Oqaatsit minguitsut atorlugit oqalussinnaavit?

TUSARNAARUK

Oqaatsit minguitsut atorlugit oqalussinnaavit?

„Inuiaat nutaanik oqaaseqalersissavakka, oqaatsinik minguitsunik, tamarmik Jehovap aqqanik torlorfiginnissinnaaqqullugit suleqatigiilluarlutillu taassuminnga kiffartorfiginnissinnaaqqullugit.“ — SEFANIA 3:9, NV.

1. Jehovap nuanningaartumik sumik tunivaatigut?

OQAATSINIK atuisinnaanermik tunissut inunninngaanneersuunngilaq, inunnilli pinngortitsisumeersuuvoq, Jehovamit Guutimit. (2 Mosesi 4:11, 12) Taassuma inuk siulleq, Adami, oqalussinnaassusiliinnarnagu aamma nutaanik oqaasiliorsinnaassusilerpaa, taamaalilluni oqaatsit ataasiakkaat atorsinnaasai amerlanerulersinnaallutik. (1 Mosesi 2:19, 20, 23) Paasinarsivoq tunissut tamanna nuanningaartuusoq! Allaat tunissut tamanna pissutigalugu inuit Ataatartik qilammiusoq attaveqarfigisinnaavaat taassumalu aqqa naalannartoq unnersiutigisinnaallugu.

2. Sooq inuit oqaatsit ataasiinnaat atorlugit oqalukkunnaarpat?

²Inuit oqaluttuarisaaneranni ukiuni 1700-ni siullerni kikkut tamarmik oqaatsit ataatsit atorlugit oqalupput, ’assigiinnik oqaaseqarlutik’. (1 Mosesi 11:1) Taavali Nimrodip nalaani pikitsitsisoqalerpoq. Inuit naalanngitsut Jehovap unnersuussutaanut akerliulluinnartumik iliorlutik kingusinnerusukkut Babelimik taaneqartumut katersuupput, sumiiffimmi ataasiinnarmiiginnarnissartik aalajangiusimalluinnarlugu. Napasuliarsualiorlutik aallartipput, Jehovamik ataqqinninnissaq pinnagu, ’tusaamasanngoqqullutilli’. Taamaattumik Jehovap pikitsitsisut oqaasii paatsiveerutitippai oqaatsinik assigiinngitsunik oqalutsilerlugit. Tamanna nunarsuarmut tamarmut siammarnerannik kinguneqarpoq. — Atuaruk 1 Mosesi 11:4-8.

3. Jehovap Babelimi pikitsitsisut oqaasii paatsiveerutitimmagit qanoq pisoqarpa?

³Ullumikkut silarsuaq tamakkerlugu oqaatsit assigiinngitsut tusindillit oqaaserineqarput, aap, missiliuunneqarpoq oqaatsit assigiinngitsut 6800-nik sinneqartut. Oqaatsit taakkua tamarmik immikkut eqqarsartaatsinik assigiinngitsunik tunngaveqarput. Tassa Jehovap oqaatsinik paatsiveerutsitsinermini pikitsitsisut oqaasii ataatsit puiortiinnarsimarpasinngilai. Aamma taakkua isumaanni oqaatsinik allanik nalunngisaqalersippai, eqqarsartaasii allanngortillugit oqaatsillu tamaasa immikkut assigiinngitsunik grammatikkilerlugit. Tupinnanngilaq napasuliap sumiiffia kingusinnerusukkut Babelimik taaneqarmat, taaguut „paatsiveerunneq“-mik isumaqartoq! (1 Mosesi 11:9) Soqutiginarpoq Biibilimi taamaallaat ullumikkut assigiinngitsorpassuarnik oqaaseqartoqarneranut pissutaasoq naammaginartumik nassuiarneqarmat.

Oqaatsit minguitsut nutaat

4. Jehovap ullutsinni qanoq pisoqarnissaa siulittuutigisimavaa?

⁴Guutip Babelimi akuliunneranik oqaluttuaq qanorluunniit tiguartinnartigigaluarpat soqutiginarnerungaartumik pingaaruteqarnerungaartumillu ullutsinni pisoqarsimavoq. Jehova pruffiitini Sefania aqqutigalugu ima siulittuivoq: „Taamanikkussamut inuiaat nutaanik oqaaseqalersissavakka, oqaatsinik minguitsunik, tamarmik Jehovap aqqanik torlorfiginnissinnaaqqullugit suleqatigiilluarlutillu taassuminnga kiffartorfiginnissinnaaqqullugit.“ (Sefania 3:9, NV) ’Oqaatsit minguitsut’ taakku suuppat, aamma taakkua atorlugit oqalunnissaq qanoq ililluta ilikkarsinnaavarput?

5. Oqaatsit minguitsut suuppat, oqaatsinillu taakkuninnga atulersitsineq qanoq kinguneqarpa?

⁵Oqaatsit minguitsut taakkua Jehova Guuti taassumalu siunertai oqaasiani Biibilimi allassimasut pillugit sallusuissutaapput. ’Oqaatsinut’ taakkununnga ilaavoq Guutip naalagaaffia pillugu sallusuissummik, Guutillu naalagaaffiata Jehovap aqqanik qanoq illernarsisitsiumaarneranik, kisimi oqartussaassusianik qanoq qutsissisitsiumaarneranik inunnullu aalajaatsunut naassaanngitsumik pilluaqqussutissanik qanoq atulersitsiumaarneranik eqqortumik paasinninneq. Guutip oqaatsinik nutaanik atulersitsisimanera qanoq kinguneqarpa? Allassimavoq inuit ’Jehovap aqqanik torlorfiginnikkumaartut suleqatigiilluarlutillu taassuminnga kiffartorfiginnikkumaartut’. Babelimi pisut akerliannik oqaatsinik minguitsunik atulersitsineq Jehovap aqqata unnersiutigineqarneranik taassumalu innuttaasa ataasiussuseqalernerannik kinguneqarpoq.

Oqaatsit minguitsut qanoq ilinniarneqartartut

6, 7. (a) Oqaatsinik allanik ilinniarnermut suut ilaappat, taakkualu oqaatsinik minguitsunik ilinniarnermut qanoq assinguppat? (b) Maanna suna sammissavarput?

⁶Allamiut oqaasiinik ilinniarusuttoq oqaatsinik ataasiakkaanik ilinniartariaqaannanngilaq. Aamma allatut eqqarsarneq ilinniartariaqarpaa, aap, eqqarsartaaseq alla pigiliuttariaqarpaa. Assersuutigalugu tunngavilersueriaaseq quiasaariaaserlu oqaatsiniit oqaatsinut assigiinngiiaarsinnaasarpoq. Aammattaaq nipinik nutaanik taaguissagaanni oqaq allatut atortariaqarpoq. Oqaatsit minguitsut, sallusuissutit Biibilimeersut, ilinnialeraangatsigik aamma taamatupajaaq ittarpoq. Ajoqersuutit Biibilimeersut tunngaviusut ikittunnguit ilinniarnissaat naammagiinnarsinnaanngilarput. Oqaatsit minguitsut sapersaatiginagit oqalussinnaajumalluta eqqarsartaaserput allanngortittariaqarparput ’isummatsigullu nutaanngortitaajuarluta allanngorluta’. — Atuaruk Romamiut 12:2; Efesosimiut 4:23.

⁷Oqaatsit minguitsut paasiinnarnagit aammali taakkua atorlugit oqalunnissamut suna iluaqutigisinnaavarput? Soorlu oqaatsinik allanik sunilluunniit ilinniarnermut tunngatillugu taamaattoq, oqaatsit minguitsut, sallusuissutip oqaasiisa, atornissaannut pikkorinnerulerniarluni iluaqutaasinnaasunik tunngaviusunik periaaseqarpoq. Inuit oqaatsinik allanik ilinniarniaraangamik periaaserisartagaasa tunngaviusut ilaat misissoriartigik periaatsillu taakkua oqaatsinik „nutaanik“ taakkuninnga ilinniarnissamut qanoq iluaqutigisinnaanerivut paasiniarlugu.

Oqaatsit minguitsut atorlugit oqalunnissaq qanoq ilikkarneqarsinnaasoq

8, 9. Oqaatsit minguitsut ilikkarsinnaajumallugit susariaqarpugut, aamma tamanna sooq taama pingaaruteqartigaa?

⁸Tusarnaarluartarit. Oqaatsit allat taakkuninnga sungiusimanninngitsunut aallaqqaammut allanarluinnarsinnaapput. (Esaja 33:19) Tusaasanilli tusarnaarluaqqissaarsinnaanerujartortilluni oqaatsit oqariartaatsillu ataasiakkaat ilisarnarsiartuinnassapput. Tamatumunnga assingusumik kajumissaarneqarpugut ’uatsinnut tusarliunneqartut sianigilluaqqissaaqqullugit sarfaanneqartutut qimakkiartoqqunatigit’. (Hebræerit 2:1) Jiisusip ajoqersukkani arlaleriarluni ima kajumissaarpai: „Siuteqartoq tusarli.“ (Matthæusi 11:15; 13:43; Markusi 4:23; Lukasi 14:35) Aap, ’tusarnaartariaqarlutalu paasinnittariaqarpugut’ oqaatsinik minguitsunik paasinnilluarsinnaanerujartoqqulluta. — Matthæusi 15:10; Markusi 7:14.

⁹Tusarnaarniarluni tusarnaarluaqqissaartariaqarpoq, imminulli akilersinnaalluarpoq. (Lukasi 8:18) Kristumiut ataatsimiinnerini nassuiarneqartut tusarnaarluaqqissaartarpavut, imaluunniit allanik allamut saassuteqartarpugut? Saqqummiunneqartunik tusarnaarluaqqissaarniarluta sapinngisarput tamaat iliuuseqarnissarput pingaaruteqartupilussuuvoq. Taamaaliunngikkutta tusaaniarnermut eqeersimaarunnaariaannaavugut. — Hebræerit 5:11.

10, 11. (a) Oqaatsinik allanik ilinniassagaanni tusarnaarnerup saniatigut qanoq iliortariaqarpa? (b) Oqaatsit minguitsut atorlugit oqalunnermut suut ilaappat?

¹⁰Oqaatsit ilinniakkasi atorlugit oqaluttut ilaartarsigik. Oqaatsinik allanik ilinniartut oqaatsit ilinniakkatik atorlugit oqaluttut tusarnaarnissaannut kajumissaarneqaannarnatik, aammali oqaatsinik taagueriaasiannik ilaarsinissamut oqariartaatsinillu taakkua atugaannik atuinissamut kajumissaarneqartarput. Taamaaliornertik allamiorpaluttupilussuarmik, kingusinnerusukkut allanit paasineqarnissamut akornutaasinnaasumik, oqalulinnginnissaminnut iluaqutigissavaat. Uagut tamatumunnga assingusumik oqaatsinik minguitsunik oqalunnermik ilinniartitsinermut pikkorissut ilinniarfigisinnaavavut. (2 Timotheusi 4:2) Ikioqqusarit, kukkugaangavillu siunnersorneqarninnik akuerinninnissamut piumassuseqarit. — Atuaruk Hebræerit 12:5, 6, 11.

¹¹Oqaatsit minguitsut atorlugit oqalunnermut ilaasut tassaaginnanngillat sallusuissummik upperinninneq tamannalu pillugu allanik ilinniartitsineq. Aamma pissuserput Guutip inatsisaanut najoqqutassiaanullu naapertuuttariaqarpoq, naapertuutitilersinnaavarpullu allat maligassiaannik pitsaasunik malinninnitsigut. Maligassiaannik malinninnermut ilaavoq taakkua uppernerannik aallussilluarnerannillu ilaarsineq, aamma Jiisusip inooriaasianik ilaarsineq. (1 Korinthimiut 11:1; Hebræerit 12:2; 13:7) Taamaaliortuarutta Guutip innuttaasa akornanni ataasiussuseqalissaaq, tamatta sumiorpalussuseq ataaseq atorlugu oqalussinnaalerlutalusooq. — 1 Korinthimiut 4:16, 17.

12. Alanngaarniarneq oqaatsinik allanik ilinniarnermut qanoq attuumassuteqarpa?

¹²Alanngaarnissaq ilinniaruk. Oqaatsinik ilinniartut assigiinngitsorpassuarnik, assersuutigalugu oqaatsinik ataasiakkaanik oqariartaatsinillu allanik, alanngaarnissaq ilinniartariaqarpaat. Kristumiut oqaatsit minguitsut sapersaatiginagit oqalussinnaajumallutik alanngaarineq iluaqutigingaarsinnaavaat. Assersuutigalugu allakkat Biibilimiittut tulleriinnerinik alanngaarniarneq iluaqutaasinnaavoq. Ilaasa allassimaffinnik aalajangersimasunik amerlassusilinnik issuaaqqissaarsinnaanissartik anguniagarisimavaat. Allat Guutip naalagaaffiata erinarsuutaanik, Israelikkut naggueqatigiissortaasa taaguutaannik apustilillu aqqaneq-marluk aqqinik — imaluunniit pissutsinik anersaap inerititaanik — alanngaarniarneq iluaqutigisimavaat. Biibilip nalaani Israelikkut ilarpassui tussiaatinik alanngaarniartarput. Ukiualuit matuma siorna nukappiaqqap arfiniliinnarnik ukiullip allassimaffiit Biibilimiittut 80-it issuaqqissaarsinnaavai. Piginnaassutsip pingaarutillip tamatuma atornissaanut pikkorinnerulersinnaavugut?

13. Sooq uteqqiisarneq taama pingaaruteqartigaa?

¹³Uteqqiineq eqqaamanninnissamut iluaqutaasarpoq, kristumiutullu ilinniartinneqarnitsinnut atatillugu eqqaasinneqaqattaartarpugut. Apustili Petrusi ima allappoq: „Tamakkuninnga eqqaasinniartuassavassi, naak ilisimalluaraluarissi sallusuissummullu ilissinniittumut aalajangersimagaluartusi.“ (2 Petrusi 1:12) Sooq eqqaasinneqarnissarput pisariaqartipparput? Eqqaasinneqarnerput pissutigalugu paasinninnerulertaratta, uungaannaq isiginnginnissamut iluaqutigisaratsigu, aamma tamanna anersaakkut eqqortumik toraagaqartuarnissatsinnik aalajangiusimanninnerulissutigisaratsigu. (Tussiaat 119:129) Guutip najoqqutassiaanik eqqaasinneqartuaraangatta imminut misissorluarsinnaanerusarpugut ’tusakkatsinnillu puiutoqqajaasarnitsinnik’ akiuisinnaanerusarluta. (Jaaku 1:22-25) Sallusuissutinik Biibilimiittunik imminut eqqaasittuartanngikkutta allat uummatitsinnut sunniuteqassapput, taava immaqa oqaatsit minguitsut atorlugit oqaluttarunnaassaagut.

14. Oqaatsinik minguitsunik atuaqqissaarnitsinni suna iluaqutaasinnaava?

¹⁴Nipituumik atuartarit. Inuit ilaat oqaatsinik ilinniarniarsarisarput oqassanatik. Tamanna pitsaanerpaamik kinguneqarneq ajorpoq. Qularnanngitsumik oqaatsinik minguitsunik atuaqqissaarnitsinni ilaannikkut ’nipikitsumik atuartarnissarput’ pisariaqartittarparput atuakkavut eqqarsaatigilluarsinnaanerujumallugit. (Atuaruk Tussiaat 1:1, 2. *) Taava atuakkavut isummatsigut puiuikkiunnerussavavut. Oqariartaaseq ’nipikitsumik atuarneq’ hebræerisut eqqarsaatiginnilluarnermut attuumassuteqarluinnarpoq. Nerisavut tamakkiisumik iluaqutigiumallugit taakkua tamualluarnissaat pingaaruteqarpoq; taamatuttaaq aamma atuakkavut tamakkiisumik paasisinnaajumallugit eqqarsaatigilluarnissaat pisariaqarpoq. Atuakkatta eqqarsaatigilluarnissaat piffissaqarfigilluartarparput? Biibilimik atuaraangatta ilikkakkavut eqqarsaatigeqqissaartariaqarpavut.

15. Oqaatsit minguitsut ’grammatikkiat’ qanoq ililluta pigiliussinnaavarput?

¹⁵Grammatikki paasiniaqqissaartaruk. Ilinniarnerup ingerlanerani pitsaassaaq grammatikkimik, tassa oqaatsit ilinnialikkat atorlugit oqaatsit uiguutillu ataasiakkaat oqaaseqatigiiliornermi qanoq katiterneqarsimanerannik, paasiniaaqqissaarnissaq. Tamanna oqaatsit sannaannik paasinnissinnaannguutigissavarput oqaatsit eqqortumik atorsinnaaniassagatsigit. Soorlu oqaatsit ataatsit aalajangersimasumik najoqqutassaqartartut, taamatuttaaq sallusuissutip oqaasiinut minguitsunut „oqaatsinut peqqissinartunut najoqqutassiaq“ najoqqutaavoq. (2 Timotheusi 1:13, NV) „Najoqqutassiaq“ taanna malittariaqarparput.

16. Suna ajugaaffigisariaqarparput, qanorlu ililluta ajugaaffigisinnaavarput?

¹⁶Siumukartuarit. Inuit ilaat oqaatsinik ima ilinniarluartigisarput nalinginnaasumik oqaloqateqarsinnaallutik, siumukarunnaarlutilli. Oqaatsit minguitsut atorlugit oqaluttunut aamma taamatut pisoqarsinnaavoq. (Atuaruk Hebræerit 5:11-14.) Taamaaqqajaasarneq qanoq ililluta ajugaaffigisinnaavarput? Oqaatsit ilinniakkavut ilinniartuarumallugit iliuuseqarnissamut kajumissuseqarnitsigut. „Taamaattumik Kristusi pillugu ilinniaqqaagassat imminiiginnarlugit inersimasunik ajoqersuinermut ingerlaqqittariaqarpugut, tunngaviliuteqqinnagit sulianit toqungasunit allamik isumataarneq Guutimullu upperneq, kuissummik assammillu patitsinermik aammalu toqusut makinnissaannik eqqartuussummillu naassaanngitsumik ajoqersuutit.“ — Hebræerit 6:1, 2.

17. Sooq aalajangersimasumik atuaqqissaarnissamut pilersaaruteqarnissaq pingaaruteqarpa? Assersuuteqarlutit nassuiaruk.

¹⁷Atuaqqissaarnissamut aalajangersimasunik piffissalertarit. Sivikitsumik atuaqqissaartarneq ilaanneeriarluni sivisuumik atuaqqissaartarnermit pitsaanerusarpoq. Kajumikkaangavit allamullu saariaannaanngikkaangavit aallartittarit. Oqaatsinik nutaanik ilinniarneq soorlu tassa kiattup orpippassuini aqqusininngualiorneq. Taanna aqqutigikulanerutillugu aqqutigiuminarnerujartortarpoq. Aqqusininnguarli taanna piffissap ilaani aqqutigineqanngikkuni sivitsunngitsoq naasupilunnit avalequtinillu aqqutigiuminaallisinneqassaaq. Taamaattumik qasusuinnissaq nikallujuinnissarlu pingaaruteqarluinnarpoq. (Danieli 6:17, 21) Sallusuissutip oqaasii minguitsut atorlugit oqalunneq eqqarsaatigalugu qinunikkut ’eqqumaniartuartariaqarlutalu tamatigut nikallujuittariaqarpugut’. — Efesosimiut 6:18.

18. Sooq periarfissat tamaasa oqaatsit minguitsut atorlugit oqaluttariaqarpugut?

¹⁸Oqalugit! Oqalugit! Oqalugit! Oqaatsinik allanik ilinniartut ilaat immaqa oqaatsit taakkua atornissaannut nangaasarput ittooramik kukkunissartilluunniit annilaangagigamikku. Tamanna siumukarnissaminnut akornutigisarpaat. Oqaatsinik allanik ilinniarnermut tunngatillugu ussatitoqaq una ilumoorpoq: „Sungiusartorooq pikkorissisarpoq.“ Oqaatsit ilinniakkat atorlugit oqalunnerujartortilluni, oqaatsit taakkua atorlugit oqalunnissaq ajornannginnerujartortarpoq. Uagut tamatumunnga assingusumik periarfissat tamaasa oqaatsit minguitsut atorlugit oqaluttariaqarpugut. „Uummatikkut upperneq iluartuutitaassutissaavoq, qanermillu nassuerneq [tamanut nassuerneq, NV] annaanneqaatissaalluni.“ (Romamiut 10:10) Kuisinnermiinnaanngitsoq uppernerput ’tamanut nassuerutigisarparput’. Aamma periarfissat tamaasa atorlugit, ilaatigut oqaluusseqataagaangatta, Jehova eqqartortarparput. (Matthæusi 28:19, 20; Hebræerit 13:15) Kristumiut ataatsimiinnerini oqaatsit minguitsut atorlugit naatsunik paasiuminartunilli akissuteqartarsinnaavugut. — Atuaruk Hebræerit 10:23-25.

Peqatigiillusi oqaatsit minguitsut Jehovamik unnersiutiginninnissamut atorsigit

19, 20. (a) Ullutsinni Jehovap Nalunaajaasuisa suliaq tupinnartoq suna suliaraat? (b) Illit suna aalajangiusimaviuk?

¹⁹Ukiumi 33-mi u.n.k. sivanip arfernani sapaatikkut ullaakkut Jerusalemimi najuulluni qanoq pissanganartigisimassava. Ullaap tungaani, qulingiluat missaani, inimi qullermi katersuussimasut tupinnartuliornikkut „allamiut oqaasii atorlugit oqalulerput“. (Apustilit Suliaat 2:4) Ullumikkut Guutip kiffai oqqanik oqalussinnaanngillat. (1 Korinthimiut 13:8) Taamaakkaluartorli Jehovap Nalunaajaasuisa Guutip naalagaaffia pillugu nutaarsiassaq nuannersoq oqaatsit 430-nit amerlanerusut atorlugit oqaluussissutigaat.

²⁰Tamatta, oqaatsit atukkavut suugaluartulluunniit, peqatigiilluta sallusuissutip oqaasii minguitsut atorlugit oqalunnerput qujamasuutigingaarparput! Oqartoqarsinnaavoq Babelimi pisut akerlianik pisoqarsimasoq. Soorlu tassa Jehovap innuttai taassuma aqqanik unnersiutiginnittut oqaatsit ataatsit atorlugit. (1 Korinthimiut 1:10) Nunarsuaq tamakkerlugu qatanngutivullu ’suleqatigiilluarluta’ kiffartornissarput aalajangiusimajuartigu — Ataatatsinnut qilammiusumut, Jehovamut, ataqqinaataasumik oqaatsit minguitsut atorlugit oqallorinnerulernissamik ilinniarnitsinni. — Atuaruk Tussiaat 150:1-6. (w08 08/15-E)

[Quppernerup ataani ilanngussaq]

^ imm. 14 Tussiaat 1:2, NV: „Jehovalli inatsisaanut kajungerpoq, inatsisaanillu nipikitsumik atuartarpoq ullukkut unnuakkullu.“

Qanoq akissavit?

• Oqaatsit minguitsut suuppat?

• Oqaatsit minguitsut atorlugit oqalunnermut suna ilaava?

• Oqaatsit minguitsut atorlugit oqalunnissamut suna iluaqutigisinnaavarput?

[Atuaqqissaarnermi apeqqutit]

[Qupp. 27-mi ungalusaq]

Oqaatsit minguitsut atorlugit oqalunnermut pikkorinnerulerit . . .

◆ tusarnaarluartarnikkut.

Lukasi 8:18; Hebræerit 2:1.

◆ oqaatsit taakkua atorlugit oqaluttunik ilaarsisarnikkut.