Jehovap ajortut eqqartuutissavai

„Piareersimaniassaatit Guutinnut sassartitaanissannut.“ — AMOSI 4:12.

1, 2. Sooq Guutip ajussuseq suujunnaarsikkumaaraa tatigisinnaavarput?

QAQUGUMULLUUNNIIT Jehovap nunarsuarmi ajussuseq naalliuutillu suujunnaarsissanerpai? Ullumikkut 2000-kkut aallartinneranni apeqqut taanna naleqqulluinnarpoq. Sumulluunniit qiviaraluarutta inuit naakkittaannerat takussaavoq. Silarsuaq nakuusernertaqanngitsoq, peqqarniisaarniaqanngitsoq ajussuseqanngitsorlu erinigeqaarput.

² Tatigilluinnarsinnaavarput Jehovap ajussuseq suujunnaarsikkumaaraa. Ajortunut akuliukkumaarneranut pissusii qulakkeerutaapput. Jehova naapertuilluartuuvoq unneqqarissuullunilu. Tussiaat 33:5-imi ima allassimavoq: „Iluarneq naapertuilluarnerlu nuannarai.“ Tussiaammilu allami ima allassimavoq: „Nakuusernermik nuannarisaqartoq [Jehovap] uumigaa.“ (Tussiaat 11:5) Jehovap, Guutip ajugaqanngitsup, iluarnermik naapertuilluarnermillu nuannarisaqartup, uumigisani naassaanngitsumik akuersaassanngilai.

3. Amosip siulittuutaanik misissuineruneq sumik ilinniarfigisinnaavarput?

³ Jehovap ajussutsimik suujunnaarsitsinissaanik qularutiginninnginnissatsinnut aamma allamik pissutissaqarpugut. Itsaq iliuuserisimasai tamatumunnga qulakkeerutaapput. Biibilimi Amosip allagaani Jehovap ajortunut qanoq periaaseqartarsimanera pillugu atuarsinnaavugut. Amosip siulittuutaanik misissuinerunikkut Guutip eqqartuussutaanut tunngasut ilinniarfigisinnaasavut pingasut erseqqississapput. Siullermik, Guuti eqqartuussisarpoq tamatigut pissutissaqarluarluni. Aappassaanik, eqqartuussutaa avaqqunneqarsinnaanngilaq. Pingajussaanillu, nalaatsornikkut eqquineq ajorpoq, Jehovammi ajortuliortunut eqqartuussutini naammassisarpaa, eqqortumillu isumaqarfiginnittut peqqissimisut saattullu nallittortarlugit. — Romamiut 9:17-26.

Guuti pissutissaqarluarluni tamatigut eqqartuussisarpoq

4. Jehovap Amosi sumut aallartippaa, sunalu siunertaralugu?

⁴ Amosip nalaani nuna naalagaaffinnut marlunnut avinneqareersimavoq — naggueqatigiit marluusut naalagaaffiat Juda kujalliulluni, naggueqatigiillu quliusut naalagaaffiat Israeli avannarliulluni. Jehovap Amosi pruffiititut kiffartoqquaa Judamilu illoqarfianiit Israelimut aallartillugu. Tassani Amosip Guutip eqqartuussutaa oqaluussissutigisussaavaa.

5. Amosip naalagaaffiit sorliit siulittuiffigeqqaarpai, iluarisaanngitsutullu eqqartuunneqarnerannut suna pissutaaqataava?

⁵ Amosi Guutip naalagaaffimmut avannarlermut aalajaanngitsumut eqqartuussutaa oqaluussissutigalugu aallartinngilaq. Nunalli sanilerisat arfinillit — Aramip, Filisterit Nunaat, Tyrusip, Edomip, Ammonip Moabillu — Guutimit iluarisaanngitsutut eqqartuussaanerat oqaluussissutigeqqaarpaa. Taamatulli eqqartuunneqartariaqarpat? Ilaana. Ilaatigut Jehovap innuttaanut akeraapput malartitassaanngitsut.

6. Sooq Guutip Arami, Filisterit Nunaat Tyrusilu ajunaarnermik eqqorneqartippai?

⁶ Assersuutigalugu Jehovap Aramæerit avoqqaarai ’Gileadi karrertaajaaffigimmassuk’. (Amosi 1:3) Aramæerit Gileadi — Israelimi nuna kuussuup Jordanip kangiatungaaniittoq — isaaffigaat, nunallu ilaa tiguarlugu innuttaasunullu peqqarniitsuliorlutik. Filisterimmi Nunaat Tyrusilu? Filisterit Israelikkut qimaasut tigusaraat Edomikkunnullu tunillugit, Israelikkullu ilaat Tyrusimi inussiaarnianit pigineqalersimapput. (Amosi 1:6, 9) Eqqarsaatigeriassagit — Guutip innuttai inussiatut tunivaat! Tupinnanngilaq Jehovap Arami, Filisterit Nunaat Tyrusilu ajunaarnermik eqqorneqartimmagit.

7. Edomi, Ammoni Moabilu Israelikkullu sumik ataatsimooruteqarpat, Israelikkulli qanoq pivaat?

⁷ Edomi, Ammoni Moabilu Israelikkullu ataatsimooruteqarput.  Inuiaat taakku pingasut tamarmik Israelikkunnut eqqarliupput. Edomikkut Aaperaat Jaakup marluliaqataatigut, Esauikkut, siuaasaraat. Taamaattumik Israelikkunnut qatanngutaasutut oqaatigineqarsinnaapput. Ammonikkut Moabikkullu Aaperaap jornguata Lotip kinguaarai. Edomilli, Ammonip Moabillu eqqarlitik Israelikkuusut qatanngutimissut pivaat? Naamerluinnaq! Edomip „qatanngunni“ naakkittaalluni panalisarluni malersorpaa, Ammonikkullu Israelikkut arnartaat tigusat naalliutsingaartarpaat. (Amosi 1:11, 13) Moabikkullu Guutip innuttai qanoq pisarneraat Amosip toqqaannartumik eqqaanngikkaluaraa, nalunngilarput Moabikkut Israelikkunnik sivisuumik akerlilersuisut. Inuiaat eqqarliusut pingasut taakku sukannersumik pillarneqassapput. Jehovap innermik suujunnaarsissavai.

Guutip eqqartuussutaa avaqqunneqarsinnaanngilaq

8. Sooq inuiaat arfinillit Israelikkunnut saniliusut Guutip eqqartuussutaa avaqqussinnaanngilaat?

⁸ Qularutissaanngilaq inuiaat arfinillit Amosip siulittuiffigeqqaagai Guutimit iluarisaanngitsutut eqqartuunneqartariaqartut. Tamanna aamma avaqqunneqarsinnaanngilaq. Amosi 1:3-miit 2:1-imut Jehova arfinileriarluni ima oqarpoq: „Aalajangersimasara isumakkeernianngilara.“ Oqaatsini naapertorlugit inuiannut taakkununnga eqqartuussutini naammassinngitsuunngilaa. Oqaluttuarisaanerup takutippaa taakku tamarluinnarmik ajunaarnermit eqqugaasimasut. Aap, ikinnerpaamik sisamat — Filisterit Nunaat, Moabi, Ammoni Edomilu — naggataatigut piujunnaarput.

9. Judami innuttaasut suneqartariaqarpat, aamma sooq?

⁹ Taava Amosip siulittuutini nunat arfineq-aappaannut — Amosip nunagisaminut Judamut — saatsippaa. Qularnanngitsumik naalagaaffimmi avannarlermi Amosip tusarnaatai tupaallassimassapput tusaramikku Amosip naalagaaffimmut Judamut eqqartuussut oqaluussissutigigaa. Sooq Judami innuttaasut Guutimit iluarisaanngitsutut eqqartuunneqartariaqarpat? Pissutaasoq Amosi 2:4-mi ima allaatigineqarpoq: „[Jehovap] inatsisai asiginnarpaat.“ Jehovap inatsisiminik taamatut piaaralutik ataqqinninngitsut isiginngitsuusaanngilai. Amosi 2:5 naapertorlugu ima siulittuivoq: „Juda aallartitsivigissavara innermik Jerusalemip pallittaalisaanik nungutitsisussamik.“

10. Sooq Judap ajunaarnissaq avaqqussinnaanngilaa?

¹⁰ Judap aalajaanngitsup ajunaarnissaq avaqqussinnaanngilaa. Arfineq-aappassaannik Jehova ima oqarpoq: „Aalajangersimasara isumakkeernianngilara.“ (Amosi 2:4) Juda siulittuutigineqartutut ajunaarnermit eqqugaavoq 607-imi u.n.s. Babylonimiunit nuna inuerutitaammat. Kingumut takoqqipparput ajortut Guutip eqqartuussutaa avaqqussinnaanngikkaat.

11-13. Amosip nuna sorleq pingaartumik siulittuiffigaa, tassanilu naqisimanninnerit qanoq ittut takussaappat?

¹¹ Maanna pruffiitip Amosip inuiannut arfineq-marlunnut  Jehovap eqqartuussutaa oqaluussissutigereerpaa. Kinaluunniit Amosimik siulittuiunnaarsorinnittoq taanna kukkuvoq. Amosi naammasseqqajanngilaq! Ingammik naalagaaffimmut avannarlermut, Israelimut, eqqartuussummik annilaarnartumik oqaluusseqquneqarpoq. Taamatullu tusarlerneqartariaqarpoq nunami ileqqussatigut anersaakkullu pissutsit ajungaarmata.

¹² Amosip siulittuutaani naalagaaffimmi Israelimi naqisimanninnerup nalinginnaanerujussua qulaarneqarpoq. Tamanna pillugu ima allassimavoq: ’Ima oqarpoq [Jehova]: Israelip pinerlunneri pingasunngortut sisamanngortut uterianngissutigaakka; inuk iluartoq akigisarmassuk aningaasarsiutigalugu ajorsartorlu kamissiutigalugu. Issup sequnneri nikanartut niaquiniittussat erinitsaappaat, qanilaartullu ingerlavissaat sangutittarpaat.’ — Amosi 2:6, 7, 1900/1961.

¹³ Iluartut ’aningaasarsiutigineqartarput’. Tamanna isumaqarunarpoq eqqartuussisut peqquserluutinik akilersillutik pisuussuteqanngitsunik pillaatissiisartut. Aningaasanik pisassallit piitsut ’kamiit’ akiisa nalinginik inussiatut tunisarpaat, immaqa akiitsoqalaarnerat pissutigalugu. Angutit naakkittaatsut atugarliortut isumatsassimanerminnut, aliasunnerminnut nikanarsagaanerminnulluunniit ersiutaasumik niaqquminnik ’issup sequnnerinik’ pujoralatserinissaat anguniarsaraat. Akilersilluni peqquserlunneq ima atugaatigisimavoq ’qanilaartut’ naapertuilluartuliorfigineqarnissaminnut neriuutaarusimallutik.

14. Naggueqatigiit quliusut naalagaaffianni kikkut ajortumik pineqartarpat?

¹⁴ Malugiuk kikkut naapertuilluanngitsuliorfigineqarnersut. Tassaapput ’iluartut’, ’ajorsartut’, ’nikanartut’ aamma ’qanilaartut’. Jehovap Israelikkunnut inatsisit tunngavigalugit angerusiliaani piumasarineqarpoq sanngiitsut ajorsartullu misiginneqatigineqartassasut. Taakkununngarpiarli naggueqatigiit quliusut naalagaaffianni pissutsit ajorneroqqissinnaanngillat.

„Piareersimaniassaatit Guutinnut sassartitaanissannut“

15, 16. (a) Sooq Israeli ima mianersoqquneqarpa: „Piareersimaniassaatit Guutinnut sassartitaanissannut“? (b) Amosi 9:1, 2-mi qanoq ersersinneqarpa pisuusut Guutip eqqartuussutaata naammassineqarnera avaqqussinnaasimanngikkaat? (c) Ukiumi 740-mi u.n.s. naggueqatigiit quliusut naalagaaffiat Israeli qanoq pineqarpa?

¹⁵ Inuunerlunneq ajortuliornerillu allat Israelimi ileqquummata, pruffiiti Amosi pissutissaqarluarluni inuiaat pikitsitsiumatuut taakku mianersoqqullugit ima oqarpoq: „Piareersimaniassaatit Guutinnut sassartitaanissannut.“ (Amosi 4:12) Israelikkut aalajaanngitsut Guutip eqqartuussutaata naammassineqarnera avaqqussinnaanngilaat, Jehovami arfineq-pingajussaanik ima nalunaarpoq: „Aalajangersimasara isumakkeernianngilara.“ (Amosi 2:6) Toqqorfissarsiortut pillugit Guuti ima oqarpoq: „Arlaannaalluunniit qimaasinnaanngilaq, arlaannaannilluunniit aniguisoqassanngilaq.  Toqusut inaannut appakaakkaluarpata tassannga assamma aassavaat; qilammut pigaluarpata tassannga nakkakaatissavakka.“ — Amosi 9:1, 2.

¹⁶ Kialuunniit Jehovap eqqartuussutaa avaqqussinnaanngilaa ’toqusut inaannut appakaannikkut’, assersuutaasumik nunami itisoorujussuarmut toqqornikkut. Aamma Jehovap eqqartuussutaa avaqqunneqarsinnaanngilaq ’qilammut pinikkut’, tassa qaqqarsuarnut portunerpaanut qimaanikkut. Jehovap mianersoqqusinera erseqqippoq: Angusinnaanngisaanik toqqorfissaqanngilaq. Guutip naapertuilluartuugami piumasaraa naalagaaffiup Israelip ajortuliaminut akisussaatinneqarnissaa. Piffissanngorporlu ukiumi 740-mi u.n.s. — Amosip siulittuutiminik allannerata kingorna ukiut 60-it missaat qaangiuttut. Taamani naalagaaffik Israeli Assyriamiunit, nunamik tiguaasunit, ajorsartitaavoq.

Guutip eqqartuussutaa nalaatsornikkut eqquineq ajorpoq

17, 18. Guutip nallittuinera pillugu Amosip allagaasa kapitaliisa qulingiluaat sumik ersersitsiva?

¹⁷ Amosip siulittuutaa iluaqutigalugu paasivarput Guuti pissutissaqarluarluni tamatigut eqqartuussisartoq, aamma eqqartuussutaa avaqqunneqarsinnaanngitsoq. Aammattaarli Amosip allagaani erserpoq Jehovap eqqartuussutaa nalaatsornikkut eqquineq ajortoq. Ajortut sumiluunniit toqqorfissarsioraluarpata Guutip nanisinnaavai taakkununngalu eqqartuussutini naammassisinnaallugu. Peqqissimisut peqqusersuitsullu aamma nanisinnaavai — taakku nallittussavai. Tamanna Amosip allagaani kapitalimi kingullermi nuanningaartumik erseqqissarneqarpoq.

¹⁸ Amosi 9:8 naapertorlugu Jehova ima oqarpoq: „Jaakukkut nungutilluinnarumanngilakka.“ Versini 13-imiit 15-imut erserpoq, Jehova neriorsuisoq Israelikkut aallarussartaat utertikkumaarlugit. Nallittussavai, toqqissisimallutillu pigissaarlutillu inuulissapput. „Assallatserisoq karrinik katersuisoq malisungaannarlugu assallatserissaaq,“ Jehova neriorsuivoq. Takorlooruk karrinik katersugassaqangaarmat katersugassat tamakkerlugit katersorneqarsinnaanngitsut assallatserinissamut siaruarterinissamullu piffissanngoqqitsinnagu!

19. Israelikkut Judakkullu amiakkui qanoq pippat?

¹⁹ Ilumut oqartoqarsinnaavoq Jehovap Judami Israelimilu ajortunik eqqartuussinera nalaatsornikkut eqquinngitsoq, eqqortumimmi isumaqarfiginnittut peqqissimisullu saattullu nallittorneqarput. Amosip allagaani kapitali 9-mi pilersitseqqinnissamik siulittuutip eqquunneratut Israelikkut Judakkullu amiakkui peqqissimisut 537-mi u.n.s. Babylonimi aallarussaaqqanerminnit uterput. Nunagisaminnut asasaminnut utersimalereerlutik pallorfiginninneq minguitsoq pilerseqqippaat. Aamma illutik sanaqqippaat, naatsiiviliorlutillu viinnequteqarfiliorput, toqqissillutillu najugarilerpaat.

Jehovap ajortut eqqartuullugillu pillassavai!

20. Amosip allagaani eqqartuussutinik misissuinermi matumani suna qulariunnaartariaqarparput?

²⁰ Pruffiitip Amosip eqqartuussutinik oqaluussissutiginninneranik misissuinermi matumani ullumikkut ajussutsimik Jehova suujunnaarsitsiumaartoq qulariunnaartariaqarparput. Sooq? Siullermik pissutigalugu Guutip ajortunut itsaq periaaserisimasai taakku nalitsinni qanoq iliuuseqarumaarneranik ersersitsigamik. Aappassaanik pissutigalugu naalagaaffimmut Israelimut tunussisumut Guutip eqqartuussutiminik naammassinninnera kristumiuuneraqatigiinnik, ’Babylonersuup’, eqqunngitsumik upperisarsiornerup silarsuarmi tamarmi naalagaaffissuata ilaanik assuarnarnerpaajusumik, suujunnaarsitsinissaanut qulakkeerutaagami. — Saqqummersitat 18:2.

21. Sooq kristumiuuneraqatigiit Guutimit iluarisaanngitsutut eqqartuunneqartariaqarpat?

²¹ Qularutissaanngilaq kristumiuuneraqatigiit Guutimit eqqartuuttariaqarnerat. Erseqqilluinnarpoq  upperisarsiornikkut ileqqussatigullu atugarisaat alianartuusut. Kristumiuuneraqatigiit — Saatanillu silarsuaata sinnera — Jehovap eqqartuussutaanit eqqorneqartariaqarput. Aamma avaqqussinnaanngilaat, eqqartuussutimmi naammassinissaanut piffissanngorpat Amosi 9:1-imi allassimasoq una eqquutissaaq: „Arlaannaalluunniit qimaasinnaanngilaq, arlaannaannilluunniit aniguisoqassanngilaq.“ Aap, ajortut sumiluunniit toqqoraluarunik Jehovamit nanineqassapput.

22. Guutip eqqartuussutaanut tunngasut pingasut suut Thessalonikamiunut allakkat aappaat 1:6-8-mit erserpat?

²² Guuti pissutissaqarluarluni tamatigut eqqartuussisarpoq. Eqqartuussutaa avaqqunneqarsinnaanngilaq, nalaatsornikkullu eqquineq ajorpoq. Tamanna apustili Paulusip oqaasiinit ukunannga ersersinneqarpoq: „Guutimmi naapertuilluarnertut isigaa ilissinnik annikilliortitsisut annikilliortitaanermik akilissallugit ilissilu annikilliortitaasusi uagutsinnut ilagitillusi akilissallusi atoruminarsisitsinermik Naalagaq Jiisusi inngilini pissaasut ilagalugit qilammit saqqummersitaappat innermi ikualasorsuarmi, aggiullugu pillaatissaq Guutimik ilisimasaqanngitsunut Naalakkamillu Jiisusimik iivangkiiliumut naalakkumanngitsunut.“ (2 Thessalonikamiut 1:6-8) „Guutip naapertuilluarnertut isigaa“ iluarisaanngitsutut eqqartuunneqartariaqartut annikilliortitaanissaat, tanitani annikilliortimmatigik. Eqqartuussut tamanna avaqqunneqarsinnaanngilaq, ajortummi ’Jiisusi inngilini pissaasut ilagalugit qilammit innermi ikualasorsuarmi saqqummersitaappat’ aniguissanngillat. Guutip eqqartuussutaa aamma nalaatsornikkut eqquineq ajorpoq, Jiisusimmi ’Guutimik ilisimasaqanngitsut iivangkiiliumullu naalakkumanngitsut’ akiniassavai. Guutillu eqqartuussutaa Guutimik mianerinnittunut annikilliortitaasimasunut atoruminarsisitsissaaq.

Peqqusersuitsunut neriuut

23. Amosip allagaani qanoq neriuutissarsisoqarsinnaava tuppallersaatissarsisoqarsinnaallunilu?

²³ Amosip siulittuutaa inunnut eqqortumik isumaqarfiginnittunut neriuummik tuppallernartumillu tusarliussaqarpoq nuanningaartumik. Amosip allagaani siulittuutigineqartutut Jehovap itsaq innuttani suujunnaarsilluinnanngilai. Naggataatigut Israelimit Judamillu aallarussaaqqasut nunagisaannut utertippai siumukarnermillu, pigissaarnermik toqqissisimanermillu pilluaqqullugit. Ullumikkut tamanna uagutsinnik sumik qularunnaarsitsiva? Jehovap eqqartuussutini naammassiguniuk, ajortut sumiluunniit toqqorsimagaluarpata naniumaarpai, taamatullu nallittorneqartariaqartut nunarsuarmi sumiikkaluarpataluunniit naniumaarpai.

24. Jehovap ullumikkut kiffai qanoq pilluaqquneqarsimappat?

²⁴ Jehovap ajortunut eqqartuussutiminik naammassinninnissaa utaqqitillutigu Jehovap kiffaasut aalajaatsutut suut misigaavut? Jehovap anersaakkut pigissaartingaarluta pilluaqqusinera! Nuannaarutigaarput pallorfiginneriaaseqaratta kristumiuuneraqatigiit ajoqersuinerluutaattut salluliuutitaqanngitsumik eqqunngitsortaqanngitsumillu. Jehovap aamma anersaakkut inuussutissanik naammangaartunik pilluaqquaatigut. Eqqaamasariaqarparpulli Jehovamit pilluaqqussutit taakku akisussaafferujussuarmik nassataqarmata. Guutip naatsorsuutigaa eqqartuussinissaq pillugu inunnik allanik mianersoqqusissasugut. Sapinngisatsinnik iliuuseqarusuppugut „inuunermik naassaanngitsumik eqqortumik isumaqarfiginnittut“ naniniarlugit. (Apustilit Suliaat 13:48, NV) Aap, sapinngisamik amerlanerpaat anersaakkut pigissaarutitsinnik avitseqatigerusuppavut. Kissaatigaarpullu aniguissasut qanittukkut Guutip ajortunut eqqartuussutini naammassippagu. Pilluaqqussutinilli tamakkuninnga pissarseqataassagutta uummatikkut eqqortumik pissuseqartariaqarpugut. Soorlu allaaserisami tulliuttumi takussagipput, tamanna Amosip siulittuutaani aamma erseqqissarneqarpoq.

Qanoq akissavit?

• Amosip siulittuutaanit qanoq erserpa Guuti pissutissaqarluarluni tamatigut eqqartuussisartoq?

• Amosip qanoq takutippaa Guutip eqqartuussutaa avaqqunneqarsinnaanngitsoq?

• Amosip allagaani qanoq erserpa Guutip eqqartuussutaata naammassineqarnera nalaatsornikkut eqquineq ajortoq?

[Atuaqqissaarnermi apeqqutit]

[Qupp. 25-mi assiliartaq]

Naalagaaffik Israeli Guutip eqqartuussineranit eqqugaanngitsuunngilaq

[Qupp. 26-mi assiliartaq]

537-mi u.n.s. Israelikkut Judakkullu amiakkui Babylonimi aallarussaaqqareerlutik uterput