Isigisavut pinnagit upperisarput malillugu saqisa

„Isigisavut pinnagit upperisarput malillugu saqivugut.“ — 2 KORINTHIMIUT 5:7, NV.

1. Apustili Paulusi isigisani pinnagit uppernikkut saqisoq sumit erserpa?

UKIOQ 55-iuvoq u.n.k. Angutip Saulusimik atillip, kristumiunik malersuisimasup, nammineq kristumiunngorneraniit ukiut 20-ngajaat qaangiupput. Ukiorpassuit qaangiukkaluartut, Guutimut uppernera taamaaginnarpoq. Piviusut qilammiittut isiminik takusimanngikkaluarlugit upperluartuuvoq. Apustili Paulusitut maanna ilisimaneqalerluni kristumiut tanitat qilaliarnissamik neriugisallit ima allaffigai: „Isigisavut pinnagit upperisarput malillugu saqivugut.“ — 2 Korinthimiut 5:7, NV.

2, 3. (a) Qanoq takutittarparput uppernikkut saqinerput? (b) Isigisat maliinnarlugit saqineq qanoq paasisariaqarpa?

² Uppernikkut saqinermi Guutip inuunitsinni siulersuilluarsinnaaneranik tatiginnilluinnarnissaq pisariaqarpoq. Qularinngilluinnartariaqarparput taassuma uagutsinnut suna iluaqutaanerpaanersoq nalunngikkaa. (Tussiaat 119:66) Inuunitsinni aalajangiigaangatta aalajangikkavullu naapertorlugit iliuuseqaraangatta „piviusut takussaanngitsut“ eqqarsaatigisarpavut. (Hebræerit 11:1, NV) ’Piviusunut takussaanngitsunut’ tamakkununnga ilaapput „qilaat nutaat“ aamma „nuna nutaaq“ Guutip neriorsuutigisai. (2 Petrusi 3:13) Isigisavulli maliinnarlugit saqigutta inuunerput misigissutsitsinniinnaq aqquneqartarpoq. Tamanna navianarpoq, Guutimmi piumasaanik sumiginnaalernitsinnik kinguneqarsinnaavoq. — Tussiaat 81:13; Oqaluussisartup oqaasii 11:9.

³ ’Savarpannguanut’ qilaliarnissamik neriugisalinnut imaluunniit ’savanut allanut’ nunarsuarmi inuunissamik neriugisalinnut ilaagaluarutta, isigisavut pinnagit upperisarput malillugu saqinissarput siunniusimasariaqarparput. (Lukasi 12:32; Johannesi 10:16) Maanna misissussavarput siunnersuutip isumassarsiarititaasup tamatuma maleruarnissaa qanoq uagut illersuutigisinnaaneripput, sivikitsuinnarmik ajortimi inuulluataarnissamut nakkaannannginniassagatta, pigisanik pingaartitsivallaarnermut napitinnginniassagatta imaluunniit pissutsit aaqqissuussaanerata maanna atuuttup naggatissaa arajutsinnginniassagatsigu. Aamma isigisat maliinnarlugit saqinerup navianaatai misissussavavut. — Hebræerit 11:25.

’Sivikitsuinnarmik ajortimi inuulluataarnissaq’ itigartiguk

4. Mosesi qanoq iliorniarluni aalajangerpa, aamma sooq?

⁴ Takorlooriaruk inuuneq Mosesip, Amramip ernerata, inuunerilersimasinnaasaralua. Egyptenimi Faraop erneri peroriartoqatigai, pissaaneqalersinnaallunilu pisoorsuanngorsinnaallunilu sunniuteqalersinnaavoq. Ima eqqarsarsinnaagaluarpoq: ’Egyptenimiut ilisimassusiannik tusaamasaasumik ajoqersorneqarsimavunga, pissaaneqarpungalu oqaatsikkut suliakkullu. Kunngikkormiuniiginnaruma, atorfiga qatanngutinnut hebræeriusunut naqisimaneqartunut iluaqutissatut atorsinnaavara!’ (Apustilit Suliaat 7:22) Mosesili aalajangerpoq ’Guutip innuttai naallioqatiginiarlugit’. Sooq? Suna kajumississutigalugu Mosesip Egyptenip neqeroorutigisinnaasai tamaasa isumakkeerpai? Biibilimi ima akissutissaqarpoq: „Uppernikkut [Mosesip] Egypteni qimappaa kunngip kamannera siooraginagu. Takussaanngitsumimmi isigisaqarlunilusooq pinertusaarpoq.“ (Hebræerit 11:24-27) Mosesip Jehovap naapertuilluarnermik eqqortuliornermillu akissarsisitsiumaarneranik upperinninnini ajortimik tamatuminngalu sivikitsuinnarmik inuulluataarutiginninnissamik akiuinissamut iluaqutigaa.

5. Mosesip maligassiaa qanoq iliornissamut kajumississutigaarput?

⁵ Uaguttaaq aalajangeruminaatsitatsinnik aalajangigassaqartarpugut,  assersuutigalugu: ’Iliuutsit ileqqulluunniit aalajangersimasut Biibilimut naapertuuterpianngitsut taamaatissavakka? Suliffik aningaasatigut iluaqutissartaqarpasissoq anersaakkulli siumukarnissannut akornutaasoq akuerissavara?’ Silarsuup matuma inuunermut killilimmik isiginnittaasianik tunngaveqanngitsunik ’takussaanngitsulli’, Jehova Guutip, siunissaq ungasinnerusoq eqqarsaatigalugu ilisimassusianik upperinninnitsinnut takussutissaasunik aalajangigaqarnissatsinnut Mosesip maligassiaa kajumississutigaarput. Qanortoq uagut Mosesitut Jehova Guutimut ikinngutaanerput silarsuup matuma neqeroorutigisinnaasaanit tamanit pingaarnerutitsigu!

6, 7. (a) Esauip qanoq ililluni takutippaa isigisani maliinnarlugit saqiumanerulluni? (b) Esaui qanoq ililluni uagutsinnut mianersoqqussutaava?

⁶ Esaui, ataataanerpaap Iisaap ernera, Mosesimit allaanerulluinnarpoq. Taannami maannakkorpiaq iluatarusussimavoq. (1 Mosesi 25:30-34) Esauip „nerisassanut ataasiagassaannarnut“ angajulliussutsi akigaa ’illernartunik pingaartitsinnginnami’. (Hebræerit 12:16, NV) Eqqarsaatiginngitsoorsimavaa angajulliussutsini akiginiarlugu aalajangernini Jehovamut attaveqarnerminut qanoq sunniuteqassanersoq aamma kinguaassaminut qanoq kinguneqarumaarnersoq. Anersaakkut paasisimasakitsuarassuuvoq. Guutip neriorsuutai erlinnartut sumiginnarpai naleqarpianngitsutullu isigalugit. Taanna uppernikkut pinnani isigisani maliinnarlugit saqivoq.

⁷ Esaui taamaalilluni ullumikkut uagutsinnut mianersoqqussutaavoq. (1 Korinthimiut 10:11) Pingaarutilinnik pingaaruteqannginnerusunilluunniit aalajangigassaqaraangatta, Saatanip silarsuaata sunniiniarneranit tammartinneqassanngilagut, soorlu ima oqarfigineqarutta: kissaatigisatit maannakkorpiaq piviusunngortittariaqarpatit. Silatusaarluta imminut ima aperisariaqarpugut: ’Aalajangikkakka Esauip iliuusiinut assingusunik iliuuseqaqajaaninnut ersiutaappat? Kissaatigisannik ingerlaannaq piviusunngortitsiniartarnera anersaakkut soqutigisat tunulliunnerannik kinguneqartarpa? Aalajangikkakka pissutigalugit Guutimut attaveqarnera navianartorsiortittarpara siunissamilu akissarsisinneqanngitsooratarsinnaallunga? Allanut qanoq maligassiuivunga?’ Aalajangikkavut illernartunik pingaartitsinitsinnut takussutissaappata, Jehovap pilluaqqussavaatigut. — Ussatit 10:22.

Pigisanik pingaartitsivallaarnermut napitinnaveersaarit

8. Kristumiut Laodikeamiittut qanoq mianersoqquneqarpat, uagutsinnullu tamanna qanoq pingaaruteqarpa?

⁸ Ukiut hundredellit siulliit naalerneranni Jiisusi Kristusi naalannarsisitaasoq apustili Johannesimut saqqummersitamini Asiaaqqami ilagiinnut Laodikeamiittunut tusarliussivoq. Tusarliussaa pigisanik pingaartitsivallaarnermut mianersoqqussutitaqarpoq. Laodikeamiut pigisatigut pisuujugaluarlutik anersaakkut piitsuupput. Uppernikkut saqinatik pisuussutinik pingaartitsivallaarnertik anersaakkut ittunik takorluuerpiarsinnaajunnaassutigaat. (Saqqummersitat 3:14-18) Ullumikkuttaaq pigisanik pingaartitsivallaarneq taama sunniuteqartarpoq. Uppernerput sanngiillisittarpaa inuunermullu arpannermi pinertusaarsinnaajunnaartittarluta. (Hebræerit 12:1) Mianersunngikkutta ’inuulluaatinit’ anersaakkut sammisaqartarnerput ipitikkiartuaarneqarsinnaavoq naggataatigullu ’ipitilluinnarneqarsinnaalluni’. — Lukasi 8:14.

9. Anersaakkut inuussutissanik pisartakkatsinnik naammaginninneq pingaartitsinerlu qanoq uagutsinnut illersuutaappat?

 ⁹ Anersaakkut uagut imminut qanoq illersorsinnaavugut? Taamaaliorsinnaavugut naammaginnittuunitsigut ’silarsuarmillu tamakkiisumik atuinnginnitsigut’ pisuussutinillu pissarsinniannginnitsigut. (1 Korinthimiut 7:31, NV; 1 Timotheusi 6:6-8) Isigisavut pinnagit upperisarput malillugu saqigutta, anersaakkut paratiisimiinnerput nuannaarutigissavarput. Anersaakkut inuussutissanik peqqinnartunik pigaangatta ’uummatitta iluunngaanit qiimmattarnissamut’ killinneqartarpugut, ilaa? (Esaja 65:13, 14) Aamma Guutip anersaavata inerititaanik inerititaqartunik peqateqartarnerput nuannaarutigisarparput, ilaa? (Galatiamiut 5:22, 23) Jehovap pilersitaanit nakussatsinneqartutut kajumissaarneqartutullu misigisarnerput pingaaruteqarluinnarpoq.

10. Imminut qanoq aperisinnaavugut?

¹⁰ Apeqqutit imminut apeqqutigisinnaasatta ilaat makkuupput: ’Pigisat inuuninni qanoq pingaaruteqartigippat? Pigisakka inuulluataarutigiinnartarpakka, imaluunniit pallorfiginninnermik ilumoortumik siuarsaanissamut atortarpakka? Suna annermik nuannaarutigisarlugulu nalerisimaarutigisarpara? Tassaava Biibilimik atuaqqissaarneq kristumiullu ataatsimiinnerini peqatigiinneq, imaluunniit kristumiutut pisussaaffeqarnani sapaatip-akunneranik naanersiornerua? Sapaatip-akunnerata naanerpassui oqaluussinermut pallorfiginninnermullu minguitsumut tunngasunut allanut atornagit qasukkarsimaarnermut sukisaarsarnermullu atortarpakka?’ Uppernikkut saqineq tassaavoq Jehovap neriorsuutaanik tatiginnilluinnarluni Guutip naalagaaffiata suliaanik ulapputeqarneq. — 1 Korinthimiut 15:58.

Naggatissaq eqqumaffigiuaruk!

11. Uppernikkut saqineq naggatissamik eqqumaffiginninnissamut qanoq iluaqutigaarput?

¹¹ Uppernikkut saqigutta silamiorpaluttumik eqqarsartaaseqarnaveersaarsinnaavugut imatut: Naggatissaq siunissami ungasissumiittoq imaluunniit takkutinngitsoorsinnaasoq. Qulartutut Biibilimi siulittuutinik upperinninninngitsutut pinnata uagut takusinnaavarput silarsuarmi pisartut Guutip oqaasiani naggatissap nalaa pillugu siulittuutinut naapertuuttut. (2 Petrusi 3:3, 4) Inuit isiginnittaasiat pissusilersornerallu pingaarnertigut ersiutaannginnerpat maannakkut ’ulluni kingullerni’ inuunitsinnut? (2 Timotheusi 3:1-5) Uppernerup isaanik takusinnaavarput ullumikkut silarsuarmi pisartut tassaaginnanngitsut oqaluttuarisaanermi pereersimasut uteqqinnerat. Paasivarput taakku tassaasut ’[Kristusip] najuunnissaanut pissutsillu aaqqissuussaanerata naggatissaanut nalunaaqqutit’ (NV). — Matthæusi 24:1-14.

12. Lukasi 21:20, 21-mi Jiisusip oqaasii ukiuni hundredelinni siullerni qanoq ilillutik eqquuppat?

¹² Uppernikkut saqinerup qanoq pingaaruteqartigineranut assersuutitut ukiuni hundredelinni siullerni pisimasoq nalitsinnut assingussuteqartoq misissorsinnaavarput. Jiisusip ajoqersukkani ima mianersoqquai: „Takugussiuk Jerusalemi sakkutuunit unguneqarsimasoq, taava nalussanngilarsi  piuneerussaaffissaa qanillisoq. Taava Judæamiittut qaqqanut qimaassapput; illoqarfimmiittut illoqarfik qimassavaat.“ (Lukasi 21:20, 21) Siulittuutip tamatuma eqquunneratut Romamiut Cestius Gallusimit siulersorneqarlutik ukiumi 66-imi u.n.k. Jerusalemi unguaat. Tassanngaannartumilli ungusisut tunuarput, tamannalu kristumiunut nalunaaqutaavoq, taakku taamaalillutik ’qaqqanut qimaanissaminnut’ periarfissaqalermata. Ukiumili 70-imi Romamiut uteqqipput, Jerusalemi saassuppaat naalaffillu piuneerullugu. Josefus oqaluttuarpoq juutit 1 millionit sinnerlugit toqusimasut 97.000-illu tigusarineqarsimasut. Taamaalilluni Guutip juutit aaqqissuussaanerannut eqqartuussutaa naammassinneqarpoq. Uppernikkut saqisut Jiisusillu mianersoqqussutaanik eqqumaffiginnittut annapput.

13, 14. (a) Siunissami qanoq pisoqassava? (b) Sooq Biibilimi siulittuutit eqquukkiartornerat eqqumaffigisariaqarparput?

¹³ Ullumikkut tamatumunnga assingusumik pisoqarumaarpoq. Naalagaaffiit Peqatigiit-niittut ilaat Guutip eqqartuussutaanik naammassinneqataassapput. Soorlu ukiuni hundredelinni siullerni Romamiut sakkutuui Pax Romanamik (Romamiut naalagaaffissuanni eqqissinermik) taasamik eqqissineqartitsisut, ullumikkut Naalagaaffiit Peqatigiit taamatut eqqissineqartitsisussaapput. Romamiut sakkutuui silarsuarmik taamanikkut ilisimaneqartumik tamarmik isumannaatsuutitsiniarsarigaluarlutik namminneq Jerusalemi piuneeruppaat. Ullumikkut aamma taamatut pisoqarumaarpoq. Biibilimi siulittuutini ersersinneqarpoq pissaanillit sakkutuullit Naalagaaffiit Peqatigiit-niittut upperisarsiornerit akornutaasutut isigilissagaat ullumikkullu Jerusalemitoqqamut assingusut — tassa kristumiuuneraqatigiit — aamma Babylonersuup sinnera tamaat piuneerunniarlugit akuliutissasut. (Saqqummersitat 17:12-17) Aap, eqqunngitsumik upperisarsiornerup silarsuarmi tamarmi naalagaaffissua tamakkeerlugu qanittukkut piuneerunneqartussaavoq!

¹⁴ Annikilliornartussarsuup aallartinneranut nalunaaqqutaassaaq eqqunngitsumik upperisarsiornerup tamarmi piuneerunneqarnissaa. Tamatuma kingorna pissutsit aaqqissuussaanerannut ajortumut maanna atuuttumut ilaasut sinneri suujunnaarsinneqassapput. (Matthæusi 24:29, 30; Saqqummersitat 16:14, 16) Uppernikkut saqigutta Biibilimi siulittuutit eqquukkiartornerat eqqumaffigissavarput. Salloqittarneqarumanata isumaqalissanngilagut eqqissineq isumannaassuserlu piviusut pilersinniarlugit Guutip inuit pilersitaat, soorlu Naalagaaffiit Peqatigiit, sakkugissagai. Taamaattumik inooriaatsitsinni takutittariaqarparput ’Jehovap ullussarsuata’ qanillinera qularinngilluinnaripput, ilaa? — Sefania 1:14.

Isigisat maliinnarlugit saqinerup navianaatai

15. Israelikkut Jehovap pilluaqqusinera misigereernikuugaluarlugu napiaaniut suna napitiffigaat?

¹⁵ Isigisat maliinnarlugit saqinikkut uppernermik sanngiilliartortitsinerup navianaatai itsaq Israelikkut misigisimasaannit ersersinneqarput. Massa Israelikkut Egyptenimi guutipiluit nikanarsarneqarnerannik isiginnittuugaluarlutik Immakkullu Aappalaartukkoortinneqarlutik pissanganartumik aniguisitaagaluarlutik, Guutip inatsisai unioqqutillugit nersuteeraasaliorput kuultiusumik taannalu pallorfigilerlugu. Utaqqikkatalerput „Mosesip qaqqamit aternissaa erinitsaakkamikku“. (2 Mosesi 32:1-4) Utaqqisinnaassuseqannginnamik guutipiluk isigisinnaasartik pallorfigilerpaat. Taamaalillutik Jehova narrunarsarpaat, ’angutillu 3.000-it missaat’ eqqartuunneqarlutik toqutaapput. (2 Mosesi 32:25-29) Ila alianartassusia Jehovamik pallorfiginnittut ilaat Jehova tatigerpasinnagu neriorsuutiminillu nammassinnissinnaanera qularerpasillugu aalajangeraangat!

16. Israelikkut qallikkut ittunit qanoq ilillutik sunnerneqartippat?

 ¹⁶ Qallikkut ittut aamma allatigut Israelikkunnut ajortumik sunniuteqarput. Isigisatik maliinnarlugit saqigamik akeqqatik siooragilerpaat. (4 Mosesi 13:28, 32; 5 Mosesi 1:28) Taamaattumik Mosesip oqartussaaneranut Guutimeersumut pikitsitsilerput atukkatillu naammagittaalliuutigilerlugit. Uppernikikkamik Egypteni anersaapilunnit sunnerneqangaartoq nunamit neriorsuutigisamit piumanerulerpaat. (4 Mosesi 14:1-4; Tussiaat 106:24) Israelikkut Kunngiminnut takussaanngitsumut ataqqinninngitsuliornerat Jehovamut aliasuutaasimassaqaaq!

17. Sooruna Israelikkut Samuelip nalaani Jehovap siulersuinera itigartikkaat?

¹⁷ Aamma pruffiiti Samuelip nalaani Israelikkut Guutimit iluarisaangaaraluartut isigisat maliinnarlugit saqinermut napitipput. Kunngeqarusulerput takusinnaasaminnik. Naak Jehovap taakkununnga kunngiunini erseqqissarsimagaluaraa, tamanna taakkua uppernikkut saqilernissaannut naammanngilaq. (1 Samueli 8:4-9) Namminneq ajoqutigisaminnik sianiilliorlutik Jehovap kukkujuitsumik siulersuinera itigartippaat inuiaqatigiillu eqqaminniittut atugaannut assingusunik atugaqarusunnerulerlutik. — 1 Samueli 8:19, 20.

18. Ullumikkut isigisat maliinnarlugit saqineq sunik navianaateqarpa?

¹⁸ Ullumikkut Jehovamut kiffaasutut taassumunnga ajunngitsumik attaveqarnerput pingaartipparput. Itsaq pisimasut ilinniarfigerusungaarpavut ilikkakkavullu inuunitsinni maleruarusungaarlugit. (Romamiut 15:4) Israelikkut isigisatik maliinnarlugit saqigaangamik, puigortarpaat Mosesi aqqutigalugu Guutimit siulersorneqarlutik. Mianersunngikkutta uaguttaaq puigorsinnaavarput Jehova Guutip Mosesillu annerup, Jiisusi Kristusip, ullumikkut ilagiit kristumiut siulersoraat. (Saqqummersitat 1:12-16) Mianersuutigisariaqarparput Jehovap peqatigiissortaasa ilaannik nunarsuarmiittunik inuup isiginninneriaasiatut isiginnilinnginnissarput. Taamatummi isiginninneriaaseqarutta, naammagittaalliortuaannalernermik Jehovamullu sinniisuusunik ataqqinnikkunnaarnermik anersaakkullu inuussutissanik ’kiffap ilumoortup silatuullu’ pilersitaanik pingaartitsiunnaarnermik kinguneqarsinnaavoq. — Matthæusi 24:45.

Uppernikkut saqinissarput aalajangiusimatigu

19, 20. Qanoq iliornissarput aalajangiusimavarput, aamma sooq?

¹⁹ Paulusip kristumiut ima allaffigai: „Sorsunnerput uinimmut aammullu sorsunnerunngilaq, piginnaatitaasunulli pissaanernullu taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut.“ (Efesosimiut 6:12) Uagutsinnut akeraasoq pingaarneq tassaavoq Saatani Diaavulu. Taassuma Jehovamut upperunnaarnissarput anguniagaraa. Guutimut kiffartornitsinnik aalajangiusimannikkunnaartitsisinnaasut suut tamaasa atorniarpai. (1 Petrusi 5:8) Saatanip pissutsinik aaqqissuussineranit salloqittarneqarnissamut suna illersuutigisinnaavarput? Tamatumunnga akissut imaappoq: Isigisavut pinnagit upperisarput malillugu saqinerput! Jehovap neriorsuutai upperalugillu tatigigutsigik ’uppersutsitsinni umiiarnissamut’ illersorneqassaagut. (1 Timotheusi 1:19) Taamaattumik Jehovap pilluaqqusinissaa tatigilluinnarlugu uppernikkut saqiuarnissarput aalajangiusimatigu. Qanortorlu qinujuarta siunissami qanittumi pisussat suut tamaasa qimarratigisinnaaqqullugit. — Lukasi 21:36.

²⁰ Isigisavut pinnagit upperisarput malillugu saqinermut tunngatillugu asseqanngilluinnartumik maligassaqarpugut. Biibilimi ima allassimavoq: ’Kristusi anniartitaavoq ilissi pillusi maligassamillu qimatsivigalusi, tumini atuarlugit malinnaaqqullusi.’ (1 Petrusi 2:21) Allaaserisami tulliuttumi sammineqassaaq taassuma saqineratut uagut qanoq saqiuarsinnaanersugut.

Eqqaamavigit?

• Isigisavut pinnagit upperisarput malillugu saqineq eqqarsaatigalugu Mosesip Esauillu maligassiaat qanoq ilinniutigaavut?

• Pigisanik pingaartitsivallaalernissaq qanoq pinaveersaarneqarsinnaava?

• Naggatissap siunissami ungasissumiittutut eqqarsaatiginaveersaarnissaanut uppernikkut saqineq qanoq iluaqutigaarput?

• Isigisat maliinnarlugit saqineq sooq navianarpa?

[Atuaqqissaarnermi apeqqutit]

[Qupp. 23-mi assiliartaq]

Mosesi uppernikkut saqivoq

[Qupp. 24-mi assiliartaq]

Qasukkarsimaarneq sukisaarsarnerlu kristumiutut sammisassanut akornutigigajuppavut?

[Qupp. 26-mi assiliartaq]

Guutip oqaasianik eqqumaffiginninneq qanoq illersuutaava?