„Nipaat nunarsuarmut tamarmut anngussimavoq“

„Inunnik inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit.“ — MATTHÆUSI 28:19, NV.

1, 2. (a) Jiisusip ajoqersukkani qanoq peqquai? (b) Sooq ukiuni hundredelinni siullerni kristumiut taama angusaqartigisinnaappat?

JIISUSIP qilaliarnissani sioqqutitsiarlugu ajoqersukkani ima peqquai: „Inunnik inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit.“ (Matthæusi 28:19, NV) Suliassaq imaannaanngilluinnartuuvoq!

² Takorlooriassagit! Piinsip ulluani ukiumi 33-mi anersaaq illernartoq ajoqersukkanut 120-nut kuineqarpoq, Jiisusillu peqqussutaa malilerpaat inuit oqaluttuullugit taanna tassaasoq Missiarsi annaassisuusussaq sivisuumik utaqqisaq. (Apustilit Suliaat 2:1-36) Taama ikitsigalutik qanoq ilillutik ’inuit inuiannit tamaneersut’ tusarlersinnaavaat? Tamanna inuit eqqarsartaasiat malillugu ajornarpoq, „Guutimulli ajornartoqanngilaq“. (Matthæusi 19:26) Ukiuni hundredelinni siullerni kristumiut Jehovap anersaava illernartoq annertoqqutigaat, nalunngilaallu suliassaq nukinginnartuusoq. (Zakaria 4:6; 2 Timotheusi 4:2) Taamaattumik ukiut qulikkuutaat ikittuinnaat tamatuma kingorna apustili Paulusi oqarsinnaavoq nutaarsiassaq nuannersoq „qilaap ataani pinngortitanut tamanut“ oqaluussissutigineqareersoq. — Kolossemiut 1:23.

3. „Qajuusiassat“, kristumiut minguitsut, qanoq malunnarunnaarsinneqarpat?

³ Ukiut hundredellit siulliit ingerlaneranni pallorfiginninneq ilumoortoq siaruariartortuarpoq. Jiisusilli siulittuutigaa taamaalluni Saatani „naasupilussanik“ siaruarteriumaartoq katersuinissap tungaanut ukiuni hundredelippassuarni ’qajuusiassanik’, kristumiunik ilumoortunik, qulisimasutut ilersitsiumaartunik. Apustilit toqunerisa kingorna tamanna eqquuppoq. — Matthæusi 13:24-39.

Nalitsinni amerliartupallanneq

4, 5. Kristumiut tanitat 1919-imiit suliaq suna aallartippaat, aamma sooq tamanna assut unamminiarnarpa?

⁴ 1919-imi „qajuusiassat“, kristumiut minguitsut, ’naasupilunnit’ immikkoortinnissaannut piffissanngorpoq. Kristumiut tanitat nalunngilaat Jiisusip ajoqersuganngortitsiortornissamik peqqussutaa suli atuuttoq. Upperilluinnarpaat ’ulluni kingullerni’ inuullutik Jiisusillu siulittuutaa una nalunagu: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (2 Timotheusi 3:1; Matthæusi 24:14) Aap, nalunngilaat suliassaqangaartoq.

⁵ Ukiumili 33-mi ajoqersukkatulli kristumiut tanitat taakku unamminiagassaqarput. Nunani ikittuni oqaluussisartut tusindilippaaluinnaapput. Qanoq ilillutik nutaarsiassaq nuannersoq „silarsuarmi tamarmi“ oqaluussissutigisinnaassavaat? Nunarsuup inui amerliartorsimapput. Ilimagineqarpoq Romami kaasareqartarnerata nalaani nunarsuarmi inuit 300 millioniusimassasut, sorsunnersuulli siulliup kingorna 2  milliardingajanngorsimapput. Ukiullu 1900-kkut ingerlaneranni nunarsuup inui suli amerliartussapput.

6. 1930-kkunni nutaarsiassaq nuannersoq qanoq oqaluussissutigineqartigaa?

⁶ Ukiuni hundredelinni siullerni qatanngutimissut Jehovap kiffai tanitat suliassartik aallartippaat, Jehova tatigilluinnarlugu, anersaavatalu najorpai. 1930-kkut qeqqanni oqaluussisartut 56.000-t missaanniittut sallusuissut Biibilimeersoq nunani 115-ini oqaluussissutigaat. Suliarujussuaq suliarineqareerpoq, sulili suliassaqaqaaq.

7. (a) Kristumiut tanitat sumik allamik unamminiagassaqalerpat? (b) ’Savat allat’ katersuineq tamanna qanoq tapersersorpaat, qanorlu kinguneqartumik?

⁷ ’Amerlangaartut’ Saqqummersitat 7:9-mi eqqaaneqartut kikkuunerinik eqqornerusumik paasinninneq allamik unamminiagassaqalersitsivoq aammattaarli kristumiut eqiasuitsut taakkua ikiortissaqalernerannut qulakkeerutaalluni. ’Savat allat’ kisissaanngitsut, inuit nunami inuusussat, „inuiaqatigiinnit naggueqatigiinnillu inuiannillu immikkullu oqaasilinnit tamanit pisut“ katersorneqarumaarput. (Johannesi 10:16) ’Jehova kiffartorfigissavaat ullukkut unnuakkullu.’ (Saqqummersitat 7:15) Tassa oqaluusseqataassapput ilinniartitseqataassallutillu. (Esaja 61:5) Taamaattumik kristumiut tanitat nuannaangaarput paasigamikku oqaluussisartut amerlisimasut, siullermik titusindilikkuutaanik kingusinnerusukkullu millionilikkuutaanik. 2003-mi oqaluussisartut amerlanerpaaffitsik qaangerlugu 6.429.351-iupput, taakkualu amerlanersaat ’amerlangaartunut’ ilaapput. Kristumiut tanitat taamatut ikiorneqarnertik qujamasuutigaat, savallu allat qatanngutimik tanitat tapersersornissaannut immikkut pisinnaatitaaffeqarnertik qujamasuutigaat. — Matthæusi 25:34-40.

8. Sorsunnersuup aappaani Jehovap Nalunaajaasuisa tatineqangaarnertik qanoq periaaseqarfigaat?

⁸ Taamani „qajuusiassat“ malunnarseqqimmata Saatanip sorsussuataalerpai. (Saqqummersitat 12:17) Taava ’amerlangaartut’ malunnarsilermata qanoq periaaseqarpa? Nakuusernerujussuarmik! Qularutigineqarsinnaava sorsunnersuup aappaani pallorfiginninnermut ilumoortumut silarsuarmi sumi tamaani saassussisoq Saataniusoq? Akerleriissuteqarnermi illua-tungeriinnit tamanit kristumiut ilumoortut tatineqangaarput. Qatannguterpassuavut angutit arnallu asanartut tataannartumik misilinneqarput, ilaallu uppernertik pillugu toqupput. Taamaattoq tussiaasiortup oqaasii uku isumaqatigaat: „Guutip ikiuineragut oqaasii unnersiutigaakka. Guuti tatigigakku siooranngilanga. Toqusussaasut susinnaagaminnga?“ (Tussiaat 56:5; Matthæusi 10:28) Kristumiut tanitat Jehovap anersaavanit nakussatsinneqarlutik aalajaapput, savallu allat aamma taamaapput. (2 Korinthimiut 4:7) Tamatuma kingunerisaanik „Guutip oqaasia siammariartorpoq“. (Apustilit Suliaat 6:7) 1939-mi, sorsunnersuaq aallartimmat, oqaluusseqataasarlutik nalunaartartut kristumiut aalajaatsut 72.475-iupput. 1945-mili, sorsukkunnaarmata, nalunaarusiap ilaannakuusup takutippaa maanna nutaarsiassamik nuannersumik oqaluusseqataasimasut 156.299-iusut. Saatani ajorsartitaangaarami!

9. Atuarfiit nutaat suut sorsunnersuup aappaata nalaani pilersinneqarpat?

⁹ Erseqqippoq sorsunnersuup aappaani uivertoqaraluartoq oqaluussinerup naammassineqarumaarnissaa Jehovap kiffaasa qularilinngisaannaraat. Tassami 1943-mi, sorsunnersuup sakkortuseruttorfiata nalaani, atuarfiit marluk pilersinneqarput. Aappaa, Teokratiimik Atuarfik, ilagiinni tamani ingerlanneqartussaavoq Jehovap Nalunaajaasui ataasiakkaat oqaluussinermik ajoqersuganngortitsinermillu ilinniartinniarlugit. Atuarfiup aappaani, Napasuliaq Alapernaarsuiffiup Biibilimik Atuarfia Gilead-imi, ajoqersuiartortitassat nunani allani oqaluussinermik siuarsaasinnaasussat ilinniartinneqartussaapput. Taamaattumik  sorsunneq naammat kristumiut ilumoortut iliuuseqarnerunissaminnut piareersimapput.

10. 2003-mi Jehovap innuttaasa aallussilluartuunerat qanoq erserpa?

¹⁰ Atuarfiit taakku iluaqutigalugit asseqanngilluinnartumik angusaqartoqarpoq. Teokratiimik Atuarfimmi ilinniartitaasut — inuusuttut utoqqaallu, angajoqqaat meeqqallu, aap, allaat nappaateqarlutik utoqqalillutilluunniit sanngiillisimasut — Jiisusip ajoqersuganngortitsiortoqqusinera naalappaat. (Tussiaat 148:12, 13; Joeli 3:1, 2) 2003-mi agguaqatigiissillugu qaammammut 825.185-it sivikitsumik aalajangersimasumilluunniit pioneritut kiffartorput taamaalillutillu takutillugu suliap nukinginnartuuneranik paasinninnertik. Ukioq taanna Jehovap Nalunaajaasuisa nalunaaquttap-akunneri 1.234.796.477-it Guutip naalagaaffianik nutaarsiassaq nuannersoq pillugu allanik oqaloqateqarnermut atorpaat. Qularutissaanngilaq Jehovap innuttami aallussilluartuunerat nuannaarutigigaa.

Nunani allani

11, 12. Assersuutit suut takutippaat ajoqersuiartortitat sulilluarsimasut?

¹¹ Ukiut ingerlaneranni ajoqersuiartortitat Gileadimi ilinniarsimasut, ukiunilu kingullerni Kiffartortut Toqqakkat Atuarfianni ilinniarsimasut aamma, nalissaqanngitsumik sulilluarsimapput. Assersuutigalugu 1945-mi ajoqersuiartortitat siulliit tikimmata Brasiliami oqaluussisartut 400-nit ikinnerupput. Ajoqersuiartortitat taakku kingusinnerusukkullu tikittut qatanngutitik Brasiliamiut aallussilluartut tamaviaaqatigaat, Jehovallu suliaat pilluaqqungaarpaa. Ullunik taakkuninnga eqqaamannittunut tamanut killinnaqaaq tusarlugu 2003-mi Brasiliami oqaluussisartut amerlanerpaaffitsik qaangerlugu 607.362-inngorsimasut.

¹² Sorsunnersuup aappaata siorna Japanimi oqaluussisartut 100-t missaannaanniipput. Sorsunnersuarmi peqqarniitsumik malersorneqarnermi ikilipput, sorsunnerullu naanerani oqaluussisartut qassissunnguinnaat anersaakkut timikkullu inuupput. (Ussatit 10:9) Oqaluussisartut ikittut taakku nalissaqanngitsumik ilumoorfiginnittuarsimasut nuannaarput ajoqersuiartortitat Gileadimi ilinniarsimasut 13-it siulliit 1949-mi tikilluaqqusinnaagamikkik, ajoqersuiartortitallu qatanngutitik Japanimiut kajumingaartut inoroorsaartullu nuannarilertorpaat. 2003-mi, ukiut 50-it sinnerlugit qaangiuttut, nalunaarutigineqarpoq Japanimi oqaluussisartut amerlanerpaaffitsik qaangerlugu 217.508-nngorsimasut! Jehovap nunami tassani innuttani pilluaqqungaarsimavai. Nunanit allarpassuarnit assingusunik nalunaaruteqarpoq. Nunani allani oqaluussisinnaasut nutaarsiassap nuannersup siaruarneranut pingaaruteqarsimapput, taamaalilluni 2003-mi silarsuaq tamakkerlugu nunani qeqertanilu 235-ni oqaluussissutigineqarpoq. Aap,’amerlangaartut’ ilumut ’inuiaqatigiinnit tamanit pipput’.

„Naggueqatigiinnit inuiannillu immikkullu oqaasilinnit tamanit pisut“

13, 14. Jehovap qanoq takutippaa nutaarsiassamik nuannersumik oqaatsit assigiinngitsut tamaasa atorlugit oqaluussinerup pingaaruteqarnera?

¹³ Piinsip ulluani ukiumi 33-mi ajoqersukkat anersaaq illernartumik taninneqarnerata kingorna tupinnartuliorneq siulleq tusagarput tassaavoq oqaatsit allanertat atorlugit inunnut katersorsimasunut ajoqersukkat oqalunnerat. Immaqa tusarnaartut tamarmik grækerisut, taamanikkut silarsuaq tamakkerlugu oqaaserineqartut atorlugit, oqaluttarput. ’Upperluartuugamik’ qularnanngitsumik aamma naalaffimmi hebræerisoortut paasisinnaavaat. Nutaarsiassarli nuannersoq inunnguuseralugu oqaatsiminni tusaramikku soqutiginnilluinnalerput. — Apustilit Suliaat 2:5, 7-12.

¹⁴ Aamma ullumikkut oqaatsit amerlasuut  atorlugit oqaluussisoqartarpoq. Siulittuutigineqarpoq ’amerlangaartut’ inuiaqatigiinnit assigiinngitsuneersuinnaassanngitsut aammattaarli „naggueqatigiinnit inuiannillu immikkullu oqaasilinnit“ assigiinngitsuneersuussasut. Tamatumunnga naapertuuttumik Jehova Zakaria aqqutigalugu ima siulittuisimavoq: „Inuiaat assigiinngitsut tamarmik angutitaasa ilaasa quliullutik angut Judakkuusoq ataaseq atisaata nuuagut tigullugu oqarumaarput: Ingerlaqatigissavassi tusaratsigu Guutip najoraasi.“ (Zakaria 8:23) Naak Jehovap Nalunaajaasui oqaatsit allanertat atorlugit oqalussinnaatitaajunnaaraluarlutik, inuit namminneq oqaasii atorlugit ilinniartinnissaasa pingaaruteqarnerat nalunngilaat.

15, 16. Ajoqersuiartortitat allallu nunasiffimminni oqaatsit atorlugit oqaluussiniarlutik imminnut sumik suliassissimappat?

¹⁵ Ullumikkut oqaatsit atugaanerpaat arlaqarput, assersuutigalugu tuluttut, franskisut Spaniamiutullu. Nunartilli qimallugu nunanut allanut oqaluussiartortut tikitamik oqaasii ilinniarniarsaraat „inuunermik naassaanngitsumik eqqortumik isumaqarfiginnittut“ nutaarsiassamik nuannersumik tusarliussinerusinnaajumallutik. (Apustilit Suliaat 13:48, NV) Tamanna ajornakusoorsinnaavoq. Assersuutigalugu Manerassuup kujataani qeqertami naalagaaffiusumi Tuvalumi qatanngutit namminneq oqaatsiminni atuagassianik atorfissaqartitsimmata, ajoqersuiartortitat ilaata suliassamisut tiguaa. Oqaatsinut taakkununnga ordbogeqanngimmat nammineerluni Tuvalumiusut oqaatsit allattulerpai. Kingorna atuagaq pâratîsime nuname nâgssáungitsumik inûsínauvutit * Tuvalumiusut saqqummerpoq. Curaçaomut ajoqersuiartortitanik tikittoqarmat taqqavanimiusut, papiamento, Biibililersaarutinik atuagassiaqanngilaq ordbogeqarnanilu. Aammattaaq oqaatsit qanoq allanneqassanersut isumaqatigiinngissutaaqaaq. Taamaattoq naqitaaraq Biibililersaarut siulleq ajoqersuiartortitat siulliit qeqertamut tikinneranniit ukiut marluk qaangiutinngitsut saqqummerpoq. Ullumikkut Napasuliaq Alapernaarsuiffik oqaatsit 133-t atorlugit, ilaatigut papiamento, tuluttoorlu ataatsikkut saqqummertarput.

¹⁶ Namibiami ajoqersuiartortitat nutserinerminni Jehovap Nalunaajaasuinik taqqavanimiunik ikiortissaqanngillat. Aammattaaq taqqavani oqaatsit ilaat, nama, oqaatsit atuagassiaatitsini atorneqartut arlallit, soorlu oqaaseq „naammalluinnartoq“, oqaasertassaqartinngilaat. Ajoqersuiartortitaq ima allappoq: „Ilinniartitsisut Biibilimik ilinniartitakka nutserininni ikiortigineruakka. Sallusuissummilli ilisimasaqarnerat killeqarmat, sanianni issiasariaqartarpunga qulakkeerniarlugu oqaaseqatigiit tamarluinnarmik eqqortuunersut.“ Taamaattoq kingorna naqitaaraq Liv i en ny verden Namibiamiut oqaasiinut sisamanut nutserneqarpoq. Ullumikkut oqaatsini kwanyama aamma ndonga Napasuliaq Alapernaarsuiffik aalajangersimasumik saqqummertarpoq.

17, 18. Mexicomi nunanilu allani qanoq unamminiagaqalersimappat?

¹⁷ Mexicomi oqaatsit atorneqartut pingaarnerit Spaniamituujupput. Spaniamiulli tikinnerat sioqqullugu nunami tassani oqaatsit amerlasuut atorneqarput,  ilaallu suli atorneqarlutik. Taamaattumik ullumikkut Jehovap Nalunaajaasui Mexicomiut oqaasii arfineq-marluk aamma Mexicomiutut ussersorluni oqaatsit atorlugit atuagassianik saqqummersitsisarput. Atuagassiaq siulleq indianerit oqaasiisa ilaanni aalajangersimasumik saqqummersinneqartalersoq tassaavoq Naalagaaffimmut Kiffartorneq mayakkutoortoq. Aap, Mexicomi oqaluussisartut 572.530-usut ilagaat mayakkut, aztekerit allallu tusindillit arlallit.

¹⁸ Ukiuni kingullerni millionilikkuutaat nunanut allanut qimaasariaqartarput aningaasaqarnerluunniit pissutigalugu nunamut allamut nunasiartortarlutik. Taamaattumillu nunarpassuarni allamiutut oqaasillit oqaluussiffigineqartut maanna aatsaat taama amerlatigilersimapput. Taamaattumik Jehovap Nalunaajaasui unamminiagassaqalerput. Assersuutigalugu Italiami Italiamiutoortut saniatigut oqaatsit 22-t atorlugit oqaluttunik ilageeqarpoq gruppeqarlunilu. Qatanngutit allamiutut oqaasilinnut oqaluussisinnaaqqullugit qanittukkut pikkorissartitsisoqarpoq oqaatsit 16-it, ilaatigut Italiamiutut ussersorluni oqaatsit, ilinniartitsissutigineqarlutik. Nunani allarpassuarni Jehovap Nalunaajaasui assingusumik iliortarput nunasisorpassuit tusarlersinnaajumallugit. Aap, Jehovap ikiuineratigut ’amerlangaartut’ assigiinngitsorparparsuarnik oqaasillit katersorneqarput.

„Nunarsuarmut tamarmut anngussimavoq“

19, 20. Paulusip oqaasii suut maluginiarnartumik eqquuttartut takuavut? Nassuiaruk.

¹⁹ Ukiuni hundredelinni siullerni apustili Paulusi ima allappoq: „Tusarsimannginneramik? Naaggaluunniit: Nipaat nunarsuarmut tamarmut anngussimavoq, oqaasiilu silarsuup isuanut.“ (Romamiut 10:18) Ukiuni hundredelinni siullerni taama oqartoqarsinnaappat, ullumikkut taama oqartoqarnerungaarsinnaannginnerpoq! Inuit millionillit, immaqa oqaluttuarisaanermi aatsaat taama amerlatigisut, ima oqartarput: „[Jehova] unnersiutigissavara sukkulluunniit, qanerma erinalimmik unnersiutigiuassavaa.“ — Tussiaat 34:2.

²⁰ Taamaattoq suliaq annertusiartuinnarpoq. Oqaluussisartut amerliartuinnarput. Oqaluussinermi nalunaaquttap-akunneri amerliartuinnartut atorpaat, millionilikkuutaanik pulaaqqiisarput hundredetusindilikkuutaanillu Biibilimik atuaqqissaaqateqarlutik. Soqutiginnilertartut amerliartuinnarput. Siorna Jiisusip toquneranik eqqaaniaalluni nalliuttorsiornermi najuuttut amerlanerpaaffitsik qaangerlugu 16.097.622-upput. Suli suliassaqaqisoq erseqqippoq. Qatanngutitta malersorneqangaarnerminni ilumoorfiginnittuarnerattut ilumoorfiginnittuarta. Qatanngutivullu 1919-imiilli Jehovamut kiffartornermi pilliuteqartartut tamaasa assigalugit aallussilluartuusa. Tamatta erinarsuutip uteqattaagartaa una erinarsoqataaffigiuartigu: „Anersaartortut tamarmik [Jehova] unnersiutigissavaat! Halleluja.“ — Tussiaat 150:6.  (wE 1/1 04)

[Quppernerup ataani ilanngussaq]

Uteqqiinermi apeqqutit

• 1919-imi qatanngutit suliaq suna aallartippaat, aamma sooq unamminiarnartuua?

• Oqaluussinermut tapersersuisussatut kikkut katersorneqarpat?

• Ajoqersuiartortitat allallu nunani allani kiffartortut sumut peqataappat?

• Suup takutippaa Jehovap ullumikkut innuttami suliaat pilluaqqugaa?

[Atuaqqissaarnermi apeqqutit]

[Qupp. 14, 15-mi assiliartaq]

Sorsunnersuup aappaani uivertoqaraluartoq nutaarsiassap nuannersup oqaluussissutigineqarumaarnera kristumiut qularilinngisaannarpaat

[Suminngaanneernera]

Qaarneq: U.S. Navy photo; allat: U.S. Coast Guard photo

[Qupp. 16, 17-mi assiliartaq]

’Amerlangaartut’ naggueqatigiinnit immikkullu oqaasilinnit tamaneersussaapput