Akerleriissut illit akuliunneqarfigisat

IKINNGUTEQARPIT ilaquttaqarpilluunniit immikkut qanitannik? Takorlooruk unnerluutigineqartutit ikinngutiginerata iluaqutissartai piinnarlugit taanna ikinngutigigit. Ajuallassagaluarputit kamaammerlutilluunniit, ilaa? Taamatorpiaq Saatani Diaavulup Jehova Guutimut qanittumik attaveqartut tamaasa unnerluutigai.

Eqqarsaatigiuk Saatanip aappariit siulliit Adami Evalu Guutip inatsisaanik unioqqutitsisimmagit Guutimullu pikitsitsinerminut ilanngutitimmagit qanoq pisoqartoq. Pisimasoq taanna isumaqarpa inuit Jehovamut naalannertik namminneq iluaqutissarsiffigisinnaatillugu aatsaat naalattuaannassasut? (1 Mosesi 3:1-6) Adamip tunussinerata kingorna ukiut 2500-t missaat qaangiuttut apeqqut taannarpiaq Saatanip saqqummiuppaa — tamatumuuna angummut Jobimik atilimmut atatillugu. Akerleriissutip tamatta akuliunneqarfigisatta suunera Saatanip unnerluussutaanit erseqqilluarpoq. Taamaattumik misissorneroriartigu Jobip Biibilimi oqaluttuarineqarnera.

„Assuarnaattuassaanga“

Jobi ’assuarnaatsuuvoq peqqusersuitsuullunilu Guutimillu mianerinnittuulluni ajortumik iliuuseqarnaveersaartuulluni’. Saatanilli Jobip peqqusersuitsuunerminut pissutigisaa eqqunngitsuunerarpaa. „Jobi pissutissaqarluarunarpoq Guutimik mianerinninnerminut,“ Saatani Jehovamut oqarpoq. Taava Diaavulup Guuti Jobilu ajortumik oqaluuserai, oqarluni Jehovap Jobip ilumoorfiginninnera pisiarisimagaa illersorneratigut pilluaqquneratigullu. Saatani qulalersitsiniarluni ima oqarpoq: „Atagu assat isatseriassagit pigisai tamaasa attorlugit, taava kiinnat toqqavillugu perloqqussagaluarpaatit!“ — Jobi 1:8-11.

Taama oqaatiginninnerit akissutissaqartinniarlugit Jobip Saatanimit misilinneqarnissaa Jehovap akueraa. Diaavulup angut aalajaatsoq taanna Guutimik tunussitinniarsaralugu ajunaarnerit malittuinnaat taassumunnga nalliutitippai. Jobip uumasuutai tamarmik tillinneqarput toqunneqarlutilluunniit, kiffai toqutaapput qitornaalu ajunaarlutik. (Jobi 1:12-19) Saatanilli anguniakkani anguaa? Naamerluinnaq! Naak nalugaluarlugu atugarliuutiminut Diaavulu pisuusoq, Jobi ima oqarpoq: „[Jehova] tunniussigami [Jehova] tigusivoq, [Jehovap] aqqa unnersiutigineqarli.“ — Jobi 1:21.

Tamatuma kingorna Saatani Jehovamut sassarpoq, Jehovallu ima oqarfigaa: „[Jobip] assuarnaassutsi aalajangiusimajuarpaa. Perlussiortinnissaanut pissutissaqarnak kaammattorsimavarma.“ (Jobi 2:1-3) Akerleriissut pingaarutilik Jobip assuarnaatsuuneranut tunngavoq — assuarnaatsuussagaanni Guutimut ilumoorfiginnilluinnartuusariaqarpoq naapertuilluarnermillu aalajangiusimannittuusariaqarluni. Jobip ilumoorfiginninnikkut misilinneqaatigisani tamanna manna tikillugu anigorsimavaa. Diaavululi uniinnanngilaq.

 Tamatuma kingorna Saatani inuiaat tamaasa akuliullugit sakkortuumik oqaatiginnippoq. Jehovamut ima oqarpoq: „Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu. Ataguli assat isatseriassagit uinnga saarngilu attorlugit, taava kiinnat toqqavillugu perloqqussagaluarpaatit!“ (Jobi 2:4, 5) Ateq Jobi atornagu Saatanip oqaatsip nalinginnaasup ’inuup’ atorneratigut inuit ataasiakkaat tamarmik Guutimut ilumoorfiginninnerat apeqquserpaa. Ima oqarporlusooq: ’Inuup inuunini annaanniarlugu suna tamaat iliuuserissavaa. Periarfissinneqaruma kinaluunniit Guutimik tunussitissinnaavara.’ Ilumoorpa pissutsini qanorluunniit ittuni tamatigorluinnarlu Guutimut ilumoorfiginnittuartumik inoqanngitsoq?

Jehovap akueraa Saatanip Jobi perulunnartumik nappaateqalersissagaa. Jobi anniaateqangaarami toquinnarumalluni Guutimut qinuvoq. (Jobi 2:7; 14:13) Taamaattoq ima oqarpoq: „Toqussara tikillugu assuarnaattuassaanga.“ (Jobi 27:5, NV) Jobip Guutimut asanninnera aalajaappoq. Nammineq ersersippaa angutaalluni assuarnaatsuusoq. Taamaattumik Biibilimi ima allassimavoq: „Taamanernit [Jehovap] Jobi pilluaqquaa suli siornagornit annerusumik.“ (Jobi 42:10-17) Allanik Jobitut ittoqarsimava? Piffissap ingerlanerani suna paasinarsisimava?

Saatanip oqaasiisa eqqunngitsuunerat qanoq uppernarsarneqartoq

Hebræerinut allakkani kapitali 11-mi apustilip Paulusip angutit arnallu aalajaatsut kristumiut sioqqullugit inuusut, ilaatigut Noa, Aaperaat, Sara Mosesilu, eqqaavai. Taava ima nalunaarpoq: „Piffissaq amigassagaluarpoq [allat] oqaluttuarissagaluarukkit.“ (Hebræerit 11:32) Guutimut kiffaasut aalajaatsut taakku amerlangaarmata, Paulusi allappoq „nalunaajaasunik taama amerlatigisunik“ avatangerneqarsimallutik. (Hebræerit 12:1) Aap, ukiut hundredelikkuutaat ingerlaneranni inuit kisissaanngitsut piumasamittut iliorsinnaatitaanertik atorlugu aalajangersimapput Jehova Guuti aalajaallutik kiffartorfiginiarlugu. — Josva 24:15.

Saatani inunnik tamanik Jehovamik tunussititsisinnaanerarpoq, tamatumalu eqqunngitsuuneranik inaarutaasumik uppernarsaasoq tassaavoq Guutip nammineq ernera, Jiisusi Kristusi. Allaat nappakkami anniartitaaffimmi naalliunnartumik toqunerup Guutimut ilumoorfiginnikkunnaarsissinnaanngilaa. Jiisusi anerningilerluni ima nillerpoq: „Ataataq, anersaara assannut tunniuppara.“ — Lukasi 23:46.

Piffissap ingerlanerani, erseqqissisimavoq Diaavulup inuit tamarluinnaasa Guutimut ilumoortumut kiffartorunnaarsissinnaanngikkai. Inuit kisissaanngitsut Jehovamik ilisarisimannilersimapput ’asannilersimallutillu uummatikkut iluunngarlutik tarnikkullu iluunngarlutik isumakkullu iluunngarlutik’. (Matthæusi 22:37) Taakku Jehovamut ilumoorfiginninnerat aalajaatsoq uppernarsaataavoq inuit assuarnaassusiat pillugu akerleriissummut tunngatillugu Saatanip ilumuunnginneranut. Aamma illit ilumoorfiginnittuarnikkut takutissinnaavat Saatani ilumuunngitsoq.

Qanoq iliorsinnaasutit

Guutip piumasaraa „inuit tamarmik annaanneqassasut sallusuissummillu ilisarsissallutik“. (1 Timotheusi 2:4) Qanoq tamatuminnga ilisarsisinnaavit? Aalajangersimasumik Biibilimik atuaqqissaartarnikkut aamma ’ilumut kisimi Guutiusumik aallartitannillu Jiisusi-Kristusimik ilisimannilernikkut’. — Johannesi 17:3.

Saatani inuup assuarnaassusianik qulalersitsiniarpoq Guutimut kiffartorneranut pissutigisaa apeqquserlugu. Ilisimalikkatit pissutigisannut sunniuteqassappata uummammiuliuttariaqarpatit. Uummammiuliutissagukkillu Biibilimi paasissutissarsiorneq naammanngilaq. Ilikkakkannik eqqarsaatiginneqqissaartarnissat ileqquliuttariaqarpat. (Tussiaat 143:5) Biibilimik Biibililersaarutinilluunniit atuaraangavit, apeqqutit makku eqqarsaatigisariaqarpatit: ’Jehova pillugu sumik tamanna ilinniarfigaara? Guutip pissusii sorliit tamatumani erserpat? Tamatumunnga tunngatillugu sutigut ilaarniartariaqarpara? Guutip suna iluaraa, sunalu iluarinngilaa? Guutimut misigissutsikka qanoq attorneqarpat?’ Taamatut eqqarsaatiginneqqissaarnerup Pinngortitsisumut qujamasungaalersissavaatit tassungalu asannilersillutit.

 Guutimut ilumoorfiginninneq tassaaginnanngilaq inuup upperisaa Guutip oqaasianut naapertuuttuunersoq. (1 Kunngit 9:4) Jehovamut ilumoorfiginnittuassagaanni inuunermi sutigut tamatigut ileqqussatigut peqqissuusariaqarpoq. Assuarnaattuarneq annaasaqaataaneq ajorpoq. Jehova ’Guutiugami pilluartoq’ kissaatigaa inuuneq nuannaarutigissagipput. (1 Timotheusi 1:11) Tulliuttuni malugiuk ileqqussatigut minguitsuujuarumallutit iliuutsit suut ingalassimasariaqaritit — taamalu inuuninni pilluarnerulerlutit Guutimillu akuerisaallutit.

Kinguaassiuutitigut inuunerloqinak

Jehovap aappariinnermi ileqqussat oqaatsimini Biibilimi aalajangersarpai, tassani ima allassimavoq: „Angutip ataatani anaananilu qimallugit nuliani attavigissavaa, uiniulissappullu ataaseq.“ (1 Mosesi 2:21-24) Aappariit ’uiniuleramik ataaseq’, Guutip aappariinnermut aaqqissuussaa ataqqivaat kinguaassiuutitigut allanik atoqateqartannginnermikkut. Apustili Paulusi ima allappoq: „Aappariinneq tamanit ataqqineqassaaq, aappariillu siniffiat minguitsuussaaq. Guutimmi eqqartuukkumaarpai kinguaassiuutitigut inuunerluttut allasiortullu.“ (Hebræerit 13:4) Oqariartaatsimi „aappariit siniffiat“-imi pineqarpoq arnap angutillu inatsisinut naapertuuttumik katissimasut atoqatigiinnerat. Taakkua arlaat aapparinngisaminik atoqateqarpat, taamaaliortoq allasiussaaq, tamatumalu kingunerisinnaavaa Guutimit iluarisaanngitsutut eqqartuussaaneq. — Malaki 3:5.

Katissimananimi atoqateqarneq? Tamanna aamma Jehovap ileqqussatigut najoqqutassiatut aalajangersagaanut akerliuvoq. Biibilimi ima allassimavoq: ’Guutip piumasaa tassaavoq kinguaassiuutitigut inuunerluttuussanngitsusi.’ (1 Thessalonikamiut 4:3) Suiaassuseqammik, qanigivallaakkanik uumasunillu atoqateqartarneq ingasattumik ajortuliornerupput Guutip assuarisai. (3 Mosesi 18:6, 23; Romamiut 1:26, 27) Guutimik nuannaartitserusuttut pilluarlutillu inoorusuttut tamarmik taamatut kinguaassiuutitigut inuunerlunnaveersaartariaqarput.

Katissimananimi tiingarujoorneq? Aamma tamanna Jehovap iluarinngilaa. (Galatiamiut 5:19) Aammattaaq isuma minguitsuutittariaqarpoq kanngunartunik eqqarsaateqarnaveersaarnikkut. Jiisusi ima oqarpoq: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ (Matthæusi 5:28) Jiisusip oqaasiini aamma pineqarput assinik pornografiimut tunngasunik, naqitanik, isiginnaarutikkoortunik internetikkoortunilluunniit isiginnaarneq; tiingasulersaarutinik atuarneq taallanilluunniit kanngunartunik tusarnaarneq. Taamaattut ingalassimalluinnarnerisigut Guuti nuannaartissavarput namminerlu ineriartorluta.

Qaninniarujoorneq qanoq isigissavarput? Angutip arnalluunniit aappallip aapparinngisaminut taamatut soqutiginninnermik ersersitsinera Biibilimi najoqqutassianut akerliuvoq Jehovamullu ataqqinninnginnermut ersiutaalluni. (Efesosimiut 5:28-33) Aamma katissimanngitsut siunertaqaratik ajuutiginnillutik imminnut samminerat naleqqutinngilaq. Taavami soqutiginninneq taama ittoq siunertarisamit ilumoorunneqarneruppat? Aliasunnermik kinguneqarsinnaanera eqqarsaatigiuk. Eqqarsaqqaartariaqarnermut pissutaasoq alla tassaavoq qaninniarujoornerup allasiornermik kinguaassiuutitigulluunniit inuunerlunnermik kinguneqarsinnaanera. Paarlattuanilli suiaassuseqatiginngisamut minguitsumik attaveqarneq imminut ataqqinninnerulissutaasarpoq. — 1 Timotheusi 5:1, 2.

Guuti allatigut qanoq nuannaartinneqartartoq

Nunani amerlasuuni aalakoornartoq pissarsiarineqariaannaavoq. Kristumiut aalakoornartutortussaanngillat? Ingasaassinani viinnisorneq, immiaarartorneq allamilluunniit aalakoornartutorneq Allakkat naapertorlugit inerteqqutaanngilaq. (Tussiaat 104:15; 1 Timotheusi 5:23) Imigassartorpallaarnerli aalakoornerlu Guutip isaani eqqunngitsuuvoq. (1 Korinthimiut 5:11-13) Qularnanngitsumik kissaatiginngilat ingasaassilluni imigassartornerup peqqissutsinnut ilaquttannullu ajoqutaanissaa. — Ussatit 23:20, 21, 29-35.

Jehova tassaavoq „Guuti unneqqarissoq“. (Tussiaat 31:6) Biibilimi allassimavoq ’Guuti sallusuitsuusoq’. (Titusi 1:2) Guutimit akuerineqarusukkuit salluliornaveersaartariaqarputit. (Ussatit 6:16-19; Kolossemiut 3:9, 10) Biibilimi  kristumiut kajumissaarneqarput ’ilumoortumik oqaluttaqqullugit’. — Efesosimiut 4:25.

Aningaasanoorneq aamma mianersorfigisariaqarparput. Naak aningaasanoorneq inuppassuarnit nuannarineqaraluartoq, piumatussusiuvoq allat ajunaarutigisaannik aningaasannanniarnerugami. Jehovap ’aningaaserituujuneq’ iluarinngilaa. (1 Timotheusi 3:8) Taamaattumik Jehova nuannaartikkusukkukku aningaasanoornerit suulluunniit, ilaatigut lottorneq, bankorneq, hestinillu sukkaniuttunik eqquiniaaneq, ingalassimasariaqarpatit. Akerlianik qularnanngitsumik paasissavat ilaquttavit pisariaqartitaannik pilersornissaannut aningaasaateqarnerulerlutit.

Tillinneq tassaavoq nammineq piginngisanik tigusineq, aamma tamanna piumatussusiuvoq. Biibilimi ima allassimavoq: „Tillissanngilatit.“ (2 Mosesi 20:15) Tillitaasut nalunagu tillitanik pisineq aamma akuerineqarani tigusineq eqqunngitsuupput. Biibilimi ima allassimavoq: „Tillittartoq tillissaarli, ilungersorlunili suliniarli assani atorlugit sulinermigut ajunngitsunik naammassisaqarniarluni ajorsartunut tunniussassaqarsinnaajumalluni.“ (Efesosimiut 4:28) Jehovamik asannittut suliffimminni suliassat unneqqarillutik suliarissavaat sulisitsisuminnillu piffissamik tillinnatik. ’Tamatigut eqqortumik iliorumasarput’. (Hebræerit 13:18) Ilerasuuteqannginnerlu qamuuna eqqissinangaarpoq.

Kamajasuuneq Guutip qanoq isigaa? Biibilimi ima mianersoqqussuteqarpoq: „Narrajasumik ikinnguteqarniaqinak kamajasumillu peqateqarnaveersaarlutit.“ (Ussatit 22:24) Aqussinnaanngisamik kamanneq nakuusernermik kinguneqarajuppoq. (1 Mosesi 4:5-8) Aamma akiniaaneq pillugu Biibilimi ima allassimavoq: „Ajortoq akileqinasiuk ajortoqataanik, inunnullu tamanut ajunnginnerusoq eqqarsaatigisarsiuk. Ajornanngippat — ilissi aalajangiisuusinnaagussi — inuit tamaasa eqqisseqatiginiarsigit. Nammineerlusi akiniaaqinasi, asasakka, Guutilli kamaassinera periarfississiuk — allassimasoqarmat: ’Akiniut pigaara, uanga akiliiumaarpunga, oqarpoq [Jehova].’“ (Romamiut 12:17-19) Siunnersuut taanna malikkutsigu, inuunerput eqqissisimanerussaaq — aamma nuannaarnerulerlutalu nalerisimaarnerulissaagut.

Illittaaq iluatsissinnaavutit

Guutimut ilumoorfiginnittuarsinnaavit naak akerlianik iliortinniarneqaraluarlutit? Aap, sapinngilatit. Inuup assuarnaassusia pillugu akerleriissummi Saatanip ilumuunnginneranik uppernarsaanermi iluatsissasutit Guutip kissaatigigaa paasisariaqarpat. Oqaasianimi ima allassimavoq: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ — Ussatit 27:11.

Jehova qinnuigisinnaavat nakussatseqqullutit taassuma isaani eqqortumik iliornissannut. (Filippimiut 4:6, 7, 13) Taamaattumik Guutip oqaasia Biibili pillugu ilisimasaqarnerulernissat tamaviaarutigiuk. Ilikkakkatit Biibilimeersut pingaartillugit eqqarsaatigigukkit, Guutimut asanninnerulissaatit taannalu nuannaartikkusulissavat. Johannesip allagaani siullerni 5:3-mi ima allassimavoq: „Guutimut asanninneq tassaavoq inassutai maleruaratsigit, inassutaalu artornartuunngillat.“ Jehovap Nalunaajaasuisa Biibilimik misissuinissannut nuannaarlutik ikiorusuppaatsit. Najukkanni taakkua attaviginissaannut imaluunniit atuagassiamik matuminnga saqqummersitsisut allaffiginissaannut tikilluaqqusaavutit. (w06 11/15-E)

[Qupp. 3-mi assiliartaq]

Jobi misilinneqarnermini aalajaattuarpoq

[Qupp. 6-mi assiliartaq]

Biibili pillugu ilisimasaqarneruleruit eqqortumik iliorniarnerit aalajangiusimanerulissavat