Naggatissap nalaani aappariinneq angajoqqaatullu suliassaq

„Piffissaq sivikilleqaaq.“ — 1 KORINTHIMIUT 7:29.

1. (a) Ullumikkut allanngornerit suut ’anigoruminaappat’? (b) Sooq ilaqutariinni pingaartitat allanngulernerat soqutigisariaqarparput?

GUUTIP oqaasiani siulittuutigineqarpoq ’naggatissap nalaata’ ilisarnaatigiumaarai sorsunnerit, nunap sajuttarneri, kaannersuaq nappaassuillu. (Danieli 8:17, 19; Lukasi 21:10, 11) Biibilimi aamma mianersoqqussutigineqarpoq inuiaat oqaluttuarisaaneranni piffissami pingaarutilimmi matumani innuttaaqatigiinnikkut allanngorujussuartoqarumaartoq. Ilaqutariittut inuunermi allanngorujussuarnerit tamakku ’ulluni kingullerni’ ernumanartorsiorfiusuni ’anigoruminaatsunut’ (NV) ilaasussaasimapput. (2 Timotheusi 3:1-4) Allanngornerit taakku sooq soqutigisariaqarpavut? Pissutigalugu nalinginnaangaarmata annertungaarmatalu kristumiup aappariinnermut angajoqqaajunermullu isiginnittaasianut sunniuteqarsinnaammata. Qanoq sunniuteqarsinnaagamik?

2. Silarsuarmi inuit amerlanerpaartaasa aappariinneq avinnerlu qanoq isigaat?

² Ulluni makkunani avinnissaq pisariillunilu nalinginnaavoq, avittartullu nunarpassuarni amerligaluttuinnarput. Eqqaamajuartariaqarparpulli  Jehovap aappariinnermut avinnermullu isiginnittaasiata silarsuarmi avatangiisitsinni isiginnittaaserineqarnerusumit allaanerulluinnarnera. Jehovap aappariinneq avinnerlu qanoq isigigamigit?

3. Jehovap Jiisusillu aappariinneq qanoq isigaat?

³ Jehovap Guutip piumasaraa aappariit katinnermi neriorsuutiminnik eqqortitsinissaat. Angut arnarlu siulliit aappariittut katitikkamigit oqarpoq ’angutip nuliani attavigissagaa uiniulissasullu ataaseq’. Jiisusip Kristusip oqaatsit taakkua oqaatigeqqippai imalu nangilluni: „Guutimmi ataqatigiilersitai inuup avissaartissanngilai.“ Imalu nangeqqippoq: „Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.“ (1 Mosesi 2:24; Matthæusi 19:3-6, 9) Taamaattumik Jehovap Jiisusillu aappariinneq inuuneq naallugu atasussatut aatsaallu aappaasut arlaat toquppat atuukkunnaartartutut isigaat. (1 Korinthimiut 7:39) Aappariinneq aaqqissuussaammat illernartoq, avinneq eqqarsaatigilluaqqaarnagu iliuuserineqartussaanngilaq. Tassami Malaki 2:16-imi allassimaqqaarfinni hebræerisuuni allassimavoq Jehovap Biibilimik tunngaveqanngitsumik ’avinneq uumigigaa’. * — Atuaruk Malaki 2:13-16; 3:6.

Aappariinneq akisussaaffeqartitsivoq

4. Sooq kristumiut inuusuttut ilaat katipallannertik peqqissimissutigisarpaat?

⁴ Silarsuarmi atoqateqarnermut tunngasunik eqqarsaatiginniffioqisumi inuuvugut, ullullu tamaasa asserpassuarnik illigeqqusaartunik siumugaqartuartarpugut. Assit taama ittut uagutsinnut, ingammik inuusuttunut ilagiinniittunut nuannareqisatsinnut, sunniutigisinnaasaat suusupagineqassanngillat. Kristumiut inuusuttut sunniutit ajortut tamakkua, allaat nammineq piumasarinngisaraluannik kinguaassiuutitigut pilerissuseqalersitsisinnaasut, qanoq periarfigisariaqarpaat? Ilaasa tatineqarnertik iliuuseqarfiginiarsarisarpaat inuusuppallaarlutik katinnermikkut. Neriuttarput taamaaliornermikkut kinguaassiuutitigut ajortuliornaveersaarsinnaallutik. Sivitsunngitsorli aalajangigartik peqqissimissutigisarpaat. Sooq? Katerngaajujunnaarniariarlutik ulluinnaat aallartikkaangata paasisarpaat qanoq assigiinngissuteqartigalutik. Pissutsit taamaakkaangata aappariit immikkut unamminiagassaqalertarput.

5. Aappariit katinnermi neriorsuutiminnik eqqortitsinissaminnut suna iluaqutigissavaat? (Aamma takuuk ilanngussaq.)

⁵ Ilimagisaraluamit allaanerulluinnartumik aappaqarneq — aamma uppeqatigigaluaraanniluunniit — artornartupilussuusinnaavoq. (1 Korinthimiut 7:28) Atukkalli qanorluunniit artornartigigaluarpata kristumiut ilumoortut nalunngilaat Biibilimik tunngaveqanngitsumik avinneq tassaasoq ajornartorsiutinut aappariinnermut pilluarnanngitsumut attuumassuteqartunut aaqqiissut akuerineqarsinnaanngitsoq. Taamaattumik katinnermi neriorsuutiminnik eqqortitserusunnertik pissutigalugu aappariittuarnissaminnik ilungersorlutik sulissutiginnittut ataqqineqartariaqarput aamma ilagiinnit kristumiunit ikiorneqartariaqarput. *

6. Kristumiut inuusuttut katinneq qanoq isigisariaqarpaat?

⁶ Inuusuttuuguit aamma katissimanngikkuit, taava katinneq qanoq isigisariaqarpiuk? Erloqissutissarpassuarnik pinngitsuuisinnaavutit aatsaat katinnissannut timikkut, eqqarsartaatsikkut anersaakkullu piareersimaleruit arnaaguit angummik angutaaguillu arnamik kristumiumik aappassiartaaruit. Soorunami katissagaanni qanoq utoqqaatiginissaq pillugu Biibilimi malittarisassaqanngilaq. * Erseqqipporli ’inuusuttuunerup aallaqqaataa’ — piffissaq kinguaassiuutitigut pilerissutsit  sakkortuffiat — qaangiusseeqqaartariaqarit. (1 Korinthimiut 7:36, NV) Sooq? Pilerissutsivit naliliilluarsinnaajunnaarsissinnaammatsit silatusaanngitsumillu aalajangiisissinnaallutit kingusinnerusukkut immaqa peqqissimissutigingaakkannik. Eqqaamajuk Jehovap aappariinneq pillugu siunnersuutai pitsaasut ilinnut iluaqutissaasut, aamma taakkua malillugit ilioruit pilluassasutit. — Atuaruk Esaja 48:17, 18.

Angajoqqaat akisussaassutsiminnik ilisimannittut

7. Aappariit inuusuttut ilaat sunik nalaataqartarpat, aamma sooq tamanna aappariinnermut artorsaatissiisinnaava?

⁷ Aappariit ilaasa inuusuttuullutik katissimasut paasisarpaat namminneq suli inersimasunngunngeqqajarlutik angajoqqaanngussallutik. Ulloq naallugu nalunaaquttap-akunnerini 24-ni sammineqarnissaminik pisariaqartitsisumik meerartaannginnerminni imminnut iluamik ilinniarnissaminnut piffissaqarluarsimanngillat. Pissusissamisoorluinnarpoq anaanaasup inoorlaamik pingaarnerpaatillugu samminnittarnera, tamannalu ataatanngorlaap sinngalissutigisinnaavaa. Aamma aappariit sinnakilaartalernertik pissutigalugu stresselersinnaapput pissutsillu atugaat najummassimanarsisinnaallutik, tamatumalu kingunerisaanik aappariinnerat artornarnerulersinnaalluni. Aappariit inuusuttut paasileriataartarpaat kiffaanngissuseqarpiarunnaarlutik. Arlaannukarsinnaanerat sulerisinnaanerallu siornatigumut naleqqiullugu killeqarnerulertarpoq. Pissutsit atukkamik allanngornerat qanoq isigissavaat?

8. Angajoqqaatut suliassaq qanoq isigineqartariaqarpa, aamma sooq?

⁸ Soorlu aappariinnermut tunngatillugu akisussaassutsimik ilisimannittuusariaqartoq, taamatuttaaq angajoqqaatut taamaannissaq pisariaqarpoq. Angajoqqaajuneq akisussaaffiullunilu immikkut pisinnaatitaaffiuvoq Guutimeersoq. Aappariit kristumiut angajoqqaajusut meerartaaraangamik pissutsinut naleqqussarniarlutik allanngortittariaqagaat suugaluarpataluunniit, sapinngisartik tamaat akisussaassuseqarpalaartumik tamanna iliuuseqarfiginiartariaqarpaat. Jehova inunnik meerartaarsinnaanngortitsisuummat angajoqqaat inoorlaaq ’Jehovap tunissutaatut’ isigisariaqarpaat. (Tussiaat 127:3) Angajoqqaat kristumiut angajoqqaatut „Naalakkami“ akisussaaffeqalerniarlutik sapinngisartik tamaat iliuuseqassapput. — Efesosimiut 6:1.

9. (a) Meeqqamik perorsaanermut suut ilaappat? (b) Uiusoq qanoq iliorsinnaava nuliani anersaakkut nukittujuarsinnaaqqullugu?

⁹ Meeqqamik perorsaanermut ilaavoq ukiorpassuarni imminut pilliutigineq. Piffissarujussuaq nukippassuillu atortariaqarput. Uiusup kristumiup paasisariaqarpaa nuliani meerartaarnermik kingorna ukiorpaalunni qularnanngitsumik ataatsimiinnerit nalaanni akornusersorneqartarumaartoq, aamma Biibilimik atuaqqissaarnissaminut atuakkaminillu eqqarsaatiginneqqissaarnissaminut periarfissakinnerujumaartoq. Tamakkua nuliaasup anersaakkut peqqiillissutigisinnaavai. Ataataallunilu uiusoq akisussaassutsiminik ilisimannittoq meeqqamik paaqqinninnermut ikiuunniarluni sapinngisaminik iliuuseqartariaqarpoq. Nuliami ataatsimiinnerup nalaani tusanngitsuugai kingusinnerusukkut nulianilu angerlarsimaffimminni oqaloqatigiissutigisinnaavaat. Aamma nuliani  ikiorsinnaavaa meeqqamik isumaginneqataalluni, nuliani isumaqarluartumik oqaluusseqataasinnaaniassammat. — Atuaruk Filippimiut 2:3, 4.

10, 11. (a) ’Jehovap oqaaqqissaarutai’ malillugit meeqqanik qanoq perorsaasoqartarpa? (b) Sooq angajoqqaarpassuit kristumiut nersualaarneqartariaqarpat?

¹⁰ Angajoqqaatut akisussaassutsimik ilisimanninnermut ilaasut tassaaginnanngillat meeqqap nerisassaqarnissaanik, atisassaqarnissaanik, najugaqarnissaanik nakorsarneqarnissaanillu isumaginninneq. Pingaartumik ulluni navianartorsiorfiusuni makkunani meeqqat ileqqussatigut najoqqutassianik sorlernik malinnittariaqarnerannik mikisunnguuneranniilli ilinniartinneqartariaqarput. Meeqqat „Jehovap ileqqoreqqusai oqaaqqissaarutaalu malillugit“ perorsarneqartariaqarput. (Efesosimiut 6:4, NV) Taamatut ’oqaaqqissaarinermut’ ilaavoq angajoqqaat meeqqap isumaanut — naalungiannguuneraniit aamma ukiuni inuusuttuaraaffiini nalorninartortalinni — Jehovap eqqarsaataanik puiuikkiussisitsinissaat. — 2 Timotheusi 3:14, 15.

¹¹ Jiisusip ajoqersukkani peqqugamigit inunnik inuiannit tamaneersunik ajoqersuganngortitseqqullugit, aamma angajoqqaat meeqqaminnik ajoqersuganngortitsinissaat eqqarsaatigisimassavaa. (Matthæusi 28:19, 20) Tamanna suliassaavoq imaannaanngitsoq silarsuup matuma meeqqanik inuusuttunillu tatisingaarnera eqqarsaatigalugu. Taamaattumik angajoqqaat meeqqaminnik kristumiutut tunniulluinnarnissamut perorsaasimasut ilagiinnit nersualaarneqartariaqarput. Angajoqqaatut akisussaaffimmik ilisimannittutut uppernermikkut qasusuinnermikkullu silarsuup sunniinera ’ajugaaffigisimavaat’. — 1 Johannesi 5:4.

Aappaqannginnissamut meeraqannginnissamullu pissutissaalluartut

12. Sooq kristumiut ilaat aalajangertarpat piffissap ilaani aappaqarniarnatik?

¹² ’Piffissaq sivikilleqimmat’ ’silarsuullu matuma pissusia nikittarmat’ (NV), Biibilimi kajumissaarneqarpugut aappaqannginnerup pitsaaqutai eqqarsaatigeqqullugit. (1 Korinthimiut 7:29-31) Taamaattumik kristumiut ilaat aappaqanngittuarniarlutik aalajangertarput, ilaat ukiualunni aappaqarniarnatik aalajangertartut. Aappaqanngitsutut kiffaanngissuserminnik namminneq angorusutaminnik anguniaanissamut atorluaannginnerat nersornarpoq. Ilarpassui aappaqanngittuarput Jehova ’akornusersorneqaratik’ kiffartorfigisinnaajumallugu. (Atuaruk 1 Korinthimiut 7:32-35.) Aappaqanngitsut ilaat pioneriullutilluunniit Betelimi suleqataapput. Ilaasa Jehovap peqatigiissortaani atorneqarsinnaanerunissartik anguniartarpaat Kiffartortut Toqqakkat Ilinniarfianni atuarnissaminnut piukkunnarsarnermikkut. Aappaqarnatik piffissaq tamaat kiffartorsimasut, kingusinnerusukkulli katinniarlutik aalajangersimasut, amerlanertigut misigisarput ukiuni aappaqanngiffimminni ilikkakkamik ilarpassui aappariinnermi atorsinnaallugit.

13. Sooq aappariit kristumiut ilaat meerartaarniarnatik aalajangertarpat?

¹³ Nunat ilaanni ilaqutariittut inuuneq allatut allanngorsimavoq — aappariippassuit aalajangertarput meerartaarniarnatik. Ilaat taamatut aalajangertarput aningaasaqarneq pissutigalugu, imaluunniit aningaasarsiorfiulluartumik suliffittaarnissaminnut periarfissaqarusukkamik. Aamma aappareeqarpoq kristumiunik  meeraqarniarnatik aalajangersimasunik. Amerlanertigulli taamatut aalajangertarput Jehovamut kiffartornissamut kiffaanngissuseqarnerujumallutik. Aappariit taamatut aalajangersimasut sutigut tamatigut nalinginnaalluinnartumik inooqatigiipput. Taamaakkaluartorli Guutip naalagaaffiata soqutigisaanik inuunerminni salliutitsiumallutik aappariinnermi pilluaqqussutit ilaannik pinngitsuuinissaminnut piumassuseqarput. (1 Korinthimiut 7:3-5) Aappariit taakkua ilaat Jehovamut kiffartorput ilageeqatigiinni ataatsini arlalinnilu angalasartutut Betelimiluunniit kiffartornermikkut. Allat pioneriullutilluunniit ajoqersuiartortitaapput. Jehovap taakkua suliaat asanninnerlu aterminut takutissimasaat puiornavianngilai. — Hebræerit 6:10.

’Uinngup piisigut naalliuuteqarneq’

14, 15. Angajoqqaat kristumiut suut ’uinngup piisigut naalliuutigisinnaavaat’?

¹⁴ Apustilip Paulusip kristumiut aappallit allaffigai ’uinngup piisigut naalliuuteqartarumaartut’. (1 Korinthimiut 7:28, 1936) Naalliuutinut ilaasinnaapput aappariit, qitornaasa imaluunniit angajoqqaavisa utoqqaat peqqiilliulernerat. Aamma ajornartorsiutit annikilliuutillu meeqqanik perorsaanermut atassuteqartut pineqarsinnaapput. Soorlu allaaserisap matuma aallaqqaataani eqqaaneqareersoq, Biibilimi siulittuutigineqarpoq ’ullussani kingullerni ernumanartorsiorfiit anigoruminaatsut nalliukkumaartut’ (NV). Anigoruminaatsut, imaluunniit artornartut, ilaat tassaasinnaapput meeqqat „angajoqqaaminnut naalanngitsut“. — 2 Timotheusi 3:1-3.

¹⁵ Meeqqanik perorsaaneq angajoqqaanut kristumiunut suliassaavoq imaannaanngitsoq. Ullut ’ernumanartorsiorfiit’ maanna atuuttut sunniutaat ajoqutaasut sunnertiffiginngitsoorsinnaanngilavut. Taamaattumik angajoqqaat kristumiut ’silarsuup matuma pissuserisaata’ meeqqaminnut sunniutigisinnaasaanut toqussutaasinnaasunut akiuuttuartariaqarput. (Efesosimiut 2:2, 3) Angajoqqaallu akiuunnermi ajugaajuaannanngillat! Erneq panilluunniit Jehovamut kiffartorunnaaraangat ilumut angajoqqaajusunut qitornaminnik sallusuissummi perorsaaniarsarisimasunut ’naalliuutaasarpoq’. — Ussatit 17:25.

„Naalliunnartoqangaassaaq“

16. ’Naalliunnartoq’ suna Jiisusip siulittuutigaa?

¹⁶ ’Naalliunnartulli’ aappariinnermut angajoqqaatulluunniit suliassamut tunngatillugu pilersinnaasut naalliunnartumit annertunerungaartumit akimorneqassapput. Jiisusi najuunnissani pissutsillu aaqqissuussaanerata maanna atuuttup naggataatungaa pillugu siulittuummi oqarpoq „[naalliunnartoqangaassasoq] silarsuup pileqqaarneraniit maannamut asseqanngitsumik nalliuteqqinngisaannassasumillu“. (Matthæusi 24:3, 21) Kingusinnerusukkut Jiisusip paasinarsisippaa amerlangaartut naalliunnartoq tamanna anigorumaaraat. Qularnanngitsumilli tamanna piffissaassaaq tamatsinnut — inersimasunut meeqqanullu — erloqinartoq, Saatanimi taassumalu aaqqissuussinera naggatissamut akiuutissapput, Saatanip aaqqissuussinerata piuneerunneqannginnerani Jehovap nalunaajaasuinut eqqissisimasunut saassussersuaarlutik.

17. (a) Sooq siunissamut isumalluarsinnaavugut? (b) Suna aappariinnermut angajoqqaajunermullu isiginnittaatsitsinnut sunniuteqartariaqarpa?

¹⁷ Siunissamulli ingasattumik ernumanissamut pissutissaqanngilaq. Angajoqqaat Jehovamut aalajaatsut meeqqatillu mikisut sernissorneqarnissartik qilanaarisinnaavaat. (Atuaruk Esaja 26:20, 21; Sefania 2:2, 3; 1 Korinthimiut 7:14.) Ulluni ernumanartorsiorfinni inuunitsinnik ilisimanninnerput qanortoq naggatissap nalaani aappariinnermut angajoqqaajunermullu isiginnittaatsitsinnut ullut makkua naangajalerneranni sunniuteqartittartigu. (2 Petrusi 3:10-13) Taamaalilluni inooriaaserput — aappaqaraluarutta aappaqanngikkaluaruttaluunniit, angajoqqaajugutta meeraqanngikkaluaruttaluunniit — Jehovamut ilagiinnullu kristumiunut unnersiutiginnissutaallunilu ataqqinaataasinnaavoq.

[Quppernerup ataani ilanngussat]

Uteqqiineq

• Sooq kristumiut inuusuttut katinniapallattariaqanngillat?

• Meeqqamik perorsaanermut suut ilaappat?

• Sooq kristumiut ilarpassui aappaqarniarnatik, aappaqarunillu, meerartaarniarnatik aalajangertarpat?

• Angajoqqaat kristumiut sunik ’naalliuuteqarsinnaappat’?

[Atuaqqissaarnermi apeqqutit]

[Qupp. 24-mi assiliartaq]

Sooq kristumiut inuusuttut katinngikkallarunik silatusaassappat?

[Qupp. 25-mi assiliartaq]

Uiusoq nuliani anersaakkut sammisassanut isumaqarluartumik peqataanissaanut ikiorniarlugu iliuuseqangaarsinnaavoq

[Qupp. 26-mi assiliartaq]

Sooq aappariit kristumiut ilaat meerartaarniarnatik aalajangertarpat?