QATANNGUTIGIIT quliuvugut Finlandimilu Pohjanmaap avannaani naasorissaasukkormiuulluta. Sorsunnersuup aappaata nalaani meeraavugut. Akersuunnerillu amerlanerit angerlarsimaffitsinniit ungasikkaluartut nalunngilarput inuit naalliungaartut. Unnuit ilaanni illoqarfiit Oulu aamma Kalajoki qaartartumeerneqarmata taakkua tungaanni qilak aappillertoq isigaarput. Angajoqqaatta ilinniartippaatigut timmisartut sorsuutit takuniariarlugit toqqortassasugut. Taamaattumik Taunop, anitta angajulliup, nunarsuaq paratiisiusoq naalliunnartoqarfiunngitsoq oqaluttuarimmagu soqutiginnilerpugut.

Tauno 14-inik ukioqarluni Biibilimik Atuaqqissaartartut atuagaataannik atuartarluni sallusuissut ilikkarpaa. Sorsunnersuup aappaa aallartimmat Biibilimit ilikkakkani pissutigalugit sakkutuujujumannginnami parnaarussaavoq. Tassani peqqarniitsumik pineqartarpoq. Tamannali Jehovamut kiffartornerorusulissutigiinnarpaa. Iperagaagami kiffartornermini aallussilluarnerulerpoq. Taanna maligassaalluartuummat Jehovap Nalunaajaasuisa illoqarfeeqqami qanittumi ataatsimiinnerinut najuuttalerusulerpugut. Aamma ataatsimeersuariartarpugut angalanissamut akissaqarumalluta iliuuseqarnerusariaqartaraluarluta. Uanitsunik naatitsisarpugut, kigutaarnanik kimmernanillu nuniattarpugut eqqaamiuttalu atisaannik iluarsaassisarluta. Suliassaqartangaartarmat ataatsikkut ataatsimeersuariarsinnaasanngilagut.

Jehova taassumalu siunertai pillugit ilikkakkavut pissutigalugit taanna asanerulerparput, marluullutalu 1947-mi kuisippugut (Annikki 15-inik ukioqarluni Aililu 17-inik). Angajorput Saimi ukioq taanna aamma kuisippoq, angajorpullu alla Linnea Biibilimik atuaqqissaaqatigisarparput. Taannattaaq ilaquttanilu Jehovap Nalunaajaasuinut ilanngupput. Kuisinnitta kingorna aalajangerpugut ikiorti-pioneriullattaartarniarluta.

1955-imi illoqarfimmut avannarpasinnerusumut Kemimut nuuppugut. Ulloq naallugu sulisaraluarluta pioneriorusuppugut. Annilaangassutigaarpulli sulinikinnerulerutta akiligassatsinnut akissaarunnissarput. Isumaqarpugut aningaasanik katerseqqaartariaqarluta. Taamani, allaaserisap matuma aallaqqaataani eqqaaneqartutut, qatanngut pioneriusoq oqaloqatigaarput. Oqaloqatigineranilu paasivarput piffissaq tamaat Jehovamut kiffartornermi aalajangiisuuginnanngitsut nammineq pissarsiarisinnaasavut ilaquttattaluunniit tapersersuinerat, pingaarnerpaasorli tassaasoq Ataatatta qilammiusup tunaarinera.

Tassa taamani qaammatini marlunni pioneriunissatsinnut aningaasanik katersaqarpugut. Taamaattumik 1957-imi maajimi Laplandimi Pellomi,  qaasuitsup killeqarfianit avannarpasinnerusumi, qaammatini marlunni pioneriorusulluta nangaasunnguamik qinnuteqarpugut. Qaammatilli marluk qaangiummata aningaasat katersavut suli pigaavut, taamaattumik suli qaammatini marlunni pionerioqqippugut. Qaammatit taakku qaangiummata aningaasat taakku suli pigaavut. Maanna qulariunnaarparput Jehovap isumassoraatigut. Ukiuni 50-ini pioneriuvugut aningaasallu taakku suli pigalutigit! Misigivugut Jehovap tasiorlutalusooq ima oqarfigigaatigut: “Siooraqinak, ikiortigaarma.” — Es 41:13.

1958-imi nakkutilliisup angalasartup kajumissaarpaatigut Laplandimi Sodankylämi specialpionerinngoqqulluta. Taamani tassani nalunaajaasoq ataasiinnaavoq, arnaq. Taassuma sallusuissummik ilisarisimannilernera soqutiginarpoq. Taassuma ernera atuaqataalu Helsinkimut, Finlandimi illoqarfiit pingaarnersaannut, angalasimapput. Illoqarfikkut ingerlatillugit qatanngutip arnap utoqqaap nukappiaraq taanna Napasuliaq Alapernaarsuiffik-mik tunivaa arnaanut tunniuteqqullugu, arnaatalu atuaramiuk ingerlaannaq paasivaa atuagassiami tamatumani sallusuissut Biibilimeersoq ajoqersuutigineqartoq.

Nuuffigisatsinni qisunnik sanaartorfeqarpoq, tassa orpinnik salliligaliorfik. Sanaartorfiup tamatuma qaliani ineqarpugut tassanilu ataatsimiittarluta. Aallaqqaammut uagut qatanngullu arnaq taassumalu pania najuuttutuaasarpugut. Atuaqqissaaqatigiissutissat atuaannartarpavut. Kingusinnerusukkut angut Jehovap Nalunaajaasuinit Biibilimik atuaqqissaaqatigineqartarsimasoq qisunnik sanaartorfimmut suliartorluni nuuppoq. Taanna ilaquttanilu ataatsimiinnitsinnut najuuttalerput kingusinnerusukkullu nulianilu kuisillutik. Maanna qatanngummik angummik aqutsisussaqalerpugut. Aamma angutit allat sanaartorfimmi sulisut ataatsimiigiartalerput sallusuissummiilerlutillu. Amerleriarattalu ilagiinngorpugut.

Oqaluussiniarluta angalangaatsiartarpugut. Aasakkut pisulluta, cyklerluta allaallumi umiaaraq angallatigalugu inuit tusarlerniartarpavut. Cykelivut iluaqutigeqaavut. Cyklerluta ataatsimeersuariartarpugut angajoqqaavullu, hundrede kilometerit arlallit ungasitsigisumi najugallit, tikeraartarlugit. Ukiukkut ullaarorlugu illoqarfeeqqat ilaannut bussertarpugut illumiillu illumut  pisuinnaq oqaluussisarluta. Illoqarfeeqqami tassani illut tamakkereeraangatsigit pisulluta illoqarfeeqqamut allamukartarpugut. Aperujussuartarpoq aqqusernillu nivanneqartuaannarneq ajorput. Qamutit hiistinik qimuttullit illerngisigut pisuttarpugut. Apeqqissimatilluguli illineeruttarpoq, upernaleraangallu aput aqilillunilu masarlunngoraangat pisuffigiuminaallisarpoq.

Ukiukkut oqorsartarnissarput ilikkarparput. Meqqunik sanaanik kamaasiaqartarpugut qaavatigullu marlunnik pingasunilluunniit alersersuaqartarluta. Takisuunik kamippaqaraluarluta qulaakkoortarpugut. Illut tikikkaangatsigit tummeqqat qaavinut pillutalu kamippavut peerlugit aputaajartarpavut. Aamma apisimatillugu maagalioraangatta kavaajatta takisuut ataatungaat masalersarput nillerneruleraangallu qerisarlutik. Ilaanni arnap ima oqarfigaatigut: ‘Uppersimassaqaasi sila taama ajortigisoq takkukkassi.’ Illu taanna tikinniarlugu 11 kilometerit pisuppugut.

Illoqarfeeqqani unnuigajuppugut. Unnukkut unnuiffissarsiorluta apersuilertarpugut. Inuit pigissaartuunngillat, inussiarnersuuppulli inoroorsaartuullutillu. Unnuisittarpaatigut nerisassanillu neqeroortarlutik. Tuttup allaallumi ilaannikkut allarsuup amia siniffigisarparput. Ilaannikkut iluatannerulaartarpugut. Assersuutigalugu illorujussuarmi arnap tikeraat inaannut qalianukaappaatigut, siniffillu siniffissarput errortanik qaqortunik putoortortalinnik tungeqarpoq. Arlaleriaqaluta unnuiffigisavullu unnussuarmut Biibili pillugu oqaloqatigiittarpugut. Ilaanni aappariit inimi ataatsimi sineqatigaavut. Angut nulialu aperisaqattaaginnaavipput, ullaassallu tungaanut Biibili pillugu oqaloqatigiippugut.

Laplandi alianaaqaaq. Uagutsinnulli inuit Jehovamik ilinniartitavut pingaartinnarnerupput. Nalunaajaaffigisatta ilagaat angutit orpinnik uppikaatitsiartorlutik Laplandimut nuuttut. Ilaannikkut uagut arnat marluinnaalluta anguterpaaluit pillammaat illuaqqamiittut iserfigisarpavut. Angutit taakkua tusarliussamik Biibilimeersumik atuagassiaatitsinnillu pingaartitsipput.

Pissanganartorpassuarnik misigisaqartarpugut. Ilaanni bussit unittarfianni nalunaaqutaq minutsinik tallimanik siulliummat bussit inortorpavut. Taava illoqarfeeqqamut allamut bussiinnarpugut. Tamaani oqaluussinikuunngilagut, kasuttorfigisatsinnili siullermi arnaq inuusuttoq naapipparput, ima oqartoq: “Tassa utaqqisakka.” Sunaaffa Biibilimik atuaqqissaaqatigisarsimasatta ilaat kasuttorfigisatta angajorigaa. Arnap inuusuttup taassuma angajuni uagutsinnut oqaqqusimavaa ulloq taannarpiaq uagutsinnit pulaarneqarusulluni. Oqarfigineqanngilagulli. Taanna Biibilimik atuaqqissaaqatigisalerparput, aamma ilaqutai  taassuma eqqaani najugallit immikkut atuaqatigisalerpavut. Ataatsikkut atuaqqissaaqatigisaleratsigit najuuttut aqqaneq-marluusarput. Taamanerniilli taassuma ilaqutarpassui Jehovap Nalunaajaasuinut ilanngupput.

1965-imi aperitippugut qaasuitsup killeqarfianit kujasinnerusumut ilagiinnut Kuusamomiittunut nuussinnaanersugut. Taamani ilagiinni taakkunani oqaluussisartut ikittuinnaapput. Aallaqqaammut tamaani oqaluussineq artornakujuppoq. Inuit uppertorujussuupput, oqaluussinerpulli nuannarinngilaat. Inuppassuilli Biibilimik ataqqinnittuupput. Taamaattumik inuit ilisarisimalerniaruusaarpavut, ukiullu marlussuit qaangiuttut ajornannginnerusumik Biibilimik atuaqqissaaqateqartalerpugut.

Ullumikkut ullaamiit unnussuarmut oqaluussinissamut nukissaqanngikkaluarluta ullut tamangajaasa oqaluussiartortarpugut. Aili 1987-imi 56-inik ukioqarluni jorngutsinnit kajumissaarneqareerluni biilernermut allagartartaarmat oqaluussiffigisartakkatsinni isorartuumi oqaluussineq oqinnerulerpoq. Aamma naalagaaffilersaarfiup nutaap inissiartaani ineqalernerput oqiliallaataavoq.

Nuannaarutigeqaarput Finlandip avannaani sallusuissummik ilassinnittorpassuaqarmat. Tamaani pionerinngoqqaaratta oqaluussisartut amerlanngillat. Maanna ilagiit arlaliupput. Ataatsimeersuaraangatta qasseriarlutami ataatsimeersuaqataasup ornilluta oqarfigisarpaatigut meeraagallarami ilaqutai Biibilimik atuaqqissaaqatigisarivut. Ilumummi Guutip suliarput pilluaqquaa! — 1 Kor 3:6.

2008-mi specialpioneritut ukiut 50-inngorpavut. Jehova qutsavigaarput taassumunnga kiffartortuarnissamut kajumissaaqatigiittarsinnaagatta. Pigisarpassuaqarnikuunngilagut, amigaateqanngisaannarpugulli. (Tuss 23:1) Maanna nalunngilarput pionerinngornissamut nangaasariaqarsimanata! Ukiuni taakkunani tamani Jehovap nakussatsittuarpaatigut ima neriorsuinermisut: “Nakussatsippakkit ikiorlutillu, assannik ajugaasartumik najummivakkit.” — Es 41:10.