’Assatit pissatsikkit’

OQAATSIT „assak“ aamma „assaat“ qallunaatut Biibilimi 1600-it sinnerlugit taaneqarput, ilaatigut oqariaatsini aalajangersimasuni assigiinngitsuni assersuutitullu atorneqartarlutik. Soorlu oqariaaseq ’assaat minguitsut’ pisuussuteqannginnermut tunngatinneqartarput. (2 Samueli 22:21; Tussiaat 24:3, 4) ’Assaat ammasut’ tukkornermut assersuutaapput. (5 Mosesi 15:11; Tussiaat 145:16) Inuunerminik navianartorsiortitsisoq ’imminut navianartorsiortittutut’ imaluunniit inuunerminik assaminiisitsisutut oqaatigineqartarpoq. (1 Samueli 19:5) ’Assannik nakkaannartitsineq’ nikallunganermut tunngatinneqarpoq. (2 Nalunaarsuutit 15:7) Aamma assaat pissatsippai ’nutaamik sapiissuseqalersippaa’ sulisinnaassuseqarluarnermik isumaqarpoq. — 1 Samueli 23:16.

„Ulluni atugarliungaarfigisatsinni” assatta pissatsinnissaat pisariaqartivipparput. (2 Timotheusi 3:1) Sapileraangatta tunniutiinnaqqajaasarpugut assavullu nakkaannartillugit. Inuusuttuaqqat ilinniarnerminnik taamaatitsiinnartarnerat, angutit nuliaminnik meeqqaminnillu qimatsisarnerat imaluunniit anaanat meeqqaminnik qimatsisarnerat qaqutigoortuunngillat. Kristumiutut assavut pissatsittariaqarpavut Guutip kiffaattut misilinneqartarnivut naammagalugit atussagutsigit. (Matthæusi 24:13) Taamaaliorutta Jehovap uummataa nuannaartissavarput. — Ussatit 27:11.

Qanoq assavut pissatsissinnaagivut

Ezrap nalaani Jerusalemimi Jehovap naalaffiata sananeqarluni aallarteqqinneqarnerani naammassinissaanut juutit assammik pissatsinneqarnissaat pisariaqartippaat. Qanoq pissatsinneqarpat? Imatut allaatigineqarpoq: „Nalliussivik seernarsaateqanngitsumik timiusartorfik nalliussivaat ulluni arfineq-marlunni; nuannaarnerlu angeqaaq. [Jehovammi] nuannaalersissimavai Assyriap kunngiata uummataa taakkununnga saatsillugu taamalu Guutip, Israelip Guutiata, illuata sananeqarneranik tapersersuilersillugu.” (Ezra 6:22) Jehovap anersaaminik juutit angerlartinnissaannut Assyriamiut kunngiat sunnersimavaa, inuillu assai pissatsippai suliaq naammassineqartillugu.

Jerusalemip qarmarsui kingusinnerusukkut iluarsarneqassammata Nehemiap inuiaqatini suliassaannut sapiissuseqalersillugit assai pissatsippai. Imatut allaatigaa: „Taava oqaluttuuppakka Guutip qanoq sernersorluarsimagaanga kunngillu qanoq oqarfigisimagaanga oqarput: ’Qarmaalluta aallartissaagut!’ Suliariniagartillu ajunngitsoq tamaviaarlutik aallartippaat.” Tamaviaarnermikkut Nehemiap juutillu allat Jerusalemip qarmarsui ulluni 52-iinnarni qarmaqqippaat. — Nehemia 2:18; 6:9, 15.

Taamatuttaaq Naalagaaffimmik iivangkiiliup oqaluussissutiginissaanut Jehovap assavut pissatsittarpai. (Matthæusi 24:14) Taamaaliortarpoq ’piginnaaneqartilluta tamatigut ajunngitsuliornissatsinnut, piumasani malillugu iliorsinnaaqqulluta’. (Hebræerit 13:21) Atortussat pitsaanerpaat isumagisimavai. Biibileqarpugut Biibilimiillu ilinniartitsinissamut atortussat atuakkat, atuagassiat, atuagassiaaqqat, naqitaaqqat, båndit videollu pigaavut nunarsuaq tamakkerlugu atorneqartut.  Tassa atuagassiat oqaatsinut 380-it missaanniittunut naqiterneqartarput. Aammattaaq Jehovap isumagaa ataatsimiinnerit ataatsimeersuarnerillu aqqutigalugit sakkut pitsaasut taakku iluaqutigalugit kiffartornitta naammassinissaanut ilinniartinneqarnissarput.

Aap, Jehovap assigiinngitsorpassuartigut assavut pissatsittarpai, kisianni aamma sapinngisamik iliornissatsinnik ilimasuffigaatigut. Eqqaamajuk pruffiitip Elisap kunngimut Joashimut Aramit sakkutuuinut saassussisunut ikioqqulluni saaffiginnittumut oqaasii kingulliit. Elisap kunngi qarsunik tiguseqquaa nunalu taakkuninnga anaaleqqullugu. Oqaluttuarineqarnera imaappoq: „Taassumalu nuna pingasoriarluni anaasarpaa. Guutilli kiffaata kamaatilerpaa oqarfigalugulu: ’Ilumulli tallimariarlutit arfinileriarlutilluunniit nuna anaasimagaluarukku Arami ajorsartilluinnarsimassagaluarpat. Maannali pingasoriaannarlutit Arami ajorsartissavat.’“ (2 Kunngit 13:18, 19) Joashi tamaviaannginnami Arami ajorsartilluinnarsinnaanngilaa.

Tamatuma ilinniutissippaatigut Jehovap uagutsinnut suliareqqusaa naammassiniarlugu aalajangiussimagutsigu tamaviaartariaqartugut. Akornutaasinnaasut ajornartorsiutaasinnaasulluunniit pisariaqanngitsumik aarleqqutiginagit, ilungersorluta uummammillu tamakkiisumik sapinngisarput tamaat iliuuseqartariaqarpugut. Ikioqqulluta Jehova saaffigisariaqarparput assavut pissatseqqullugit. — Esaja 35:3, 4.

Jehovap assavut pissatsissavai

Qularutissaanngilaq Jehovap ikiussagaatigut assavullu pissatsillugit piumasaa malillugu iliorsinnaaqqulluta. Soorunami unamminiarnartunik tamanik tupinnartuliornikkut ikiornavianngilaatigut. Ullut tamaasa Biibilimik atuarnissatsinnik, ataatsimiinnissanut piareersartarnissatsinnik tamatigullu najuuffigisarnissaannut, pisinnaaffigullu tamaasa oqaluussisarnissatsinnik tassungalu qinujuarnissatsinnut ilimasuffigaatigut. Aalajaalluta eqiasuillutalu periarfissaqarnitsinni sapinngisarput tamaat iliuuseqarutta, Jehovap kissaatigisaminik iliuuseqarnissatsinnut pissatsissavaatigut. — Filippimiut 4:13.

Tamanna kristumiup misigaa ukiup ataatsip ingerlanerani nuliani anaananilu toqummata. Suli aliasuutigingaarai ernera nuliaminit kristumiutut inooriaatsimik tunussisumit qimanneqarpoq. Qatanngut oqarpoq: „Ilikkarpara qanoq, qaqugu imaluunniit qanoq akulikitsigisunik misilinneqarnissarput nammineq aalajangersinnaanngikkipput.” Ingerlariaqqinnissaminut qanoq nakussatsinneqarpa? „Qinunerup namminerlu atuaqqissaarnerup napatissimavaannga. Anersaakkullu qatanngutima tapersersuinerat tuppallersaataasimaqaaq. Tamanit pingaarnerusumik ilikkarpara, artornartumik pisoqartinnagu Jehovamut nammineq qanittumik attaveqarnerup ineriartortinnissaata pingaaruteqassusia.”

Inuunerit qanorluunniit ingerlasimagaluarpat, aalajangerit aalajaallutit Jehova tatiginiarlugu assavullu pissatsinniarlugit iliuuserisai tamaasa atorluarlugit. Taava Jehova pitsaanerpaamik kiffartuussinnaassavat taamaalillutillu aqqa erlinnartoq ataqqillugulu unnersiutigalugu. — Hebræerit 13:15.  (wE 12/1 02)

[Qupp. 31-mi assiliartaq]

Joashi tamaviaannginnami Arami ajorsartilluinnarsinnaanngilaa