernituani ajugaassasoq. — Johannesi 3:16.

Jehovap kiffani paarai

3. Diaavulup Jehovamut kiffaasut qanoq isigai?

³ Jiisusip Diaavulu ’silarsuup matuma naalagaaneratut’ eqqartorpaa ajoqersukkanilu nammineq malersorneqarsimanermisut malersorneqarumaarnerat pillugu mianersoqqullugit. (Johannesi 12:31; 15:20) Silarsuup, Saatanimut Diaavulumut naalatsigitittup, kristumiut ilumoortut uumissorpai Jehovamut kiffartormata, naapertuilluarnermillu oqaluussissutiginnimmata. (Matthæusi 24:9; 1 Johannesi 5:19) Diaavulup ingammik tanitanik suli nunarsuarmiittunik kingusinnerusukkullu Kristusip naalagaaffiani qilammiusumi taassuminnga naalakkersueqateqartussanik saassussisarpoq. Aamma Jehovamut nalunaajaasorpassuarnik nunarsuarmi paratiisiusumi naassaanngitsumik inuunissamik neriuuteqartunik saassussisarpoq. Guutip oqaasiani ima mianersoqquneqarpugut: „Akerartortersi Diaavulu løvitut uiannisaartutut angalasarpoq iisassarsiorluni.“ — 1 Petrusi 5:8.

4. Guutip innuttaasa Diaavulumik akiuinerminni iluatsittarnerat sumut uppernarsaataava?

⁴ Peqatigiissortatut Jehovamit annertoqqusersorneqaratta Diaavulumik akiuinerput iluatsittarpoq. Eqqarsaatigeriaruk kisermaassillutik naalakkersuisut oqaluttuarisaanermi peqqarniinnerpaartaasa ukiuni 100-ni kingullerni Jehovap Nalunaajaasuinik nungutitsiniarsarisimanerat. Taamaakkaluartorli Jehovap Nalunaajaasui amerligaluttuinnarput maannalu nunarsuaq tamakkerlugu ilagiinni 100.000-init amerlanerusuni 7 millioningajaallutik. Kisermaassillutilli naalakkersuisut naakkittaatsut Jehovap innuttaanik malersuisut piujunnaareerput!

5. Esaja 54:17 Jehovap kiffaanut qanoq eqquuppa?

⁵ Itsaq Jehovap Israelikkut oqaluffigigamigit nuliaminillu taallugit ima neriorsuivoq: „Sakkut ilinnut sakkuaatissatut saffiukkat atorsinnaassuseqassanngillat, oqqat ilinnik unnerluutiginnittut tamaasa eqqartuutitissavatit pisuusutut. Tassa [Jehovap] kiffaasa pissarsiassaat, iluarnerat uannit pivoq.“ (Esaja 54:6, 17) Neriorsuut tamanna ’ulluni kingullerni’ makkunani silarsuaq tamakkerlugu Jehovap innuttaanut eqquussimavoq. (2 Timotheusi 3:1-5, 13) Diaavulu akiortuarparput, sakkullu Guutip innuttaanik nungutitsiniarsarinermini taassuma atortagai sunniuteqarsinnaassanngillat, Jehovap iligimmatigut. — Tussiaat 118:6, 7.

6. Saatanip naalakkersuinerata qanoq pineqarumaarnera pillugu Danielip siulittuutaani sumik paasisaqarpugut?

⁶ Saatanip naalakkersuineranut tunngasut tamarmik pissutsit aaqqissuussaanerata ajortup maanna atuuttup naggatissaani qanilliartupallattumi suujunnaarsinneqassapput. Pruffiiti Danieli Guutimit isumassarsisitaalluni ima siulittuivoq: „Kunngit taakkua [nalitsinni naalakkersuisut] inuutillugit qilaap Guutiata naalagaaffik qaqugumulluunniit atasussaq [qilammi] pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat [maanna atuuttut] tamaasa aserortissavai suujunnaarsillugillu, namminerli soraajuitsumik atassaaq.“ (Danieli 2:44) Tamanna pippat Saatanip inuillu naammalluinnanngitsut naalakkersuinerat peerutissaaq. Saatanip pissutsinik aaqqissuussaanut tunngasut tamarmik peerulluinnassapput, Guutillu naalagaaffia akerlilersorneqarnani nunarsuarmut tamarmut naalakkersuisinnaassaaq. — Atuaruk 2 Petrusi 3:7, 13.

7. Qanoq ililluta nalunngilarput Jehovap kiffai Diaavulumik akiuisinnaassasut?

⁷ Qularutissaanngilaq Jehovap peqatigiissortaata atajuarnissaa anersaakkullu siumukartuarnissaa. (Atuaruk Tussiaat 125:1, 2.) Uagummi inuttut ataasiakkaatut? Biibilimi allassimavoq uagut Jiisusip pisimaneratut Diaavulumik akiuisinnaajumaartugut. Jiisusimmi Johannesi aqqutigalugu siulittuutaani erserpoq ’amerlangaartut’, nunarsuarmi inuunissamik neriugisallit, Saatani akerlilersuigaluartoq aaqqissuussaanerup matuma naggatissaani aniguiumaartut. Biibilimi oqaluttuarineqarpoq taakku ima torlulasut: „Annassut Guutitsinnit issiavissaarsuarmi issiasumit Savaaqqamillu [Jiisusimit Kristusimit] pivoq.“ (Saqqummersitat 7:9-14) Tanitat Saatanimik ajugaaffiginnittutut eqqartorneqarput; aamma taakkua suleqataasa, ’savat allat’, taanna akiorpaat. (Johannesi 10:16; Saqqummersitat 12:10, 11) Akiorsinnaassagaannili ilungersortariaqarlunilu ’ajortumit annaanneqarnissaq’  qamannga pisumik qinnutigineqartariaqarpoq. — Matthæusi 6:13.

Diaavulumik akiuinermut tunngatillugu naammalluinnartumik maligassiuisoq

8. Diaavulup inoqajuitsumi Jiisusimik ussiinera siulleq Biibilimi qanoq oqaluttuarineqarpa, Jiisusili qanoq piva?

⁸ Diaavulup Jiisusi assuarnaakkunnaarsinniarsaraa. Inoqajuitsumi Jiisusi usserpaa aalajangiusimasaanik qasukkartitsisinniarlugu Jehovamullu naalanngitsinniarlugu. Jiisusili Diaavulumik akiuinermut tunngatillugu naammalluinnartumik maligassiuivoq. Jiisusi ulluni unnuanilu 40-ni iisinnginniareerluni qularnanngitsumik nererusussuataarsimassaaq. Saatani ima oqarpoq: „Guutip ernerippatit ujaqqat makku timiusanngoqqukkit.“ Jiisusilli pissaaneq Guutip imminut tunniussaa namminissarsiorluni atorusunngilaa. Imali oqarpoq: „Allassimavoq: ’Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.’“ — Matthæusi 4:1-4; 5 Mosesi 8:3.

9. Sooq Diaavulup timikkut pisariaqartitatsinnik pissusissamisoortunik atornerluiniarsarinera akiortariaqarparput?

⁹ Ullumikkut Diaavulup Jehovap kiffaasa timikkut pisariaqartitaat kissaataallu pissusissamisoortut atornerlunniarsarisarpai. Taamaattumik kinguaassiuutitigut ussernartut, silarsuarmi inuunerluffiusumi amerlaqisut, aalajangersimalluta akiortariaqarpavut. Guutip oqaasiani erseqqissumik ima allassimavoq: „Nalugassiuk iluaatsut Guutip naalagaaffia kingornussarsiarissanngikkaat? Tammaqinasi! Kinguaassiuutitigut inuunerluttut guutipilussiortulluunniit, allasiortut anguteqatiminnoortartulluunniit, . . . Guutip naalagaaffia kingornussarsiarissanngilaat.“ (1 Korinthimiut 6:9, 10) Tassa erseqqippoq inuit inuunerluttut inooriaatsiminnillu allannguiumanngitsut Guutip silarsuassaani nutaami inuunissamut periarfissinneqassanngitsut.

10. Matthæusi 4:5, 6 naapertorlugit Saatanip Jiisusimik assuarnaakkunnaarsitseriaraluarnermini suna alla ussiiniutigaa?

¹⁰ Jiisusip usserneqarnerisa ilaat pillugu Biibilimi ima allassimavoq: „Taava Diaavulup Jiisusi illoqarfimmut illernartumut ingerlaqatigaa, naalaffiullu inngianut pisippaa oqarfigalugulu: ’Guutip ernerippatit taava samunga nakkarit. Allassimavormi: „Inngilini peqqussavai, taakkualu kissumiassavaatsit isikkat ujaqqamut sumulluunniit kalluteqqunagu.“’“ (Matthæusi 4:5, 6) Saatanip isumaa naapertorlugu Jiisusip taamatut takussutissiinermigut Missiarsiunini immikkut ittumik ersersissinnaavaa. Taamaaliortuuppalli tamanna assuarnassagaluarpoq anneruniarnerussagaluarlunilu, aamma Guutimit akuerineqarnanilu annertoqqusersorneqarsimassanngikkaluarpoq. Aamma pisumi tamatumani Jiisusi Jehovamut assuarnaattuarpoq allassimaffimmillu issuaanermigut akilluni. Ima oqarpoq: „Allassimavortaaq: ’[Jehova] Guutit misilissanngilat.’“ — Matthæusi 4:7; 5 Mosesi 6:16.

11. Saatanip qanoq ussersinnaavaatigut, tamannalu qanoq kinguneqarsinnaava?

¹¹ Saatanip immaqa Jehovamik misiliinissamut ussissavaatigut. Qanoq ililluni? Silarsuarmit matumannga akuerisaaniaqqulluta kajumissaarsinnaavaatigut.  Atisanut isikkorissarnermullu tunngatillugu mutinik silamiorpaluttunik ilaarsinissatsinnut aliikkutassanilluunniit nalorninartunik pingaarnerutitsilernissatsinnut sunnersinnaavaatigut. Siunnersuutilli Biibilimiittut sumiginnarlugit silarsuaq ilaarutsigu, tamatuma kingunipiluinut inngilinit sernissorneqarnissarput naatsorsuutigisinnaavarput? Kunngi Daavi Batsebamut tunngatillugu ajortuliaminik peqqissimissutiginnikkaluarluni iliuutsimi kingunerinut asattuunneqanngilaq. (2 Samueli 12:9-12) Jehova naleqqutinngitsumik, immaqa silarsuarmik ikinnguteqarnikkut, misilinniaqinatigu. — Atuakkit Jaaku 4:4; 1 Johannesi 2:15-17.

12. Ussiiniummi Matthæusi 4:8, 9-mi eqqaaneqartumi suna siunertarineqarpa, Jiisusillu Saatani qanoq akivaa?

¹² Diaavulup inoqajuitsumi Jiisusimut ussiiniutaasa ilaat alla politikkikkut pissaaneqarnissamik neqeroorummik ilaqarpoq. Silarsuarmi naalagaaffiit tamaasa taakkualu alutornassusiat Jiisusimut takutippai imalu oqarluni: „Tamakku tamaasa ilinnut tunniutissavakka pallorfigigumma.“ (Matthæusi 4:8, 9) Taassuma Jehovap kisimi pisinnaatitaaffigisaanik pallorfigineqarniarsarinerata Jiisusimillu Jehovamut ilumuunngitsuliortitsiniarsarinerata kannguttaassusia! Inngili ilumoorfiginnittuugaluartoq pallorfigineqarumassutsiminik eqqarsaatiginnittuarnermigut Saataninngorpoq Diaavulu ajortiliusoq, piumatooq ussiisorlu ajortoq. (Jaaku 1:14, 15) Tamatumanngali allaanerulluinnartumik Jiisusip Ataataminut qilammiusumut aalajaattuarnissani aalajangiusimavaa taamaattumillu ima oqarluni: „Nigorit, Saatani! Allassimavormi: ’[Jehova] Guutit pallorfigissavat taannalu kisiat kiffartuullugu.’“ Taamaalilluni Jiisusip taamatut paatsuugassaanngitsumik oqaaseqarluni Diaavulu akioqqippaa. Guutip ernera Saatanip silarsuaaniittunik sunilluunniit kissaateqanngilaq, pinngortitamillu anersaajusumik ajortumik taassuminnga pallorfiginninngisaannassaaq! — Matthæusi 4:10; 5 Mosesi 6:13; 10:20.

’Diaavulu akiorsiuk, taava ilissinnit qimaassaaq’

13, 14. (a) Diaavulup silarsuarmi naalagaaffiit tamaasa neqeroorutigigamigit suna siunertaraa? (b) Saatanip qanoq ililluni ajortunngortinniarsaraatigut?

¹³ Saatanip silarsuarmi naalagaaffiit tamaasa Jiisusimut takutinnerisigut pissaaneq inuup allap pigisimanngisaannagaa taassumunnga neqeroorutigaa. Saatanip neriuutigaa Jiisusip takusani nuannarissagai politikkikkullu siuttutut silarsuarmi pissaaneqarnerpaanngorsinnaanerminik qularinnikkunnaassutigissagai. Ullumikkut Diaavulup silarsuup naalagaaffiinut pissaanermik neqeroorfiginngilaatigut, uummativulli ajortunngortinniarsarisarpai isigisavut, tusartakkavut eqqarsaativullu aqqutigalugit.

¹⁴ Diaavulup silarsuaq tamaat naalagaaffigilluinnarpaa. Taamaammat silarsuarmi matumani tusagassiuutit pissaaneqarfigai. Taamaattumillu aamma tupinnanngilaq silarsuarmi isiginnaarneqarsinnaasut, tusarnaarneqarsinnaasut atuarneqarsinnaasullu kinguaassiuutitigut inuunerlunnermit nakuusernermillu sunnerneqarluinnarsimanerat. Aamma ussassaarusiortartut pisariaqartinngilluinnakkatsinnik kissaateqalersinniarsaraatigut. Tamakkua aqqutigalugit Diaavulup pigisanik isitsinnut, siutitsinnut isumatsinnullu kajungernartunik usserniartuarpaatigut. Najoqqutassianulli Biibilimiittunut akerliusunik isiginnaarumanatalu tusarnaarumanatalu atuarumannginnitsigut ima oqartarpugullusooq: „Nigorit, Saatani!“ Saatanip silarsuaanik minguttuumik aalajangersimalluinnarluta itigartitsinitsigut Jiisusi ilaartarparput. Aamma suliffimmi, atuarfimmi, eqqaamiutsinnut ilaquttatsinnullu sapiilluta Jehovamut nalunaajaasutut Kristusimullu ajoqersukkatut imminut ilisaritikkaangatta Saatanip silarsuaanut ilaannginnerput ersertarpoq. — Atuaruk Markusi 8:38.

15. Sooq Diaavulu akiorsinnaassagutsigu eqqumajuartariaqarpugut?

¹⁵ Pingajussaanik iluatsinngitsumik Jiisusimik Guutimut assuarnaakkunnaarsitseriaraluarnermi kingorna „Diaavulup Jiisusi qimappaa“. (Matthæusi 4:11) Saatanilli Jiisusimik ussiisarunnaarnissani siunertarinngilaa, ima allassimagami: „Diaavulup [inoqajuitsumi] ussiiniutissaarukkami qimakkallarpaa.“ (Lukasi 4:13) Diaavulu akiorsinnaasimagaangatsigu Jehova qutsavigisariaqarparput. Guutimulli ikiortissarsiortuartariaqarpugut, Diaavulumi piffissami imminut naleqquttumi — ilimagisatsiguunngitsoq  — usserniarluta utissaaq. Taamaattumik qanorluunniit misilinneqaraluarutta eqqumajuartariaqarpugut piareersimajuartariaqarlutalu Jehovamut kiffartornermi illernartumi pinertusaarnissamut.

16. Nukimmik sakkortuumik sumik Jehovap tunisarpaatigut, aamma sooq taanna qinnutigisassavarput?

¹⁶ Diaavulup akiornissaanut ikiorneqarsinnaajumalluta nukik qilammi nunarsuarmilu sakkortunerpaaq — Guutip anersaava illernartoq — qinnutigisariaqarparput, piumaarparpullu. Taanna pissutigalugu nammineq iliuuserisinnaanngisatsinnik iliorsinnaanngussaagut. Jiisusip ajoqersukkani neriorsoqqissaarpai Guutip anersaavanik illernartumik tunineqarsinnaassasut. Ima oqarpoq: „Ilissi [naammalluinnanngitsuususi taamaattumillu ilaatigut] ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ (Lukasi 11:13) Jehovamut qinnutigiuartigu taassuma anersaavata illernartup pinissaa. Diaavulumik akiuiniarluta aalajangiusimanninnitsinni nukimmit nukinnit tamanit sakkortunerpaajusumit tamatumannga tapersersorneqarluta akiuunnermi ajugaasinnaavugut. Qamannga pisumik qinujuarnitta saniatigut anersaakkut sakkutuussutit tamarmiusut Guutimeersut atisariaqarpavut ’atasinnaaqqulluta Diaavulup qoqassiniaraangatigut’. — Efesosimiut 6:11-18.

17. Jiisusip sumik nuannaarutiginninneq Diaavulumik akiuinissaminut iluaqutigaa?

¹⁷ Jiisusi Diaavulumik akiuinissamut suli allamik iluaquteqarpoq, aamma uagut taanna iluaqutigisinnaavarput. Biibilimi allassimavoq Jiisusip „nuannaarnissaq siunerminiittoq pillugu sanningasulik [nappagaq anniartitaaffik, NV] naammagalugu [atoraa] kanngunarsaataanera soqutiginagu, maannalu Guutip issiavissaarsuata talerpiata tungaani issialluni“. (Hebræerit 12:2) Tamatumunnga assingusumik nuannaarsinnaavugut Jehovap kisimi oqartussaassusia tapersersorutsigu, aqqa illernartoq ataqqigutsigu akissarsiassarlu — inuuneq naassaanngitsoq — eqqaamajuarutsigu. Qanoq nuannaartigissaagut Saatani suliaalu tamarmik ataavartumik suujunnaarsinneqarpata ’qanilaartullu nuna kingornuppassuk pilluangaarnerminnillu nuannaarutiginnilerpata’! (Tussiaat 37:11) Taamaattumik Jiisusip pisimaneratut Diaavulu akiortuaruk. — Atuaruk Jaaku 4:7, 8. (w08 11/15-E)

Qanoq akissavit?

• Jehovap innuttaminik paarsisarneranut suut uppernarsaataappat?

• Diaavulumik akiuinermut tunngatillugu Jiisusi qanoq maligassiuiva?

• Qanoq ilillutit Diaavulu akiorsinnaaviuk?

[Atuaqqissaarnermi apeqqutit]

[Qupp. 29-mi assiliartaq]

Silarsuarmik ikinnguteqarneq Guutimut akeranngornermik kinguneqartarpoq

[Qupp. 31-mi assiliartaq]

Jiisusi Saatanip silarsuup naalagaaffii tamaasa neqeroorutigimmagit itigartitsivoq