Ajornartorsiorfinni tuppallersaat

NUTAARSIASSAT ullumikkut qaqutiguinnaq qiimmassaataasarput. Ataaseq allassimavoq „ullumikkut pisartut amiilaarnartangaarmata allaat tv-aviisi takussanerlugu takussannginnerluguluunniit aalajangerniarneq ajornartarpoq.“ Silarsuaq sorsunnernik, peqqarniisaarnernik, erloqinartunik, pinerlunnernik nappaatinillu ulikkaarpoq — tamarmik uagutsinnut tassanngaannaq eqquisinnaasut, taamaattoqareersimanngippat!

Taamatorluinnaq pisoqarnissaa Biibilimi siulittuutigineqarpoq. Nalerput pillugu Jiisusi oqarpoq sorsunnersuaqartarlunilu nunami sajunnersuaqartarumaartoq, nappaassuaqartarlunilu kaannersuaqartarumaartoq. (Lukasi 21:10, 11) Aamma apustili Paulusi „ullut atugarliungaarfissat“ pillugit allappoq, inuit tassaalerumaartut qiningasut, aningaaserituut, ajunngitsunut akeraasut. Piffik tamanna ’ullussanik kingullernik’ taavaa. — 2 Timotheusi 3:1-5.

Taamaalilluni nunarsuarmi pisartut nutaarsiassani aallakaatinneqartartut Biibilimi siulittuutigineqartutulli iinnangajapput. Assigiissutaalli taannaannaavoq, Biibilimi allamik isiginnittaaseqarmat. Guutip oqaasia isumassarsiarititaasoq iluaqutigalugu, ajortorpassuaqarnera kisiat pinnagu aamma siunissap qanoq nassataqarumaarnera paasisinnaavarput.

Ajussuseq Guutip qanoq isigigaa

Biibilimi nassuiaanneqarpugut pissutsit ajortut ullumikkut atuuttut Guutip qanoq isiginerai.  Ajornartorsiungaarfiit siulittuutigisimagaluarlugit, pisartut nuannarinngilai naassaanngitsumilluunniit akueriinnarumanagit. „Guutimi tassaavoq asanninneq,“ apustili Johannesi allappoq. (1 Johannesi 4:8) Jehovap inuit isumassungaarpai ajortullu tamarluinnaasa uumigalugit. Taamaattumik tuppallersarneqarumalluta tulluartumik Guutimut, ajunngitsuusumut, uagutsinnut misiginneqataasumut, piginnaassuseqarluni ajortunillu nunamit piiaarusussuseqartumut saaffiginnissinnaavugut. Tussiaasiortoq allappoq: „[Guutip qilammi kunngitut ivertitaata] annaatissavai piitsoq ikioqqulluni suaartartoq annikilliortitarlu ikiortissaaleqisoq. Nallittussavai sanngiitsut piitsullu, piitsullu inuunerat annaatissavaa. Aniguisissavai qunutitaanermit nakuuserfigisaanermillu, aavat erlinnangaartuuvoq taassuma isaani.“ — Tussiaat 72:12-14.

Naalliuttut naakkigaagit? Taamaakkunarpoq. Guuti assilillugu pinngortitaagatta, pissuseq tamanna uagutsinnut ikkussimavaa. (1 Mosesi 1:26, 27) Taamaattumik tatigilluinnarsinnaavarput Jehova inuit naalliuutaannut misigittaatsuunngitsuusoq. Jiisusip, kikkunnit tamanit Jehovamik ilisarisimanninnerusup, Jehovap uagutsinnik soqutiginningaarnera uagutsinnillu misiginneqatiginningaarnera oqaatigaa. — Matthæusi 10:29, 31.

Guutip pinngortitarsuata aamma takutippaa inuiaqatigiinnik isumassuisuusoq. Jiisusi oqarpoq Guutip ’seqerni ajortunut ajunngitsunullu nueqqusaraa siallersitsisarlunilu iluartunut iluaatsunullu’. (Matthæusi 5:45) Illoqarfiup Lystrap inuinut Paulusi oqarpoq Guuti ’imminut nalunaajaassutigisimasoq ajunngitsuliornermigut tunisarlugit qilammit sialummik ullunillu naalluarfiusunik, qaarsillartittarlugit uummataallu nuannaartittarlugit.’ — Apustilit Suliaat 14:17.

Kina ajussutsimut pisuua?

Paulusip pisumi tassanerpiaq aamma qanoq oqarnera maluginiagassaavoq: „Siornatigut Guutip inuit Guutimik nalusut tamaasa namminneq ingerlavigiumasaasigut ingerlatissimavai.“ Tamanna tunngavigalugu inuiaat — tassa inuit namminneq — ajornartorsiutitik amerlanerit akisussaaffigaat. Guuti pisuutinneqarsinnaanngilaq. — Apustilit Suliaat 14:16.

Ajortunik pisoqartarnera sooq Guutip akueraa? Tamanna qaquguluunniit iliuuseqarfiginiarpaa? Apeqqutit tamakku taamaallaat Guutip oqaasiani, Biibilimi, akineqarput. Tassami akissutaat anersaamut allamut apeqqummullu akerleriissutaasumut, anersaat silarsuaanni taassumannga aallarnerneqartumut, attuumassuteqarpoq.

[Qupp. 4-mi assiliartaq]

Inuit naakkinnittuupput. Guuti inunnik naalliuttunik qanoq misiginneqataatigissava?

[Suminngaanneernerat]

Qulleq saamerleq, Kroatia: UN PHOTO 159208/S. Whitehouse; meeraq kaattoq: UN PHOTO 146150 BY O. MONSEN