Suut qimarratigisariaqarivut

„Taatuuku pulateriaarsuit piaraat! Kia ilitsersuuppaasi kamannissaq nalliuttussaq qimarratigissagissi?“ — MATTHÆUSI 3:7, 1936.

1. Qimaasunik Biibilimi oqaluttuarineqartunik eqqaasaqarit.

OQAASEQ ’qimarratiginninneq’ tusaraangakku suna eqqaasarpiuk? Ilaasa immaqa eqqaasarpaat Josefi inuusuttoq isikkorissoq Potifarip nuliata ileqqorlulluni qaninniarnerinik qimarratiginnittoq. (1 Mosesi 39:7-12) Allat immaqa eqqaasarpaat kristumiut ukiumi 66-imi u.n.k. Jerusalemimit qimaasut Jiisusip mianersoqqussutaa una malillugu iliorlutik: „Takugussiuk Jerusalemi sakkutuunit unguneqarsimasoq, taava . . . Judæamiittut qaqqanut qimaassapput; illoqarfimmiittut illoqarfik qimassavaat.“ — Lukasi 21:20, 21.

2, 3. (a) Johannesip Kuisisup upperisarsiornikkut siuttunik qulaarinera qanoq paasisariaqarpa? (b) Jiisusi qanoq ililluni Johannesip mianersoqqussutaanik sakkortunerulersitsiva?

² Oqaluttuani eqqaaneqareersuni assersuutaanngitsumik qimarratiginninneq eqqartorneqarpoq. Ullumikkut kristumiut ilumoortut nunarsuarmi tamarmiittut assersuutaasumik qimaanissaat pisariaqarpoq. Johannesip Kuisisup oqaaseq ’qimarratiginninneq’ assersuutaasumik atorpaa. Juutinut Johannesimik takunnikkiartorlutillu tusarnaariartunut ilaapput upperisarsiornikkut siuttut imminnut iluartuutittut allamik isumataartariaqarsorinngitsut. Taakkua inuinnarnik allamik isumataarsimanerminnut assersuutaasumik kuisittunik nikaginnipput. Johannesip upperisarsiornikkut siuttut ilumoortuusaartut taakkua qunusuilluni qulaarpai ima oqarluni: „Taatuuku pulateriaarsuit piaraat! Kia ilitsersuuppaasi kamannissaq nalliuttussaq qimarratigissagissi? Taamaattumik allamik isumataarnermut naapertuuttunik inerititaqaritsi.“ — Matthæusi 3:7, 8, 1936.

³ Johannesip qimaanivik eqqartunngilaa. Eqqartuussinissaq, ulloq kamaffiusoq, mianersoqqussutigaa upperisarsiornikkullu siuttut oqaluttuullugit ullormi tamatumani aniguerusukkunik allamik isumataarsimanerminnut uppernarsaataasumik inerititaqartariaqartut. Kingusinnerusukkut Jiisusip upperisarsiornikkut siuttut qunusuilluni assuarai. Toqutserusussuseqarnerannit erserpoq taakkua ataatavigisaat tassaasoq Diaavulu. (Johannesi 8:44) Johannesip siusinnerusukkut mianersoqqussutaa sakkortunerulersippaa taakkua ’paarmortorujuit piaraannik’ taallugit imalu aperaluni: „Qanoq ilillusi pinngitsuussavisiuk Anniarfimmut [Gehennamut, NV] pisussatut eqqartuunneqarnissaq?“ (Matthæusi 23:33) Jiisusi ’Gehennamik’ oqarami suna pivaa?

4. Jiisusip Gehennamut tunngatillugu suna pivaa?

⁴ Gehenna tassaavoq qooroq Jerusalemip avataaniittoq igitanik uumasunillu toqungasunik ikuallaaviusartoq. Jiisusip Gehenna naassaanngitsumik toqunermut assersuutitut atorpaa. * Upperisarsiornikkut siuttut Gehenna qanoq ilillutik pinngitsoorsinnaaneraat aperigami, ersersippaa taakkua eqimattatut isigalugit naassaanngitsumik suujunnaarsitaajumaartut. — Matthæusi 5:22, 29. *

5. Johannesip Jiisusillu mianersoqqussutaat oqaluttuarisaanermi qanoq piviusunngorpat?

⁵ Juutit upperisarsiornikkut siuttuisa Jiisusimik taassumalu ajoqersugaanik malersuinermikkut ajortuliatik ajornerulersiinnarpaat. Kingusinnerusukkut ulloq Guutip kamaffia nalliuppoq, soorlu Johannesi Jiisusilu taama oqarsimasut. Pisumi tamatumani „kamannissaq“ tamanna sumiiffimmut aalajangersimasumut nalliutitinneqarpoq, tassa Jerusalemimut Judæamullu, taamaammat ilumuuissumik qimaasoqarsinnaasimavoq. Kamanneq nalliuppoq Jerusalemi naalaffillu ukiumi 70-imi u.n.k. Romamiunit  piuneerunneqarmata. ’Naalliunnartoqangaarpoq’ naalliunnartunit Jerusalemimi misigineqarsimasunit tamanit naalliunnarnerusumik. Inuppassuit toqutaallutilluunniit tigusarineqarput. Annikilliornartoq taanna aseruinermut annerusumut kristumiuunerartunut upperisarsiornernulluunniit allanut ilaasortaasunut nalliutitinneqarumaartumut tikkuussivoq. — Matthæusi 24:21.

Kamannissaq qimarratigisariaqagarput

6. Kristumiut siulliit ilagiivini qanoq pisoqalerpa?

⁶ Kristumiut siulliit ilaat uppernerminnik tunussipput, inuppassuillu tunusseqataapput. (Apustilit Suliaat 20:29, 30) Jiisusip apustilii inuutillutik tunussinermut assiaqutitut ipput, toqummatali kristumiuunerartut assigiinngitsorpassuit pilerput. Ullumikkut kristumiuunerartut hundredelinnik oqaluffeqarfeqarput imminnut akerleriittunik ajoqersuutilinnik. Biibilimi siulittuutigineqarpoq kristumiuuneraqatigiinni saqqummertoqarumaartoq palaseqatigiinnik, ataatsimut isigalugit ’inatsisaatsuunerup inuttaatut’, ’tammarnerup erneratut’ oqaatigineqartunik, „taanna Naalakkap Jiisusip takussaalluni tikiukkuni anersaartorfigalugu toqukkumaarpaa suujunnaarsillugulu“. — 2 Thessalonikamiut 2:3, 6-8.

7. Sooq oqariartaaseq „inatsisaatsuunerup inuttaa“ kristumiuuneraqatigiit palaseqatigiivinut tulluarpa?

⁷ Kristumiuuneraqatigiit palaseqatigiivi ’inatsisaatsutut’ oqaatigineqarsinnaapput Biibilimik tunngaveqanngitsunik ajoqersuuteqarnermikkut, nalliuttunik Biibilimi ajoqersuutigineqartunut akerliusunik nalliuttorsiutiginnittarnissamut kajumissaarinermikkut kristumiorpalunngitsumillu pissusilersornermik isiginngitsuusaarinermikkut inunnik millionilinnik tammartitsisimagamik. Upperisarsiornikkut siuttut Jiisusimit assuarineqartut assigalugit ullumikkut ’tammarnerup erneranut’ ilaasut makititaanissamik neriuuteqarnatik suujunnaarsitaassapput. (2 Thessalonikamiut 1:6-9) Kristumiuunerartummi palasiinit upperisarsioqatigiillu allat kristumiuuneraqatigiit avataanniittut palasiinit tammartinneqarsimasut? Apeqqut tamanna akissutissarsiumallugu Jerusalemip ukiumi 607-imi u.n.s. piuneerunneqarnerata kingorna pisimasut misissoriartigit.

„Babylonimit qimaagitsi“

8, 9. (a) Jeremiap juutit Babylonimi aallarussaaqqasut siulittuutaasumik sumik tusarliussassaqarpa? (b) Mederit Perserillu Babylonimik tiguaanerata kingorna qimaanissamut periarfissaalersoq suna pineqarpa?

⁸ Pruffiitip Jeremiap Jerusalemip piuneerunneqarnera ukiumi 607-imi u.n.s. pisoq siulittuutigaa. Oqarpoq juutit aallarussaassasut, ’ukiulli 70-it’ aallarussaanermik kingorna nunaminnut utissanerarlugit. (Jeremia 29:4, 10) Jeremia juutinut Babylonimi aallarussaaqqasunut pingaarutilimmik tusarliussassaqarpoq — tassa Babylonimiut upperisarsiornerannit eqqunngitsumit mingutsissanngitsut. Taamaalillutik piffissanngorpat Jerusalemimut uteriaannaassapput pallorfiginninnerlu minguitsoq pilerseqqillugu. Tamanna pivoq Mederit Perserillu ukiumi 539-mi u.n.s. Babylonimik tiguaanerata kinguninngua. Perserit kunngiat Kyrosi II peqqussuteqarpoq juutit Jerusalemimut utersinnaalersillugit Jehovallu naalaffianik sanaqqiisinnaalersillugit. — Ezra 1:1-4.

 ⁹ Juutit tusindilippassuit uternissamut kajumissaarut malillugu iliorput taamaalillutillu Jeremiap peqqussutaa siulittuutaasoq malillugu iliorlutik. (Ezra 2:64-67) Tassa taakku sumiiffimmut allamut assersuutaanngitsumik qimaapput. (Atuaruk Jeremia 51:6, 45, 50.) Pissutsilli atukkatik pissutigalugit juutit tamakkeratik Jerusalemimut Judamullu uterniarlutik angalangaatsiarput. Babylonimiiginnartut, soorlu pruffiiti Danieli utoqqalisimasoq, Jehovamit pilluaqqusaasinnaapput, aatsaat pallorfiginninnermik minguitsumik Jerusalemimit aallaaveqartumik uummatikkut iluunngarlutik tapersersuigunik Babylonimiullu guutisiornerannut peqataanngilluinnarunik.

10. ’Maajunnartut’ suut ’Babylonersuup’ akisussaaffigai?

¹⁰ Ullumikkut inuit milliardillit upperisarsiornerit eqqunngitsut arlaannut itsaq Babylonimit aallaaveqartunut atassuteqarput. (1 Mosesi 11:6-9) Upperisat imaluunniit upperisarsioqatigiit taakkua ataatsimut isigalugit ’Babylonersuartut, arnat atortittartut nunarsuullu maajunnartuisa anaanaattut’ oqaatigineqarsinnaapput. (Saqqummersitat 17:5) Ilisimaneqarluarpoq upperisarsiorneq eqqunngitsoq oqaluttuarisaanerup ingerlanerani silarsuarmi matumani politikkikkut naalakkersuisunik tapersersuisimasoq. ’Maajunnartut’ Babylonersuup akisussaaffigisaasa ilaat tassaapput sorsunnerpassuit inuit millionillit ’nunarsuarmi toqutaasimanerannik’ kinguneqarsimasut. (Saqqummersitat 18:24) ’Maajunnartut’ allat tassaapput kinguaassiuutitigut inuunerlunneq, soorlu palasit meeqqanik kinguaassiuutitigut atorluisarnerat oqaluffeqarfinni oqartussaasunit sianiginngitsuusaarneqartoq. Taava Jehovap Guutip nunarsuarmik upperisarsiornermit eqqunngitsumit qanittukkut aniguisitsinissaa tupinnarpa? — Saqqummersitat 18:8.

11. Kristumiut ilumoortut Babylonersuup aserorneqannginnerani suna pisussaaffigaat?

¹¹ Kristumiut ilumoortut tamatuminnga ilisimannittut Babylonersuarmiittunik mianersoqqusinissartik pisussaaffigaat. Taakku mianersoqqusisarput ilaatigut Biibilinik atuakkanillu atuagassianillu Biibililersaarutinik ’inussiamit aalajaallunilu silatuumit’ (NV), Jiisusip anersaakkut ’nerisassanik piffissaq eqqorlugu tunniussisartunngortitaanit, saqqummersinneqartartunik agguaanermikkut. (Matthæusi 24:45) Inuit ilaat tusarliussamik Biibilimiittumik soqutiginnikkunik Biibilimik atuaqqissaarneq iluaqutigalugu paasisaqarnerusinnaapput. Neriuppugut paasissagaat kingusinaartinnani ’Babylonimit qimaanissap’ qanoq pisariaqartiginera. — Saqqummersitat 18:4.

Guutipilussiorneq qimarratigiuk

12. Assilissanik, inuusalianik guutipilunnillu pallorfiginninneq Guutip qanoq isigaa?

¹² Babylonersuarmi iliuuserineqartartoq maajunnartoq alla tassaavoq assilissanik, inuusalianik guutipilunnillu allanik pallorfiginninneq. Taakkua Biibilimi ’guutitut maajunnartutut guutipalaatullu’ oqaatigineqarput. (5 Mosesi 29:16) Guutip iluarisaatut iliorusuttut tamarmik guutipilussiorneq nigorsimalluinnartariaqarpaat, Guutip nammineq oqaasii ukua naapertorlugit: „Uanga tassa Jahve, tassa atera! Ataqqinassusera tunniutissanngilara kimulluunniit, nersorneqaatissaraluunniit guutilianut.“ — Esaja 42:8.

13. Guutipilussioriaatsit malunnaarsaartut suut qimarratigisariaqarpavut?

¹³ Aamma Guutip oqaasiani guutipilussioriaatsit  malunnaarsaarnerusut qulaarneqarput. Assersuutigalugu piumatuneq Biibilimi ’guutipilussiornertut’ eqqaaneqarpoq. (Kolossemiut 3:5) Piumatuneq tassaavoq allap pigisaanik pigisaqarusussuataarneq. (2 Mosesi 20:17) Inngilip Saatani Diaavulunngortup Qutsinnerussaartup naligilernissaanik pallorfigineqarnissaminillu kissaatipiluni ineriartortippaa. (Lukasi 4:5-7) Tamanna Guutimut pikitsitsineranik Evamillu Guutip inerteqqutigisaanik pilerigisaqalersitsineranik kinguneqarpoq. Oqartoqarsinnaavoq Adami aamma guutipilussiortoq nuliaminut annaarusunngisaminut namminissarsiorluni pilerissutsini Guutimut naalannissaminngarnit pingaarnerutikkamiuk. Guutilli kamannissaata ulluani aniguerusuttut tamarmik Guutimut tunniusimalluinnartariaqarput piumatunermullu nakkaannaratik.

„Kinguaassiuutitigut inuunerlunneq qimarratigisiuk“

14-16. (a) Ileqqussatigut najoqqutassanut tunngatillugu Josefi qanoq maligassiuilluarpa? (b) Kinguaassiuutitigut eqqunngitsunik pilerissuseqalernaveersaarniarluta qanoq iliortariaqarpugut? (c) Qanoq ililluta ’kinguaassiuutitigut inuunerlunneq qimarratigisinnaavarput’?

¹⁴ Atuaruk 1 Korinthimiut 6:18. * Potifarip nuliata Josefi kanngunartuliortinniarsarimmagu, taanna assersuutaanngitsumik qimaavoq. Taamaalilluni kristumiunut aappaqanngitsunut aappalinnullu maligassaalluarpoq. Qularnanngitsumik Josefip nalunngeqatiginnissutaa siornatigut pisimasunit Guutip kinguaassiuutitigut inuunerlunnermut qanoq isiginninneranik ersersitsisunit ilusilersorneqarsimavoq. Guutip ’kinguaassiuutitigut inuunerlunnermik qimarratiginninnissamik’ peqqussutaata naalannissaa kissaatigigutsigu, uagutsinnik aapparinngisatsinnut kinguaassiuutitigut perusussuseqalersitsisinnaasut tamaasa pinngitsoorniassavavut. Siunnersuut Biibilimeersoq imaappoq: „Toqutissigit . . . ilissinniittut: Kinguaassiuutitigut inuunerlunneq, minguttuuneq, pileritsaassineq kajungerisapiluillu aamma piumatuuneq, tassa guutipilussiorneq. Tamakkua Guutip kamannera naalasseriitsut qitornaannut nalliutitittarpaat.“ — Kolossemiut 3:5, 6.

¹⁵ Maluginiariaruk allassimasoq ’Guutip kamannera nalliutissasoq’. Silarsuarmi inuppassuit kinguaassiuutitigut pilerissusipiluit ineriartortittarpaat nakkaannarfigisarlugillu. Uagut kristumiuugatta qinnutigisariaqarparput Guutimit anersaamillu illernartumit ikiorneqarnissaq kinguaassiuutitigut pilerissutsinit minguttuunit aqunneqalinnginniassagatta. Biibilimik atuaqqissaartarneq, kristumiut ataatsimiinnerinut najuuttarneq oqaluusseqataasarnerlu ’anersaami inuunissamut’ aamma iluaqutigissavavut. Taamaalilluta ’uinngup pilerissusii malissanngilavut’. — Galatiamiut 5:16.

¹⁶ Erseqqippoq pornografiimut tunngasut isiginnaartarutsigit ’anersaami inuunngitsugut’. Kinguaassiuutitigut atoqatigiinnissamut pileritsannartunik atuarnaveersaarlutalu isiginnaarnaveersaarlutalu tusarnaarnaveersaassaagut. Aammattaaq ’illernartunut’ Guutip piinut akunnerminni nuannaralugit kanngunangajattunik quiasaaruteqartarnissaat eqqartuisarnissaallu eqqunngitsuliornerussaaq. (Efesosimiut 5:3, 4) Taamaaliortanngikkutta Ataatatsinnut qilammiusumut asannittumut kamannissaata nalliuttussap pinngitsoornissaa silarsuassaanilu nutaami naapertuilluartumi inuunissaq ilumoorluta kissaatigalutigu ersersissavarput.

„Aningaaserituujuneq“ qimarratigisiuk

17, 18. Sooq „aningaaserituujuneq“ qimarratigisariaqarparput?

¹⁷ Timotheusimut allakkamini siullerni Paulusip erseqqissarpai najoqqutassiat inussianut kristumiunut atuuttut, inussiallu taakkua ilaasa immaqa naalakkamik kristumiuunerat pigisatigut  iluanaarutigissallugu naatsorsuutigisimavaat. Allat immaqa namminissarsiorlutik qatanngutinut ilagiinniittunut attaveqarnertik iluaqutiginiarsarisimavaat. Paulusip ’Guutimik mianerinninnermik [pigisatigut] iluaqutiginnissinnaasorineq’ mianersoqqussutigaa. Tamatumunnga pissutaasimasinnaavoq „aningaaserituujuneq“, kikkunnut tamanut, pisuunut piitsunullu, ajortumik sunniuteqarsinnaasoq. — 1 Timotheusi 6:1, 2, 5, 9, 10.

¹⁸ Eqqaamassajunnarsivatit ’aningaaserituujunertik’ imaluunniit pisiarineqarsinnaasunik, pingaaruteqanngitsunilli, asanninnertik pissutigalugu Guutimut attaveqarluarunnaarsimasut pillugit Biibilimi oqaluttuat. (Josva 7:11, 21; 2 Kunngit 5:20, 25-27) Paulusip Timotheusi ima kajumissaarpaa: „Illit inuk Guutip pigisaa, ajortut tamakku tamaasa nigorsimaniakkit [qimarratiginiakkit, NV] noqqaassutigalugillu iluarneq, Guutimik mianerinninneq, upperneq, asanninneq, nikallujuinneq qanilaarnerlu.“ (1 Timotheusi 6:11) Siunnersuummik tamatuminnga maleruaanissaq ullormi kamaffissami aniguerusuttunut tamanut pingaaruteqarluinnarpoq.

„Inuusuttut kajungerisaat qimarratigikkit“

19. Meeqqat inuusuttullu tamarmik suna pisariaqartippaat?

¹⁹ Atuaruk Ussatit 22:15. * Inuusuttup sianiissutsini tammassutigeriaannaasarpaa; tamatuminngali pinaveersaartitsisinnaasoq tassaavoq perorsaaneq, imaluunniit ilinniartitsineq, Biibilimik tunngaveqartoq. Inuusuttorpassuit kristumiut sallusuissummiinngitsunik angajoqqaallit najoqqutassianik Biibilimiittunik ujartuisarput taakkualu maleruarniarsarisarlugit. Allat qatanngutinut ilagiinniittunut anersaakkut inersimalluartunut siunnersortissarsiortarput. Siunnersuutinik Biibilimik tunngavilinnik, kialuunniit siunnersuutigigaluarpagit, maleruaaneq maanna siunissamilu pillualissutaassaaq. — Hebræerit 12:8-11.

20. Inuusuttut kissaatigisapilunnik qimarratiginninnissamut suna iluaqutigisinnaavaat?

²⁰ Atuaruk 2 Timotheusi 2:20-22. * Inuusuttut ilaat iluaqutaasumik perorsarneqarsimanngitsut unammillerpalaartuunermut, piumatunermut, kinguaassiuutitigut inuunerlunnermut, aningaaserituujunermut aliikkutassanillu noqqaassutiginninnermut nakkaannarlutik qimagussimapput. Tamakkua tassaapput „inuusuttut kajungerisaat“, Biibilimilu kajumissaarneqarpugut taakkuninnga qimarratiginneqqulluta. Kristumiu inuusuttoq taamaaliorsinnaajumalluni suminngaanneersuugaluartunilluunniit ajortumik sunnertinnaveersaartariaqarpoq. Ingammik iluaqutaassaaq „uummatimikkut minguillutik Naalakkamik torlorfiginnittut peqatigalugit“ pissuserineqartussanik ajunngitsunik noqqaassutiginninnissaq pillugu siunnersuummik Biibilimeersumik malinninneq.

21. Jiisusip ajoqersukkani nuanningaartumik qanoq neriorsorpai?

²¹ Inuusuttuugaluarutta utoqqaagaluaruttaluunniit, inunnik uagutsinnik qimagutitsiniartunik malinnikkumannginnerput Jiisusip ajoqersugaanut, savat ungalusamiittut assigalugit ’nalusamik nipaanik qimarratiginnittunut’, ilaarusunnitsinnut uppernarsaataassaaq. (Johannesi 10:5) Ullormili Guutip kamaffissaani aniguissagaanni ajoqutaasunik qimarratiginninnerinnaq naammanngilaq. Aamma pissuserineqartussat ajunngitsut noqqaassutigisariaqarpavut. Allaaserisami tulliuttumi pissuserineqartussat taakku ilaat arfineq-marluk sammissavavut. Tamatumunnga pissutissaqarluarpugut, Jiisusimmi nuanningaartumik matuminnga neriorsorpaatigut: „[Savaatikka] inuunermik naassaanngitsumik tunisarpakka, aamma qaqugumulluunniit tammanngisaannassapput, taakkuninngalu kialluunniit arsaarsinnaanngilaanga.“ — Johannesi 10:28.

[Quppernerup ataani ilanngussat]

Qanoq akissavit?

• Juutit upperisarsiornikkut siuttui Jiisusip qanoq mianersoqquai?

• Inuit millionillit ullumikkut qanoq navianartorsiorpat?

• Guutipilussioriaatsit malunnaarsaartut suut qimarratigisariaqarpavut?

[Atuaqqissaarnermi apeqqutit]

[Qupp. 15-mi assiliartat]

Oqaaseq ’qimarratiginninneq’ tusaraangakku suna eqqaasarpiuk?