„Ullussat kingulliit“ suuppat?

ILINNUT qanigisannullu siunissaq qanoq ittuussanersoq eqqarsaatigisarpiuk? Inuppassuit nutaarsiassani saqqummersartut soqutigisorujussuuaat, silarsuarmi pisut inuunerminnut qanoq sunniuteqarsinnaanerat malinnaaffiginiarlugu. Guutilli oqaasia isumassarsiarititaasoq misissoraanni paasineqarsinnaavoq qanorpiaq pisoqassanersoq. Tamatumunnga pissutaavoq silarsuarmi pissutsit ullumikkut nalunngisavut siunissamilu pisussat Biibilimi qangarsuarli siulittuutigineqarsimanerat.

Jiisusi Kristusip nunamiikkallarami tamaginnut Guutip naalagaaffia oqaluussissutigivaa. (Lukasi 4:43) Tusarnaartuisa soorunami paaserusussimassavaat naalagaaffik nalissaqanngitsoq taanna qaqugu tikiutissanersoq. Jiisusip eqqunngitsumik unnerluutigisaalluni toqutaanissaa ullunik pingasunik sioqqullugu ajoqersugaasa ima aperaat: „Qaqugu tamakku taamaalissappat, sunalu [Guutip naalagaaffiani kunngitut] najuunnissannut pissutsillu aaqqissuussaanerata naggatissaanut nalunaaqqutaassava?“ (Matthæusi 24:3, NV) Jiisusip taakku oqarfigai Guutip naalagaaffiata tamakkiisumik nunarsuarmut tamarmut naalakkersuilernissaa qaqugorpiaq pissanersoq Jehova Guutip kisimi ilisimagaa. (Matthæusi 24:36; Markusi 13:32) Jiisusilli inuillu allat pissutsit nunami atuuttussat Kristusip Guutip naalagaaffiani kunngitut naalakkersuilerneranut ilisarnaataasussat siulittuutigaat.

Pissutsit aaqqissuussaanerata maanna atuuttup ’ulluini kingullerni’ inuunitsinnut uppernarsaatit takussaasut misissortinnagit, anersaat takussaanngitsut silarsuaanni pisimasoq pingaaruteqartoq misissullatsiassavarput. (2 Timotheusi 3:1) Jiisusi Kristusi 1914-imi qilammi kunnginngorpoq. * (Danieli 7:13, 14) Pissaanermik tunineqarnermi kingunitsianngua pingaarutilimmik iliuuseqarpoq. Biibilimi ima allassimavoq: „Qilammi sorsunneqalerpoq. Mikaelip inngiliisalu uumasorujuk saassuppaat, uumasorujullu inngiliilu akiuupput.“ (Saqqummersitat 12:7) Mikaeli kinaava? Tassaavoq Jiisusi Kristusi qilammi ’inngiliunertut’ atorfimmini taaguutaa. * (Judasi 9; 1 Thessalonikamiut 4:16) Uumasorujuk tassaavoq Saatani Diaavulu. Akiuunneq tamanna Saatanimut inngilipiluinullu, anersaapilunnut, qanoq kinguneqarpa? Sorsunnermi ajorsarput ’nunamullu igitaallutik’, imaluunniit qilammit anisitaallutik, nunap qanittuanut. (Saqqummersitat 12:9) Taamaattuminguna qilanni Guutillu ernerisa anersaajusut aalajaatsut akornanni nuannaarneqangaartoq. Inuilli nuannaarneq tamanna misiginngilaat. Biibilimi ima allassimavoq: „Eqqanaq nuna imarlu Diaavulu ilissinnut aqqarmat kamattorsuulluni, piffissakissutsi nalunnginnamiuk.“ — Saqqummersitat 12:12.

Saatanip kamannera nunami najugalinnut eqqanartunik, tassa naalliunnartunik erloqinartunillu, kinguneqarpoq. Eqqanartut tamakku sivikitsuinnarmik pissapput. Biibilimi ullut taakku ’ullutut kingullertut’ eqqaaneqarput. Nuannaarutigisinnaavarput ungasinngitsukkut Diaavulu nunamut sunniisinnaajunnaarsilluinnarneqassammat. Ullunili kingullerni inuunitsinnut suut ilisarnaataappat?

[Quppernerup ataani ilanngussat]

 [Qupp. 2-mi suminngaanneernerat]

SAQQAA: Asseq salleq: © Chris Stowers/Panos Pictures; asseq tunorleq: FAROOQ NAEEM/AFP/Getty Images