Pilluarnermut aqqut tutsuiginartoq

Pilluarnermik noqqaassutiginninneq inuit tamarmik pisinnaatitaaffigaat. Taama isumaqarput USA-p namminiilivinneranik nalunaarusiamik ilusiliisut. Noqqaassutiginninnerli tassaanngilaq noqqaassutigisamik angusineq. Inuusuttorpassuit aliikkusersuinerup timersornerulluunniit silarsuaanni tusaamasanngorniartarput, qassilli iluatsitsilluarneq kissaatigisartik angusarpaat? Erinarsortartoq tusaamasaasoq, nipilersortartutut tusaamasanngorniarnerup qanoq ajornartigineranik ilisimannittoq, ima oqarpoq: „Iluatsitsilluarnissaq ilimagineqassanngilaq.“

Misigisimavit pilluarnissaq aamma taama sapernartigisoq? Nikalloqinak. Pillualertoqarsinnaavoq eqqortumik anguniaraanni. Qanoq ililluni? Allaaserisap matuma siuliani ’Guuti pilluartoq’, Jehova, eqqartorneqarpoq. (1 Timotheusi 1:11) Guutip Biibilimi siunnersorpaatigut pilluarnermik noqqaassutiginninnerput pakatsinermik kinguneqannginniassammat. Jehovap ikiorsinnaavaatigut aliasunnernut pissutaagajuttut ajugaaffiginissaannut. Assersuutigalugu eqqaaneqarsinnaavoq asasatsinnik toqusooraangatta tuppallersaat taassuma uagutsinnut tuppallersaatigisinnaasaa.

Asasamik toqusooraanni

Toqu ajunngitsortaqarpa? Toqup meeqqat angajoqqaaverutitittarpai angajoqqaallu meeqqatik annaasarlugit. Ikinngutigiinnerpaanik avissaartitsisarpoq qanigisariinnilu toqqissisimajunnaarsitsisarluni. Toqusoqartillugu ilaqutariit pilluaraluartut aliasunnermit artorsartitaasinnaapput.

Erseqqippoq toqu alianartuusoq. Inuilli ilaasa allatut isumaqarfigaat. Toqu pilluaqqussutitut isigaat. Aggustimi 2005-imi anorersuup Katrinap Mexicop kangerliumanersua aqqusaarmagu eqqugaasumik ilisinermi, palasi ima oqarpoq: „Katrinamit toqutaanngilaq. Guutimuna imminut pisikkaa.“ Pisumi allami napparsimmavimmi sulisoq  ajunngitsumik isumaqarluni niviarsiaqqamut anaanaminik annaasaqarsimasumut oqarpoq aliasussanngitsoq Guutimmi anaanaa qilammut pisissimammagu. Paniusoq qiasorujussuulluni ima oqarpoq: „Sooq? Sooq anaanannik arsaarpaanga?“

Toqungasut pillugit isummat eqqunngitsut taamaattut soorunami amerlanertigut qimataasunut tuppallersaataaneq ajorput. Sooq? Isummat tamakku toqu pillugu sallusuissummut naapertuutinngimmata. Ajornerusorli tassaavoq tamakku pissutigalugit Guuti ilaqutariit ikinngutillu asasaannik naakkittaatsumik annernangaartumillu arsaarisutut takorloorneqartarmat — soorlulusooq tuppallersaammut pilerfiunani pinerluttuusoq. Toquli pillugu ilumoortoq Guutip oqaasiani allaatigineqarpoq.

Biibilimi toqu akeqqatut taaneqarpoq. Aamma toqu kunngimut inuiaqatigiinnut naalagaasumut assersuunneqarpoq. (Romamiut 5:17; 1 Korinthimiut 15:26) Toqu akeraammat pissaaneqangaartoq inuk kinaluunniit toqunngitsoorsinnaanngilaq, toqusorlu kinaluunniit tassaaginnarpoq toqup eqqugarpassuisa ilaannaat. Ilumoortup Biibilimeersup tamatuma nassuiarluarpaa sooq asasatsinnik toqusooraangatta aliasuttarnersugut soriarsinnaanngitsutullu misigisarnersugut. Taamatut misiginerup pissusissamisoorluinnartuunera ilumoortumit Biibilimeersumit tamatumannga uppernarsarneqarpoq. Ilumoorpali Guuti inuit akeraat, toqu, atorlugu asasitsinnik qilammut imminukartitsisartoq? Biibilimi qanoq allassimasoqartoq takoriartigu.

Oqaluussisartup oqaasii 9:5, 10-mi ima allassimavoq: „Toqungasut sunnguamilluunniit ilisimasaqanngillat! . . . Toqusut inaanni ornitanni [suliassaqanngilaq] ataqatigiinneqaraniluunniit ilisimasassanik ilisimassusermilluunniit peqarnani.“ ’Toqusut inaat’ sunaagami? Tassa inuiaat ataatsimut ilerrat toqugutta ornitassarput. Ilivermi tassani toqungasut susinnaanngillat, aalariarsinnaanngillat, misigissuseqanngillat eqqarsaatersorsinnaanatilluunniit. Qanoq innerat itisuumik sininnermut assersuunneqarsinnaavoq. Tassa Biibilimi erseqqissarneqarpoq toqukkut annaasavut Guutip qilammut imminukartittanngikkai. Toqungasut iliverniipput uumassuseqaratik.

Ilumoortoq tamanna Jiisusip ikinngummi Lazarusip toqunerata kingorna uppernarsarpaa. Jiisusip toqu sininnermut assersuuppaa. Guutip ajugaqanngitsup najortiginiassammagu Lazarusi qilaliartinneqarsimagaluarpat, asanninngitsuliornerusimassagaluarpoq toqoqqittussanngorlugu Jiisusip nunamut utertissimasuuppagu. Oqaluttuami isumassarsiarititaasumi oqaluttuarineqarpoq Jiisusi ilerrup eqqaani nipituumik ima torlulasoq: „Lazarusi, maanga anigit!“ Nanginnerani Biibilimi ima allassimavoq: „Toqusoq anivoq.“ Lazarusi uummaqqippoq. Jiisusip nalunngilaa Lazarusip nunarsuaq qimanngisaannarsimagaa. Ilivermiissimavoq uumassuseqarnani. — Johannesi 11:11-14, 34, 38-44.

Oqaluttuap Biibilimeersup tamatuma paasitippaatigut Guutip inuit nunamiit qilaliartinniarlugit toqu atorneq ajoraa. Taamaattumik Guuti qanillisinnaavarput nalunagu taanna aliasunnitsinnut pisuunngitsoq. Aamma qularutigissanngilarput taassuma nalunngilluinnaraa inuup akeraa, toqu, qanoq aliasutsitsitigisarlunilu ajoqusiitigisartoq. Toqungasut qanoq innerat pillugu  ilumoortup Biibilimeersup aamma takutippaa toqungasut anniarfimmi innermiluunniit eqqiarfimmi naalliutsinneqanngitsut, uumassuseqaratilli ilivermiittut. Taamaattumik toqukkut annaasatsinnik eqqaamasavut Guutimik ajorinninnermit nalusanilluunniit siooranermit aserorneqartariaqanngillat. Allaat Jehovap Biibilimi suli allanik tuppallersaatissaqartippaatigut.

Neriuuteqarneq pillualersitsisarpoq

Allassimaffiit misissukkatta takutippaat piviusumik pilluassagaanni neriuuteqarneq pingaaruteqartoq. Oqaaseq „neriuut“ Biibilimi atorneqartoq tatiginnilluni arlaannik ajunngitsumik ilimagisaqarnermik isumaqarpoq. Neriuuteqarneq qanoq maannakkut pillualersitsisinnaanersoq paasiumallugu, Lazarusip makititaanera pillugu oqaluttuaq uteqqiffigisinnaavarput.

Jiisusip tupinnartuliornera tamanna minnerpaamik marlunnik pissuteqarpoq. Siullermik Marta, Maria taakkualu ikinngutaat aliasunneranni tuppallersarniarlugit. Lazarusi asangaagartik ilageqqissinnaalerpaat. Pissutaasorli alla pingaarnerusoq Jiisusip Martamut ima eqqaavaa: „Oqarfigisimannginnerpagit upperuit Guutip naalannassusia takussagit?“ (Johannesi 11:40) Oqaatsit „Guutip naalannassusia“ The New Testament in Modern English-imi J.B. Phillipsip nutsigaani „Guutip tupinnartuliarisinnaasai“-nik nutserneqarsimavoq. Lazarusimik makititsinermigut Jiisusip takutippaa Jehova Guutip qanoq iliorsinnaanera siunissamilu qanoq iliorumaarnera. ’Guutip tupinnartuliarisinnaasaasa’ ilaat misissorneroriartigit.

Johannesi 5:28, 29-mi Jiisusi ima oqarpoq: „Tamanna tupigusuutigissanngilarsi; piffissarmi nalliukkumaarpoq ilivermiittut tamarmik taassuma nipaanik tusarumaarfissaat ilivernillu aniumaarfissaat.“ Tamanna isumaqarpoq toqungasut ilivermiittut, Guutip eqqaamasai tamarmik, asasavut ilanngullugit, uummaqqikkumaartut. Pisussaq tupinnangaartoq tamanna pillugu Apustilit Suliaat 24:15-imi amerlanerusunik paasissutissaqarpoq, ima allassimavoq: ’Toqusut makikkumaarput — iluartut iluaatsullu.’ Allaat „iluaatsut“, Jehovamik ilisarisimanninngitsut taassumunngaluunniit kiffartorsimanngitsut, Guutimit iluarisaalernissaminnut periarfissaqassapput.

Makititsineq tamanna sumi pissava? Tussiaat 37:29-mi ima allassimavoq: „Iluartut nuna kingornutissavaat najugaqassallutillu tassani naassaanngitsumik.“ Qanoq isumaqarnera eqqarsaatigeriassagit. Ilaqutariit ikinngutigiillu toqukkut avissaartitaasimasut nunami maani takoqqissapput. Eqqarsaatigigaangakku asasavit ilageqqilernissaat qanoq nuannertigissanersoq qamannga pisumik nuannaarutigisannginnerpiuk?

Jehovap kissaatigaa pilluartuussasugut

Naak ajornartorsiuteqaraluartugut Jehovap uagutsinnik pilluarnerutitseriaasii assigiinngitsut marluk maannakkut sammereerpavut. Siullermik Biibili aqqutigalugu ilisimasaqartippaatigut siunnersorlutalu ulluni atugarliorfiusuni iluaqutigisinnaasatsinnik. Siunnersuutit Biibilimiittut asasatsinnik annaasaqarnitsinni aliasunnitta naammagalugu atornissaanut iluaqutaanerisa saniatigut aningaasaqarnikkut peqqissutsikkullu ajornartorsiutit anigornissaannut naammagalugilluunniit atornissaannut iluaqutigisinnaavavut. Innuttaaqatigiinni naapertuilluanngitsuliornerit politikkikkullu allanngorarnerit naammagalugit atornissaannut nakussatsissutigisinnaavavut. Siunnersuutit Biibilimiittut maleruartarutsigit, aamma inuttut allanik ajornartorsiuteqarnitsinni iluaqutigissavavut.

Aappassaanik Biibilip atuaqqissaarneratigut neriuuteqalersinnaavugut inuit tunniussinnaasaannit tamanit annerungaartumik. Neriuummut Biibilimi saqqummiunneqartumut ilaavoq ikinngutit ilaquttallu makititaanissaannik neriuut. Saqqummersitat 21:3, 4-mi sukumiinerusumik paasissutissaqarpoq: „Guuti nammineq [inunniikkumaarpoq]. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ Tassa imaappoq ullumikkut nuannaanngissutigisinnaasavut tamarmik erniinnaq naassaanngitsumik peerneqassasut. Biibilimi neriorsuutit piviusunngorumaarput, taakkualu eqquunnerat nuannaarutigisinnaassavarput. Siunissami pissutsit pitsaanerunissaannik ilisimasaqarnerinnaq tuppallersaataavoq.

Ukiorpassuit matuma siorna Mariap uini annaavaa, uia kræftimik nappaateqarluni anniangaarluni  toquvoq. Tamatuma kinguninngua aningaasatigut ajornartorsiorneq pissutigalugu paninilu pingasut allamut nuuttariaqalerput. Ukiut marluk qaangiummata Mariap paasivaa kræfteqalersimalluni. Marloriarluni pilatserujussuarpoq, ullullu tamaasa anniarujussuartarluni. Tamakku ajornartorsiutigigaluarlugit isumalluartumik isiginnittaaseqarpoq, tamannalu allanik qiimmassaanissaminut iluaqutigisarpaa. Qanoq ililluni nuannaartuaannarlunilu pilluartuaannarsinnaava?

Maria ima oqarpoq: „Ajornartorsiuteqaraangama imminut eqqarsaatigivallaarnaveersaartarpunga. Imaattut apeqqutiginaveersaartarpakka: ’Sooq uangarpiaq? Sooq uanga taamatut naalliuttariaqarpunga? Sooq uanga napparsimalerpunga?’ Isumalluanngitsumik eqqarsartaaseqarneq nukissaarutsitsisarpoq. Taamatut eqqarsartaaseqarnanga nukikka Jehovamut kiffartornermi allanillu ikiuinermi atortarpakka. Tamatuma pillualersittarpaanga.“

Neriuuteqarneq Mariamut qanoq pingaaruteqartigaa? Tatigilluinnarpaa Jehovap siunissami nappaatit inuillu ajornartorsiutaat allat tamaasa peerumaarai. Napparsimmavimmi katsorsartikkaangami neriuutini kræftimik nappaatilinnut allanut, amerlanertigut isumatsassimasunut, oqaluttuarisarpaa. Neriuuteqarneq Mariamut qanoq pingaartigaa? Ima oqarpoq: „Biibilimi Hebræerit 6:19-imi allassimasoq, Paulusip neriuutip tarnimut kitsatut ittuuneranik eqqartuinera, eqqarsaatigigajuppara. Kisaq taanna piginngikkutsigu umiatsiatut pitunneqanngitsutut anorersuarmi tissukassaagut. Taamali ittumik kisaqaraanni ’anorersuit’ nalaattakkat anigorluarneqarsinnaapput. ’Inuunermik naassaanngitsumik Guutip sallusuitsup neriorsuutigisimasaanik’ neriuut iluaqutigalugu Maria nuannaartuaannarlunilu pilluartuaannarsinnaavoq. Aamma ilinnut taamaassinnaavoq. — Titusi 1:2.

Ajornartorsiuteqaraluarlutit Biibilimik atuaqqissaartarnikkut piviusumik pillualersinnaavutit. Immaqali Biibilimik atuaqqissaarnerup iluaqutaanera pillugu apeqqutissaqarputit. Piviusumik pillualissaguit akissutit Biibilimiittut pisariaqartitatit Jehovap Nalunaajaasuisa ilinnut takutikkumavaat. Jehovap uagutsinnut neriorsuutigisaata piviusunngornissaanik utaqqininni, inuit ima eqqaaneqartut misigisaat illit aamma misigisinnaavat: „Tipaatsunnerup nuannaarnerullu angussavai, aliasunneq anersaarulunnerillu peerutissapput.“ — Esaja 35:10. (wE 6/15 06)

[Qupp. 5-mi assiliartaq]

Sallusuissut Biibilimeersoq aliasunnermi tuppallersaataasinnaasutuaavoq

[Qupp. 7-mi assiliartaq]

Makititaanissamik neriuutip Biibilimeersup pilluarnerulersissinnaavaatigut