Aammalu una takorlooriaruk: Anaanaasoq kisimiittoq meeraalu marluk aappariinnit ilagiinniittunit qaaqquneqarput. Meeqqani qaaqquneqarsimallutik oqarfigimmagit taakku nuannaartorujussuupput. Meeqqat ullup nalliunnissaa qilanaarisorujussuuaat. Qaaqquneqarfissarli aqaguttoq aappariit anaanaasoq oqarfigaat naatsorsuutiginngisamik pisoqarsimasoq qaaqqussullu taamaatiinnartariaqarlugu. Kingusinnerusukkulli anaanaasup paasivaa sooq taamaatitsisimasut. Aappariit qaaqqusereerlutik ikinngutiminnit allanit qaaqquneqarsimapput, qaaqqussullu tamanna akueriinnarsimavaat.

Kristumiuugatta neriorsuinitsitut iliortariaqarpugut. ‘Angernatalu naaggaartariaqanngilagut’, tassa neriorsuissanngilagut kingornatigullu pissutissaqarluarata taamaatitsilluta. (2 Kor 1:18) Pisunili marlunni allaatigineqareersuni erserpoq pissutsit assigiinngitsuusinnaasut. Ilaannikkut isumaqatigiissutigereersimasavut naapertorlugit iliuuseqanngitsoorsinnaavugut. Allaat apustilip Paulusip pisumi aalajangersimasumi neriorsuutini taamaatiinnartariaqarsimavaa.

Ukiumi 55-imi Paulusi pingajussaanik ajoqersuiartortitatut angalanermini Efesosimut tikeraarpoq. Ægæerit Imartaat umiatsiamik ikaarlugu Korinthimut kingornalu Makedoniamut angalaniarluni pilersaaruteqarpoq. Taava Jerusalemimut uterniarnermini ilagiinnut Korinthimiittunut aappassaanik tikeraarniarluni pilersaaruteqarpoq taakkua tunissutaat Jerusalemimukaassinnaaniassagamigit. (1 Kor 16:3) Tamanna nalunngilarput Korinthimiunut allakkat aappaanni ima allassimammat: “Tamanna tatigalugu siornatigut pilersaarutigisimagaluarpara tikeraarniarlusi aappassaanik saammaanneq tamanna pisinnaaqqullugu, ilissinninngaanniillu Makedonialiarniarlunga, Makedoniamiillu uterfiginiarlusi Judæamut ingerlaqqinnissannut ilissinnit ikiorserneqarumallunga.” — 2 Kor 1:15, 16.

Ilimanarpoq Paulusip uppeqatiminut Korinthimiunut allakkani taakku tikeraarniarlugit  pilersaarusiornini eqqaasimagaa. (1 Kor 5:9) Tamatuma kinguninngua Paulusip Kloekkormiunit tusarpaa ilagiinni ingasattumik ajornartorsiuteqartoq. (1 Kor 1:10, 11) Paulusip pilersaarutigisaraluani allanngortippaa ilagiillu Korinthimiut maannakkorpiaq tikeraarniarnagit aalajangerluni. Taava allakkat Korinthimiunut allakkatut siullertut taaneqartut allappai. Paulusi allakkamini siunnersuillunilu oqaaqqissaarivoq. Aamma angalanissaminik pilersaarutini allanngortissimallugu allappoq, Makedoniamukaqqaarniarlunilu kingornalu aatsaat Korinthimukarniarluni allaatigaa. — 1 Kor 16:5, 6. *

Qatanngutit Korinthimiittut Paulusimit allagarsigamik taakkua ilaasa Paulusi neriorsuinermisut iliunnginnerarpaat. Taakku isumaqarput Paulusimit pitsaanerullutik. Paulusip taakku ‘apustilissaarsuarnik’ taavai. Paulusi imminut illersorniarluni ima aperivoq: “Taamaliorniarama isumaatsuliortutut aalajangersimanerpunga, imaluunniit namminissarsiorlunga aalajangersimanerpunga angertarlungalu naaggaartarlungalu?” — 2 Kor 1:17; 11:5.

Apustili Paulusi pissutsit eqqarsaatigalugit ‘isumaatsuliorpa’? Soorunami naamik! Oqaaseq uani ‘isumaatsuliornermik’ nutserneqartoq isumaqarpoq tatigisassaanngitsoq inummullu neriorsuutiminik eqqortitsinngitsumut atorneqarsinnaalluni. Kristumiut Korinthimiut Paulusip apeqqutaa: “namminissarsiorlunga aalajangersimanerpunga?” iluaqutigalugu paasisinnaagaluarpaat imaanngitsoq Paulusi tatigisassaannginnami pilersaarutiminik allannguisoq.

Paulusi taakkua unnerluutaat naqqissorlugu ima allappoq: “Guutip unneqqarissup uppernarsarsinnaavaa ileqqorinngikkipput ilissinnut oqalunnitsinni angertarlunilu naaggaartarneq.” (2 Kor 1:18) Paulusip uppeqatimi Korinthimiittut soqutigisaannik salliutitsigami angalanerminik pilersaarutini allanngortippaa. Korinthimiunut allakkat aappaanni 1:23-mi Paulusi ima allappoq: “Tassaana qajassuukkumallusi Korinthilianngitsoortunga.” Aap, tikeraannginnermini periarfissippai siunnersuutiminik maleruaanissaat. Taamaaliorpullumi. Makedoniamiitilluni Paulusip Titusimit tusarpaa Korinthimiut eqqunngitsuliornerminnik peqqissimisariaqarnissaminnillu paasinninnissaminnut Paulusip allagai iluaqutigisimagaat. Tamannalu Paulusip nuannaarutigingaarpaa. — 2 Kor 6:11; 7:5-7.

‘Apustilissaarsuit’ Paulusi neriorsuutiminik eqqortitsinnginnerarmassuk immaqa aamma oqarsimassapput Paulusip oqaluussinermini tatigisassaannginneranik. Paulusilli Korinthimiut eqqaasippai Jiisusi Kristusi pillugu tusarliussaq taakkununnga oqaluussissutigalugu. “Guutimmi ernera Jiisusi-Kristusi uanga Silvanusillu Timotheusillu ilissinni oqaluussissutigisarput tassaanngilaq angertarlunilu naaggaartarneq, angernerinnarli taassumaniippoq.” (2 Kor 1:19) Jiisusi Kristusi tatigisassaanngitsuusinnaava? Naamik! Inuunermini kiffartornerminilu Jiisusip sallusuissut tamatigut oqaluussissutigisarpaa. (Joh 14:6; 18:37) Jiisusip oqaluussissutigisaa ilumoorluinnarlunilu tatiginartuuppat Paulusillu tamannarpiaq aamma oqaluussissutigippagu Paulusip oqaluussinera aamma tatiginartuusimassaaq.

Jehova ‘Guutiuvoq sallusuitsoq’. (Tit 1:2) Tamanna Paulusip eqqaasaani tulliuttumi uani erserpoq: “Guutimmi neriorsuutai tamarmik taassumani [Kristusimi] angerneqarput.” Jiisusip nunarsuarmiitilluni assuarnaattuarnera pissutigalugu Jehovap neriorsuutaasa tatiginartuunerat upperilluinnarsinnaavavut. Paulusi ima nangippoq: “Taamaammat aamma taassumuuna [Jiisusikkut] aarmeertarpugut Guutip ataqqinaatissaanik.” (2 Kor 1:20) Jiisusip ‘aarmeerutaanera’ qanoq paasisariaqarpa? Tamanna paasisariaqarpoq Jehovap neriorsuutaasa tamarmik piviusunngornissaannut Jiisusip qularnaveeqqutaaneranik.

Soorlu Jehova aamma Jiisusi Kristusi salluneq ajortut taamatuttaaq Paulusip ‘angertarnini’  ilumooruttarpaa. (2 Kor 1:19) Tatigisassaavoq; ‘namminissarsiorluni’ aalajangerneq ajorpoq. (2 Kor 1:17) Guutilli anersaavanit siulersortippoq. (Gal 5:16) Qanoq iliortarnermini tamani erserpoq qatanngutini ajunngitsumik kissaakkai. Neriorsuutini eqqortittuaannarpai!

Ullumikkut inuit neriorsueriarlutik pissuteqarpiaratik imaluunniit allamik iliuuseqarusunnertik pissutigiinnarlugu neriorsuutiminnik unioqqutitsisarnerat nalinginnaavoq. Niueqatigiinnermi isumaqatigiissut ilaannikkut eqqortinneqartanngilaq allaat atsioqatigiinnikkut isumaqatigiissutigineqaraluarpat. Aappariippassuillu katinnerminni neriorsuinertik inuunermik sinneranni eqqortinneqartussatut isiginngilaat. Aappariit avittut amerliartuinnarput, tamannalu ersersitsivoq inuppassuit katinnerminni neriorsuutertik pingaaruteqanngitsutut unioqqutinneqariaannaasutullu isiginninnerannik. — 2 Tim 3:1, 2.

Illimmi? Illit neriorsuutitit eqqortittuaannarpigit? Allaaserisap aallaqqaataani sammeriikkatsitut imaassinnaavoq pissutsit iliuuseqarfigineqarsinnaanngitsut pissutigalugit isumaqatigiissutigisaraluarput taamaatittariaqaripput, imaanngilarlu tatigisassaanngitsuusugut. Neriorsuiguit neriorsuutit eqqortinniarlugu sapinngisat tamaat iliuuseqartariaqarputit. (Tuss 15:4; Matt 5:37) Taamaaliortaruit tatigisassaasutut tamatigullu ilumoortumik oqaluttuaannartutut ilisimaneqalissaatit. (Ef 4:15, 25; Jaak 5:12) Inuit paasigunikku tamatigut tatigisassaasuusutit Guutip naalagaaffia oqaluussissutigigaangakku immaqa tusarnaarusunnerussavaatsit. Taamaattumik qanortoq tamatta neriorsuutivut eqqortittuaannarisigit!