Aliasuttut tuppallersakkit
Aliasuttut tuppallersakkit
’[Jehovap] tanitaraanga . . . aliasuttut tamaasa tuppallersaqqullugit.’ — ESAJA 61:1, 2.
1, 2. Kikkut tuppallersartariaqarpavut, aamma sooq?
JEHOVAP, Guutip piviusumik tuppallersaasartup, ajunaartunik isumassuinissatsinnik ilinniartippaatigut. Aliasuttut ’nikallortullu tuppallersassagivut’ ilinniartippaatigut. (1 Tásalûníkamiut 5:14) Uppeqativut taamatut pisariaqartitsigaangata soorunami taamatut ikiortarpavut. Ilagiinniittuunngitsulli, allaat inussiarnisaarfiginnissimanngitsut, aamma taamatut isumassortarpavut. — Matthæusi 5:43-48; Galatiamiut 6:10.
2 Jiisusi Kristusip Esajap allagaani siulittuut atuarpaa oqaatsillu imminut atorlugit siulittuutigineqartumik suliarinnittussatut: „Guutip [Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq oqaatigeqqullugu piitsunut, nakorsarneqarnissarlu aserorsimasumik uummatilinnut, . . . aliasuttut tamaasa tuppallersaqqullugit.“ (Esaja 61:1, 2; Lukasi 4:16-19) Nalitsinni kristumiut tanitat qangali nalunngilaat aamma namminneq Esajap siulittuutigisaatut suliaqartariaqarlutik, aamma ’savat allat’ nuannaarlutik taakku suleqatigilersimavaat. — Johannesi 10:16.
3. Guutip naalliuutit sooq akuerinerai apeqqutigineqaraangat aperisut qanoq ikiorsinnaavavut?
3 Ajunaartoqaraangat inuillu ’aserorsimasumik uummateqaleraangamik’ ima aperigajupput: ’Sooq Guutip ajunaarnerit taamaattut akuerai?’ Tamanna Guutip oqaasiani akineqarpoq. Biibilimilli atuaqqissaarsimanngitsup akissutaa tamanna ingerlaannaq paasilluinnarnavianngilaa. Tamatumani Jehovap Nalunaajaasuisa atuagassiaataat iluaqutaasinnaapput. * Aallaqqaammulli Biibilimi versialuinnarnik soorlu Esaja 61:1, 2-millu atuarneq inuppassuarnut tuppallersaataasimavoq, versit taakku erseqqissumik takutimmassuk Guutip inuit tuppallersarusukkai.
4. Polenimi Jehovap Nalunaajaasuisa ilaata atuartoq isumatsassimasoq qanoq tuppallersarpaa, misigisaalu allanik tuppallersaaleraangavit qanoq iluaqutigisinnaaviuk?
4 Inuusuttut utoqqaallu tuppallersarneqarnissartik pisariaqartippaat. Polenimi inuusuttuaraq isumatsassimasoq ikinngutiminut siunnersoqquvoq. Ikinngutaata, Jehovap Nalunaajaasuisa ilaata, mianersorluni aperaa suna artorsaatigineraa, paasivaalu nalornisaqartoq imaattunik: „Sooq taama ajortoqartigaa? Sooq inuit naalliuttarpat? Sooq nukara nukillaarnermik nappaateqarpa? Aamma sooq uummalluppunga? Oqaluffimmi oqarput Guutip piumasarigaa. Tamannali ilumoorpat Guuti upperiunnaassavara!“ Ikinngutaa nipaqanngitsumik Jehovamut qinoriarluni ima oqarpoq: „Nuannaarutigaara taamatut aperigamma, ikiorusuppakkit.“ Oqaluttuarpoq nammineq meeraalluni nalornisarpassuaqarluni Jehovap Nalunaajaasuinillu ikiorneqarluni. Taava ima oqarpoq: „Ilikkarpara inuit naalliunnerannut Guuti pisuunngitsoq. Asavai. Pitsaanerpaamik kissaappai, qanittukkullu nunami allanngornerujussuaqarnissaa isumagissavaa. Nappaatit, utoqqalinermi ajornartorsiutit toqulu peerneqassapput, Guutillu aqqutigeqqusaanik malinnikkumasut naassaanngitsumik inuussapput — nunarsuarmi maani.“ Allassimaffiit uku atuarpai: Saqqummersitat 21:3, 4; Jobi 33:25; Esaja 35:5-7 aamma 65:21-25. Sivisuumik oqaloqatigeereerlutik niviarsiaq malunnartumik tuppallerluni iluaallatsitsillunilu ima oqarpoq: „Maanna nalujunnaarpara inuunerup suna siunertarigaa. Pulaaqqissinnaavakkit?“ Niviarsiaqqat marluullutik sapaatip-akunneranut marloriarlutik Biibili atuaqqissaartalerpaat.
Guutip tuppallersaatigisaa
5. Tuppallersaat suna iluaqutaalluinnarsinnaava?
5 Allat tuppallersaraangatsigik soorunami misiginneqataanissarput pingaaruteqarpoq. Ikiorniakkatta oqaatsitsigut nipitsigullu malugisinnaasariaqarpaa pissutsit atugai killissutigingaarivut. Oqarniaannarluni oqaatsit iluaqutaanngillat. Biibilimi allassimavoq ’nikallujuilluta Allakkallu tunissutaat tuppallersaatigalugit neriuuterput aalajangiussinnaagipput’. (Romamiut 15:4) Tamanna eqqarsaatigalugu piffissaalluartukkut nassuiarsinnaavarput Guutip naalagaaffia sunaanersoq Biibilimilu takutillugu naalagaaffiup tamatuma ajornartorsiutit qanoq aaqqikkumaarai. Taava neriuut tamanna sooq tutsuiginartuunersoq tunngavilersorsinnaavarput. Taamaalilluta allat tuppallersarsinnaavavut nakussatsillugillu.
6. Inuit sumik paasitittariaqarpavut tuppallersaat Biibilimeersoq tamakkiisumik iluaqutigissappassuk?
6 Tuppallersaatigisarput inuup tamakkiisumik iluaqutigissaguniuk Guuti ilumoortoq ilisarisimalertariaqarpaa, kinaassusilittut qanoq ittuunera neriorsuutaalu qanoq tatiginartiginersut paasisariaqarlugit. Ikiorniagarput Jehovamut pallorfiginnittooreersuunngippat tulliuttut nassuiarnissaat pitsaassaaq. (1) Tuppallersaat Biibilimiittoq Jehovameersuuvoq, Guutimit ilumoortumit. (2) Jehova tassaavoq Ajugaqanngitsoq, qilammik nunamillu Pinngortitsisoq. Guutiuvoq asannittoq ilumoortumik tunniusimangaartoq sallusuissumillu peqangaartoq. (3) Oqaasianik eqqoqqissaartumik ilisarsinikkut Guutimut palligukkutta ajornartorsiutit naammagalugit atornissaannut nakussatsinneqarsinnaavugut. (4) Biibilimi allassimaffeqarpoq inuit ataasiakkaat misilinneqarnerminni immikkorluinnaq ittuni iluaqutigisinnaasaannik.
7. (a) Guutip ’Kristusikkut naammangaartumik tuppallersaasarneranik’ innersuussinikkut suna angusinnaavarput? (b) Kukkussuteqarnerminik aliasuutiginnittoq qanoq tuppallersarsinnaavarput?
7 Aliasuttut nikallungasullu Biibilimik ilisimasaqareersut ilaasa Korinthimiunut allakkat aappaat 1:3-7-imeersunik atuffanneqaraangamik qujamasuutigingaartarpaat. Versinik atuffasisut oqaatsit uku erseqqissartarpaat: „Taamattaaq Kristusikkut naammangaartumik tuppallersarneqartarpugut“. Versi taanna iluaqutigalugu paasineqarsinnaavoq Biibili tassaasoq tuppallersaatissarsiffiusinnaasoq maluginerusariaqartoq. Aamma oqaloqatigiinnernut allanut, immaqa piffissami allami, aallarniutaasinnaavoq. Misigisoqarpat ajornartorsiutini kukkussutiminik pissuteqartut, assuarinagu, Johannesip allagai siulliit 2:1, 2-mi aamma Tussiaat 103:11-14-imi oqaatsit tuppallersaatigisinnaavavut. Taamatut Guutip tuppallersaatigisaanik allat tuppallertilluinnarsinnaavavut.
Nakuusernerit aningaasaqarnikkullu ajornartorsiutit
8, 9. Nakuusernernit eqqugaasimasut qanoq tuppallersarneqarluarsinnaappat?
8 Inuit millionilikkuutaat pinerluttuliornerni sorsunnerniluunniit nakuusernerit naalliuutigaat. Taakkua ilaat qanoq tuppallersarsinnaavavut?
9 Kristumiut ilumoortut silarsuarmi matumani akerleriinnernut sunulluunniit oqaatsimikkut iliuutsimikkulluunniit arlaannaannilluunniit illersuinnginnissartik mianersuutigeqqissaarpaat. (Johannesi 17:16) Maannakkut pissutsit ajortut naassaanngitsumut atuutissanngitsut takutinniarlugu Biibili atortarpaat. Immaqa Tussiaat 11:5 atuarpaat nakuusernermik nuannarisaqartoq Jehovap qanoq isigigaa takutinniarlugu, imaluunniit Tussiaat 37:1-4 atuarpaat Guutip akiniaaqqulluta kajumissaanngikkaatigut, tatigeqqullunili kajumissaaraatigut, takutinniarlugu. Tussiaat 72:12-14-imi oqaatsit takutippaat Salomop annerup, Jiisusi Kristusip, maanna qilammi kunngiusup, inunnut pisuussuteqanngitsunut nakuusernernik naalliuuteqartunut misigissusii.
10. Sorsunneq misigisimagukku allassimaffiit innersuussutigineqartut qanoq tuppallersaatigisinnaavigit?
10 Ilaasa akerleriissuteqarnerit tulleriiaaginnaat misigisimavaat akerleriittut pissaaneqarniunneranni. Sorsunnerit sorsunnerillu kingunerisaat inuunermut ilaaginnartussatut isigaat, isumaqarpullu nunamut allamut qimaaneq atukkaminnik pitsaanerulersitsisinnaasutuaasoq. Amerlanerilli iluatsitsineq ajorput, qimaaniartorpassuillu toqusarput. Iluatsitsisullu allanik ajornartorsiuteqaliinnarajupput. Inuit taamaattut Tussiaat 146:3-6-imik atuffanneqarunik immaqa inuuneq nunamut allamut nuunnermit nalerisimaarnarnerusoq aalajaannerusorlu neriuutigilersinnaavaat. Matthæusi 24:3, 7, 14-imi imaluunniit Timotheusimut allakkat aappaat 3:1-5-imi siulittuutit iluaqutigalugit ’uungaannaq’ isigiunnaarsinnaapput pissutsillu atortariaqakkamik pingaaruteqarnerat takusinnaalissallugu, tassa pissutsit aaqqissuussaanerata nutaanngitsup naggatissaata nalaani inuusugut. Siunissaq eqqissinartoq pillugu taakkununnga tatiginartumik neriuuteqalersitsisinnaasut allassimaffiit ukuupput: Tussiaat 46:2-4, 9, 10 aamma Esaja 2:2-4.
11. Arnap Afrikap Kitaani najugallip allassimaffiit suut tuppallersaatigai, aamma sooq?
11 Afrikap Kitaani piffissami sorsuffiujuaannartumi arnaq eqqartoqaleruttortoq angerlarsimaffimminiit qimaavoq. Annilaangangaalluni, aliasungaarluni pakatsisimaqalunilu inuulerpoq. Kingusinnerusukkut ilaqutariittut nunamut allamut nunassereerlutik uia aalajangerpoq katinnermut allagartartik ikuallanniarlugu nulianilu naartusoq ernertillu qulinik ukiulik aallartinniarlugit, namminerlu palasinngorniarluni. Filippimiunut allakkat 4:6, 7 aamma Tussiaat 55:23 arnamut atuarneqarmata allaaserisallu Biibililersaarutit Napasuliaq Alapernaarsuiffik-meersut Iteritsi!-meersullu pigamigit aatsaat tuppalliutissarsivoq inuunerullu siunertaanik paasinnilerluni.
12. (a) Aningaasaqarnikkut tatineqangaartunut Biibilimi qanoq tuppallersaatissaqarpa? (b) Asiami Jehovap Nalunaajaasuisa ilaata pisiniartoq qanoq ikiorpaa?
12 Aningaasaqarnikkut nakkaattoornerit inuit millionilikkuutaat inuunerannik aseruisimapput. Ilaannikkut aamma sorsunnerup kingunerisaanik taamaattoqartarpoq. Ilaannikkullu naalakkersuisut silatusaanngitsumik politikkeqarnerisa pissaaneqartullu piumatuujunerisa unneqqaserlunnerisalu inuit ileqqaarutaat naleerutsittarpaat inuppassuillu pigisaminnik isumakkeerisittariaqartarlugit. Inuit ilaasa ajornartorsiutigaat silarsuup matuma ajunngitsortaanik pigisakittuaannarnertik. Taakku tamarmik tuppallersarneqarsinnaapput ilisimatinneqarlutik Guuti neriorsuisoq imminut tatiginnittut aniguisikkumaarlugit silarsuarlu naapertuilluarfiusoq inuit suliaminnik nuannaarutiginniffigisassaat atulersikkumaarlugu. (Tussiaat 146:6, 7; Esaja 65:17, 21-23; 2 Petrusi 3:13) Nunami Asiamiittumi Jehovap Nalunaajaasuisa ilaata pisiniartoq aningaasaqarnikkut pissutsit isumakuluutigalugit oqaluttoq tusaagamiuk, nassuiaappaa pisut tassaasut nunarsuarmi pisussat tulleriiginnaasussaat ilaat. Matthæusi 24:3-14-imik aamma Tussiaat 37:9-11-mik eqqartuineq aalajangersimasumik Biibilimik atuaqqissaartalernermik kinguneqarpoq.
13. (a) Neriorsuutiminnik ilumoorussinngitsunik pakatsissuteqartut Biibili atorlugu qanoq ikiorsinnaavavut? (b) Pissutsinik ajortunik Guuteqannginneranut uppernarsaatitut isiginnittut qanoq eqqarsalersinniarlugit tunngavilersuisinnaavit?
13 Inuit ukiorpassuarni naalliuuteqarsimasut neriorsuutinilluunniit ilumoorussinngitsunik pakatsisimasut, Israelikkutut Egyptenimi „neriuutaarussimagamik“ tusaarusunngitsutut issinnaapput. (2 Mosesi 6:9) Pissutsini taamaattuni immaqa iluaqutaasinnaavoq maannakkorpiaq ajornartorsiutiminnik aniguinissaannut, inuppassuillu inuunerannik asuliinnartitsisinnaasunik ingalassimanninnissamut, Biibili qanoq iluaqutaasinnaanersoq takutissallugu. (1 Timotheusi 4:8b) Ilaasa atugarliorlutik inuunertik Guuteqannginneranut soqutiginninnginneranulluunniit uppernarsaatitut isigisinnaavaat. Immaqa allassimaffiit naleqquttut atorlugit eqqarsalersinniarsinnaavat paasitinniarlugu Guutip inuit iluaqutissaat isumagisimagaa, inuppassuilli tamatuminnga ilassinnissimanngitsut. — Esaja 48:17, 18.
Anorersuarujussuit, nunap sajunneri ajunaarnersuillu allat
14, 15. Ajunaarnersuarmi inuppassuit annilaarujussuarmata Jehovap Nalunaajaasui qanoq isumassuippat?
14 Anorersuarujussuartillugu, nunap sajunnerani, ikuallattoqartillugu qaartoortoqartilluguluunniit ajunaarnersuaqaraangat sumi tamaani aliasuttoqangaartarpoq. Aniguisut qanoq tuppallersarneqarsinnaappat?
15 Inuit isumaalugineqarnertik paasissallugu pisariaqartippaat. Nunami ataatsimi peqqarniisaarniat saassussereersut inuppassuit annilaarujussuaqqapput. Taakkua ilarpassuisa ilaquttatik, pilersuisortik ikinngutitilluunniit annaavaat. Ilaasa suliffitsik isumannaassusermilluunniit misiginertik annaavaat. Jehovap Nalunaajaasui inuit qanittumi najugallit ikiorniarlugit neqeroorput. Annaasaqarneranni misiginneqatigingaarlugit ersersippaat, Biibilimilu tuppallernartunik atuffakkumallugit. Amerlasuut isumassuinermut taamaattumut qujamasungaarput.
16. El Salvadorimi ajunaarnersuaqarmat Jehovap Nalunaajaasui oqaluussinerminni sooq angusarissaarpat?
16 2001-imi El Salvadorimi nunap sajorujussuarnerani marullorujussuaq sisoorpoq inuppassuit inuunerannik akeqartumik. Jehovap Nalunaajaasuisa ilaata ernera 25-nik ukiulik erneratalu aappassiaata nukai marluk toqupput. Angutip inuusuttup arnaata aappassiaatalu illumiit illumut oqaluussineq ingerlaannaq ulapputigilerpaat. Naapitarpassui oqarput Guutip toqusut imminut pisikkai pisorlu Guutip piumasarigaa. Nalunaajaasut taakkua marluk Ussatit 10:22 issuartarpaat takutinniarlugu Guutip kissaatiginngikkaa kinaluunniit naalliuuteqassasoq. * Romamiunut allakkat 5:12 atuartarpaat takutinniarlugu toqu silarsuarmut tikiussimasoq inuup ajortuliornera pissutigalugu, Guutip piumasaa pissutaanani. Oqaatsillu tuppallernartut allassimaffinni ukunaniittut aamma innersuuppaat: Tussiaat 34:19, Tussiaat 37:29, Esaja 25:8 aamma Saqqummersitat 21:3, 4. Inuit tusarnaarusuttarput, ingammik arnat taakku marluk ajunaarnersuarmi ilaquttaminnik annaasaqarsimammata, Biibilimillu atuaqqissaaqatitaarpassuaqarput.
17. Ajunaarnersuaqaraangat sutigut ikiuisinnaavugut?
17 Ajunaarnersuaqassappat immaqa ikiortarialinnik naammattuuissaatit. Nakorsaasortariaqarsinnaavutit, napparsimmaviliaasseqataasariaqarsinnaavutit nerisassaqartitsiniarnermiluunniit illusisitsiniarnermilu ikiuuttariaqarsinnaavutit. 1998-imi Italiami taamatut ajunaarnersuaqartillugu tusagassiortup malugisimavaa Jehovap Nalunaajaasui „silatusaartumik iliuuseqartut ajoqusersimasunillu ikiuiniartut, qanorluunniit upperisaqarneri eqqarsaatiginagu“. Sumiiffiit ilaanni pisut, siulittuutit naapertorlugit ullussani kingullerni pisussat, naalliutsitsingaartarput. Sumiiffinni taamaattuni Jehovap Nalunaajaasuisa inuit Biibilimi siulittuutinik oqaluttuuttarpaat Guutillu naalagaaffiata piviusumik toqqissisitsinissaanik neriorsuutinik tuppallersartarlugit. — Ussatit 1:33; Mika 4:4.
llaqutaasumik toqusoqartillugu
18-20. Ilaquttaminik annaasaqarsimasoq tuppallersarniarlugu qanoq oqarsinnaavit?
18 Ullut tamaasa inuit millionillit asasaminnik annaasaqarlutik aliasuuteqartarput. Oqaluussitillutit ulluinnarniluunniit sammisartakkannik sammisaqartillutit aliasuuteqartunik naapitaqarsinnaaavutit. Tuppallersarniarlugit qanoq oqarsinnaavit, imaluunniit qanoq iliuuseqarsinnaavit?
19 Naammattuukkat immaqa artorsaateqangaarpoq eqqarliminillu pulaartorpassuaqarluni. Qularnanngitsumik oqaasissarpassuaqarputit, periaaserinnissarli pingaaruteqarpoq. (Oqaluussisartup oqaasii 3:1, 7) Iluaqutaanerpaassagunarpoq misiginneqataanermik ersersitsinerinnaq atuagassiamillu Biibililersaarummik naleqqulluartumik (atuagassiaaqqamik, atuagassiamik naqitaaqqamilluunniit) tunniussinissaq. Ullualuit qaangiuppata uterfigisinnaavat arlaannik ikiorsinnaanerlugu paasiniarlugu. Piffissaalluartukkut Biibilimi qiimmaallannartunik atuffakkumasinnaavat. Iluaqutaasinnaavoq iluaallaataasinnaallunilu. (Ussatit 16:24; 25:11) Soorunami Jiisusitut toqusunik makititsisinnaanngilatit. Oqaluttuussinnaavalli toqusut qanoq pisarnerat pillugu Biibilimi qanoq allassimasoqarnersoq, eqqunngitsumik isumaqarneranik naqqiinissamut immaqa piffissaanngikkaluartoq. (Tussiaat 146:4; Oqaluussisartup oqaasii 9:5, 10; Ezekieli 18:4) Toqusut makititaanissaat pillugu Biibilimi neriorsuutit atuaqatigiissutigisinnaavasi. (Johannesi 5:28, 29; Apustilit Suliaat 24:15) Neriorsuutit taakku qanoq isumaqarneri oqaloqatigiissutigisinnaavasi, immaqa toqusunit makititaanerit Biibilimi eqqartorneqartut arlaat tunngavigalugu. (Lukasi 8:49-56; Johannesi 11:39-44) Aamma Jehova Guutitut asannittutut uagutsinnut taamatut neriuuteqalersitsisutut saqqummiuguk. (Jobi 14:14, 15; Johannesi 3:16) Nassuiaruk ajoqersuutit taakku illit qanoq iluaqutigineritit aamma sooq tatigineritit.
20 Aliasuttoq naalagaaffilersaarfimmi ataatsimiigiarnissamut qaaqquneqaruni tullerminnik asannivissunik, qanorlu nakussatseqatigiittoqarsinnaaneranik ilisimannittunik, ilisarisimasaqalersinnaavoq. Sverigemi arnap paasilersimavaa tamannarpiaq inuunini naallugu ujartorsimallugu. — Johannesi 13:35; 1 Thessalonikamiut 5:11.
21, 22. (a) Aliasuttut tuppallersassagutsigik susariaqarpugut? (b) Biibilimik ilisimasaqareersoq qanoq tuppallersarsinnaaviuk?
21 Ilagiinniittumik ilagiilluunniit avataanniittumik aliasuuteqartoqaraangat qanoq oqarnissat qanorlu iliornissat nalornissutigisarpiuk? Grækerit oqaasiat Biibilimi „tuppallersaat“-mik nutserneqartartoq isumaqavippoq „inuup sanianukaqqusaaneq“. Piviusumik tuppallersaasuunermut ilaavoq aliasuttunik ikiuinissamut piareersimajuarneq. — Ussatit 17:17.
22 Taavami tuppallersarniakkavit toqu, utertitsissut makititaanerlu pillugit Biibilimi allassimasut nalunngereerpagit? Ikinngummik uppeqatigisamik najorteqarnerinnaq tuppallernarsinnaavoq. Aliasuttoq oqalukkusuppat tusarnaarnissaanut piareersimagit. Oqaaserpassuaqartariaqarlutit misigissanngilatit. Allassimaffinnik atuaqatigiikkussi taava Guutip oqaasiatut ilinnut aappannullu nakussatsitsisutut atuarsigit. Guutip neriorsuutaasa eqquunnissaannik marluullusi upperinnilluinnarnersi ersersiguk. Guutip misiginneqataanera ersersikkaangakku oqaasianilu sallusuissutit erlinnartut oqaatigigaangakkit aliasuttut ikiorsinnaavatit Jehovamit, ’Guutimit tuppallersaajuartumit’, nakussatsinneqarnissaannik. — 2 Korinthimiut 1:3. (wE 5/1 03)
[Quppernerup ataani ilanngussat]
^ imm. 3 Takukkit atuakkat Ilisarsineq inuunermut naassaanngitsumut sammisoq, kapitali 8; Lad os ræsonnere ud fra Skrifterne, quppernerit 227-34, 265-69; Findes der en Skaber som interesserer sig for os?, kapitali 10; atuagassiaararlu Guutip ilumut soqutigaatigut?
^ imm. 16 Allassimaffiup naanera nutsigaq pisoqaq naapertorlugu ima nutserneqartussaavoq: „Erloqinartumillu ilasarinngilaa“.
Qanoq isumaqarpit?
• Inuppassuit ajunaartoqarneranut kina pisuutittarpaat, taakkulu qanoq ikiorsinnaavavut?
• Allat ikiorniarlugit qanoq iliorsinnaavugut Biibilimi tuppallersaammik tamakkiisumik iluaqutiginnilersillugit?
• Najugaqarfinni inuppassuit suut aliasuutigaat, qanorlu tuppallersarsinnaavigit?
[Atuaqqissaarnermi apeqqutit]
[Qupp. 17-mi assiliartat]
Tusarliussaq tuppallernartoq aliasuffiusumi oqaluussissutigineqarpoq
[Suminngaanneernera]
Qimaasunut inissiaq: UN PHOTO 186811/J. Isaac
[Qupp. 18-mi assiliartaq]
Ikinngutip najuunnerinnaa tuppallernarsinnaavoq