Qanoq tassanngaannaq anersaakkut uummatilunnaveersaartoqarsinnaava?

Timersortartoq silarsuarmi pikkorinerpaat ilaat peqqilluinnarsorinartorlu sungiusarluni tassanngaannaq uppilluni toquvoq. Sergei Grinkovimik ateqarpoq, olympiademilu sukuutsernermi marloriarluni ajugaasimavoq. Timersortartutulli ingerlallualeruttorfimmini iluatsikkiartornera tassanngaannaq naavoq. 28-iinnarnik ukioqarluni toquvoq. Pisimasumut alianartumut suna pissutaava? Tassanngaannaq uummatilulerneq. Oqaatigineqarpoq uummatilunneranik takussutissaqanngivissoq toquneralu taamaammat pakasaalluinnartuusoq. Misissuinermili ersarippoq uummataa allisoorsimasoq taqarsuit uummammiittut nerukillisimaqisut.

NAAK siumut takussutissaqanngitsumik tassanngaannaq uummatilulertorpassuaqarunaraluartoq nakorsat oqaasissaqarluartut naapertorlugit qaqutigoortuuvoq. Amerlanertigut mianersoqqussutaasut sunneeqataasullu soorlu anernikilliorneq, sakisakkut anniarneq oqimaarpallaarnerlu sumiginnarneqartarput. Naak uummatiluleriataarneq tamatigut toqussutaasariaqanngikkaluartoq amerlasuut inuunermi sinnerani imaannaanngitsumik innarluuteqalertarput.

Nakorsat amerlanerit isumaqatigiissutigaat nerisassat inooriaatsillu eqqumaffigineratigut akulikitsumillu misissortittarnikkut uummatiluleriataarneq pitsaaliorneqarsinnaasoq. * Taamatut pinaveersaartitsigaanni pisariaqartunillu allannguiumalluni uummatiluleriataarnerup kingunerisa alianartut ingalannissaannut iluaqutaasorujusuussaaq.

Uummatitsinnulli tunngatillugu allamik eqqumaffiginninnerusariaqarpugut. Biibilimi ima mianersoqquneqarpugut: „Paarisassannit tamanit annermik uummatit paariuk inuuneq tassannga aallaaveqarmat.“ (Ussatit 4:23) Allassimaffimmi ingammik uummat assersuutaasoq pineqarpoq. Uummaterput piviusoq paariniarlugu eqqumasariaqarpugut, kisiannili uummaterput assersuutaasoq anersaakkut nappaatinut toqussutaasinnaasunut illersorniarlugu eqqumanerusariaqarpugut.

 Uummatiluleriataarnermut assersuutaasumut pissutaasut

Assersuutaasumik uummatiluleriataarnermut pitsaaliuiniaraanni pissutaasut ilisimanissaat iliuuseqarfiginninnerlu pisariaqarput, soorlu uummallunnermi piviusumi taamaattoq. Timikkut anersaakkullu uummallulersitsisinnaasut tunngaviusut ilaat misissoriartigik.

Nerisassat. Naak junkfoodit (tassa nerisassat inuussutissartaqarpianngitsut orsoqarpallaartut imaluunniit sukkoqarpallaartut) mamarsinnaagaluartut inuussutissartaqarpiannginnerat amerlanernit isumaqatigiissutigineqarpoq. Eqqarsartaatsikkut junkfoodit, ullumikkut sumi tamaani pissarsiarineqarsinnaasut, assingusumik misigissutsinut kajungernarput anersaakkulli peqqissutsimut ajoqutaallutik. Tusagassiuutitigut peqqusersiortumik neqeroorutigineqartut amerlanersaasa, kinguaassiuutitigut eqqunngitsumik atoqatigiinneq, ikiaroornartumik atornerluineq, nakuuserneq anersaarsiornerlu, saqqummiuttarpaat. Isuma nerisassanik taamaattunik immersorneqaruni uummammut assersutaasumut toqussutaassaaq. Mianersoqqussutitut Guutip oqaasiani ima allassimasoqarpoq: „Silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput. Silarsuarlu piumatussusialu nungussapput, Guutilli piumasaanik iliortoq naassaanngitsumik atassaaq.“ — 1 Johannesi 2:16, 17.

Junkfoodit sungiussimagaanni nerisassat peqqinnartut, soorlu paarnat naatitallu, kajungernarunnaartarput. Taamatuttaaq isuma uummallu silamiut aliikkusersuutaannik immersortaraanni anersaakkut inuussutissat tamuasarissat kajungernarunnaartarput. Immaqa piffissami sivikitsuinnarmi ’immuk’ Guutip oqaasianeersoq inuussutigineqarsinnaavoq. (Hebræerit 5:13) Ungasinnerusorli eqqarsaatigalugu anersaakkut inersimassutsimut alliartuutaanngilaq, tamannami ilagiinni kiffartornermilu akisussaaffinnik tunngaviusunik naammassinninnissamut pisariaqarluinnarpoq. (Matthæusi 24:14; 28:19; Hebræerit 10:24, 25) Ilaat anersaakkut ima sangiitsigilersimapput allaat unittoorlutik imaluunniit nalunaajaasarunnaarlutik.

Ulorianartoq alla tassaavoq qallikkut salloqittaasinnaaneq. Isertorluni pigisalerituunngorsimatilluni imaluunniit aliikkusersuutinik kinguaassiuutitigut inuunerlunnermut, nakuusernermut anersaarsiornermulluunniit tunngasunik sammisaqalersimatilluni uummatip assersuutaasup sanngiilliartornera isertuunneqarsinnaavoq kristumiutut akisussaaffiit qarsuppittumik naammassineratigut. Immaqa isumaqartoqarsinnaavoq nerilluartannginnerup anersaakkut qanoq issuseq sunnernavianngikkaa, assersuutaasumilli uummat ajoquserneqarsinnaavoq, soorlu nerisalunnerup taqarsuit uummammiittut qerattartoortissinnaagai uummallu ajoquserlugu. Jiisusi mianersoqqusivoq kissaatigisapiluit uummammiuliuteqqunnagit. Oqarpoq: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ (Matthæusi 5:28) Aap, anersaakkut nerisalunneq anersaakkut tassangaannaq uummatilulernermik kinguneqarsinnaavoq. Kisiannili allanittaaq eqqumaffiginnittariaqarpugut.

 Timersorneq. Naluneqanngilaq qasuersimaarpallaarneq uummatiluleriataartitsisinnaasoq. Anersaakkut qasuersimaarpallaarneq aamma kingunipiloqarsinnaavoq. Immaqa qatanngut kristumiutut kiffartoqataalaartarpoq ilorrisimaarusunninili akornuserneqaqqunagu imminut killilersimaarluni. Taamaattumik „sulisutut kanngusuutissaqanngitsutut oqaatsimik sallusuissutaasumik nassuiaasutut“ suliniarluni immannguaannaq iliuuseqartarpoq iliuuseqanngivilluniluunniit. (2 Timotheusi 2:15) Imaluunniit ilaat kristumiut ataatsimiinnerinut ilaannikkuinnaq najuuttarput piareersarsimanngisaannangajakkamilli akeqataasarnatik. Immaqa anersaakkut ittunik anguniagaqanngillat sammisaqarusunngivillutilluunniit. Piffissap ingerlanerani anersaakkut timersortannginneq taamaattoq uppernermik sanngiillisitsisinnaavoq, aap toqussutaasinnaavoq. (Jaaku 2:26) Apustili Paulusi kristumiunut hebræeriusunut allakkami, navianartoq tamanna tikkuarpaa. Taakkua ilaat anersaakkut tunngasutigut qasuersimaarpallaalersimagunarput. Tamatuma anersaakkut ittunik pingaartitsinerannik manngertunngortitsisinnaaneranut Paulusi qanoq mianersoqqusisoq malugiuk. „Qatanngutit, sianiginiarsiuk ilarsi kinaluunniit uummateqanngisaannassammat ajortumik uppinngitsumillu, Guutimik uumasumik tunussisumik, ullulli tamaasa immissinnut oqaaqqissaaqatigiittaritsi ’ullumi’ qarallartillugu, ajortip salloqittaaneratigut manngertittoqaqqunasi.“ — Hebræerit 3:12, 13.

Uippakajaarneq. Uippakajaarneq uummatiluleriataarnermut pissutaasut ilungersunarnerpaat ilagaat. Taamatuttaaq uippakajaaraanni imaluunniit inuunerup matuma piinik isumakuluutinik nanertuuteqaraanni uummammut assersuutaasumut aseruutaasinnaavoq. Allaat Guutimut kiffartornermi unittoortitsisinnaavoq. Taamaammat Jiisusip mianersoqqussutaa naleqquppoq: „Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit.“ (Lukasi 21:34, 35) Isertorluta ajortuliorsimalluta sivisuumik ilerasuuteqarutta tamanna uippakajaarnermik kinguneqarsinnaavoq uummallu assersuutaasoq ajoquserneqarluni. Kunngi Daavip misilittakkaminit nalunngilaa ajoqusiisumik uippakajaarneq qanoq annernarsinnaatigisoq. Taamaattumik ima allappoq: „Saanikka aserorsimanngitsortaqanngillat ajortulisimanera pissutaalluni. Ajortuliama artorsippaannga,  nanertuutaalerpoq uannut oqimaappallaartoq.“ — Tussiaat 38:4, 5.

Imminut tatigivallaarneq. Tassangaannaq uummatilulinngitsiarlutik amerlasuut peqqissuunasorigaluarput. Nakorsiarnissaminnik siunnersorneqarnertik itigartittarpaat pisariaqanngivissutulluunniit quiasaarutigisarlugu. Ukiorpaalunni Jehovamut kiffartorsimasut ilaat isumaqalersinnaapput anersaakkut innarlerneqarsinnaanatik. Immaqa anersaakkut peqqissusertik misissortinngitsoortarpaat imaluunniit timip mianersoqqussutai sumiginnartarlugit, ajunaarnersuarli nalliukkumaarpoq. Pingaaruteqarpoq apustili Paulusip imminut tatigivallaarneq pillugu ilitsersuutaa eqqarsaatigissallugu: „Taamaattumik kinaluunniit patajaatsuusorisoq mianersorli orloqqunani.“ Silatusaarnerussaaq naammalluinnanngissuserput miserratiginngikkutsigu ilaannikkooriarlutalu anersaakkut peqqissuserput misissortarutsigu. — 1 Korinthimiut 10:12; Ussatit 28:14.

Mianersoqqussutit sumiginnaqinagit

Pissutissaqarluartumik uummatip assersuutaasup qanoq innera Biibilimi pingaartinneqarpoq. Jeremiap allagai 17:9, 10-mi allassimavoq: „Tamanit annerusumik uummat tatigisassaanngitsuuvoq. Katsorsagassaanngilaq; Kiammi inuup uummammiugisai ilisimasinnaavai. Uanga, Naalagaq, uummatit misissuiffigisarpakka tartullu misilittarlugit, kinaluunniit pisassaanik pitikkumallugu inuuserisaa suliaalu missiliuutigalugit.“ Uummatitsinnik misissuinermi saniatigut Jehovap aamma asannilluni periarfissippaatigut nammineerluta ummatitta misissornissaanut.

„Kiffaq ilumoortoq silatoorlu“ aqqutigalugu uummatitsinnut assersuutaasumut ulorianarsinnaasunik piffissaq eqqorlugu mianersoqqunneqartarpugut. (Matthæusi 24:45) Assersuutigalugu uummatitsinnit salloqqittartissinnaavugut silarsuarmi isummat kissaatigissallu piviusuunngitsut eqqarsaatigiuaannarlugit. Tamatuma annertuumik ajoqusersinnaavaatigut, ingammik mingunnartunik eqqarsartippatigut. Taamaattumik silarsuarmi isummat kissaatigissallu eqqarsaatiginaveersaartariaqarpavut. Jiisusitut eqqunngitsuliorneq uumigigutsigu uummaterput tamakkununnga illersussavarput. — Hebræerit 1:8, 9.

Aamma kristumiut ilagiivini utoqqaanertanit asannittunit ikiorneqarsinnaavugut. Ikiuineq tamanna qanorluunniit nuannaarutigitigigaluarutsigu uummatitta assersuutaasup paarinissaanut naggataatigut nammineq akisussaaffeqarpugut. Uagut tamatta immikkut ’suut tamaasa paasiniaqqissaartariaqarpavut’, aamma ’immitsinnik paasiniaaffigisariaqarpugut uppernermiinnersugut’. — 1 Thessalonikamiut 5:21, NV; 2 Korinthimiut 13:5.

Uummat paariuk

Najoqqutaq Biibilimeersoq, „Inuup siaruartikkani aamma katersorumaarpai“,uummatip assersuutaasup peqqissuutinnissaanut aamma atuuppoq. (Galatiamiut 6:7) Anersaakkut ittunik tassangaannaq pingaartitsiunnaartoqaraangat amerlanertigut sivisuumik isertorlutik anersaakkut aseroriartuutaasunik soorlu tiingasulersaarutinik sammisaqarnerat, timip piinik isumakuluuteqarpallaarnerat, imaluunniit inuiaqatigiinni nuimasumik atorfeqalerniartarnerat pissutaasarput.

Uummaterput paariniarutsigu anersaakkut nerisassavut eqqumaffigisariaqarpavut. Isumarput uummaterpullu Guutip oqaasianik immersortariaqarpavut, eqqarsartaatsikkullu junkfoodit ussernartut uummammulli assersuutaasumut misigittaatsunngortitsisut ingalassimallugit. Tussiaasiortup assersuut una, kingusinnerusukkut nakorsanit uppernarsineqarsimasoq, atorpaa: ’Uummataat orsutut misigittaatsigaat.’ — Tussiaat 119:70, Tastamantitoĸaĸ.

Sanngiissutit isertorlugit sivisuumik ajornartorsiuteqarsimagaanni uummammip assersuutaasup taqarsui militsinnagit ajugaaffiginiarlugit ilungersortariaqarpoq. Silarsuaq kajungernarsilerpat sukisaarsaarutinillu nuannaarniutinillu neqeroorutissarpassuaqarsorinarpat apustili Paulusip siunnersuutaa eqqarsaatigeqqissaarneqartariaqarpoq:  „Imali oqarpunga, qatanngutit: Piffissaq sivikilleqaaq, matumalu kingorna . . . silarsuarmillu atuisut atuinngitsutut [issapput]. Tassami silarsuaq maannakkutut ittoq aserorumaarpoq.“ (1 Korinthimiut 7:29-31) Pigisatigullu pisuussutit kajungerigaanni Jobip oqaasii uku eqqarsaatigineqartariaqarput: „Kuulti isumalluutigisimanerpara, imaluunniit oqarsimanerpunga kuulti akuitsoq tatigalugu? Tamanna iluanngitsuliaasimassagaluarpoq pillarneqaataasussaq; taava Guuti qutsissumiittoq miserratigisimassagaluarpara.“ — Jobi 31:24, 28; Tussiaat 62:11; 1 Timotheusi 6:9, 10.

Unnersuussutinik Biibilimeersunik pisartakkatsinnik sumiginnaaneq ileqqorigutsigu tamanna navianartuuvoq. Tamatumunnga atatillugu Guutip oqaasiani ima mianersoqqussuteqarpoq: „Inuk avoqqaarineqartuaraluarluni naalasseriitsoq tassanngaannaq sequmisinneqarumaarpoq katsorsarneqarsinnaajunnaarlunilu.“ (Ussatit 29:1) Akerlianilli uummaterput assersuutaasoq paarigaangatsigu isumakkut nuannaarneq eqqissinerlu, inuunerup pilimanianngitsup — kristumiussutsip ilisarnaatigiuaannagaata — kingunerisai, misigisinnaasarpavut. Apustili Paulusi isumassarsisinneqarluni allappoq: „Nalunanngilarlu Guutimik mianerinninneq naammagittarnermik ilaqartoq taamaalluni immini iluanaarnaraluartoq; sunnguamimmi nassataqarata silarsuarmut matumunnga pisimagatta aamma sunnguamik nassataqarnata silarsuaq manna qimattussaavarput. Nerisassaqarlutalu atisassaqarutta tamakku naammagissavavut.“ — 1 Timotheusi 6:6-8.

Aap, Guutimik mianerinninnerup ineriartortittuarneratigut nukittuumik peqqissumillu assersuutaasumik uummateqarluta qulakkeersinnaavarput. Aamma anersaakkut nerisassavut eqqumaffigalugit silarsuarmi inooriaaseq eqqarsartaaserlu aseruutaasut, uummatitsinnik assersuutaasumik ajoqusiinissaannut periarfississanngilavut. Pingaarnerpaamilli: Qanortoq peqatigiiffini aqqutigalugu Jehovap aaqqissuussineri atorluarlugit uummatitsinnik assersuutaasumik akulikitsumik misissuiuarta. Taamaaliortarutta tassanngaannaq uummatilulernerup kingunerinik alianartunik pinngitsuuiniarnermut iluaqutaasorujusuussaaq. (wE 12/01 01)

[Quppernerup ataani ilanngussaq]

[Qupp. 22-mi issuagaq]

Anersaakkut nerilluartannginnerup uummat assersuutaasoq ajoqusersinnaavaa soorlu nerisalunneq taqarsuarnik uummammiittunik qerattartoortitsisinnaasoq uummallu ajoquserlugu

[Qupp. 22-mi issuagaq]

Anersaakkut qasuersimaarpallaarneq kingunipiloqarsinnaavoq

[Qupp. 23-mi issuagaq]

’Inuunerup matuma piinik isumakuluutit’ uummammut assersuutaasumut toqussutaasinnaavoq

[Qupp. 23-mi assiliartaq]

Anersaakkut peqqissusermik sumiginnaaneq annernartunik ajornartorsiuteqalersitsisinnaavoq

[Qupp. 25-mi assiliartaq]

Ileqqunik pitsaasunik anersaakkut ittunik ineriartortitsinikkut uummat assersuutaasoq illersorneqartarpoq

[Qupp. 21-mi suminngaanneernera]

AP-ip assiutaa/​David Longstreath