Ilaat qanoq ilillutik akissutissarsisimasut

INUIT millionillit Guutimut qinusarput. Ilaasa qularinngilluinnarpaat qinnutitik tusarneqassasut. Allat qularnerupput. Suli allat akissutissaasinnaasumik ujarlertarput, Guutimulli saaffiginninnissartik eqqaanngisaannarpaat.

Biibilimi oqaatigineqarpoq Guuti ’qinnutinik tusartartoq’. (Tussiaat 65:3) Qinusaruit qularinngiliuk Guutimut ilumoortumut qinusarlutit? Qinusarpillu Guutip akiumasaanik?

Nunarsuarmi tamarmi inuppassuit misilittakkatik tunngavigalugit apeqqut angissavaat. Suna paasisimagamikku?

Guuti kinaagami?

Portugalimi ilinniartitsisoq mattuttunit palasinillu ajoqersorneqarsimasoq upperisaminik pingaartitsisuuvoq. Ileqqulersuutit pingaartitassatut ilinniarsimasani oqaluffeqarfiup allanngortimmagit imaluunniit atorunnaarmagit paatsuungalerpoq. Ungasissumut aallarpoq, kangiamiut upperisarsiornerat paasisaqarfigaa eqqarsaatigilerlugulu ilumoortumik ataatsimik Guuteqarnersoq. Sunamitaava pallorfiginninnerua ilumoortoq? Biibilimi atuarsimasaminik palasi aperigamiuk pakatsissutigisaminik iluamik akiumaneqanngilaq.

Illoqarfigisaani oqaluffeqarfik quppersakkamik agguaassivoq Jehovap Nalunaajaasuinik oqaloqateqarnissamut mianersoqqusilluni. Jehovap Nalunaajaasuinik oqaloqateqanngisaannarsimavoq; apeqqutissanili eqqarsaatigiinnalerpai, ullullu ilaanni matuminut pimmata tusarnaarpai, oqaatigisaallu soqutigilerpai.

Apeqqutissarpassuani akissutissarsiniarlugit Jehovap Nalunaajaasui Biibilimik atuaqqissaaqatigisalerpai. Sapaatip-akunneri tamaasa apeqqutigisassarpassuani piareertarpai. Paaserusuppaa Guuti qanoq ateqarnersoq, ataasiinnarmik ilumoortumik Guuteqarnersoq, taassuma pallorfiginninnermi assilissat atorneqarnerat akuerineraa allarpassuillu. Akissutit oqaluussisartut namminneq isumaannik tunngaveqanngisaannarlutik tamatigut Biibilimit tunngaveqartarnerat nuannaajallaatigalugulu tupaallaatigaa. Apeqqutissarpassuani ataasiakkaarlugit akissutissarsiortorpai. Ullumikkut Jehova „anersaakkut ilumoornikkullu“ pallorfigisarpaa, soorlumi Jiisusi oqartoq  „ilumoortumik pallorfiginnittut“ taamaaliorumaartut. — Johannesi 4:23.

Sri Lankami ilaqutariit Biibili akuttunngitsumik atuaqatigiissutigisarpaat, apeqqutissarpassuilli saqqummerartut akissutissarsisanngilaat. Palasi akisinnaanngilaq, Jehovalli Nalunaajaasui pulaarput atuagassianillu Biibilimik paasissutissiisunik qimatsivigalugit. Oqaluussisartut kingusinnerusukkut periarfissaqalerput ilaqutariit apeqqutaat naammaginartumik akissallugit, Biibilimillu atuaqqissaaqatigiittarnissaq isumaqatigiissutigineqarpoq. Ilaqutariit ilinniakkatik soqutiginartippaat.

Meeraanerminiilli oqaluffimmi tusartuakkani pissutigalugit ilaqutariinni anaanaasup paasiuminaatsippaa Jiisusip Ataataa ’kisimi Guutiusoq’, soorlu Jiisusi nammineq taama oqartoq. (Johannesi 17:1, 3) Anaanaasup ilinniarsimavaa Jiisusip Ataataq naligigaa, tamatumalu „paasissaanngitsuunera“ assortugassaanngitsoq. Ilumoorluni ilungersoqalunilu Jehovamut aqqa atorlugu qinuvoq, qinnuigaalu Jiisusip qanoq inissisimaffeqarnera erseqqissumik takuteqqullugu. Taamaalioreerami allassimaffiit tamatumunnga attuumassutillit misissoqqissaaqqippai. (Johannesi 14:28; 17:21; 1 Korinthimiut 8:5, 6) Soorlumi isaasa assiaqutaat peerneqartut, maannalu paasillualerpaa Jehova, qilammik nunamillu Pinngortitsisoq aammalu Jiisusi Kristusip Ataataa, tassaasoq Guuti ilumoortoq. — Esaja 42:8; Jeremia 10:10-12.

Sooq inuit pisuussuteqanngitsut naalliuppat?

Inuk Biibilimi oqaluttuarineqartut ilaat Jobi tupinnaannartumik naalliuuteqangaarsimavoq. Silarlussuarmi meerai tamarmik ajunaarput, pigisanilu tamaasa annaavai. Aamma nappaat annernartorsuaq ikinngutaasuusaartullu pasilliutaat atortariaqarpai. Atukkani ajorseruttortut Jobi isumaalliorluni oqaaseqarpoq. (Jobi 6:3) Guutilli pissutsit qanoq innerat nalunngilaa. (Jobi 35:15) Nalunngilaa Jobi qamuuna qanoq ittuusoq, pisariaqartunillu ajoqersuuppaa. Ullumilu taamatut ajoqersortarpaatigut.

Castro Mocambique-miu arni toqummat quliinnarnik ukioqarpoq. Isumatsangaarluni aperivoq: „Sooq uatsinniit peersinneqassava?“ Angajoqqaavisa Guutimik upperinninnissaanik ilinniartissimavaat, taamali pisoqarnera siunertaqanngitsutut ippoq. Nassuiaat naleqquttoq sumi nassaarisinnaavaa? Biibileerannguamik chewatut naqitikkamik atuarnini atuakkanilu pillugit angajuminik oqaloqateqarnini tuppallersaatigai.

Castrop paasiartuaarpaa Guuti Guutiunngitsoq naapertuilluanngitsoq anaanamilu toquneranut pisuunngitsoq. Naamik, naammalluinnanngitsuuneq kingornussaq pissutaavoq. (Romamiut 5:12; 6:23) Biibilip makinnissamik neriorsuutaa pingaartumik tuppallersaatigaa, anaanamimi takoqqinnissaanik Biibilip qularunnaarsippaa. (Johannesi 5:28, 29; Apustilit Suliaat 24:15) Alianaraluartumik ataataa ukiut sisamat qaangiummata aamma toquvoq. Tamatumuunali Castrop annaasaqarnini anigoruminartinneruaa. Ullumikkut Castro Jehovamik asannittuuvoq taassumunngalu ilumoorluni kiffartorluni, nuannaarneralu tamanut ersippoq.

Biibilimi oqaluttuat Castrop tuppallersaatigisai inuppassuarnut allanut ilaquttamik toqunerannik aliasuutiginnittunut aamma tuppallersaataapput. Inuit ilaat naapertuilluanngitsuliornerujussuarnik nalaataqarsimasut Jobitut aperisimapput: „Sooq iluaatsut inuuginnartarpat?“ (Jobi 21:7) Guuti oqaatsimini Biibilimi qanoq akissuteqartoq malugigaanni paasinarsisarpoq periaasia ajunngitsumik kinguneqassasoq. — 2 Petrusi 3:9.

Barbara USA-mi peroriartorpoq sorsunnermik amiilaarnartuinillu nammineerluni misigisaqarani. Nunarsuattali ilaani sorsuuttoqartarpoq, sorsuttoqarneranilu pinerluttuliornernik nalunaarutit tusagassiuutini ulluinnarsiutaapput. Atuartuunermi nalaani tupigusuutigisarpaa silarsuarmi oqaluttuarisaanerup naatsorsuutigineqanngitsumik allanngorartuarnera. Suna pissutaava? Pisut Guutip soqutiginngilai? Upperaa Guuteqartoq, assigiinngitsunilli misigissuseqarfigaa.

Barbaralli inuunermut isiginninnera allanngoriartorpoq Jehovap Nalunaajaasui ilagisaleramigit. Tusarnaarpai, Biibilimik atuaqqissaaqatigai, naalagaaffilersaarfimmi ataatsimiinnerit ilaat peqataaffigai ataatsimeersuarnerisalu  ilaannut aggerluni. Aammattaaq maluginiarpaa Jehovap Nalunaajaasuinit assigiinngitsunit imminnut assortuuttunik paasissutissinneqarneq ajorluni, ataasiusumilli isumaqartut isummatik Biibilimik tunngaveqartikkamikkit.

Jehovap Nalunaajaasuisa Biibili atorlugu uppernarsarpaat silarsuaq Saatani Diaavulumit naalagaaffigineqartoq, tamarmilu anersaavanit sunnerneqarsimasoq. (Johannesi 14:30; 2 Korinthimiut 4:4; Efesosimiut 2:1-3; 1 Johannesi 5:19) Barbara oqaluttuuppaat pisimasut nassuiarneqarsinnaanngitsutut isikkullit Biibilimi siullittuutigineqarsimasut. (Danieli, kapitali 2, 7 8-lu) Guutip tamakku siulittuutigisimavai piumagaangami siunissaq takusinnaasaramiuk. Pisimasut ilaat Guutip pilersitarai, allalli akueriinnarsimavai. Jehovap Nalunaajaasuisa paasitippaat Biibilimi nalitsinni ajunngitsut ajortullu siulittuutigineqarsimasut, qanorlu isumaqarneri nassuiarneqarsimasut. (Matthæusi 24:3-14) Silarsuassamik nutaamik naapertuilluarfiusussamik Biibilip neriorsuutaanik paasitippaat, silarsuassaq naalliuutaaruffiusimasussaq. — 2 Petrusi 3:13; Saqqummersitat 21:3, 4.

Barbarap paasiartuaarpaa inuit naalliuutaannut Jehova pisuunngitsoq, aammali inuit inassutini sumiginnaraangatigit ajornartorsiuteqalernissaat akornuserneq ajoraa. (5 Mosesi 30:19, 20) Naassaanngitsumik inuusinnaanissarput pilluarnissarpullu Guutip isumagisimavaa, unnersuussutaalu naapertuilluartut naapertorlugit inoorusunnerluta takutitsinissatsinnik periarfissippaatigut. (Saqqummersitat 14:6, 7) Barbara aalajangerpoq Guutip piumasaqaatai paasiniarniarlugit, taakkulu malillugit inuuniarluni. Aammattaaq asanninneq, Jiisusi naapertorlugu ajoqersugaanut ilumoortunut ilisarnaataasussaq, Jehovap Nalunaajaasuini nassaaraa. — Johannesi 13:34, 35.

Barbaramut ikiuisup aamma illit ikiorsinnaavaatit.

Inuuneq siunertalik

Naak suut tamarmik ajunngitsumik ingerlasutut isikkoqaraluartut inuunerup nalunartuinut nassuiaatit amigaatigineqarsinnaapput. Tuluk inuusuttoq Matthew taama misigaaq. Guuti ilumoortoq ilisarerusuttorujussuuaa inuunerullu siunertaa paaserusuttorujussuullugu, ingammik 17-inik ukioqarluni angunni annaagamiuk. Matthew nipilersornermik universitetimi ilinniagartuunngorpoq, paasiartuaalerpaali inooriaatsini pigisanik pingaartitsiffiusoq qanoq naammaginanngitsigisoq. Londonimut nuuppoq, ikiaroortalerluni imerniartarfiliartalerlunilu unnuakkut ammasartumut. Aammattaaq inuunermik siunertalimmik ujaasinermini ulloriarsiorneq, anersaarsiorneq, zenbuddhasiorneq filosofiilu soqutigilerpai. Isumatsaqaluni Guutimut noqqaavoq sallusuissutip nassaarinissaanut ikioqqulluni.

Ullut marluk qaangiummata Matthewip ikinngutitoqqani naapippaa anngiiarfigalugulu. Ikinngutaa Jehovap Nalunaajaasuinik atuaqqissaaqateqarsimavoq, Timotheusimullu allakkat aappaat 3:1-5 takutimmagu allassimaffimmi ullutsinni inuiaqatigiit qanoq eqqorluartigisumik allaaserineqarneri Matthewip tupigusuutigeqaa. Jiisusip qaqqami oqaluusaa kajumissaatigeqisani atuarpaa. (Matthæusi, kapitali 5-7) Jehovap Nalunaajaasui pillugit isornartorsiuerpaluttumik atuagaqarsimanini pissutigalugu aallaqqaammut qularaluarpoq, naggataatigulli aalajangerpoq naalagaaffilersaarfimmi qanittumiittumi ataatsimiinnerit peqataaffiginiarlugit.

Matthewip tusakkani iluarai, ilagiinnilu utoqqaanertat ilaat atuaqqissaaqatigisalerpaa. Piffissap sivikitsuararsuup ingerlanerani paasilerpaa ujakkani nanisimallugu, aamma paasilerpaa tamanna qinnutaanut Guutip akissutigigaa. Matthewip malugaa iluaqutigalugu ileqqut Jehovap iluarinngisai ileqqoriunnaaramigit. Guutimik mianerinninneq peqqinnartoq ineriartortippaa, Guutillu inassutai naapertorlugit inuunerminik aaqqiinissamik kajumissuseqalerpoq. Maanna inuuneq siunertaqalerpoq. — Oqaluussisartup oqaasii 12:13.

Siumut aalajangerneqareersimanngilaq Matthew allalluunniit allaaserisami uani eqqaaneqartut inooriaatsimik nalerisimaarnartumik nanisaqassasut. Paasivaalli Jehova Guuti inatsisiminik nuannaarlutik naalannissaminnik qinersisunut tamanut asannittumik siunertaqartoq. (Apustilit Suliaat 10:34, 35) Ilaatigut Guutip  siunertaraa silarsuarmi sorsuffiujunnaarsimasumi, napparsimasoqarfiujunnaarsimasumi kaannersuaqarfiujunnaarsimasumilu, aap, allaat toqusarunnaarfiusimasumi inuit inuunermik naassaanngitsumik tunissallugit. (Esaja 2:4; 25:6-8; 33:24; Johannesi 3:16) Tamanna misigerusuppiuk? Qanoq inuunermi nalerisimaarneq nassaarisinnaanerlugu paaserusuppiuk? Taava Jehovap Nalunaajaasuisa naalagaaffilersaarfianni ataatsimiinnerit Biibilip ilinniutitut atorneqarfigisaasa najuuffiginissaannut tikilluaqqusaavutit. (wE 5/1 03)

[Qupp. 7-mi assiliartaq]

Guutimut iluunngarlutit qinugit, aqqalu atoruk

[Qupp. 7-mi assiliartaq]

Unneqqarillutik Biibilimik ilinniartitsisut Biibilimi allassimasut pillugit oqaloqatigisakkit

[Qupp. 7-mi assiliartaq]

Naalagaaffilersaarfimmi ataatsimiinnernut najuukkiartorit

[Suminngaanneernera]

Angalasoq: Chad Ehlers/Index Stock Photography