’Inerititaqarluaritsi’

’Inerititaqarluarnissigut uannut ajoqersugaanersi takutissiuk.’ — JOHANNESI 15:8 NV.

1. (a) Naammassisariaqagaq suna Jiisusip apustiliminut eqqaasaa Jiisusimut ajoqersugaaniaraanni naammassineqartariaqarpa? (b) Uatsinnut qanoq aperisariaqarpugut?

UNNULLUNI Jiisusip toqunissaanut aqaguppoq. Apustilini qiimmassarlugit ikinngutimisut tatigilluakkamisut oqaluffigai. Unnuap qeqqa qaangersimassavaa, ikinngutigilluakkanili asangaaramigit oqaloqatigiinnarpai. Oqaloqatigitillugit imminut ajoqersugaajuassagunik naammassisariaqagaannik suli allamik eqqaasippai. Oqarpoq: „Inerititaqarluarnissigut uannullu ajoqersuganngornissigut Ataataga naalannarsissaaq.” (Johannesi 15:8) Ajoqersukkanut piumasaqaat taanna ullumikkut naammassivarput? ’Inerititaqarluarnissaq’ qanoq isumaqarpa? Unnuk taanna oqaloqatigiinnerat uterfigigutsigu akissutit nanissavavut.

2. Toqunissani aqaguttoq unnukkut Jiisusip assersuusiaq suna oqaluttuaraa?

² Inerititaqarnissamik kajumissaarutini assersuusiornermigut saqqummiuppaa. Jiisusi apustiliminut oqarpoq: „Uanga tassaavunga viinnequt piviusoq, Ataatagalu viinnequtilerisuuvoq. Avalequtit uanniittut inerititaqanngitsut tamaasa peertarpai, inerititaqartullu salittarpai suli inerititaqarneruleqqullugit. Ilissi minguitsooreerpusi oqaaseq ilissinnut oqaatigisara pissutaalluni. Uanniittuaritsi, taava uangattaaq ilissinniittuassaanga. Soorlu avalequt imminik inerititaqarsinnaanngitsoq viinneqummut atajuanngikkuni, taamattaaq ilissi inerititaqarsinnaanngilasi uanniittuanngikkussi. Uanga viinnequtaavunga, ilissilu avalequtaavusi. Inerititaqarluarnissigut uannullu ajoqersuganngornissigut Ataataga naalannarsissaaq. Soorlu Ataatap asagaanga, uangattaaq ilissi asavassi; asannissutsinniittuaritsi. Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu.“ — Johannesi 15:1-10.

3.  Jiisusip ajoqersugai inerititaqarniarlutik qanoq iliussappat?

³ Assersuusiami tassani Jehova viinnequtilerisuuvoq, Jiisusilu orpiuvoq viinnequt. Apustilit Jiisusip oqaluussai avalequtaapput. ’Taassumaniittuarnissartik’ ilungersuutigiuarunikku inerititaqassapput. Apustilit inuunerminnut pingaarutilimmik qanoq taassumaniittuarsinnaasut Jiisusip oqarfigaattaaq: „Inassutikka maleruarussigit asannissutsinniittuassaasi.“ Kingusinnerusukkut apustili Johannesi tamatumunnga assingusumik kristumioqatiminut allappoq: „[Kristusip] inassutaanik maleruaasoq Guutimiittuassaaq.“ * (1 Johannesi 2:24; 3:24) Taamaattumik inatsisaanik malinninnermikkut Jiisusip ajoqersugai taassumaniittuassapput, taassumaniittuarneranillu inerititaqassapput. Inerititarisassattami suna ilisarnaatigissavaat?

 Inerititaqarnerulernissaq

4. Avalequt inerititaqanngikkuni ’peerneqassasoq’ qanoq ilinniarfigaarput?

⁴ Assersuusiaq taanna naapertorlugu viinnequtip killorneqarnissaa Jehovap isumagaa. Tamatuma qanoq paasitippaatigut? Paasitiinnanngilaatigut ajoqersukkat tamarmik inerititaqassasut, aammali paasitippaatigut tamarmik inerititaqarsinnaasut, atukkatik pisinnaasatillu qanoq ikkaluarpataluunniit. Jehovap asanninneranut naapertuutissanngilaq ajoqersugaq ’peerneqarpat’ imaluunniit pisinnaasaminik akornuteqarluni arlaannik iliuuseqanngitsoorluni atorsinnaanngitsutut nalilerneqarpat. — Tussiaat 103:14; Kolossemiut 3:23; 1 Johannesi 5:3.

5. (a) Inerititaqarsinnaaneq pillugu Jiisusip assersuutaata qanoq paasitippaatigut? (b) Inerititat marluk suut misissornerussavavut?

⁵ Viinneqummik assersuut takutitsivortaaq periarfissavut naapertorlugit ajoqersukkatut sulinerunitsigut inissaqartitsinerput annertusartariaqaripput. Tamanna Jiisusip qanoq oqaatigineraa malugeriaruk: „Avalequtit uanniittut inerititaqanngitsut tamaasa peertarpai, inerititaqartullu salittarpai suli inerititaqarneruleqqullugit.“ (Johannesi 15:2) Assersuusiallu naalernerani Jiisusip ajoqersukkani „inerititaqarneruleqqullugit“ (versi 8) kajumissaarpai. Tamatumannga suna ilinniarparput? Jiisusip ajoqersugaatut iliuuserisavut naammagilinngisaannassagivut. (Saqqummersitat 3:14, 15, 19) Inerititaqarneruniarluta periarfissarsiortuartariaqarpugut. Suunuku inerititarissagivut? Tassaapput (1) „anersaap inerititai“ aamma (2) Naalagaaffiup inerititai. — Galatiamiut 5:22, 23; Matthæusi 24:14.

Anersaap inerititai — kristumiut pissusii

6. Pissutsip siulliup „anersaap inerititaanik“ taaneqartartup pingaaruteqarnera Jiisusip qanoq erseqqissarpaa?

⁶ „Anersaap inerititaasa“ oqaluttuarineqarneranni asanninneq siulliullugu taaneqarpoq. Guutip anersaavata kristumiut asanninneqalersittarpai, Jiisusimmi viinneqummik inerititalimmik assersuusiunngitsiarluni apustiliminut oqaaserisai naalappaat: „Inassummik nutaamik tunivassi: Asaqatigiissaasi.“ (Johannesi 13:34) Aap, toqutinnani unnuk kingulleq apustilini oqaloqatigigamigit eqqaasitsissutigiuarpaa asanninnermik takutitsinissaq qanoq pingaaruteqartigisoq. — Johannesi 14:15, 21, 23, 24; 15:12, 13, 17.

7. Inerititaqarnerup kristumiutullu pissuseqarnerup ataqatigiinnerat Petrusip qanoq takutippaa?

⁷ Asanninnerup Jiisusip pigisaata ileqqullu tassunga attuumassutillit Jiisusip ajoqersugaani ilumoortuni takuneqartariaqarnerat Petrusip unnummi unnuamilu tassani najuuttup paasivaa. Ukiorpassuit qaangiuttut kristumiut kajumissaarpai soorlu imminut naalakkersinnaaneq, qatanngutigiittut tunniusimaneq asanninnerlu ineriartortinnissaat pingaarteqqullugu. Nangillunilu oqarpoq taamaaliornerup ilatsiinnartuutissanngikkai inerititaqanngitsoortissanagillu’. (2 Petrusi 1:5-8) Aap, atukkavut qanoq ikkaluarpataluunniit anersaakkut inerititaqarsinnaavugut. Qanortoq asanninnissarput, inussiarnisaarnissarput,  saamasuunissarput kristumiullu pissusiinik allanik nittaanissarput suli annermik ilungersuutigisigu. „Tamakku inatsisini inerteqqutaanngillat!” (Galatiamiut 5:23) Taamaattumik „inerititaqangaarniarta“.

Naalagaaffiup inerititai

8. (a) Anersaap inerititaasa Naalagaaffiullu inerititaasa suna ataqatigiissutigaat? (b) Apeqqut suna eqqarsaatigineqartariaqarpa?

⁸ Inerititat ajoquteqanngitsut qalipaatigissaartullu orpimmut orpikkamulluunniit kusassaataasorujussuusarput. Ilisimaneqartutulli kusassaataannaasussaanngillat. Inerititat kigutaallu orpikkat amerliartornissaannut pingaaruteqarput. Aamma anersaap inerititai taamaapput; kristumiunut ’pinnersaataapput’, pinnersaataaginnanngivippulli. Inerititat kigutaannik ’siaruarterinissatsinnut’, tassa Naalagaaffiup oqariartuutaanik Guutip oqaasianiittumik siaruarterinissatsinnut, pissutsit asanninnertut uppernertullu ittut kajungilersippaatigut. Ataqatigiinneq pingaarutilik taanna apustili Paulusip qanoq erseqqissaraa malugeriaruk: ’Upperpugut’, oqarpoq — eqqaamavarpullu upperneq anersaap inerititaanut ilaasoq — nangipporli: ’Taamaattumik oqaluppugut.’ (2 Korinthimiut 4:13) Paulusip suna pinerlugu erseqqissisippaa ima oqarami: „Taamaattumik Guuti . . . pilliivigiuartigu qujaniutinik, tassa qarlut aqqanik nassuerutiginnittut inerititaannik.“ Tassa taanna inerititarisassatta aappaat. (Hebræerit 13:15) Guutip naalagaaffiani oqaluussisartutut inerititaqarneruniarluta inuunitsinni inissaqarnerulersitsisinnaanerpugut, aap, „inerititaqangaalersinnaanerpugut“?

9. Inerititaqarneq tassaava ajoqersuganngortitsiortorneq? Tunngavilersuigit.

⁹ Tamanna akissagutsigu siullermik Naalagaaffiup inerititaa sunaanersoq paasilluartariaqarparput. ’Ajoqersuganngortitsigaanni’ inerititaqarsimasutut oqassalluni eqqortuua? (Matthæusi 28:19) Inerititavut tassaaneruppat inuppaaluit Jehovamut pallorfiginnittunngorlutik kuisinnissaannut ikiorsimasavut? Naamik. Taamaassimappat tamanna qatanngutitsinnut asasatsinnut ukiorpassuarni angusaqarpiaratik Naalagaaffiup oqariartuutigititaanik oqaluussissutiginnissimasunut nikallornassagaluarpoq. Naalagaaffiup inerititai tassatuaagaluarpata ajoqersukkat nutaat, taava oqaluussisartut taakku eqiasuitsut Jiisusip assersuusiaanisut avalequtaassagaluarput inerititaqanngitsut. Soorunami taamaanngilaq. Naalagaaffiummi suut inerititarineruai?

Naalagaaffiup naatsiiassartaanik siaruarterinikkut inerititaqalerit

10. Suna Naalagaaffiup inerititarineraa inerititarinnginneraalu qanoq Jiisusip angummik naatsiiassanik issunut assigiinngitsunut siaruarterisumik assersuusiaanit ersersinneqarpa?

¹⁰ Angummik nunamut assigiinngisitaartumik issortalimmut naatsiiassanik siaruarterisumik Jiisusip assersuusiaani akissut ersersinneqarpoq, akissut oqaluussiffinni angusaqarfiuallaanngitsuni oqaluussisunut qiimmaallannartuusoq. Jiisusip nassuiarpaa naatsiiassat tassaasut Guutip oqaasia, tassa Naalagaaffiup oqariartuutigititaa, issorlu tassaasoq inuup assersuutaasumik uummataa. Naatsiiassat ilaat ’issorissumut tupput, naajartoramillu 100-riakkanik inerititaqalerput’. (Lukasi 8:8) Inerititat suut? Karrit kaavequtaat naagaangamik inerikkaangamillu kaavequtinik allanik pilersitsinatik naatsiiassartaqalersarput. Kristumiut aamma taamaapput. Kristumiup inerititai tassaasariaqanngillat ajoqersukkat nutaat, tassaasinnaallutilli ’naatsiiassat’ siaruartigassat.

11. Naalagaaffiup inerititaa qanoq nassuiarneqarsinnaava?

¹¹ Taamaattumik uani Naalagaaffiup inerititai tassaanngillat ajoqersuganngorlaat imaluunniit kristumiut pissusii pitsaasut. Naatsiiassaq siaruarterneqartoq tassaavoq Naalagaaffiup oqaasia, taamaattumillu inerititarisaa tassaavortaaq Naalagaaffiup oqaasia — kisianni qassiinngortitaq. Uani tassaavoq Guutip naalagaaffia pillugu oqalunneq, tassa nutaarsiassamik nuannersumik oqaluussineq. (Matthæusi 24:14) Qanorluunniit atugaqaraluaraanni Naalagaaffiup inerititaata nammannissaa — Naalagaaffik pillugu oqaluussinissaq — artornanngila? Aap. Assersuusiami tassanerpiaq sooq taamaannera Jiisusip nassuiarpaa.

 Guutip ataqqinaatissaanik pisinnaasarput tamaat iliuuseqarpugut

12. Naalagaaffiup inerititaanik inerititaqarnissaq kristumiunut tamanut artornanngila? Akissutit tunngavilersoruk.

¹² Naatsiiassat issorissumut tuttut inerititaqalerput „ilaat 100-riaammik, ilaat 60-eriaammik ilaallu 30-riaammik”. (Matthæusi 13:23) Naatsiiassat narsaammut siaruarterneqaraangamik pissarsiassartaasa annertussusiat pissutsinit assigiinngitsunit sunnerneqartarput. Nutaarsiassap nuannersup oqaluussissutiginerani iliuuserisinnaasavut aamma taamaapput; pissutsit atukkavut aamma assigiinngitsuupput, tamannalu naatsorsuutigigini Jiisusip takutippaa. Oqaluussisartut ilaat peqqissuupput nukippassuaqarlutillu; ilaat periarfissarpassuaqalersarput. Iliuuserisinnaasavut allat iliuuserisinnaasaannit annerullutilluunniit minnerusinnaapput, pisinnaasavulli tamakkerlugit iliuuseqarutta Jehovap nuannaarutigissavaa. (Galatiamiut 6:4) Ukioqqortusisimalluta imaluunniit nappaammit killilerneqarsimalluta oqaluussinermut peqataanerusinnaajunnaarsimagaluartugut, Ataatatta paasinnittup „inerititaqangaartutut” isigissavaatigut. Sooq? ’Pigisatsinnik tamanik’ tunigatsinni; uummatitsinnik iluunngarluta kiffartuukkatsinni. * — Markusi 12:43, 44; Lukasi 10:27.

13. (a) ’Inerititaqartuarnissatsinnut’ sumit pingaarnermit kajumissisinneqarpugut? (b) Oqaluussiffigisartakkatsinni ikittuinnaat tusarnaarusuppata inerititaqartuarnissatsinnut suna iluaqutigisinnaavarput? (Ungalusaq qupp. 18-miittoq takuuk.)

 ¹³ Naalagaaffiup inerititaanik annerusumik minnerusumilluunniit inerititaqarsinnaagaluarluta ’inerititaqartuarnissarput’ kajumigissavarput, taamaaliornitsinnut pissutaasoq eqqaamagutsigu. (Johannesi 15:16) Kajumilersitsisoq pingaarnerpaaq Jiisusip eqqaavaa: „Inerititaqarluarnissigut uannullu ajoqersuganngornissigut Ataataga naalannarsissaaq.“ (Johannesi 15:8) Aap, oqaluussigaangatta Jehovap aqqanik kikkut tamarmik takkuanni illernarsisitseqataasarpugut. (Tussiaat 109:30) Arnaq oqaluussisartoq Honorimik atilik 75-it missaannik ukiulik oqarpoq: „Qutsinnerussaartumut oqariartuussisuuneq immikkut pisinnaatitaaffiuvoq, angusaqarfiorpianngitsuniluunniit taamaappoq.“ Claudio 1974-imili kajumilluni oqaluussisartuusimasoq aperineqarpoq angalaartarfimmini ikittuinnaat tusarnaarusukkaluartut qanoq oqaluussiuaannarsinnaanersoq. Johannesi 4:34-mik issuaalluni akivoq, tassani Jiisusi oqarami: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ Claudio nangippoq: „Oqaluussisartutut suliama aallartiinnarnissaa naammagiinnarnianngilara; Jiisusitut naammasserusuppara.“ (Johannesi 17:4) Nunarsuaq tamakkerlugu Jehovamut nalunaajaasoqarpoq Claudiotut isumalinnik. — Ungalusaq „Qanoq ’nikallujuillutik inerititaqartut’“, takuuk qupp. 18.

Oqaluussineq ilinniartitsinerlu

14. (a) Johannesi Kuisisup Jiisusillu kiffartornerat qanoq marloqiusamik siunertaqarpa? (b) Ullumikkut kristumiutut kiffartorneq suua?

¹⁴ Iivangkiiliulersaarutit naapertorlugit Johannesi Kuisisoq siulliulluni Guutip naalagaaffianik oqaluussisuuvoq. (Matthæusi 3:1, 2; Lukasi 3:18) Siullermik siunertaraa ’nalunaajaajartornissaq’, uppernikkullu taamaaliorpoq neriuutigalugu ’kikkut tamarmik taassumuuna uppertunngussasut’. (Johannesi 1:6, 7) Johannesip oqaluussiffigisai arlallit Jiisusimut ajoqersuganngorput. (Johannesi 1:35-37) Taamaattumik oqartoqarsinnaavoq Johannesi oqaluussillunilu ajoqersuganngortitsisuusoq. Aamma Jiisusi oqaluussisartuullunilu ajoqersuisuuvoq. (Matthæusi 4:23; 11:1) Pissusissamisuuginnarpoq Jiisusip ajoqersukkani aamma pisussaaffilermagit Naalagaaffiup oqariartuutaanik oqaluussiutigalutik oqariartuummik ilassinnittut isumassoqqullugit, taakku aamma ajoqersuganngorniassammata. (Matthæusi 28:19, 20) Taamaattumik ullumikkut suliarput oqaluussinerullunilu ilinniartitsineruvoq.

15. Ukiuni hundredelinni siullerni ullumikkullu oqaluussinermut qisuariarnerit qanoq assigiissuteqarpat?

¹⁵ Ukiuni hundredelinni siullerni apustili Paulusip oqaluussineranik ilinniartitsineranillu inuit tusartut ilaat „oqaasiinit qularunnaarsinneqarput, allalli uppinngillat“. (Apustilit Suliaat 28:24) Taamatorluinnaq ullumikkut nalaataqartarpugut.  Amerlanertigut Naalagaaffiup naatsiiassartai ajoraluartumik issorissumut tuttanngillat. Jiisusilli siulittuisimaneratut naatsiiassat ilaat issorissumut tuttarput, naajartorlutik sorlaqalerlutillu. Ukioq kaajallallugu sapaatip-akunneri tamarluinnaasa 5000-it sinnillit Jiisusimut ajoqersuganngortarput ilumoortut! Inoqarpoq ’oqaatigineqartunik upperinnittunik’, naak oqariartuut amerlanersaasa itigartikkaluaraat. Uummataasa Naalagaaffiup oqariartuutaanit killinneqarnerannut suna pissutaaqataava? Oqaluussisartup naatsiiassanik siaruarterlaanik aalajaalluni imerterisup soqutiginninnermik takutitsinera pissutaaqataagajuppoq. (1 Korinthimiut 3:6) Tamatumunnga marluinnarnik assersuuteqassaagut.

Inuttut soqutiginninneq pingaaruteqaqaaq

16, 17. Oqaluussiffigisavut inuttut soqutiginninnermik takutitsivigissallugit sooq pingaaruteqarpa?

¹⁶ Oqaluussisartup inuusuttup Belgiameersup Karolienip arnaq utoqqaq oqariartuummut soqutiginninngitsoq pulaarpaa. Arnap assaata illua nermutilik Karolienip oqaluussisartoqataatalu takuaat, aperaallu arlaannik ikiorsinnaasoralugu. Arnaq qujaannarpoq. Ullulli marluk qaangiummata oqaluussisartut marluk taakku uteqqipput arnarlu utoqqaq qanoq innersoq aperalugu. „Tamanna sunniuteqarpoq,” Karolien oqaluttuarpoq. „Inuttut soqutiginninnerput uissuummissutigeqaa. Iseqquaatigut, Biibilimillu atuaqqissaarluta aallartippugut.“

¹⁷ Oqaluussisartoq USA-meersoq Sandi inuttut soqutiginninnermik takutitseriaatsimik oqaluussiffigisartakkamini sunniuteqarluartumik nassaarsimavoq. Qanittorisamini ilaqutariinnik meerartaartoqarsimasoq tusaraangamiuk angajoqqaanngorlaat sanilitut pulaarlugit Biibilimik oqaluttuaatikka neqeroorutigisarpaa. * Amerlanertigut anaanaasoq angerlarsimasarpoq, nuannaarutigiinnartarpaalu naalungissami pulaartumut takutinnissaa. Tamatigut nuannersumik oqaloqatigiilersarput. „Meeqqap nipituumik atuffartarnissaata qanoq iluaqutaatigissaneranik angajoqqaat oqaloqatigisarpakka; tamannami angajoqqaat meeqqallu akornanni atassuteqarlualersitsisarpoq,“ Sandi oqaluttuarpoq. „Taava ullumikkut silarsuaq taamaatsillugu meeqqanik perorsaanissap qanoq unamminiarnartoqartigineranik oqaloqatigisarpakka.“ Pulaarneq taamaattoq ungasinngitsukkut anaanap meeqqallu arfinillit Jehovamut kiffartortunngornerannik kinguneqarpoq. Siulliullutit iliuuseqarnikkut inuttullu soqutiginninnikkut kiffartorninni immaqa assingusunik nuannersunik misigisaqarsinnaassaatit.

18. (a) Qanoq ililluta tamatta ’inerititaqangaarnissamik’ piumasaqaat naammassiuarsinnaavarput? (b) Jiisusimut ajoqersugaanissamut piumasaqaatit pingasut sorliit naammassiniarlugit aalajangiusimaviuk?

¹⁸ Nuanneqaaq paasillugu ’inerititaqangaarnissamik’ piumasaqaat naammassineqarsinnaasoq! Inuusuttuugaluarutta utoqqaagaluaruttaluunniit, peqqissuugaluarutta napparsimagaluaruttaluunniit, oqaluussiffitsinni inuit tusarnaarumagaluarpata tusarumanngikkaluarpataluunniit tamatta inerititaqangaarsinnaavugut. Qanoq? Suli annerusumik anersaakkut inerititaqarnitsigut pisinnaasavullu naapertorlugit Guutip naalagaaffianik oqariartuummik siaruarterinitsigut. Tamatuma peqatigisaanik ’Jiisusip oqaasiiniittuarnissarput asaqatigiinnissarpullu’ ilungersuutigissavarput. Piumasaqaatit pingaarutillit pingasut Johannesip iivangkiiliuani atuarsinnaasavut naammassigutsigit, taava ’ilumut Jiisusimut ajoqersugaassaagut’. — Johannesi 8:31; 13:35.  (wE 2/1 03)

[Quppernerup ataani ilanngussaq]

Uteqqiinissamut apeqqutit

• Qanoq ittunik inerititaqarnerusariaqarpugut?

• Sooq ’inerititaqangaarnissarput’ ajornanngila?

• Jiisusimut ajoqersugaassagaanni piumasaqaatit pingasut suut Johannesip iivangkiiliua aallaavigalugu sammissavavut?

[Atuaqqissaarnermi apeqqutit]

[Qupp. 18-mi ungalusaq/​assiliartaq]

QANOQ „NIKALLUJUILLUTIK INERITITAQARTUT“

OQALUUSSIFFIUSARTUNI Naalagaaffiup oqariartuutaanut soqutiginniffiuallaanngitsuni qanoq aalajaalluta oqaluussiuarsinnaavugut? Apeqqummut tassunga akissutit atorluarsinnaasut tusariakkit:

„Jiisusi tamakkiisumik tapersersortigalugu nalunagu tamanna nikallujuilersitsillunilu isumalluaqqilernarpoq — taamaappoq oqaluussiffigisartakkami qanorluunniit qisuariartoqaraluaraangat.“ — Harry, 72-inik ukiulik, 1946-imi kuisittoq.

„Oqaatsit Korinthimiunut allakkat aappaanni 2:17-imiittut tamatigut qiimmaallatsittarpaannga. Oqaatsit taakku eqqaasittarpaatigut ’Guutip kiinaata saani Kristusimi’ kiffartortartugut. Kiffartornermut tassunga peqataagaangama ikinngutiginerpaasakka ’peqatigisarpakka’.“ — Claudio, 43-nik ukiulik, 1974-imi kuisittoq.

„Eqqortumik oqassaguma oqaluussineq uannut imaannaanngitsuuvoq. Malugisarparali Tussiaat 18:30-mi oqaatigineqartutut pisoqartartoq: ’Guutima ikiuineratigut qarmaliat qarsuppakka.’“ — Gerard, 79-inik ukiulik, 1955-imi kuisittoq.

„Kiffartortillunga allassimaffimmik ataasiinnarmilluunniit atuffassisinnaagaangama, inuup ataasiinnaalluunniit uummatini Biibilimit killisiortimmagu nuannaarutigisarpara.“ — Eleanor, 26-nik ukiulik, 1989-imi kuisittoq.

„Assigiinngitsunik aallarniiniarlunga misiligartuarpara. Periarfissat inuunerma sinnerani atorsinnaasannit amerlanerupput.“ — Paul, 79-inik ukiulik, 1940-mi kuisittoq.

„Ajortumik qisuariartoqaraangat uannut ajortumik qisuariarnertut isigineq ajorpara. Eqqissisimasumik pissuseqarniarsarisarpunga; inuit oqaloqatigisarpakka isumaallu tusarnaartarlugu.“ — Daniel, 75-inik ukiulik, 1946-mi kuisittoq.

„Misigisarnikuuara kuiserlaat ilaasa orneriarlunga oqarfigigaannga oqaluussinera Jehovamut Nalunaajaasunngornerminnut pissutaaqataasoq. Uanga nalusannik kingusinnerusukkut allanit atuaqqissaaqatigineqartalersimapput siumukarnissaannillu ikiorneqarlutik. Nuanneqaaq eqqarsaatigalugu ikioqatigiilluta oqaluussisartugut.“ — Joan, 66-inik ukiulik,1954-imi kuisittoq.

’Nikallujuillutit inerititaqarnissannut’ suna ikiuutaasinnaava? — Lukasi 8:15.

[Qupp. 16-mi assiliartat]

Anersaap inerititaanik takutitsinikkut Naalagaaffiullu oqariartuutaanik oqaluussinikkut inerititaqangaarsinnaavugut

[Qupp. 19-mi assiliartaq]

Jiisusi qanoq isumaqarpa oqarami apustilini ’inerititaqangaassasut’?