Jiisusi Kristusi — ajoqersuiartortitat pingaarnerpaartaat

„Taassumannga pisuugama taassumalu aallartitarimmanga.“ — JOHANNESI 7:29.

1, 2. Kina ajoqersuiartortitat inuusimasut pingaarnerpaartaraat?

OQAASEQ „ajoqersuiartortitaq“ tusaraangakku suna eqqaasarpiuk? Ilaasa kristumiuunerartut ajoqersuiartortitaat eqqaasarpaat, taakkualu ilarpassui nunani kiffartorfimminni politikkikkut aningaasaqarnikkullu inuiaqatigiinni pissutsinut akuliuttarput. Jehovalli Nalunaajaasuisa ilaattut qularnanngitsumik illit eqqaasarpatit ajoqersuiartortitat Siulersuisoqatigiinnit nunanut assigiinngitsorpassuarnut Guutip naalagaaffia pillugu nutaarsiassamik nuannersumik oqaluussissutiginniffissaminnut aallartinneqartartut. (Matthæusi 24:14) Ajoqersuiartortitat taakkua namminissarsioratik piffissartik nukitillu inunnik ikiuinermut atortarpaat taakku Guutimut qanilliniassammata taassumunngalu erlinnartumik attaveqalerniassammata, tamannalu anguniagaavoq nersornangaartoq. — Jaaku 4:8.

² Oqaatsit „ajoqersuiartortitaq“ aamma „ajoqersuiartortitat“ Biibilimi dronningimit Margrethe II-mit atortussanngortinneqarsimasumi ilaanngillat. Efesosimiunulli allakkani 4:11-mi grækerit oqaasiat ’iivangkiiliulersaartoq’-mik nutserneqarsimasoq aamma „ajoqersuiartortitaq“-mik nutserneqarsinnaavoq. Jehova iivangkiiliulersaartut, imaluunniit iivangkiiliumik oqaluussissutiginnittartut, pingaarnerpaartaraat, ajoqersuiartortitatulli pingaarnerpaatut taaneqarsinnaanngilaq, aallartinneqarsimanngisaannarpormi. Jiisusili Kristusi imminut pilluni Ataatanilu qilammiusoq pillugu ima oqarpoq: „Taassumannga pisuugama taassumalu aallartitarimmanga.“ (Johannesi 7:29) Jehovap inuiaat silarsuaannik asanningaarnerminut uppernarsaatitut ernituani nunarsuarmut aallartippaa. (Johannesi 3:16) Jiisusi ajoqersuiartortitat pingaarnerpaartaattut — ajoqersuiartortitatut asseqanngilluinnartutut — taaneqarsinnaavoq, nunarsuarmummi aallartitaaneranut pissutaasut ilagaat ’sallusuissummik nalunaajaassutiginnittussaanera’. (Johannesi 18:37) Guutip naalagaaffia pillugu nutaarsiassamik nuannersumik oqaluussissutiginnermik suliassani naammassilluarpaa, ilinniartitsineralu ullumikkut suli iluaqutigaarput. Oqaluusseriaasia ilinniartitseriaasialu atortarpavut, ajoqersuiartortitaagaluarutta ajoqersuiartortitaanngikkaluaruttaluunniit.

3. Apeqqutit suut maanna sammissavavut?

³ Jiisusip Guutip naalagaaffianik oqaluussissutiginnittutut suliassaa soorlu ima apererusulersitsivoq: Jiisusi nunarsuarmi sunik misigisaqarpa? Ilinniartitsinera sooq taama sunniuteqarluartigaa? Aamma suna pissutigalugu kiffartornerminik naammassinnilluarpa?

Allarluinnarnik avatangiiseqarluni kiffartornissamut piumassuseqarneq

4-6. Jiisusip qilammi sungiusimasaanit allaanerusunik nunarsuarmi naleqqussarfigisariaqagaasa ilaannik eqqaasaqarit.

⁴ Ajoqersuiartortitat ullumikkut ajoqersuiartortinneqartartut oqaluussisartullu pisariaqartitsiffiunerusuni kiffartorniarlutik aallartartut avatangiisinut inooriaatsikkut sungiusimasaminnit pissakilliorfiunerusunut naleqqussartariaqartarput.  Eqqarsaatigeriarulli pissutsit Jiisusip nunarsuarmi inuunermini atugaasa qilammilu sungiusimasaasa — inngilit minguitsumik pissutiginiagaqarlutik Jehovamut kiffartortut akornanni Ataatami eqqaaniiffigisaasa — assigiinngissutaat. (Jobi 38:7) Silarsuarmi ajortunngorsimasumi inuit ajortillit akornanniilluni allaanerulluinnarsimassaaq! (Markusi 7:20-23) Jiisusip allaat ajoqersukkami imminut qaninnerpaat akornanni unammisoqarnera misigaa. (Lukasi 20:46; 22:24) Nunarsuarmili maani soorunami suut tamaasa naammalluinnartumik periarfigai.

⁵ Jiisusi tupinnartuliornikkut inuit oqaasii atorlugit oqaluttalinngilaq; meeraanerminit ilinniartariaqarpai. Qilammi inngilinik peqqusisareersimalluni allanngornerup angissusia! Nunarsuarmi maani Jiisusi ’inuit oqaasiisa’ ilaannik minnerpaamik ataatsinik oqaluttarpoq. Taakkua ’inngilit oqaasiinit’ allaanerulluinnarput. (1 Korinthimiut 13:1) „Oqaatsilli saamangaartut“ taassuma oqaaserisai eqqarsaatigalugit inoqarsimanngisaannarpoq taassumatut oqalussinnaasumik. — Lukasi 4:22.

⁶ Aamma Guutip ernera nunarsuarmut pigami allanut tunngatillugu allanngorujussuarnernik misigisaqarpoq. Jiisusili ajortimik Adamimit kingornussinngikkaluarluni inunngorpoq kingusinnerusukkut ’qatanngutigiligassani’, ajoqersukkani tanitat, assigilerlugit. (Atuaruk Hebræerit 2:17, 18.) Jiisusip nunarsuarmi inuunermini unnummi kingullermi Ataatani qilammiusoq „inngilinik legioninit aqqaneq-marlunnit amerlanerusunik“ aallartitseqqullugu qinnuiginngilaa. Eqqarsaatigeriarulli Jiisusi inngiliunerugami Mikaeli inngilinut qanoq amerlatigisunut oqartussaassuseqarsimasoq! (Matthæusi 26:53; Judasi 9) Ilumoorpoq Jiisusi nunarsuarmi maani tupinnartuliortartoq; suliaali qilammi suliarisinnaasimasaanut naleqqiullugit killeqangaatsiarput.

7. Juutit upperisarsiornikkut siuttui Inatsisinut qanoq isiginnittaaseqarpat?

⁷ Jiisusi inuttut inunngunngikkallarami ’Oqaatsitut’ piunermini taannaasimasinnaavoq Guuti sinnerlugu Israelikkunnut oqaaseqartartoq taakkuninngalu inoqajuitsukkut siulersuisoq. (Johannesi 1:1; 2 Mosesi 23:20-23) Taakkua Inatsisit pigilersimavaat „inngilit ilitsersuussinerisigut, [maleruarnagilli]“. (Apustilit Suliaat 7:53; Hebræerit 2:2, 3) Ukiuni hundredelinni siullerni juutit upperisarsiornikkut siuttuisa Inatsisit siunertaviat paasinngilluinnarpaat. Assersuutigeriartigu sabbati pillugu inatsit. (Atuaruk Markusi 3:4-6.) Allakkanik ilisimasut farisiiarillu „inatsisini pingaarnerutitat: naapertuilluarneq nallittuinerlu ilumoorsuserlu“ sumiginnarpaat. (Matthæusi 23:23) Taamaakkaluartorli Jiisusi tunniutiinnanngilaq. Sallusuissut oqaluussissutigiuarpaa.

8. Sooq Jiisusip ikiorsinnaavaatigut?

⁸ Jiisusi piumassuseqarpoq. Inunnik asanninnerminit killinneqarpoq taakkuninngalu ikiuinissani qamannga pisumik kissaatigalugu. Oqaluussisartutut anersaaqarunnaanngisaannarpoq. Nunarsuarmiinnerminilu Jehovamut aalajaannini pissutigalugu „naalatsiminut tamanut naassaanngitsumik annatsitsisunngorpoq“. Aammattaaq „nammineq usserneqarlunilu naalliutsitaagami usserneqartut ikiorsinnaavai“. — Hebræerit 2:18; 5:8, 9.

Ilinniartitsisutut ilinniartinneqarluarsimasoq

9, 10. Jiisusi nunarsuarmukannginnermini qanoq ilinniartinneqarpa?

⁹ Ullumikkut kristumiut ajoqersuiartortitatut aallartinneqannginneranni taakkua ilinniartinneqarnissaat Siulersuisoqatigiinnit isumagineqartarpoq. Jiisusi ilinniartinneqarpa? Aap, kisianni Missiarsitut taninneqannginnermini juutit ilinniarfiini ilinniartinneqanngilaq. Aamma upperisarsiornikkut siuttut nuimasut ilaannit ilinniartinneqanngilaq. (Johannesi 7:15; naleqqiuguk Apustilit Suliaat 22:3). Soormiuna Jiisusi taama ilinniartitsillaqqitsigisoq?

¹⁰ Jiisusi anaanaminit Mariamit ataatarsiaminillu Josefimit sumilluunniit ilinniartinneqarsimagaluaruni qutsinnerpaamit, Ataataminit qilammiusumit, kiffartornissaminut pitsaanermik akimanerpaamillu ilinniartinneqarpoq. Tamanna pillugu Jiisusi nammineq ima oqarpoq: „Nammininnit oqalunngilanga; Ataatamali uannik aallartitsisup nammineq inassutigaa qanoq oqassasunga qanorlu oqalussasunga.“ (Johannesi 12:49) Malugiuk Ernerup sunik ilinniartitsissuteqarnissani pillugu sukumiisumik ilitsersuunneqarnera. Jiisusip nunarsuarmukannginnermini qularnanngitsumik Ataatani piffissarujussuaq atorlugu  ilagisarsimassavaa tusarnaarlugu. Pitsaanerusumik ilinniartinneqarsinnaasimava?

11. Jiisusip Ataatami inunnut isiginnittaasia qanoq ersersilluartigaa?

¹¹ Erneq pinngortinneqarnerminiilli Ataataminut anngigisaqarnani qanittumik attaveqarpoq. Jiisusip inuttut inunngunngikkallarami Jehovap inunnut isiginnittaasia taakkununnga iliorfiginneriaasianik qimerluuinermigut maluginiarpaa. Guutip inunnik asanninnera Ernerup ima ersersilluartigaa ilisimassutsitut kinaassusilikkatut ima oqarsinnaalluni: ’Inuit nuannaarutigaakka.’ — Ussatit 8:22, 31.

12, 13. (a) Jiisusip Ataatami Israelikkunnut iliorfiginneriaasianik qimerluuinini sumik ilinniarfigaa? (b) Jiisusip imminut ilinniartitsissutigineqartut qanoq atorpai?

¹² Ernerup aamma pissutsini unamminiarnartuni Ataatami qanoq periartarneranik, assersuutigalugu Israelikkunnik naalasseriitsunik qanoq pinnittarneranik, qimerluuinini ilinniarfigaa. Nehemia 9:28-mi ima allassimavoq: „Eqqissisitaariaraangamik kingumut iliuleraraat [illit Jehova] isinni ajortumik. Taava akeraasa assaannut tunniuttaraatit naalakkersugaritillugit. Kingumut ilinnut torloraraat qilammiillu tusarlugit annaattuartarpatit nallittuingaarninni.“ Jiisusip Jehovamik qimerluuinermigut suleqateqarnermigullu inunnik angalaarfigisartakkaminiittunik misiginneqatiginninneq tamatumunnga assingusoq ineriartortippaa. — Johannesi 5:19.

¹³ Aamma ajoqersukkaminik nallittuinermigut ilikkakkani atorpai. Jiisusip toqunissaanut aqaguttoq taassuma ajoqersugaasa asangaagaasa tamarmik taanna „immineerpaat qimaallutillu“. (Matthæusi 26:56; Johannesi 13:1) Allaat apustilip Petrusip Jiisusi pingasoriarluni miserratigaa. Taamaakkaluartorli Jiisusip imminut uteqqinnissaannut periarfissaqartippai. Petrusi ima oqarfigaa: „Uanga qinnuppakkit uppersutsit soraaqqunagu. Qaqugulu saakkuit qatanngutitit nakussatsikkigit.“ (Lukasi 22:32) Israeli anersaakkut ittoq „apustilit pruffiitillu tunngavigisaanni“ aalajaatsumik tunngaveqarpoq, ujaqqanilu Jerusalemip nutaap qarmarsuata tunngavigisaani allassimapput Savaaqqap, Jiisusip Kristusip, apustiliisa aalajaatsut aqqaneq-marluk aqqi. Ullumikkut suli kristumiut tanitat taakkualu suleqataat tunniulluinnarsimasut, ’savat allat’, Jehova Guutimit taassumalu erneranit asasaanit siulersorneqarlutik peqatigiissortatut Guutip naalagaaffianik oqaluussissutiginnittutut amerliartorput. — Efesosimiut 2:20; Johannesi 10:16; Saqqummersitat 21:14.

Jiisusi qanoq ilinniartitsisoq

14, 15. Jiisusip ilinniartitsinera allakkanik ilisimasut farisiiarillu ilinniartitsinerannit qanoq allaanerua?

¹⁴ Jiisusip ajoqersukkat ilinniartikkaangamigit ilikkakkani qanoq atortarpai? Jiisusip ilinniartitsinera juutit upperisarsiornikkut siuttuisa ilinniartitsinerannut sanilliukkaangatsigu takusinnaasarparput Jiisusip ilinniartitsinera qanoq allaanerulluinnartigisoq. Allakkanik ilisimasut farisiiarillu ’Guutip oqaasii atorunnaarsittarpaat kingornussarsiatik pillugit’. Tamatuma akerlianik Jiisusip oqaaserisani nammineq ’isumaginngilai’. Guutip oqaasia, imaluunniit tusarliussaa, pillugu ilinniartitsiuaannarpoq. (Matthæusi 15:6; Johannesi 14:10) Uaguttaaq taamaaliortariaqarpugut.

¹⁵ Jiisusip ilinniartitsinerata allakkanik ilisimasut farisiiarillu ilinniartitsinerannit allaanerulluinnarneranut aamma alla pissutaavoq. Taakkua pillugit Jiisusi ima oqarpoq: „Taamaattumik ilissinnut oqaatigisaat suut tamaasa iliuuserisigit maleruarlugillu, suliaalli maleqinasigit; oqaaserisamittummi iliorneq ajorput.“ (Matthæusi 23:3) Jiisusip allanut ilinniartitsissutigisani nammineq iliuuserisarpai. Tamatuminnga ersersitsisumik assersuuteqariarta.

16. Sooq oqartoqarsinnaava Jiisusi nammineq kajumissaarut Matthæusi 6:19-21-miittoq malillugu inuusoq?

¹⁶ Jiisusip ajoqersukkani kajumissaarpai ’qilammi erlinnartuutinik katerseqqullugit’. (Atuaruk  Matthæusi 6:19-21.) Jiisusi nammineq tamanna malillugu inuua? Aap, ilumoortormi naapertorlugu imminut pilluni ima oqarsinnaasimavoq: „Terianniat siseqartarput qilaallu timmiai ulloqartarlutik, Inuulli Ernera niaqquminut iigarfissaqanngilarluunniit.“ (Lukasi 9:58) Jiisusi pilimanianngitsumik inuuvoq. Pingaarnerpaamik Guutip naalagaaffia pillugu nutaarsiassamik nuannersumik oqaluussissutiginninneq ulapputigaa, maligassiuinermigullu ersersippaa isumakuluutit nunami pisuussutinik katersinermik pissuteqartut ingalassimanissaat qanoq paasisariaqarnersoq. Jiisusip ersersippaa qilammi erlinnartuutinik katersineq qanoq pitsaanerungaartigisoq, qilammimi „qillaalaat oquillu aseruissanngimmata, tillinniallu nakuuserlutik illumut iserlutik tillissanngimmata“. Illit Jiisusip qilammi erlinnartuutinik katersueqqusilluni kajumissaarutaa malippiuk?

Pissutsit Jiisusip nuannarineqaatigisai

17. Pissutsit suut Jiisusip iivangkiiliumik oqaluussissutiginnittartutut immikkorluinnaq ittunnguutigai?

¹⁷ Pissutsit suut Jiisusip iivangkiiliumik oqaluussissutiginnittartutut immikkorluinnaq ittunnguutigai? Pissutsit taakkua ilaat tassaavoq taassuma ikiukkaminut isiginnittaasia. Jehovap pissusiisa ajunngitsut Jiisusip ersersitaasa ilaat tassaapput maniguunnera, asanninnera misiginneqataaneralu. Maluginiariaruk pissutsit taakkua qanoq ilillutik inuppassuarnik Jiisusimut kajungilersitsinersut.

18. Jiisusip maniguuttuunini qanoq ersersippaa?

¹⁸ Jiisusip nunarsuarmukartussanngortitaanini akuerereeramiuk, ’iperarpaa [qilammi naalannassutsini anersaajuninilu] kiffap isikkua atillugu inuillu assigilerlugit saqqummerluni inuttut’. (Filippimiut 2:7) Taamaalilluni maniguunnini ersersippaa. Tusarnaartuni nikagineq ajorpai. Ima oqarneq ajorpoq: ’Pavanngarsuaq qilammiit aggerpunga, taamaammat tusarnaartariaqarpassinga.’ Missiarsiunerartunit allaanerulluni imminut Missiarsiviusutut suaarutigisaqattaarneq ajorpoq. Ilaannikkulli peqqusisarpoq kinaanini aamma susimanini pillugu oqaluttuartoqassanngitsoq. (Matthæusi 12:15-21) Jiisusip kissaatigaa inuit takusimasatik tunngavigalugit imminik malinninnissartik namminneq aalajangissagaat. Ajoqersukkat Naalakkamik inngilitut qilammi peqatigisarsimasamisut naammalluinnartuunissartik naatsorsuutiginngimmagu nuannaarutigingaarsinnaavaat.

19, 20. Jiisusip asanninneq misiginneqatiginninnerlu sunissaminut kajumississutigai?

 ¹⁹ Jiisusip Kristusip asanninneq — Ataatami qilammiusup pissusia pingaarnerpaaq — aamma ersersippaa. (1 Johannesi 4:8) Jiisusip tusarnaartuni ilinniartittarpai asanninneq kajmississutigalugu. Assersuutigalugu maluginiaruk angut inuusuttoq pisooq qanoq misigissuseqarfiginera. (Atuaruk Markusi 10:17-22.) Jiisusip taanna ’asalerpaa’ ikiorusulerlugulu, angutilli inuusuttup pisuup Jiisusimik malinninniarluni pigisarpassuani isumakkeerumanngilai.

²⁰ Pissuseq Jiisusip nuannarineqaatigisaa alla tassaavoq misiginneqatiginninnera. Jiisusimut tusarnaarusuttut inuit naammalluinnanngitsut tamaasa assigalugit isumakuluutinik ajornartorsiutinillu nanertuuteqarput. Jiisusip tamanna nalunngilaa, taamaammallu misiginneqatigai. Assersuutigalugu ilaanni Jiisusi apustilillu ima ulapitsigipput nerinissaminulluunniit piffissaqaratik. Jiisusili inuppassuit imminut tusarnaarniarlutik katersuussimasut takugamigit qanoq misigiva? „Nalligingaalerpai savatut paarsisoqanngitsutut immata; amerlasuunillu ajoqersulerpai.“ (Markusi 6:34) Jiisusip taakkua qanoq nallinnartiginerat malugaa, taakkualu ilinniartinniarlugit iluaqutissaannillu tupinnartuliorniarluni nukini tamaasa atorpai. Ilaasa taassuma pissusii qaqutigoortut kajungilissutigaat; oqaasii killinneqaatigaat taassumunngalu ajoqersuganngorlutik.

21. Allaaserisami tulliuttumi suna sammissavarput?

²¹ Jiisusip nunarsuarmi kiffartornera ilinniarfigingaarsinnaavarput, allaaserisamilu tulliuttumi tamanna sammineqassaaq. Jiisusi Kristusi, ajoqersuiartortitat pingaarnerpaartaat, allatigut qanoq ilaarsinnaavarput?

Qanoq akissavit?

• Jiisusi nunarsuarmukannginnermini qanoq ilinniartinneqarpa?

• Jiisusip ilinniartitsinera allakkanik ilisimasut farisiiarillu ilinniartitsinerannit qanoq allaanerua?

• Pissutsit suut Jiisusip nuannarineqaatigai?

[Atuaqqissaarnermi apeqqutit]

[Qupp. 19-mi assiliartaq]

Jiisusi inuppassuarnik qanoq ilinniartitsiva?