Suna naleqavippa?

Naleqangaartunik pigisaqarluni nalerisimaarnarsinnaavoq. Suusinnaappalli? Aningaasarpassuit? Pinnersaatit? Tusaamasaaneq ataqqisaanerlu? Inuppassuit tamakku pingaartingaartarpaat. Toqqissisimasutut isumannaatsutullu aammalu akuerineqarusunnermissut akuerineqartutut misigitissinnaavaat. Siunissami anguniakkatta kissaatittalu piviusunngorumaarnissaat neriuutigalugu taakku noqqaassutigaavut?

AMERLANERIT pingaarnerutitaat tassaagajupput pisariaqartitaminnik matussutissiisut, kissaatimittulluunniit nalerisimaalersitsisut. Inuulluataarutit isumannaatsumillu siunissaqalersitsisut nuannaraavut. Iluaqutaasut massakkorpiarlu qiimmassaasut uagutsinnillu nuannarinnilersitsisut pingaartippavut. Kissaatit soqutigisallu allanngorartuartut tunngavigalugit nalilersuineq, uungaannaq isigineruvoq. Naleqavissut pisariaqartinnerpaasatsinnit aalajangerneqartarput.

Suut pisariaqartinnerpaavavut? Inuunermit minnerunngitsoq. Inuuneqanngippat piunavianngilagut. Israelitoqqami kunngi Salomo allappoq: ’Toqungasut sunnguamilluunniit ilisimasaqanngillat, . . . toqusut inaanni ornitanni suliassaqanngilaq ataqatigiinneqaraniluunniit ilisimasassanik ilisimassusermilluunniit peqarnani.’ (Oqaluussisartup oqaasii 9:5, 10) Toqoriataassagaluarutta pigisavut tamarluinnaasa annaasussaavagut. Pingaarnerutitassarput tassaavoq uagutsinnik inuuinnartitsisinnaasoq. Sunaassava?

Suup inuuinnartissinnaavaatigut?

’Aningaasat alanngortaliisarput,’ Salomo oqarpoq. (Oqaluussisartup oqaasii 7:12) Naammattunik aningaasaateqaraanni angerlarsimaffigissaartoqarsinnaavoq nerisassaqarlunilu. Utoqqalilluni sanngiillillunilu sulisinnaajunnaaraanni aningaasaateqarlunili pingaarutillit ernummatiginagit nunanut allanut angalaneq nuannaarutigineqarsinnaavoq. Aap, aningaasaateqarneq iluaqutissartarpassuaqarpoq. Aningaasalli inuuinnartissinnaanngilaatigut. Apustili  Paulusip Timotheusi kajumissaarpaa: „Silarsuarmi matumani pisuut peqqusiffigissavatit makitaniaqqunagit pisuussutitilluunniit allanngujasut isumalluutigeqqunagit, isumalluutigeqqulluguli Guuti pisariaqakkatsinnik naammattunik tunniussisoq.“ (1 Timotheusi 6:17) Silarsuarmi aningaasat inuuneqalersissinnaanngilaatigut.

Hitoship misigisaa maluginiaruk. Hitoshi piitsuulluni peroriartorpoq, taamaattumillu pisuunngornissani kissaatigingaarlugu. Nunap piinut nalilinnut ima isumalluuteqartigaaq allaat inuit ilumoorfiginninnerat pisiarisinnaasoralugu. Ullut ilaanni angut Hitoship matuanut kasuttorpoq aperalugulu nalunnginneraa Hitoshi pillugu Jiisusi Kristusip inuunini pilliutigisimagaa? Hitoshi alapernaalerpoq inuk namminermisut ittoq pillugu kialuunniit toqunissaa ilimaginnginnamiuk. Sapaatip-akunnerata tulliani tamanut ammasumik oqalugiaat tusarnaarpaa tupaallaatigalugulu oqalugiartup tusarnaartut kajumissaarmagit ’isitik qaammaarittissagaat’. Isi ’qaammarissoq’ anersaamut tunngasunik pingaartitsivoq siunissamullu ungasissumut isigisinnaalluni. (Lukasi 11:34) Hitoship pisuussutit ilungersuutigiunnaarlugit anersaakkut nalillit salliutilerpai.

Aammattaaq pisuussutit killilimmik toqqissisimatissinnaallutalu inuunerput allanngujaatsissinnaavaat. Peqangaarluni ulluinnarni pisariaqartitat ernummatigisariaqanngillat. Akimarpaluttumi angerlarsimaffigissaarluni angusaqarluartutut misigisimanarpoq. Atisat kusanartut biilillu torrattut allanit qummut isigineqalissutigisinnaavavut.

’Suleruloornermi inerititat inuulluutigisinnaallugit’ nuanneqaaq. (Oqaluussisartup oqaasii 3:13) Peqangaarluni qanigisanut oqartoqarsinnavoq: „Eqqasuutaarupputit, nerillutillu imerniarit inuulluataarlutillu!“ Pigisalli naleeruteriaannaapput. Jiisusip piumatuuneq mianersorfigeqquaa: ’Inuup inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.’ (Lukasi 12:15-21) Qanorluunniit pigisaqartigigaluaraanni inuuneq qulakkeerneqarsinnaanngilaq.

Liz pisuumik ueqarsimavoq. Oqarpoq: „Angerlarsimaffigissaarpugut, marlunnik biileqarluta aningaasatigullu atukkatta pigisatigut silarsuup neqeroorutigisinnaasaanik nuannaarutiginninnissatsinnut kiffaanngissuseqartilluta. . . . Eqqumeequtaali tassa suli aningaasat ernummatigigakkit.“ Sooq taamaannera nassuiarpaa: „Annaasassaqaqigatta. Pigisaqarnerujartortilluni ernumanarnerusarunarpoq.“

Amerlasuut tusaamasaaneq ataqqineqarnerlu pingaarteqaat, qaffassimaartissinnaagamikkit. Ullumikkut silarsuarmi inuit suliffigissaartut iluatsitsisimasullu sinngagineqartarput. Piginnaasat ineriartortikkaanni tusaamasaassutigineqalersinnaapput. Allat uagutsinnit iluaritikkusulissapput, nersualaarneqalissalluta isumagullu soqutigineqarnerulerlutik. Tamakku tamarmik nuannaartitsisinnaapput nalerisimaartitsisinnaallutillu. Ullulli ilaanni qaangiutissapput. Salomop ataqqineqarneq pissaanerlu kunngip pigisinnaasai pigai. Maalaarlunili oqarpoq: „Ilisimasoq sianiitsorluunniit eqqaamaneqartanngillat. Erniinnaq tamarmik puiorneqarumaarput.“ (Oqaluussisartup oqaasii 2:16) Tusaamaneqarneq ataqqineqarnerlu naassaanngitsumik inuutitsisinnaanngillat.

Qiperuisartoq Celomik atilik tusaamasaanermiit pingaarnerungaartumik pingaartitaqalerpoq. Ilinniartutut aningaasanik ikiorsiissutisivoq atuarnini pikkorissarninilu ingerlatiinnarsinnaalerlugit. Erniinnaq suliai eqqumiitsulianik isornartorsiuisartunit tusagassiuutitigullu nersorneqartalerput. Qiperugaasa ilarpassui Europami illoqarfinni anginerusuni saqqummersinneqarput. Celo oqaluttuarpoq: „Nassuerutigissavara eqqumiitsuliorneq inuuninni piffissap ilaani pingaarnerpaammat. Paasilerparali taamatut suliinnassaguma, assigiinnassagaa naalakkat marluk ataatsikkut kiffartorfiginiarsarigikka. (Matthæusi 6:24) Nalunngilara Guutip naalagaaffia pillugu nutaarsiassamik nuannersumik oqaluussineq pingaarnerpaajusoq, taamaattumik aalajangerpunga qiperuisartuujunnaarniarlunga.“

 Suna naleqarnerua?

Inuunngikkutta sunaluunniit siunertaqaranilu naleqassanngimmat, inuuinnarumalluta qanoq iliorsinnaavugut? Inuuneq Jehova Guutiminngaanneerpoq. (Tussiaat 36:10) Aap, „taassumanimi inuuvugut anersaartorlutalu atallutalu“. (Apustilit Suliaat 17:28) Asasaminut inuuneq naassaanngitsoq tunissutigaa. (Romamiut 6:23) Tunissut taanna piniarlugu qanoq iliorsinnaavugut?

Naassaanngitsumik inuujumalluta Jehovamut qanimut attaveqartariaqarpugut. Taamaattumik Taassuminnga iluarisaasinnaagutta tamanit naleqarnerungaarpoq. Iluarisaagutta pilluarneq piviusoq naassaanngitsorlu qilanaarisinnaavarput. Guutimik iluarisaanngikkutta toqu naassaanngitsoq kisiat ornitaaraarput. Taamaattumik Jehovamut attaveqarluarnissatsinnut iluaqutaasinnaasut tamarmik naleqangaarput.

Qanoq iliortariaqartugut

Iluatsitsinerput ilisimassuseqarnitsinnit aalajangerneqarpoq. Jehovap oqaasia, Biibili, aqqutigalugu eqqorluartumik ilisimasaqalissaagut. Tassuunaannaq ilikkarsinnaavarput Guuti nuannaartinniarlugu qanoq iliortariaqartugut. Taamaattumik Biibilip atuaqqissaarnissaa pisariaqarpoq. Jehova Guuti Jiisusi Kristusilu pillugit tamaviaarluta ilinniarutta, ilisimasaqarneq tamanna ’tassaassaaq inuuneq naassaanngitsoq’. (Johannesi 17:3) Ilisimasaqarneq taamaattoq pingaartingaartariaqarparput. — Ussatit 2:1-5.

Guutip oqaasianit ilisimasaqalereerutta, alloriarnermut tullermut alloriarsinnaavugut — Jiisusi Kristusimut uppernerput ersersillugu. Jehova oqarpoq imminut saakkusuttut tamarmik Jiisusi aqqutigissagaat. (Johannesi 14:6) ’Allakkut annaffissaqanngilaq.’ (Apustilit Suliaat 4:12) Inuuginnarnissatsinnut „sølvi kuultiluunniit“ aalajangiisuunngillat, ’akiliunneqarsimavugulli Kristusip aavanik erlinnartumik’. (1 Petrusi 1:18, 19) Jiisusip ajoqersuutaasa maligassiaatalu malinneratigut uppernerput takutittariaqarparput. (Hebræerit 12:1-3; 1 Petrusi 2:21) Pilliutaa naleqangaarpoq, allaat inuiaat naassaanngitsumik siunissaannut aalajangiisuulluni. Pilliutaa tamakkiisumik iluaqutigilerutsigu tamanit naleqarnerpaaq pissavarput, inuuneq naassaanngitsoq. — Johannesi 3:16.

Jiisusi oqarpoq: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ (Matthæusi 22:37) Jehova asagutsigu ’inassutai maleruassavagut’. (1 Johannesi 5:3) Silarsuarmit immikkoornissarput, ileqqorissuunissarput aalajaallutalu naalagaaffianik tapersersuinissarput inassutaanut ilaapput. Taamaalilluta toqu pinnagu ’inuuneq qinersinnaavaarput’. (5 Mosesi 30:19) ’Guuti qaninniarutsigu, taava taanna uagutsinnut qanillissaaq’. — Jaaku 4:8.

Guutimit iluarisaalluni qulakkeerinnissimaneq silarsuarmi erlinnartuutinit pingaarnerungaarpoq. Guutimit iluarisaasoq nunarsuarmi pisuujunerpaajuvoq. Qanortoq erlinnartuut naleqavissoq pigiumallugu ilungersorta — tassa Jehovamit iluarisaaneq. Taamaattumik apustili Paulusip oqaasii malitsigit: ’Noqqaassutigisigit iluarneq, Guutimik mianerinninneq, upperneq, asanninneq, nikallujuinneq qanilaarnerlu. Uppertutut sorsunniaritsi ajunngitsoq sorsuutigalugu, pigilerniaruk inuuneq naassaanngitsoq.’ — 1 Timotheusi 6:11, 12. (wE 15/9 01)

[Qupp. 29-mi assiliartat]

Suut pingaarnerpaatippigit? Aningaasat? Pigisat? Tusaamasaaneq? Allalluunniit?

[Qupp. 31-mi assiliartaq]

Biibili atuaqqissaartariaqarparput