Silarsuarmi kanngunartuliorfiusumi minguitsuujuaannartoqarsinnaavoq

ANGUT inuuserippoq palersimallunilu. Arnaq pinnerpoq piginnaaneqarluarlunilu. Suleqatigiipput. Arnap angut inuttut soqutigilluinnartarpaa. Angutip arnaq ajuutigaa. Imminnut tunissutissarsisarput. Sivitsunngitsoq arnaatigilerpaa. Taanna pillugu nuliani qimappaa. Naggataatigut arnaq aalajangerpoq angut qimallugu uiminiiginnarniarluni. Angutip aamma nuliani soqutigerpiarnagu uterfigigaluarpaa, iliuuserisimasanili peqqissimissutigivinnginnamigit iluatsinngillat. Akuliusimasut tamarmik inuunerminni ingerlaqqipput, ajoqusinngitsuunngillalli.

Kinguaassiuutitigut qutsissunik najoqqutaqarneq ileqqorinnertut isigineqarunnaarsimavoq. Killeqanngitsumik nuannaarniutissarsiortuarneq iluarisassariortuarnerlu ulluinnarni inuunermut ilaapput. The New Encyclopædia Britannica-mi allassimavoq: „Allasiorneq nalinginnaalersimagunarpoq, ilaatigullu aappariinnertulli nalinginnaatigilersimalluni.“’

Jehova Guutilli ’aappariinnerup tamani ataqqisaatinneqarnissaa, aappariillu innarfiata minguitsuutinneqarnissaa’ kissaatigaa. (Eprîarit 13:4, NV) Biibilimi allassimavoq: ’Tammaqinasi: Uersaasulluunniit Guutipilussiortulluunniit arnaanillilluunniit mumingasumilluunniit kanngunartuliorfigitittut kanngunartuliorfiginnittulluunniit . . . Guutip naalagaaffia kingornussarissanngilaat.’ (1 Korintumiut 6:9, 10) Taamaattumik Guutimut iluarisaaneq nuannaarutigissagaanni silarsuarmi ileqqorluttumi ileqqussatigut minguitsuujuartariaqarpoq.

Avatangiisinit ajortumik sunnerneqarnermit qanoq illersortoqarsinnaava? Ussatit kapitaliisa tallimaanni Israelitoqqap kunngiata Salomonip apeqqut tamanna akivaa. Oqaasii takoriartigit.

Eqqarsarluarnerup illersussavaatigut

„Ernera, ilisimassut pigisara maluginiarluarniaruk siutitillu manillugit siuneqarnermut uanga pigisannut,“ (Ussatit 5:1) kunngi Salomon aallartippoq. ’Eqqarsarluarsinnaaqqullutit, ilisarsissullu qarlunnut aalajangiuteqqullugu.’ — ússatit 5:2.

Kanngunartuliornissamut ussernartut akiorniassagaanni ilisimassuseqartariaqarpoq — Biibilimik ilisarsinermik atuisinnaassuseqarluni — siuneqassuseqartariaqarlunilu — ajunngitsunik ajortunillu immikkoortitsisinnaasariaqarluni. Aqqut eqqortoq qinertariaqarpoq. Eqqarsarluarsinnaanerput illersorsinnaajumallugu ilisimassut siuneqassuserlu Salomonip maluginiaqquai. Qanoq ililluni taamaaliortoqarsinnaava? Biibili atuaqqissaaraangatsigu Guutip iliuuseqarfiginneriaasia maluginiartariaqarparput siutigullu piumasaanut siunertaanullu manillugit. Taamaaliorutta eqqarsaativut eqqortumut sammitissavavut. Taamaaliornikkut eqqarsartaaseriligarput ilisimassummut ilisarsinermullu Guutimeersumut naleqqutissaaq. Piginnaaneq tamanna eqqortumik atorutsigu kanngunartuliornissamut ussernartorsiornermut illersussavaatigut.

’Qilaaq perrattoq’ mianersorfigiuk

Kanngunartuliortartut nakutitsiniuteqartarput. Taamaattumik silarsuarmi minguttuumi matumani minguitsuujuassagaanni eqqarsarluarsinnaaneq pingaaruteqartorujussuuvoq. Salomon mianersoqqusivoq: ’Arnap taassuma allaasup qarlui tungusunnitsuummik nutaamik kusermata, qilaalu  uuliamit perrannerulluni; kingornali naasutut sungarnitsutut sungarnitsigaaq, panatut illuttut kiinalittut ipittigaluni.’ — ússatit 5:3, 4.

Ussammi matumani arnaq uteriitsoq isummamigut allanngujasoq taaneqarpoq ’arnaq allaasoq’ — atortittartoq. * Oqaatsit nakutitsiniutai tungusunnipput uuliamiillu perrannerulutik. Kanngunartuliorluni qaninniarnerit amerlanersaat taamatut aallartittanngillat? Amy, arnaq allatsi 27-nik ukiulik, ima misigisaqarsimavoq: „Suliffinni angutip inussiarnisaarfigisorujussuuvaanga periarfissallu tamaasa nersualaartarlunga. Malugineqarluni nuanneqaaq. Takulluarsinnaagakkuli kinguaassiuutinut tunngasutiguinnaq soqutigigaanga qaninniarneranik nakutinneqanngilanga.“ Nakutitsiniartut qanoq ittorpiaaneri paasisimanngikkaanni oqaasii kajungernartorujussuugajuttarput. Pissutsini taamaattuni eqqarsarluarsinnaasariaqarpoq.

Kanngunartuliornerup kinguneri naasutut sungarnitsutut sungarnitsigipput panatullu illuttut kiinalittut ipitsigalutik — annernarlutik toqunarlutillu. Taamaaliornerup kingupilui nuanniitsut makkuugajupput — ilerasunneq, kissaatiginngisamik naartulerneq kinguaassiuutitigulluunniit tunilaattartumik nappaateqalerneq. Eqqarsaatigiullu uiusup nuliaasulluunniit allasiortup aapparminik misigissutsikkut anniartitsingaarnera. Ataasiarluni allasiorneq misigissutsikkut ikeqalersitsisinnaavoq inuunerup sinnerani qileroqalersitsisumik. Kanngunartuliorneq ajoqusiingaartarpoq.

Kunngi silatooq Salomon arnaq uteriitsoq pillugu ima nangippoq: ’Isigai toqumut samunnariartorput, allorarneri uneriffimmut attuumapput. Inuunartumut aqqutaasoq misissorumannginnamiuk ingerlavii tamanut saattarput, ilisimanngikkaalu.’ (ússatit 5:5, 6) Arnap kanngunartuliortup aqqutini toqussutigaa, Sheolimukassutigaa, inuiaat ataatsimut ilerrannut. Nappaatit kinguaassiuutitigut tunillaattartut, ingammik aids-ip, siaruapiloornerata, oqaatsit taakku ilumoorneri uppernarsarpaat. Aqqutaatigut sangujoraartukkut malinnitsimitulli naggateqassaaq.

Kunngi isumassuilluni sakkortuumik ima kajumissaarivoq: ’Taamaattumik maanna tusarniarsinga, qitornannguakka, qanermalu oqalunneri tunulliuteqinasigik, Aqqutigisat taassumannga ungasilli, illuatalu paa qaninaarnaveeruk. ’ — ússatit 5:7, 8.

Kanngunartuliortut sunniisinnaaneri sapinngisamik ungasinniartariaqarpavut. Sooq nipilersortunut kanngunartunut tusarnaarnikkut, aliikkutassianik ileqqorluttunngornartunut tiingasulersaarutinulluunniit isiginnaarnikkut sunnertissaagut? (Ussatit 6:27; 1 Korintumiut 15:33; Evfisumiut 5:3-5) Qaninniarnikkut, kanngunartumik atisalersornikkut allatigulluunniit peqqusaarpalaarnikkut inunnut ileqqorluttunut malugeqqusaarneq sianiitsuliornerussaaq. — 1 Timûtiuse 4:8; 1 Pîtruse 3:3, 4.

Akisuallaaqaaq

Uteriitsut isummamikkullu allangujasut ’allaasut ’ ungasinnissaannut allanik pissutissaqarpugut? Kunngi Salomon akivoq: ’Usornaatigisat allanut tunniuteqinavat ukiussatillu naakkittaatsumut tunniullugit; pigisatit takornartat qaarsillaatigeqinavaat, pissarsiatit erloqissutigisatit allanertat illuanniilerlutik; taavalu naggatissakkut nimaassasutit, neqaarullutillu uineerukkuit. ’ — ússatit 5:9-11.

Salomonip erseqqissarpaa kanngunartuliortoorneq akisuujusoq. Allasiorneq ataqqineqarunnaarnerlu imminulluunniit ataqqiunnaarneq imminnut atapput. Nammineq kanngunartuliornissamut pilerissuseq allalluunniit pilerissusia naammassiniaannaraanni nikanarsaataanngila? Kinguaassiuutit tungaatigut katissimanngisamut tunniusimagaanni imminut ataqqinnginnermut ersiutaanngila?

’Ukiussat, pigisat pissarsiallu erloqissutigisat allanertamut tunniunneri’ qanoq paasisariaqarpa? Qinerlerfissiami allassimavoq: „Versit taakkua isumaat erseqqilluinnarpoq: Allasiorneq akisusinnaavoq; arnap aningaaserituunera innuttaaqatigiilluunniit taarseeqqusinerat pissutigalugu sulisutigisimasat — atorfik, oqartussaaneq pisuussutillu — annaaneqarsinnaapput.“ Kanngunartumik attaveqatigiinnerit akisusinnaapput.

Sianiitsoq ataqqineqarunnaareerluni pigisanilu nungoreerlugit nimaarsinnaavoq: „Ajoqaaq  anusinngorsaat uumigisimagakku avoqqaarineqarnerlu soqutigisimanagu, ajoqersortima nipaat naalassimannginnakku ilinniartitsisimalu oqaasii tusaanianngitsoorsimallugit. Pillagaaqqajavissimavunga inuit katersuussimaneranni.“ — Ussatit 5:12-14.

Piffissap ingerlanerani ajortuliortoq misissueqqissaartartup ima taasaatut oqartalissaaq: „’Taamaaliorsimagaluarumatoq’: ataataga tusaasimagaluarukku; oqaatseriippallaarsimanngikkaluaruma; allat siunnersuutaat tusarnaarsimagaluarukkit.“ Taamatulli paasisaqarneq kingusinaareerpoq. Kanngunartuliortup inuunera tusaamaneqarneralu ajoquserneqareerput. Kanngunartuliortinnani kingunissaasa eqqarsaatigeqqissaarnissaat pingaaruteqarluinnarpoq.

„Imigariniaruk imeq nammineq puilasuliaativit imaa“

Kinguaassiuutit tungaatigut Biibili sukangavallaarpa? Naamerluinnaq. Ajuutigiilluni asanninneq aamma angutip arnallu nuannareqatigiissinnaanerat Guutimit tunissutaapput. Ataqatigiinnerli tamanna katissimasut akornanniinnaq pissaaq. Kunngi Salomonip uiusoq ima oqaaqqissaarpaa: „Imigariniaruk imeq nammineq puilasuliaativit imaa, imeq illit nammineq puilasuutinnit kuuttoq! Puilasuutitit kuutsikkumavigit aqqusinernut, kuunnguaatitillu illoqannginnersanut? Illit taakku namminiinnaq pigisassaraatit allanik piginneqateqarnak.“ — Ussatit 5:15-17.

„Nammineq puilasuliaatit“ aamma „puilasuutit“ tassaapput nuliamut asasamut taaguutit taallarpalaartut. Kinguaasiuutitigut atoqatiginera imermik inuummarinnartumik imernermut assersuunneqarpoq. Imertartarfiit tamanut naatsorsuussat akerlianik puilasuliaq puilasuulluunniit allat susassarinngisaattut isigineqartarpoq. Uiusoq kajumissaarneqarpoq nuliaminik meeqqioqqullugu, illoqannginnersani, arnani allani, anisuuminik siaruarterinani. Paasinarluinnarpoq nuliaminut ilumoornissaa siunnersuutigineqartoq.

Silatooq nangippoq: ’Puilasuutit pilluaqqunarsili, inuusunnernilu nuliarilikkat tipaatsuutiguuk. Kulavak isigiuminartoq savaasarlu innarmiu alianaatsoq assigiliuk; paaqqinninnerata tumannguersartaannarlisit, asassusialu putussutigittuinnaruk. ’ — ússatit 5:18, 19.

Oqaaseq „puilasuutit“ uani kinguaassiuutitigut atoqatigiinnermi naammassinermut tunngatinneqarpoq. Katissimasamik kinguaassiuutitigut atoqateqarneq ’pilluaqqussutaavoq’ — Guutimit tunissut. Uiusoq kajumissaarneqarpoq inuusunnermini nuliarilikkani nuannaarutigeqqullugu. Uiusup isaani nuliaq pinnersuuvoq kulavattut asanarluni, savaasatut innarmiutut ajuutiginarluni isigiuminarlunilu.

Taava Salomon akisariaqanngitsunik marlunnik apeqquteqarpoq: „Ernera, soormi kajungissuseqarfigissaviuk angutip allap nulia, sooq arnaq alla allasiorniartoq pakkutissaviuk?“ (Ussatit 5:20) Aap, sooq katissimasoq suliffimmi, atuarfimmi allanilluunniit attavigisaminik aappariinnermi avataatigut kinguaassiuutitigut atoqateqarnissamut pileritsassava.

Paulusip aappariit kristumiut ima siunnersorpai: ’Imannali oqarpunga, qatanngutikka; ullussat sivikipput; kingorna nuliaqaraluartut  nuliaqanngitutut issapput.’ (1 Korintumiut 7:29) Oqaaqqissaarut tamanna qanoq isumaqarpa? Kristusip ajoqersugaasa ’Guutip naalagaaffia piniaqqaassavaat’. (Matîuse 6:33) Taamaattumik aappariit imminnut ima sammitigissanngillat allaat Guutip naalagaaffiata soqutigisaanik kingulliussilerlutik.

Imminut naalakkersinnaasariaqarpoq

Kinguaassiuutitigut pileritsannerit nununeqarsinnaapput. Jehovamit pilluaqqusaajumasunut tamanna pisariaqarpoq. Paulusip kristumiut oqaaqqissaarpai: ’Tassaammat Guutip peqqusaa iluarsissutissarsi, uersaaneq nigussagissi nungullusilu timisi pigisinnaassagisi iluarsiartortillusi ataqqinartillusilu. ’ — 1 Tásalûníkamiut 4:3, 4.

Taamaattumik inuusuttut atoqateqarusunnermut pileritsanneq malugiinnarlugu katipallattariaqanngillat. Aappariinneq pisussaaffittaqarpoq, akisussaaffillu eqqortissagaanni inersimalluartuusariaqarpoq. (1 Moses 2:24) ’Inuusunnertuunerup allaqqaataanit’ — ukiut kinguaassiuutitigut pilerissuseqarfiusut siuneqassutimullu ajoqusiisinnaasut — qaangiunnissaanut utaqqineq pitsaaneruvoq. (1 Korintumiut 7:36, NV) Aammattaaq inersimasoq katikkusuttoq ilagisartakkami akornanni aappassarsisinnaannginnini piinnarlugu kanngunartuliussappat sianiitsulionerussaaq eqqungitsuliornerullunilu.

„Guutiitsoq nammineq ajortuliamigut pisarineqartarpoq“

Kinguaassiuutitigut kanngunartuliornerup eqqunngitsuuneranut inuunermik Tunisisup, Jehovap, atoqateqarnissamut pilerissuseqartitsisup, taamaaliornermik assuarinninnera tunngaviuvoq. Ileqqussatigut minguitsuuginnarnissamut sakkortunerpaamik kajumissaarutitut kunngi Salomon oqarpoq: „[Jehovap] isigisarpai angutip ingerlavii, aqqutai malittareqqissaarpai.“ (Ussatit 5:21) Guutimut ’naatsorsuiffigisassatsinnut ’ ersinngitsoqanngilaq. (Eprîarit 4:13) Atoqatigiinnerit minguttuut suulluunniit, isertugaagaluarpata, timikkut inooqatigiinnermullu tunngasutigut ajoqusiineri soqutiginagit iliuusiugaluarpata, Jehovamut attaveqarnerput aserussavaa. Sianiitsuliornerussaaq eqqunngitsumik nuannaarneq sivikitsoq piinnarlugu Guutimik eqqisseqateqarneq annaagaanni.

Kanngutaallutik kanngunartuliortut ilaat kingunerlutsitsisannginnguatsiarput. Ungasinnerusorli eqqarsaatigalugu taamaanngilaq. Kunngi Salomon oqarpoq: „Guutiitsoq nammineq iluaatsuliamigut pisarineqartarpoq, ajortuliaasa napiaaniutitut aalangeersimasarpaat. Anusinngorsagaannginnini toqussutissaraa, silaatsuunersuani nungutitaassutigissavaa.“ — Ussatit 5:22, 23.

Sooq taamatut tammartitaasoqassava? Ussatit-ni silarsuup pilerinartuinut siumut mianersoqquneqarpugut. Aamma oqaluttuuppaatigut qanoq akeqassanersoq. Kinguaassiuutitigut kanngunartuliorneq nunap piisigut akisusinnaavoq peqqiilliortitsisinnaallunilu, sanngiillisitsisinnaalluni nikanarsaataasinnaallunilu. Tamanna nalunngikkutsigu, ’taamaaliorsimagaluarumatoq’-mik oqaqattaartariaqassanngilagut. Jehovap oqaatsimini isumassarsiarititaasumi unnersuutaasa maleruarnerisigut silarsuarmi ileqqorluttumi ileqqussatigut minguitsuujuarsinnaavugut. (wE 15/7 2000)

[Quppernerup ataani ilanngussaq]

[Qupp. 30-mi assiliartat]

Kanngunartuliornerup kingunerisai naasutut sungarnitsutut sungarnitsigipput

[Qupp. 31-mi assiliartat]

’Inuusunnerni nuliarilikkat tipaatsuutiguuk’