Ilumoortumik asannittuliornissaq qanoq ilikkarsinnaagipput

„Asanninneq inuunermut peqqissaataavoq; asanninneq tassaavoq inuuneq.“ — Living to Purpose, Joseph Johnson, 1871.

ASANNITTULIORNEQ qanoq ilinniarneqartarpa? Tarnip pissusiinik, psykologiimik, ilinniarnikkut? Imminut ikiornissaq pillugu ilinniutinik atuarnikkut? Asanninnilersaarutinik filmernikkut? Naamik, ilaa? Asanninnermik ilinniut siulleq angajoqqaat maligassiuinerisigut ilinniartitsinerisigullu ilinniarneqartarpoq. Meeqqat asanninnerup pingaaruteqarnera ilinniartarpaat asannittunik avatangiiseqarlutik angajoqqaamik piviusumik isumassuinerat, sernissuinerat, imminnik oqaloqatiginninnerat soqutiginninnerallu paasileraangamikku. Suut eqqortuunersut suullu ajortuunersut pillugit najoqqutassianik peqqinnartunik ajoqersuunneqarnermikkut asanninneq ilinniartarpaat.

Piviusumik asanninneq misigissusiinnaanngilaq. Allat soqutigisaannik tamatigut salliutitsiniarnikkut asanninneq ersersinneqartarpoq, aamma naak taamaattoqarnera allat takusinnaanngikkaluaraangassulluunniit, soorlu meeqqat asannittumik perorsaatissinneqartut taamaakkajuttartut. Namminissarsiunngitsumik asannittuliornikkut maligassaq naammalluinnartoq tassaavoq Pinngortitsisoq. Apustili Paulusi allappoq: „Ernera, [Jehovap] perorsaanera asiginnaqinagu, avoqqaarinninneri nikalluutiginiaqinagit, [Jehovap] asasani anusinngorsartarmagu erninilu asasani tamaasa pillartarlugit.“ — Hebræerit 12:5, 6.

Jehovap asanninnera angajoqqaatut qanoq ilaarneqarsinnaava? Aappariillu akornanni maligassiuilluarnissaq qanoq pingaaruteqartigaa?

Asanninnermi maligassaalluarit

Uiuguit nuliat pingaartippiuk, nersorlugulu ataqqisarpiuk? Nuliaaguit uiit asallugulu tapersersorpiuk? Biibilimi oqaatigineqarpoq nuliariit asaqatigiillutillu ataqqeqatigiittariaqartut. (Efesosimiut 5:28; Titusi 2:4) Taamaaliorpata meeqqat qanimut takusinnaassavaat qanoq kristumiutut asanninneq ersersinneqartartoq. Tamanna maligassiaassaaq pingaarutilerujussuaq nalilerujussuarlu.

Angajoqqaat angerlarsimaffimminni asanninneq ineriartortissinnaavaat ilaqutariinnut aliikkutassiat, ileqqussat, anguniakkat pingaarnersiuinerillu tungaasigut qutsissunik najoqqutassaqartitsinermikkut. Nunarsuaq tamakkerlugu inuppassuit paasisimavaat tamatuma tungaatigut Biibili iluaqutaaqisoq. Inuit taakku uppernarsaataapput Biibili ilumut ’Guutimit anersaarfigineqartoq tamarmi iluaqutaasoq ajoqersuinermut, uppernarsaanermut, ilitsersuinermut iluarnermullu  perorsaanermut’. (2 Timotheusi 3:16) Aap, Qaqqami Oqaluutsimi ajoqersuutigineqartut ileqqussat inuunermilu pissutsit allat pillugit nalissaqanngitsutut inuppassuarnit isigineqartarput. — Matthæusi, kapitali 5-imiit 7-imut.

Inoqutigiit tamarmik Guutimit siulersortippata najoqqutassiaanillu malinnippata ataasiakkaat toqqissisimanerusutut misigissapput, aamma meeqqat angajoqqaaminnik asannillutillu ataqqinninnissaat ilimanarnerusarpoq. Akerlianik meeqqat angerlarsimaffimminni aalajangiusimaneqanngitsunik, amigartunik imaluunniit qasungasunik najoqqutassiallit isumaloqqajaasunngortarput, kamaqqajaasunngorlutik pikitsitsiumatuunngorlutillu. — Romamiut 2:21; Kolossemiut 3:21.

Angajoqqaammi kisimiittut? Asanninnerup suuneranik meeqqaminnik ukiukitsunik ilinniartitsinissaminnut periarfissalunneruppat? Taamaattariaqanngilaq. Soorunami angerlarsimaffimmit toqqissisimanartumit angajoqqaat tamaasa ilagalugit peroriartorfiusumit pitsaanerusoqanngilaq, kisianni misilittakkanit takutinneqarpoq ataataq anaanarluunniit amigaataagaluartoq ilaqutariit attaveqaqatigiilluaraangata iluatsitsisoqarsinnaasartoq. Meeqqatit kisimeeqatigigukkit Biibilip najoqqutassiaasa angerlarsimaffissinni maleruarnissaat noqqaassutigiuk. Ussateqarpoq imaattumik: „[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Tamanna aamma ilaqutariinni atuuppoq. — Ussatit 3:5, 6; Jaaku 1:5.

Nunarsuaq tamakkerlugu Jehovap Nalunaajaasuini inuusuttorpassuaqarpoq angerlarsimaffinni ataasiinnarmik pilersuisulinni peroriartorsimasunik, maannalu aalajaallutik Guutimik kiffartuussisunik. Tamatumannga takutinneqarpoq kisimiittut meeqqatik asannittuliornissaannik ilinniartissinnaagaat.

Kikkulluunniit asannittuliorneq ilikkarsinnaavaat

Biibilimi siulittuutigineqarpoq ‘ullussat kingulliit’ ilaatigut ilisarnaatigissagaat ‘asanniuitsuuneq’, naak asaqatigiinneq ilaqutariit iluanni pissusissamisooraluartoq. (2 Timotheusi 3:1, 3) Kisianni asanninneq taamaattoq misigisimanagu peroriartorsimasut allaat asanninnermik takutitsinissartik ilikkarsinnaavaat. Qanoq? Asanninnerup pilerfianit kikkunnullu tamanut uummatimikkut imminik ujarlertunut asanninnermik tunniusimanermillu takutitsiviginnittumit Jehovamit ilinniarlugu. (1 Johannesi 4:7, 8) „Ataatamami anaanamalu qimakkaluarpannga [Jehovap] ilasiarissavaanga,“ tussiaasiortoq oqarpoq. — Tussiaat 27:10, 1990.

Jehovap asanninnerminik assigiinngitsutigut takutitsivigisarpaatigut. Ilaatigut taamaaliortarpoq Biibili aqqutigalugu, anersaani illernartoq ikiortigalugu qatanngutigiillu kristumiut aqqutigalugit ataatatut ilitsersuinermigut. (Tussiaat 119:97-105; Lukasi 11:13; Hebræerit 10:24, 25) Takulaariartigu anersaakkut tunissutit taakku pingasut Guutimut inoqatitsinnullu asanninneq qanoq alliartortissinnaagaat.

Ilitsersuut isumassarsiarititaasoq Ataatatsinnit qilammiusumeersoq

Allamut qanittumik attaveqarniaraanni ilisarilluarneqartariaqarpoq. Imminut qanillinissatsinnik kajumissaarniarluta Jehova Biibili aqqutigalugu uatsinnut ilisaritippoq. Biibilimilli atuarneq naammanngilaq. Aammali ajoqersuutit Biibilimiittut malittariaqarput sunniutaasalu iluaqutaanerat misigalugu. (Tussiaat 19:8-11) „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq,“ Esaja 48:17-imi taama allassimavoq. Aap, Jehova tassaavoq asanninneq, iluaqutissatsinnillu ilitsersortarpaatigut, imaanngitsoq pisariaqanngitsunik malittarisassaliornermigut inassutiliornermigullu kiffaanngissuserput killilersorniaraa.

 Biibilimik eqqortumik ilisimasaqarneq inoqatitsinnut asanninnermik alliartortitseqataasarpoq. Guutip oqaasia aqqutigalugu taanna inunnik qanoq isiginnittaaseqartoq allanullu attaveqarnitsinni najoqqutassat sorliit atorneqassasut ilinniartarparput. Taamaattumik ilisimasaqarnitsigut tullitsinnut asanninnermik alliartortitsinissamut tunngavissaqarluarpugut. Apustili Paulusi oqarpoq: ’Imaattoq qinnutigisarpara: asannissusersi ilisarsinermik sianinernillu tamanik ilaqangaaleriartuinnaqqullugu.’ — Filippimiut 1:9, 1961.

’Ilisarsinerup’ imaluunniit eqqorluartumik ilisimasaqarnerup asanninneq ajunngitsumik sunnersinnaavaa, soorlu tamanna sallusuissummi Apustilit Suliaat 10:34, 35-mi oqaatigineqartumi ersersinneqartoq: „Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.“ Guutip inuit inuiaassusiatiguunngitsoq imaluunniit amiisa qalipaataatiguunngitsoq kisianni naapertuilluartumik iliorneri Guutimillu mianerinninneri aallaavigalugit nalilertarpagit, allanik naliliinitsinni uaguttaaq taama kinaassusersiunngitsigissannginnerpugut? — Apustilit Suliaat 17:26, 27; 1 Johannesi 4:7-11, 20, 21.

Asanninneq — Guutip anersaavata inerititaa

Soorlu sialuup orpiit pitsaasunik paarnaqalersittarai, taamatut Guutip anersaavata inuit oqaluukkuminartut Biibilimi „anersaap inerititaanik“ taaneqartunik inerititaqalersittarpai. (Galatiamiut 5:22, 23) Inerititap ilaa pingaarutilik tassaavoq asanninneq. (1 Korinthimiut 13:13) Qanorli Guutip anersaava pineqartarpa? Pingaarnermik qinunikkut. Guuti qinnuigigutsinni anersaaminik tuneqqulluta tunissavaatigut. (Lukasi 11:9-13) Anersaamik illernartumik tuneqqullutit ’qinujuarnissamik’ kajumissaarut malittarpiuk? Taamaappat inerititaa kissaatiginartoq, ilaatigut tassaasoq asanninneq, inuuninni suli malunniunnerulissaaq.

Allamilli anersaaqarpoq Guutip anersaavanik akiuisumik. Anersaaq taanna Biibilimi „silarsuup anersaavanik” taaneqarpoq. (1 Korinthimiut 2:12; Efesosimiut 2:2) Anersaap taassuma inuit ajortumik sunnertarpai, pilerfigaalu „silarsuup matuma naalagaaneranik“ taaneqartoq, Saatani Diaavulu. Silarsuaq Guutimut takornartaasoq naalakkersuiffigaa. (Johannesi 12:31) Anoritut pujoralammik ipermillu teqqalatitsisutut silarsuup anersaavata kissaatit ajortut asanninnermik nillortitsiartortartut timittalu sanngiissusaanik kajumissaarisartut supoortarpai. — Galatiamiut 5:19-21.

Inuit anersaaq taanna ajortoq pisarpaat aningaaseritunermik imminuinnarlu eqqarsaatiginermik sunnertinnermikkut, nakuusernermik nuannarisaqarnermikkut, asanninnermillu eqqunngitsumik pissusissamisuunngitsumillu silarsuarmi nalinginnaaqisumik isiginnittaaseqarnermikkut. Ilumoortumik asanninnerujumaguit taava aalajangersimalluinnarlutit silarsuup anersaava akiortariaqarpat. (Jaaku 4:7) Namminerli piginnaaneqarnerit tatiginiartariaqanngilat. Jehovamut ikiortissarsiorit. Anersaavata — qilammi nunamilu tamanit pissaaneqarnerpaap — akiuunninni ikiorlutillu pissatsissinnaavaatit. — Tussiaat 121:2.

Qatanngutigiissuarni kristumiuni asannittuliornissat ilinniaruk

Soorlu meeqqat angerlarsimaffimminni asanninneq takugaangamikku asanninnermik nittaanissartik  ilinniartaraat, taamatuttaaq tamatta — inuusuttuugaluarutta utoqqaagaluaruttaluunniit — kristumioqatitta allat ilaginerisigut asanninnerulersinnaavugut. (Johannesi 13:34, 35) Kristumiut ilagiivini pingaarutillit ilaat tassaavoq inuttut ataasiakkaatut „asaqatigiinnermut ajunngitsuliornermullu [immitsinnut] kajumissaaqatigiinnermik“ pilersitsinissaq. — Hebræerit 10:24.

Asanninneq taamaattoq silarsuarmi avatangiiserisatsinni asanniffiunngitsumi „paarinerlugaallutillu naakkinarsisimasunit” pingaartinneqartarpoq. (Matthæusi 9:36) Misilittakkat takutippaat asanninnermik misigitinneqarani meeraanerup sunniutaasa ajortut ilarpassui inersimasunngornermi allanut asannittumik attaveqarnikkut akiorneqarsinnaasut. Taamaattumik kristumiut tunniulluinnarsimasut tamarmik nutaanik takkuttunik tamanik asannittumik ilassinninnissaat pingaaruteqartorujussuuvoq.

„Asanninneq soraanngisaannassaaq“

Asanninneq soraanngisaannassasoq Biibilimi oqaatigineqarpoq. (1 Korinthimiut 13:8) Apustili Paulusip tamatumunnga pissutaasoq oqaluttuaraa: „Asanninneq kamagittartuuvoq, asanninneq saamasuuvoq, asanninneq sinngasarinngilaq; pingaakujuttarnanilu perroortarinngilaq. Kanngunartuliortarinngilaq, namminissarsiortarinngilaq; puffassartarinngilaq puttarsisaqartarnanilu.“ (1 Korinthimiut 13:4, 5) Erseqqippoq oqaasiinnaat imaluunniit misigissutsit qarsupittut tassani pineqanngitsut. Tassami, asanninnermik taassuminnga takutitsisut inuunerup pakatsinartui naalliunnartuilu nalunngilaat, allanulli asanninnertik tamakkunannga aserugaatittanngilaat. Asanninneq ilumoortoq tassaavoq „naammalluinnassutsip qilerutaa“. — Kolossemiut 3:12-14.

Niviarsissap Koreamiup 17-inik ukiullip tamanna paasivaa. Ilaquttami Jehova Guutimik kiffartuussilernini akuerisinnaanngimmassuk angerlarsimaffini qimattariaqarpaa. Kamannermik sunnertigani ikioqqulluni Guuti qinnuigaa, eqqarsaatinilu oqaasianik anersaavanillu sunnertippai. Ilaquttani akulikitsumik allaffigisarpai, allakkaminilu erseqqissumik takutittarpaa qamannga ilumoortumik asagini. Tamatuma kinguneranik anii marluk Biibilimik atuaqqissaartalerput, maannalu kristumiuupput tunniulluinnarsimasut. Aamma anaanaata aqqaluaatalu sallusuissut Biibilimeersoq ilassivaat. Naggataatigut angutaa Jehovap Nalunaajaasuinut akerlilersuisimaqisoq allamik isumataarpoq. Niviarsiaq allappoq: „Tamatta uppeqatitsinnik aappanippugut, maannalu ilaquttanni 23-t pallorfiginninnermi ilumoortumi ataasioqatigiipput.“ Aap, asanninneq ajugaavoq.

Ilumoortumik asanninneq ineriartortikkusuppiuk, aamma allat taamaaliornissaannut ikiorusuppigit? Taava Jehova, asanninnerup pilerfia, qanillattoruk. Aap, oqaasii uummammiuliukkit, anersaaq illernartoq qinnutigiuk, qatanngutigiissuarnilu kristumiuni allat akuttunngitsumik ilagisakkit. (Esaja 11:9; Matthæusi 5:5) Soorlu Biibilimi takutinneqartoq, qanittumi guutiitsut peerutissapput, tamatumalu kingorna ilumoortumik asannittut kiserngorutissapput. Aap, asanninneq pilluarnermut inuunermullu aqqutaavoq. — Tussiaat 37:10, 11; 1 Johannesi 3:14.  (wE 7/1 03)

[Qupp. 6-mi assiliartat]

Qinunerup Guutillu oqaasianik atuaqqissaarnerup asanninnermik ilumoortumik ineriartortitsinissatsinnut ikiortarpaatigut