Piunngitsunik naleqanngitsunillu itigartitsigit

„Piunngitsunik noqqaassuteqartoq isumaatsuuvoq.“ — USSATIT 12:11.

1. Pigisatta nalillit ilaat suuppat, aamma taakku pitsaanerpaamik qanoq atorsinnaavavut?

TAMATTA arlaannik nalilinnik peqarpugut. Taakkua tassaasinnaapput naammaginakannersumik peqqissuseqarneq, timikkut nukissaqarneq, inunnguuserisamik eqqarsartaatsikkut piginnaaneqarneq imaluunniit aningaasaateqarneq. Jehova asagatsigu taassumunnga kiffartornermi tamakkuninnga tamanik atuineq nuannaarutigaarput, taamaalillutami kajumissaarut Biibilimiittoq una malillugu iliortarpugut: „[Jehova] ataqqinaaseruk pisuussutigisannik.“ — Ussatit 3:9.

2. Piunngitsut naleqanngitsullu pillugit Biibilimi sumik mianersoqqussuteqarpa, mianersoqqussullu taanna sumorpiaq tunngava?

² Biibilimili aamma piunngitsut naleqanngitsullu eqqartorneqarput tamakkuninngalu noqqaassutiginninnermut nukinnik pigisanillu atuilussinnarnissaq mianersoqqussutigineqarluni. Tamatumunnga tunngatillugu maluginiariaruk Ussatit 12:11-mi qanoq allassimasoqarnersoq: „Nunaatiminik naggorissaasoq qaarsillarluni nerisinnaavoq, piunngitsunilli [imal.: naleqanngitsunik] noqqaassuteqartoq isumaatsuuvoq.“ Ussammi tamatumani sunarpiaq pineqarnersoq paasiuminarpoq. Angutip ilaquttani nerisassaqartinniarlugit pisariaqartunillu allanik isumaginiarlugit piffissani nukinilu suleruloornermut atorpagit, ilaatigut toqqissisimalissagunarput. (1 Timotheusi 5:8) Piffissanili nukinilu naleqanngitsunut atulussinnarunigit, tamanna ’isumaatsuuneranut’, tassa naliliilluarsinnaannginneranut ilaquttaminillu isumaginnilluarnissamut kajumissuseqarluannginneranut, ersiutaassaaq. Qularnanngitsumik tamanna inuunermi pisariaqartunik amigaateqalerneranik kinguneqassaaq.

3. Naleqanngitsunik noqqaassutiginninnginnissamut mianersoqqussut Biibilimiittoq Guutimik pallorfiginninnermut qanoq tunngassuteqarpa?

³ Najoqqutassiarmi ussammi tamatumaniittoq Guutimik pallorfiginninnermut tunngatillugu atorutsigu? Taava paasissavarput aalajaalluni eqiasuillunilu Jehovamut kiffartortoq piviusumik toqqissisimalertartoq. Taassuma qularutiginngilluinnarsinnaavaa maannakkut Guutimit pilluaqqusaanini siunissamullu qularnaatsumik neriuuteqarnini. (Matthæusi 6:33; 1 Timotheusi 4:10) Naleqanngitsunilli allamut saassutiginnittoq Jehovamut attaveqarnerminik naassaanngitsumillu inuunissaminut periarfissaqarnerminik navianartorsiortitsisarpoq. Uagut qanoq ililluta tamanna pinngitsoorsinnaavarput? Erseqqissumik takusinnaasariaqarparput suut inuunitsinni ’naleqanngitsuunersut’ taakkuninngalu itigartitsinissarput aalajangiusimallugu. — Atuaruk Titusi 2:11, 12.

4. Suut ataatsimut isigalugit naleqanngitsuuppat?

⁴ Taavami naleqanngitsut suugamik? Oqartoqarsinnaavoq ataatsimut isigalugit tassaasut suut uagutsinnik tarnikkut iluunngarluta Jehovamut kiffartornaveersaartitsisut tamarmik. Assersuutigalugu tassaasinnaapput qasuersaariaatsit aliikkusersoriaatsillu assigiinngitsut. Soorunami taakkua ingasaannagit iluaqutaasarput. Guutimulli kiffartorneq tunulliullugu piffissarput taakkununnga atorpallaarutsigu taakkua naleerutissapput, anersaakkut peqqissutsitsinnut ajoqutaalerlutik. (Oqaluussisartup oqaasii 2:24; 4:6) Tamanna pinngitsoorumallugu inuunermi oqimaaqatigiissaarisariaqarpoq mianersuutigalugu piffissaq qanoq atornerlugu, piffissaq naleqaqimmat. (Atuaruk Kolossemiut 4:5.) Naleqanngitsunulli ilaapput qasuersaarnermit aliikkusersornermillu navianarnerungaartut. Tassa guutipiluit.

Guutit naleqanngitsut itigartikkit

5. Oqaatsimut ’guutipiluit’-mut Allakkani Hebræerisuuniittumut tunngatillugu oqaaseq alla suna atorneqarsinnaava?

⁵ Soqutiginarpoq Allakkani Hebræerisuuni oqaaseq ’guutipiluit’ atorneqaraangat allassimaffiit amerlanersaanni oqaatsimit ’guutit naleqanngitsut’-mik aamma nutserneqarsinnaasumit nutserneqarsimasarmat. Assersuutigalugu Jehovap Israelikkut ima oqarfigai: „Immissinnut guutipiluliuutissanngilasi [naleqanngitsunik guutiliuutissanngilasi, NV-mi q.a.i.], * guutilianik ujaqqanilluunniit  nappartitsissanngilasi ujaqqanillu ilusilersukkanik pallorfigisassassinnik nunassinniititaqassanngilasi.“ (3 Mosesi 26:1) Aamma kunngi Daavi ima allappoq: „[Jehova] angingaarpoq unnersiutigineqangaartuullunilu, annilaarnangaarpoq guutinut tamanut. Inuiaammi guutii tamarmik suunngitsuupput, [Jehovali] tassaavoq pinngortitsisoq qilammik.“ — 1 Nalunaarsuutit 16:25, 26.

6. Sooq guutipiluit naleqanngillat?

⁶ Soorlu Daavi allattoq, Jehovap angingaassusianut uppernarsaataasunik avatangiiseqarpugut. (Tussiaat 139:14; 148:1-10) Angeruseq tunngavigalugu Jehovamut attaveqarneq Israelikkunnut immikkut pisinnaatitaaffiuvoq angingaartoq, taakkuali taassuminnga tunussinerat aamma guutilianik ujaqqanillu pallorfiginninnerat sianiilliornerungaarpoq! Taakkua guutipiluisa ilumut naleqanngitsuunerat, imminnik pallorfiginnitsiminnilluunniit annaassinissamut pissaaneqannginnerat, paasinarsivoq. — Eqqartuussisut 10:14, 15; Esaja 46:5-7.

7, 8. ’Pisuussutit’ qanoq ilillutik guutigineqalersinnaappat?

⁷ Ullumikkut nunat ilarpassuini inuit guutiliaannik suli pallorfiginnittoqartarpoq, kisianni taakku itsaq iluaqutaanngitsiginermissulli maanna iluaqutaanngitsigipput. (1 Johannesi 5:21) Biibilimili oqaluttuarineqarpoq aamma allanik guutiliaanngitsunik guuteqartoq. Assersuutigalugu Jiisusip oqaasii ukua maluginiariakkit: „Naalakkanut marlunnut kiffartorsinnaasoqanngilaq. Aappaa uumigiguniuk aappaa asassavaa, aappaa tulaavigiguniuk aappaa asiginnassavaa. Guutilu Mammonilu [pisuussutillu, 1936] tamaasa kiffartorfigisinnaanngilasi.“ — Matthæusi 6:24.

⁸ ’Pisuussutit’ qanoq ilillutik guutitut issinnaagamik? Assersuutigeriartigu itsaq Israelimi ujarak narsaammiittoq. Illuliorniaraanni qarmaliorniaraanniluunniit iluaqutaasinnaasupilussuuvoq. Israelikkulli ’pallorfigisassatut’ napparpassuk taakkununnga naakkiuffissanngussaaq. (3 Mosesi 26:1) Aningaasanut tunngatillugu aamma taamaappoq. Inuussutissaqarumalluta aningaasaateqartariaqarpugut, aamma Jehovamut kiffartornermi atorluarsinnaavavut. (Oqaluussisartup oqaasii 7:12; Lukasi 16:9) Aningaasarsiornerli kristumiutut kiffartornitsinnit pingaaruteqarnerusutut isigigutsigu, aningaasat guutigilersimassavavullusooq. (Atuaruk 1 Timotheusi 6:9, 10.) Silarsuarmi matumani aningaasat pingaaruteqangaarfianni aningaasanut oqimaaqatigiissumik isiginnittaaseqarnissarput qulakkeertariaqarparput. — 1 Timotheusi 6:17-19.

9, 10. (a) Kristumiup ilinniagaqarneq qanoq isigissavaa? (b) Qaffasinnerusumik ilinniarnerup suna navianaatigaa?

⁹ Iluaqutaasinnaasut naleqanngitsunngorsinnaanerannut assersuutissaq alla tassaavoq silarsuarmi ilinniagaqarneq. Meeqqatta ilinniagaqarluarnissaat kissaatigaarput inuunerminni imminut napatissinnaaniassammata. Sulilu pingaaruteqarnerusumik: Kristumiu ilinniagaqarluartoq Biibilimi atuakkaminik paasinnilluarsinnaaneruvoq, ulluinnarni ajornartorsiutinik Biibilimi najoqqutassiat tunngavigalugit eqqarsaatiginnilluarsinnaaneruvoq taamaalillunilu silatusaartumik isummerluarsinnaanerulluni, aammattaaq sallusuissutit Biibilimiittut pillugit paasiuminartumik qularunnaarnartumillu ilinniartitsilluarsinnaaneruvoq. Ilinniagaqarluarumalluni piffissaq sivisungaatsiartoq atortariaqarpoq, tamannali imminut akilersinnaavoq.

¹⁰ Qaffasinnerusumimmi ilinniagaqarneq universitetimi ilinniarfimmiluunniit qaffasinnerusumi? Tamatuma inuunermi iluatsitsilluarnissamut pingaaruteqartupilussuartut isigineqartarnera nalinginnaavoq. Taamatulli ilinniagaqartut ilarpassuisa naggataatigut silamiut ilisimassusiat ajoqutaasoq isummaminni pigilertarpaat. Ukiut inuusuttuuffiusut naleqangaartut Jehovamut kiffartornermi pitsaanerpaamik atorneqarsinnaagaluartut maangaannartittarpaat. (Oqaluussisartup oqaasii 12:1) Tupinnanngitsumik nunani inuppassuarnit taamatut ilinniagaqarfiusartuni aamma inuppassuaqarpoq Guutimut upperunnaarsimasunik. Silarsuarmi matumani ilinniartitaanermik aaqqissuussinerit siuarsimasut toqqissisimalersitsinissaat tatiginagu, Guutimik tatiginninneq pitsaaneruvoq. — Ussatit 3:5.

Uinikkut kajungerisat guutinngorteqinagit

11, 12. Sooq Paulusip ilaat ’aqajaqquminnik guuteqarnerarpai’?

¹¹ Ilagiinnut Filippimiittunut allakkamini apustili Paulusi  guutigilerneqarsinnaasumik allamik uparuagaqarpoq. Siornatigut uppertuusimasut eqqartorpai, maannali taakku pillugit ima allappoq: „Amerlaqaat Kristusip sanningasulianut [nappakkamut Kristusip anniartitaaffianut, NV] akeraallutik inuusut, taakkulu qasseeriarlunga ilissinnut oqaatigereeraluarlugit maanna qiallunga aammaarlunga oqaatigaakka. Taakkua tammarnissaq naggatissaraat, aqajarortik guutigaat, . . . nunallu pii kisiisa eqqarsaatigaat.“ (Filippimiut 3:18, 19) ’Aqajaroq’ qanoq ililluni guutiusinnaagami?

¹² Paulusip matumani eqqaasaasa uinikkut kajungerisaminnik naammasinninnissamik kissaateqarnertik Paulusimik Jehovamut kiffartoqateqarnissaminninngarnit pingaarnerutilersimarpasippaat. Immaqa ilaat ima imertigalutillu neritigipput nerivallaalerlutillu imerpallaalerlutik. (Ussatit 23:20, 21; naleqqiuguk 5 Mosesi 21:18-21.) Allat periarfissat taamanikkut silarsuarmiittut atorluarniarlugit aalajangersimasinnaapput taamaalillutillu tamakkua Jehovamut kiffartornerminnit allamut saassutigalugit. Qanortoq inuunermik nuannaarutiginninnissamik kissaateqarneq uummatikkut iluunngarluta Jehovamut kiffartornitsinnik tamaviaarussiunnaarutiginngisaannartigu. — Kolossemiut 3:23, 24.

13. (a) Piumatuuneq qanoq paasisariaqarpa, Paulusillu piumatuuneq sumut assersuuppaa? (b) Qanoq ililluni piumatuunaveersaartoqarsinnaava?

¹³ Paulusip guutipilussiorneq aamma allamut tunngatillugu eqqaavaa. Ima allappoq: „Taamaattumik toqutissigit nunamut atasut ilissinniittut: Kinguaassiuutitigut inuunerlunneq, minguttuuneq, pileritsaassineq kajungerisapiluillu aamma piumatuuneq, tassa guutipilussiorneq.“ (Kolossemiut 3:5) Piumatuuneq tassaavoq piginngisatsinnik piginnerusussuataarneq. Pigisanik pileritsaassinerusinnaavoq, aammali kinguaassiuutitigut pileritsannerusinnaavoq. (2 Mosesi 20:17) Taamatut pileritsannerup guutipilussiornermut assersuunneqarnera eqqarsalernarpoq, ilaa? Jiisusip assersuusiaq torrattoq atorpaa pilerissusipiluit akiorniarlugit sapinngisaq tamaat iliuuseqarnissap qanoq pingaaruteqartiginera ersersinniarlugu. — Atuaruk Markusi 9:47; 1 Johannesi 2:16.

Oqaatsit naleqanngitsut mianersorfigisigit

14, 15. (a) Oqaatsit suut Jeremiap nalaani inuppassuarnit naakkiussutigineqarpat? (b) Sooq Mosesip oqaasii naleqangaarpat?

¹⁴ Oqaatsit aamma naleqanngitsuusinnaapput. Assersuutigalugu Jehovap Jeremia ima oqarfigaa: „Pruffiitit taakku atera taallugu sallullutik siulittuisarput; uanga aallartinngilakka imaluunniit peqqusiffigisimanagit oqaluffigisimanagilluunniit. Takorluukkat salluliuutaasut siulittuutillu eqqortuunngitsut [oqaatsillu naleqanngitsut, NV] uummatiminniillu peqquserluutaat tassaapput ilissinnut takorluukkersaarutigisartagaat.“ (Jeremia 14:14) Pruffiitioqqusersut Jehovap aqqani oqalunnerarput, namminnerliuku isummaminnik namminnerlu ilisimassutsiminnik siuarsaasut. Taakkua oqaasii oqaasiupput naleqanngitsut. Naleqanngitsuupput pallorfiginninnermillu ilumoortumik navianartorsiortitsillutik. Ukiumi 607-imi u.n.s. oqaatsinik naleqanngitsunik tamakkuninnga maleruaasut ilarpassui Babylonimiut sakkutuuinit tassanngaannartumik toqutaapput.

¹⁵ Taakkua oqaasiinit allaanerulluinnartumik Mosesip Israelikkut ima oqarfigai: „Ullumi erseqqissaallunga ilissinnut oqaaserisakka tamaasa aalajangiussigit. . . . Oqaatsimmi taakku asuliinnaanngillat, tassaappulli ilissinnut inuussutaasussat. Oqaatsit taakku tunngavigalugit nunami Jordanikkut ikaarussi tiguarumaakkassinni inuummersorumaarpusi.“  (5 Mosesi 32:46, 47) Aap, Mosesip oqaasii Guutimit isumassarsiarititaapput. Taamaattumik inuiaqatigiit atugarissaarnissaannut naleqangaarput, pingaaruteqarluinnarput. Taakkuninnga maleruaasut inuunertupput pigissaalerlutillu. Qanortoq oqaatsinik naleqanngitsunik itigartitsiuarisa oqaatsinillu sallusuissutaasunik naleqangaartunik maleruaajuarluta.

16. Ilisimatuut oqaasii Guutip oqaasianut akerliusut qanoq isigaavut?

¹⁶ Ullumikkut oqaatsinik naleqanngitsunik tusagaqartarpugut? Aap. Assersuutigalugu ilisimatuut ilaat oqarput pinngoriartuaarsimaneraanermi ilisimatuussutsikkullu paasisani allanut tunngasuni ersertoq Guutimut uppernissaq pisariaarussimasoq, suullu tamarmik pinngortitami allanngoriartornerit iluaqutigalugit nassuiarneqarsinnaasut. Oqaatsit makitarpaluttut tamakku eqqissiunnaarutigissavavut? Soorunami naamik! Inuit ilisimassusiat Guutip ilisimassusianit allaaneruvoq. (1 Korinthimiut 2:6, 7) Aamma nalunngilarput inuit ajoqersuutaat Guutip paasinarsisitaanut akerliugaangata, ajoqersuutit inunneersuusut tamatigut eqqunngitsuusartut. (Atuaruk Romamiut 3:4.) Ilisimatuussutsikkut aalajangersimasutigut siuariartoqarsimagaluartoq, Biibilimi inuit ilisimassusiannik naliliineq ilumoortuarpoq: „Silarsuup matuma ilisimassusia Guutimi sianiissusiinnaavoq.“ Inuit eqqarsaataat Guutip ilisimassusianut asseqanngitsumut naleqqiullugit imaqanngitsuupput, naleqanngitsuupput. — 1 Korinthimiut 3:18-20.

17. Kristumiuunerartut upperisarsiornikkut siuttuisa tunussisullu oqaasii qanoq isigissavavut?

¹⁷ Oqaatsit naleqanngitsut aamma kristumiuunerartut upperisarsiornikkut siuttuineersuupput. Taakku Guutip aqqani oqalunnerartarput, oqaasiisali amerlanerpaartaat Biibilimik tunngaveqanngillat taamaattumillu naleqanngitsuullutik. Aamma tunussisut naleqanngitsunik oqaaseqartarput, ’inussiamit aalajaallunilu silatuumit’ toqqakkamit ilisimassuseqarnerunerarlutik. (Matthæusi 24:45-47, NV) Oqaaserisatilli namminneq ilisimassusertik tunngavigalugu oqaaserisarpaat taamalu oqaasii naleqanngitsuusarlutik, taakkuninnga tusarnaartunut tamanut tammartitsissutaallutik. (Lukasi 17:1, 2) Qanoq ililluta taakkunannga tammartinneqarnaveersaarsinnaavugut?

Oqaatsit naleqanngitsut qanoq itigartinneqartartut

18. Pissutsini qanoq ittuni siunnersuut 1 Johannesi 4:1-imiittoq malissinnaavarput?

¹⁸ Apustili Johannesi utoqqalisimasoq tamanna pillugu pitsammik ima siunnersuuteqarpoq: „Asasakka, uppereqinasigit oqaaserineqartut isumassarsiarititaasut tamaasa, oqaaserineqartulli isumassarsiarititaasut misilissigit paasiniarlugu Guutimeersuunersut, pruffiitioqqusersorpassuimmi silarsuarmut aallarsimapput.“ (1 Johannesi 4:1, NV) Siunnersuut tamanna malillugu oqaluussinitsinni naapitavut tamatigut kajumissaartarpavut tusakkatik Biibilimi allassimasunut sanilliuttarlugit misissortaqqullugit. Tamannattaaq uagutsinnut najoqqutassaalluartuuvoq. Sallusuissummik isornartorsiuerpalullutik oqaluttunik imaluunniit ilagiinnik, utoqqaanertanik qatanngutitsinnilluunniit allanik nikassaasunik tusagaqarutta ingerlaannaq  akuersussanngilavut. Imali aperisinnaavugut: „Tamakkuninnga oqaluttuarinnittoq Biibilimi allassimasut naapertorlugit iliuuseqartarpa? Oqaluttuat pasilliutilluunniit tamakku Jehovap siunertaanik siuarsaappat? Ilagiinni eqqissinermik siuarsaappat?“ Tusakkavut qatanngutigiissuarnut ineriartuutaanatik aserorsaataasut tamarmik naleqanngillat. — 2 Korinthimiut 13:10, 11.

19. Utoqqaanertat naleqanngitsunik oqaaseqannginnissartik qanoq ilillutik qulakkeertarpaat?

¹⁹ Oqaatsinut naleqanngitsunut tunngatillugu aamma utoqqaanertat pingaarutilimmik ilinniagassaqarput. Taakku siunnersuigaangamik ilisimasamik killeqarnerat eqqaamasariaqarpaat, aamma namminneq ilisimasatik misilittakkatillu kisiisa tunngavigalugit siunnersuineq ajorput. Biibilimi allassimasut innersuussutigiuartariaqarpaat. Najoqqutassaalluartoq una apustilip Paulusip allagaaniippoq: ’Allassimasut qimmullugit isumalioqinasi.’ (1 Korinthimiut 4:6, 1936) Utoqqaanertat Biibilimi allassimasut qimmullugit iliorneq ajorput, aammattaaq siunnersuutinik Biibilimeersunik atuakkani atuagassianilu inussiamit aalajaallunilu silatuumeersuniittunik qimmuineq ajorput.

20. Naleqanngitsunik itigartitsinissamut suut iluaqutigisinnaavavut?

²⁰ Naleqanngitsut — ’guutiugaluarunik’, oqaasiuagaluarunik allaagaluarunilluunniit — ajoqutaasorujussuusarput. Taamaammat suut naleqanngitsuunersut paasinissaannut ikioqqulluta Jehova qinnuigiuassavarput, naleqanngitsunillu qanoq ililluni itigartitsinissaq eqqarsaatigalugu taassumunnga siulersoqqulluta. Taamaaliorutta tussiaasiortutut ima oqarpugullusooq: „Isikka alartikkit sallunermit [naleqanngitsunit, NV], inuuginnartinnga illit aqqutigeqqusanni.“ (Tussiaat 119:37) Allaaserisami tulliuttumi Jehovap siulersuinera naapertorlugu iliornerup pingaaruteqassusia sammissavarput.

[Quppernerup ataani ilanngussaq]

Uku nassuiarsinnaavigit?

• Naleqanngitsunut itigartittariaqakkatsinnullu suut ilaappat?

• Aningaasat qanoq ililluta guutitut itsinnaveersaarsinnaavavut?

• Uinikkut kajungerisat qanoq ilillutik guutipilussiorninngorsinnaappat?

• Oqaatsit naleqanngitsut qanoq ililluta itigartissinnaavavut?

[Atuaqqissaarnermi apeqqutit]

[Qupp. 11-mi assiliartaq]

Israelikkut kajumissaarneqarput ’nunaatiminnik naggorissaaqqullugit’ naleqanngitsunillu noqqaassutiginneqqunagit

[Qupp. 12-mi assiliartaq]

Nunap piinik pigisaqarusunnerit Jehovamut kiffartorninnik tamaviaarussiunnaassutiginngisaannaruk

[Qupp. 13-mi assiliartaq]

Utoqqaanertat oqaasii naleqangaarsinnaapput