Inuusuttut Jehovap uummataanik nuannaartitsisut

Allaaserisat atuaqqissaaqatigiissutissat makku pingaartumik inuusuttunut Jehovap Nalunaajaasuiniittunut allagaapput. Taamaattumik inuusuttut kajumissaarniarpavut taakku peqqissaartumik atuaqqissaaqqullugit ilagiillu Napasuliaq Alapernaarsuiffik-mik atuaqqissaaqatigiinneranni peqataalluaqqullugit.

„Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ — USSATIT 27:11.

1, 2. (a) Silarsuaq nuannerunartittarukku isumaqarpa kristumiutut atorsinnaanngitsutit? (Romamiut 7:21) (b) Asafip maligassiaa qanoq ilinniarfigisinnaavarput? (Qupp. 23-mi ungalusaq takuuk.)

ATISASSARSINIARLUTIT takorlooriaruk. Nuannarilluinnakkannik takusaqariataarputit. Qalipaataa ilusialu nuannaraatit isumaqarlutillu akikitsuararsuusoq. Taavali iluamik misissorpat. Tupaallaatigisannik malugaat annoraamineq amullartertoq mersornerlugaasorlu. Torrakkaluarluni pitsaassusia ajorluinnartuuvoq. Aningaasaajaatigerusuppiuk?

² Tamanna kristumiutut inuusuttutut illit nalaassinnaasannut eqqaanarpoq. Silarsuarmiittut — soorlu atisat uani allaatigineqartut — takullatsiaannarlugit pilerinarsinnaagaluarput. Assersuutigalugu atuaqatitit immaqa festinut pissanganartunut peqataasarput, ikiaroornartutortarlutik, imigassartortarlutik peerartaaqattaartarlutik katisimanatillu atoqateqartarlutik. Taama inooriaaseqarneq ilaannikkut nuannerunartittarpiuk? Taakkua kiffaanngissuseqarpasinnerat misilerusulaartanngiliuk? Taamaakkuit isumaqaliaarpallaassanngilatit uummatikkut ajortuullutit kristumiutullu atorsinnaanak. Tassami, Biibilimi miserratigineqanngilaq silarsuaq pilerinartorujussuusinnaasoq — aamma inunnut Guutimut kiffartorusuttunut. — 2 Timotheusi 4:10.

3. (a) Sooq silarsuarmi neqeroorutigineqartunik noqqaassutiginninnissaq silatusaarnerunngila? (b) Ullumikkut inuppassuit inooriaaserisaata isumaqannginnera pillugu kristumiu qanoq oqarsimava?

³ Silarsuarli inuuffigisarput iluamik misissulaariaruk, atisat pisiarerusussinnaasavit iluamik misissornerattut. Imminut aperigit: „Silarsuarmi pissutsit qanoq ittuunerat pillugu ’annoraamineq mersorneqarneralu’ sumik takutitsippat?“ Biibilimi allassimavoq ’silarsuaq nungussasoq’. (1 Johannesi 2:17) Taamaattuminguna ingerlanerluttoqassanngippat nuannaarniutit tassanngaanneersut tamarmik atuukkallaannartussaasut. Aamma Guuti soqutiginagu ileqqoqarneq akisoorujussuussaaq. Iluanaarnartutut oqaatigisassaanngilluaasarpoq. Kristumiu ’inuusuttuunermi maangaannartissimaneranik aliasuutiginnittariaqartoq’ oqarpoq: „Silarsuarmiutut inuuneq immaqa kajungernartarlunilu ussernartorsiornartarpoq. Silarsuarmiullu isumaqalerserusuppaatsit aliikkutassiatik  kingunipiloqanngitsumik atorneqarsinnaasut. Tamannali ajornarluinnarpoq. Silarsuarmiut atornerlunniarpaatsit, atornerloreerunitsit atorfissaarutissavaatsit.“ * Sooq inuusuttuunerit inooriaatsimut taama siunertaqanngitsigisumut atulussinnassaviuk?

„Ajortumut“ sernissorneqarneq

4, 5. (a) Toqunngitsiarnermini Jiisusip suna qinnutigaa? (b) Sooq taama qinuneq pissusissamisoorpa?

⁴ Inuusuttut Jehovap Nalunaajaasuiniittorpassuit nalunngilaat silarsuarmi neqeroorutigineqartut pitsaavallaanngitsut. Taamaattumik taakkua silarsuarmut ikinngutaannginnissartik ilungersuutigisarpaat. (Jaaku 4:4) Illit inuusuttut aalajaatsut taakkua ilagaatsit? Taamaappat nersorneqartariaqarputit, ilagisartakkanit tatineqarneq allanillu allaaneruneq sapernarsinnaammata. Iluatsinissannulli ikiorneqarsinnaavutit.

⁵ Toqunngitsiarnermini Jiisusip Jehova qinnuigaa ajoqersukkat ’paareqqullugit ajortoq pissutigalugu’. (Johannesi 17:15, NV) Jiisusip pissutissaqarluarluni Ataatani taama qinnuigaa. Nalunngilaami ajoqersukkaminut ilumoortuarnissaq unamminiarnartuussasoq, qanorluunniit utoqqaassuseqaraluarpata. Sooq? Jiisusip nalunngilaa ajoqersukkami ilaatigut pissaanilissuaq takussaanngitsoq, ’ajortumik’ taasani, tassa Saatani Diaavulu, akerariumaaraat. Biibili naapertorlugu anersaaq ajortoq taanna „løvitut uiannisaartutut angalasarpoq iisassarsiorluni“. — 1 Petrusi 5:8.

6. Saatanip inuusuttut asattuunnavianngikkai qanoq nalunngilarput?

⁶ Inuiaat oqaluttuarisaaneranni Saatanip inunnik peqqarniitsumik naalliutsitsisarnini nuannaarutigisarpaa. Eqqarsaatigeriakkit ajunaarnersuit Jobimut ilaqutaanullu Saatanip atortitai. (Jobi 1:13-19; 2:7) Pisimasut Saatanip nakuusertuuneranik erseqqissumik takutitsisut immaqa nammineq eqqaamasinnaavatit. Diaavulu iisassarsiorpoq, inuusuttullu asattuunnavianngilai. Assersuutigalugu ukiut hundredellit siulliit aallartinneranni Herodesip Betlehemimi nukappiaqqat marlunnik marluk inorlugilluunniit ukiullit tamarmik toqunneqarnissaat pilersaarutigaa. (Matthæusi 2:16) Saatanip Herodesi tamatuminnga isumassarsisissimassagunarpaa nukappiaraq Guutip neriorsuineratut siunissami Missiarsinngortussaq Guutilu sinnerlugu Saatanimut eqqartuussummik naammassinnittussaq piuneerunniarlugu. (1 Mosesi 3:15) Paasinarpoq Saatani meeqqanut inuusuttunullu asannittuunngitsoq. Kissaatigisatuaa tassaavoq sapinngisamik amerlanerpaat iinissaat. Ingammik ullumikkut taamaappoq, Saatani qilammit nunarsuarmut iginneqarsimagami „kamattorsuullunilu,  piffissakissutsi nalunnginnamiuk“. — Saqqummersitat 12:9, 12.

7. (a) Jehovap Saatani qanoq assiginngilluinnarpaa? (b) Inuuneq nuannaarutigerusukkakku Jehovap qanoq isigaa?

⁷ Saatani ’kamattorsuaq’ assiginngilluinnarlugu Jehova ’nallittuingaartuuvoq’. (Lukasi 1:78) Nammineq asannilluinnartuuvoq. Tassami, pissuseq kusanartoq taanna Pinngortitsisitsitta immikkut illuinnartumik pissuserimmagu Biibilimi allassimavoq: „Guutimi tassaavoq asanninneq.“ (1 Johannesi 4:8) Paasisinnaaviuk silarsuup matuma guutia Guutilu illit immikkut pisinnaatitaaffigalugu pallorfigisat qanoq assigiinngitsigisut? Saatani inunnik iisassarsiorpoq, Jehovali ’kimilluunniit tammaqqusinngilaq’. (2 Petrusi 3:9) Jehovap inuit tamarluinnarmik inuunerat erlinnartutut isigaa — aamma illit inuunerit. Oqaatsimini kajumissaaraangamisit silarsuarmut ilaaqqunak inuunermik nuannarinikkunnaarsinniarlutit kiffaanngissutsilluunniit killilerniarlugu taamaaliortanngilaq. (Johannesi 15:19) Akerlianik paaraatit „ajortoq“ pissutigalugu. Ataatavit qilammiusup silarsuarmi nuannaarniutaagallartunit pitsaanerungaartunik misigisaqarnissat kissaatigaa. Kissaatigaa „inuunivik“ — nunarsuarmi paratiisimi inuuneq naassaanngitsoq — misigissagit. (1 Timotheusi 6:17-19) Jehovap piumasaraa anguniagaq tamanna angussagit, angunissaalu tikillugu tapersersorumavaatit. (1 Timotheusi 2:4) Aammattaaq Jehovap qaaqqusissut immikkut ittoq ilinnut tunniuppaa. Taanna sunaagami?

’Uummatiga nuannaartiguk’

8, 9. (a) Jehova tunissummik sumik tunisinnaaviuk? (b) Saatanip Jehova qanoq mitallerpaa, soorlu Jobimik oqaluttuami takuneqarsinnaasoq?

⁸ Ikinngutigilluakkat tunissutissarsiniariarlutit pajukkakku tulluunnera tupaallannera qujamasunneralu takunikuuiuk? Qularnanngitsumik eqqarsaatigeqqissaarsimassavat sumik tunigukku pitsaanerpaassanersoq. Pinngortitsisinnulli, Jehova Guutimut, tunissuteqassagaluaruit sumik tunissagaluarpiuk? Apeqqut aallaqqaammut immaqa eqqumiigissavat. Ajugaqanngitsoq pisariaqartitaanik sumik inuinnannguup tunisinnaagamiuk? Pigeriinngisaanik sumik tunisinnaaviuk? Biibilimi ima akissuteqarpoq: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ — Ussatit 27:11.

⁹ Biibilimi atuarsimassagunarpat Jehovamik mitalliisoq tassaasoq Saatani Diaavulu. Taanna oqarpoq Guutimut kiffaasut tamarmik asanninnermik pissuteqarnatik namminissarsiornermilli pissuteqarlutik kiffartortut. Saatani oqarpoq inuit misilinneqartuugunik pallorfiginninnermit ilumoortumit qimagutipallassasut. Eqqaamajuk Jobi, inuk ajunngitsoq, pillugu Saatanip Jehovamut oqarnera: „Taanna ilaqutaalu pigisaalu tamaasa tamatigut sernissugarisimannginnerpigit? Sulinera tamaat pilluaqqusimavat, nersutaataalu amerlangaaramik nunamut tamarmut siammarsimapput. Ataguli assat isatseriassagit pigisai tamaasa attorlugit, taava kiinnat toqqavillugu perloqqussagaluarpaatit!“ — Jobi 1:10, 11.

10. (a) Jobip ilumoornera kisiat Saatanip apeqqusinngikkaa qanoq nalunngilarput? (b) Akerleriissummi illit qanoq inissisimavit?

¹⁰ Biibilimi ersersinneqarpoq Jobip ilumoornera kisiat Saatanip apeqqusinngikkaa aammali Guutimut kiffaasut allat tamarmik ilumoornerat — aamma illit. Inuiaat ataatsimut isigalugit Saatani Jehovamut oqarsimavoq: „Inuummi [Jobiinnaanngitsup inuulli kialuunniit] pigisani tamaasa akigeriaannaasarpai inuunini annaajumanagu.“ (Jobi 2:4) Paasisinnaaviuk akerleriissummi pingaarutilimmi tamatumani qanoq inissisimasutit? Ussatit 27:11-mi atuakkatsitut Jehova oqarpoq tunineqarsinnaalluni — Saatanimut mitalliisumut akissutissatut atorsinnaasaminik. Eqqarsaatigeriaruk! Silarsuarmi qutsinnerpaasup illit qinnuigaatit oqaluttuarisaanermi akerleriissutit pingaarnersaata aalajangiiffigineqarnissaanut peqataaqqullutit! Ataqqinaatip akisussaaffiullu qanoq angitiginerat paasiviuk? Jehovap ilinnut qinnutigisaa naammassisinnaaviuk? Jobi taamaaliorsinnaavoq. (Jobi 2:9, 10) Aamma Jiisusi allarpassuillu, ilaatigut inuusuttorpassuit, oqaluttuarisaanerup ingerlanerani taamaaliorsimapput. (Filippimiut 2:8; Saqqummersitat 6:9) Aamma illit taamaaliorsinnaavutit. Aamma pingaaruteqarpoq kalluunnaveersaartuuinnarsinnaannginnerit paasissallugu. Inooriaatsikkut takutissavat Saatanip mitalliinera tapersersornerit imaluunniit Jehova tapersersornerit. Kina tapersersussaviuk?

 Jehovap soqutigaatit

11, 12. Jehovamut kiffartorniarlutit aalajangernersutit aalajanginnginnersutilluunniit taassumunnga assigiinngissuteqarpa? Nassuiaruk.

¹¹ Illilli aalajangernissat ilumut Jehovamut pingaaruteqarpa? Inuppassuit aalajaattuarsimasut naammariinnginnamik Saatanip oqaasiinik eqqunngitsuuneraanissamut? Diaavulu oqarsimavoq Jehovamut asanninnermik pissuteqarluni kiffartortoqanngitsoq, oqarsimaneralu eqqunngitsuunerarneqareersimavoq. Jehovalli kissaatigaa illittaaq qilammi nunamilu kisimi oqartussaaneq pillugu akerleriissummi tapersersussagit, inuit ataasiakkaat soqutigigamigit, aamma illit soqutigigamisit. Jiisusi oqarpoq: „Ataatassi qilanniittup piumasarinngilaa minninnguit ukua ilaannik ataatsimilluunniit tammartoqassasoq.“ — Matthæusi 18:14.

¹² Paasinarpoq Jehovap qanoq aalajangernissat soqutigigaa. Tamannaannaanngilarli. Qamuuna attorneqaatigingaarpaa. Biibilimi allassimavoq Jehova misigissutsimigut attorneqangaartartoq inuit ajunngitsulioraangata ajortulioraangataluunniit. Assersuutigalugu ’aliasuutigaa’ Israelikkut pikitsitseqqeqattaartuarnerat. (Tussiaat 78:40, 41, NV) Noap nalaani ulersuup siorna ’inuit ajussusiat angeqimmat’ Jehova „aliasulerpoq“. (1 Mosesi 6:5, 6) Qanoq isumaqarnera paasisinnaaviuk? Ajortumik ingerlanissat aalajangiukkukku Pinngortitsisit aliasutissavat ajuallatsissalluguluunniit. Tamanna isumaqanngilaq Guuti sanngiitsuusoq misigissutsiminilluunniit aqquneqartoq. Naamik, asagamitinuna ingerlalluarnissallu soqutigalugu. Ajunngitsulioraangavilli Jehovap uummataa nuannaartittarpat. Nuannaarnerminut pissutigiinnanngilaa Saatanip sallutuujuneranik uppernarsaaqataanerit aammali akilersinnaagamisit — tamannalu kissaatigingaarpaa. (Hebræerit 11:6) Jehovami Ataataavoq asannittoq ilinnik asanningaartoq.

Maannakkut allaat akilerneqartarputit

13. Sooq maannakkut allaat Jehovamut kiffartorneq iluaqutaava?

¹³ Imaanngilaq aatsaat siunissami Jehovamut kiffartornerit pillugu akilerneqarumaartutit. Inuusuttut Jehovap Nalunaajaasuiniittorpassuit maannakkut allaat inuunertik nuannaarutigalugulu nalerisimaarutigaat, pissutissaqarluarpullu. Tussiaasiortoq allappoq: „[Jehovap] maleruagassiai naapertuilluartuupput, uummammik nuannaartitsisarput.“ (Tussiaat 19:9) Jehovap inunnit tamanit nalunnginneruaa uagutsinnut suna iluaqutaanersoq. Pruffiiti Esaja aqqutigalugu oqarpoq: „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq. Ilumulli inassutikka tusaaniarsimagaluarukkit  taava eqqississutissat ilissagaluarpoq kuussuartut, iluassutsillu immap malingisut.“ — Esaja 48:17, 18.

14. Akiligassaqalernermik pissuteqartunik aliasuuteqalinnginnissannut Biibilimi najoqqutassiat qanoq iluaqutigisinnaavigit?

¹⁴ Biibilimi allassimasunik maleruaanerit aliasuutissarpassuaraluavit anniaatissarpassuaraluavillu pinngitsoortinnissaannut iluaqutigissavat. Assersuutigalugu Biibilimi allassimavoq aningaaserituut ’imminnut amerlasuunik erloqissutissiortartut’. (1 Timotheusi 6:9, 10) Kammalaativit ilaasa tamanna misigisimanerpaat? Inuusuttut amerlasuut akiligassarpassuaqalersimapput atisanik ilisarnaatilinnik imaluunniit elektronikkikkut atortorissaarutinik nutaanerpaaginnarnik peqarusungaaramik. Ukiorpassuarni akiligassarsianik erniakkaanik akilersuisariaqarneq inussiaataanertut ippoq annernartoq. — Ussatit 22:7.

15. Biibilimi najoqqutassiat kinguaassiuutitigut inuunerlunnerup kingunipiluinut alianartunut qanoq illersuutigisinnaavigit?

¹⁵ Kinguaassiuutitigummi inuunerlunneq? Silarsuaq tamakkerlugu ukiut tamaasa inuusuttorpassuit ueqanngitsut naartulertarput. Ilaat kissaatiginaguluunniit pilersorsinnaanaguluunniit perorsarsinnaanngisaminnik meerartaartarput. Allat naartuersittarput taamaalillutillu ilerasuuteqangaartarlutik. Inuusuttorpassuit arnat angutillu kinguaassiuutitigut atoqatigiinnermi nappaatipalaanik tunillatsittarput, soorlu assersuutigalugu AIDS-imik. Jehovamik ilisarisimannittunut ajornerpaaq soorunami unaavoq taassumunnga attaveqarnertik ajoqusertaramikku. * (Galatiamiut 5:19-21) Taamaattumik pissutissaqarluartumik Biibilimi ima allassimasoqarpoq: „Kinguaassiuutitigut inuunerlunneq qimarratigisiuk!“ — 1 Korinthimiut 6:18, NV.

’Guuti pilluartoq’ kiffartorfigiuk

16. (a) Inuusuttuunerit nuannaarutigissagit Jehovap kissaatigigaa qanoq nalunngiliuk? (b) Sooq Jehovap inuunermi najoqqutassanik tunivaatigut maleruartariaqakkatsinnik?

¹⁶ Biibilimi Jehova taaneqarpoq ’Guuti pilluartoq’. (1 Timotheusi 1:11) Kissaatigaa illittaaq pilluassasutit, oqaatsiminimi Biibilimi ima oqarpoq: „Inuusuttuunersi nuannaarutigisiuk. Suli inuusutsillusi pilluarniaritsi.“ (Oqaluussisartup oqaasii 11:9, Today’s English Version) Jehovalli siunissaq ungasinnerusoq eqqarsaatigisarpaa, aamma ileqqut ajunngitsut eqqunngitsullu kinguneri  nalunngilai. Taamaattuminguna ima siunnersoraatit: „Pinngortitsisit eqqaamaniaruk inuusuttuunerpit ulluini, ullut ajortut nalliutinnginneranni ukiullu ima oqaatigisavit pilinnginneranni: ’Taakku nuannarinngilakka!’“ — Oqaluussisartup oqaasii 12:1.

17, 18. Kristumiup inuusuttup Jehovamut kiffartornermini nuannaarnini qanoq oqaatigisimavaa, illillu qanoq taassumatut nuannaalersinnaavit?

¹⁷ Inuusuttorpassuit Jehovamut kiffartorneq nuannaarutigaat. Assersuutigalugu Lina 15-inik ukiulik oqarpoq: „Nuannaarnissannut tulluusimaarnissannullu pissutissaqarluarpunga. Peqqippunga pujortartarnangaluunniit ikiaroortannginnama. Ilagiinni siunnersorneqartarpunga atorsinnaasannik, Saatanillu tatisingaarnerata anigornissaanut iluaqutigisinnaasannik. Nuannaarutigingaartarparalu naalagaaffilersaarfimmi ikinngutit pitsaasut ilagisarsinnaagakkit. Tamanilli nuannequtiginerpaasaa unaavoq nunarsuarmi naassaanngitsumik inuunissaq qilanaarisinnaagakku. Allanit tamanit nallernissaqanngilaq.“

¹⁸ Inuusuttorpassuit Linatut upperisaq tamaviaarutigaat, tamatumalu nuannaalersippai. Paasisimavaat inuunertik ilumut siunertaqartoq siunissaqartorlu, naak ilaannikkut unamminiarnartorpassuaqaraluartoq. Taamaattumik Guuti ilinnik pitsaanerpaamik kissaassiuartoq kiffartorfigiuarniaruk. Uummataa nuannaartikkukku, taassuma aamma illit nuannaartissavaatit — maannakkut naassaanngitsumillu! — Tussiaat 5:12.

[Quppernerup ataani ilanngussaq]

Uteqqiinermi apeqqutit

• Saatanip qanoq navianartorsiortittarpaatit?

• Jehovap uummataa qanoq nuannaartissinnaaviuk?

• Biibilimi qanoq takutinneqarpa Jehovap soqutigigaatit?

• Jehovamut kiffartorneq sunik iluaqutissartaqarpa?

[Atuaqqissaarnermi apeqqutit]

[Qupp. 23-mi ungalusaq/​assiliartaq]

Angut naapertuilluartoq naakkiuteqqajartoq

Israelitoqqami Jehovap naalaffiani Asafi Levikkuusoq nipilersortartuuvoq nuimasoq. Allaat erinarsuutit pallorfiginninnermi atorneqartartut ilaat erinniorlugillu taalliorsimavai. Naak taama immikkut pisinnaatitaaffeqaraluarluni Asafip guutiitsut inooriaasiat nuannerunartilertarpaa. Taakkua Guutip inatsisai unioqqutissinnaarpasimmatigit pillarneqarnatik. Asafip kingusinnerusukkut miserratiginngilaa: „Naakkiuteqqajaasimavunga, isikkakka quaaqqajaasimapput, uumitsaatigisarakkit anneruniartut, takugaangakkit iluaatsut pilluarlutik inuusut.“ — Tussiaat 73:2, 3.

Kingusinnerusukkut Asafi Guutip naalaffianukarpoq, Guutimullu qinuvoq eqqarsaatini oqaatigalugit. Anersaakkut siuneqassuseqaleqqikkami paasivaa Jehovap ajussuseq uumigigaa aamma guutiitsut naapertuilluartullu tamarmik naggataatigut siaruartikkaminnik katersuiumaartut. (Tussiaat 73:17-20; Galatiamiut 6:7, 8) Aap, guutiitsut quasartumiittutut ipput. Siusinnerusukkut pinngippat taava Jehovap aaqqissuussaaneq guutiitsoq manna suujunnaarsippagu orlussapput. — Saqqummersitat 21:8.

[Qupp. 25-mi assiliartat]

Jehovap illit pitsaanerpaamik kissaattuarpaatit, Saatanilli illit iiniarpaatit

[Qupp. 26-mi assiliartaq]

Inuusuttorpassuit uppeqatiminnik kristumiunik Jehovamut kiffartoqatiginninnertik nuannaarutigaat