Jesus Kristusip qanoq ikiorsinnaagaatigut

JESUSIP nunamiikkallarami allat oqaatigineqarsinnaangitsumik ikiortarsimaqai. Jesusip inuunerani pisimasorpassuarnik takunnittuulluni oqaluttuareqqiisoq ajunngitsuliarpassui annertungaarmata ima naggaseerusulersissimavaa: ’Jesusilli suliai allattaaq amerlagaluaqaat; tamakkuli tamarmik immikkut allakkatigut oqaatigineqassagaluarpata isumaqarpunga mappersakkat allattariaqassasut silarsuup inissaqartissanngikkai.’ (Juánase 21:25) Jesusip nunamiinnermini suliai tamarmik apererusulersitsipput: ’Qilammiilluni qanoq ikiorsinnnaavaatigut? Jesusip qamannga pisumik misiginneqataanera ullumikkut iluaqutigisinnaavarput?’

Akissut nuannaajallannartuullunilu eqqissiallannarpoq. Biibilimi oqaluttuarineqarpoq Jesus ’qilammut isertoq Guutip kiinaata saanut pilluta sassartarumalluni.’ (Eprîarit 9:24) Uagutsinnut iluaqutissaq suna naammassisussaavaa? Apustili Paulus allappoq Kristus ’savaasat norraallu aavinik pinnani, namminerli aamminik isissuteqarluni illernartuummut [’qilammut’] isertoq ataasiarluni utertitsissummillu naassaanngitsumik pissarsiaqarluni.’ — Eprîarit 9:12; 1 Juánase 2:2.

Eqqarsaat killinnarpoq. Jesusip qilaliarami allanut ajunngitsuliorneq unitsinngilaa, akerlianilli inunnut kinguaariinnut tamanut iliuuseqarnerunissaminut periarfissaqalerpoq. Guuti ajunngitsuliornermini pisassarinngisaraluatsinni Jesusimik ’Naalagaanersuup qilammiittup issiavissaarsuata talerpiata tungaani’ tamanut ’kiffartuuteqartutut’, palasiuninngortitsinera pissutaavoq. — Eprîarit 8:1, 2.

Tamanut kiffartortoq

Taamaattumik Jesus qilammi inuiannut tamanut kiffartortussaasimavoq. Itsaq Israelimi palasiunerup Guutimik pallorfiginnittut sinnerlugit kiffartuutigisartagaa kiffartuutigisussaasimavaa. Kiffartuutigisassaa taanna sunaava? Paulus allappoq: ’Palasiuneq kinaagaluartoq tunissutinik pilliutinillu toqutassanik aatsisassalluni ivertissimavoq; tamanna pillugu unattaaq [Jesus qilaliartoq] sumik aatassaqassavoq’. — Eprîarit 8:3.

Jesus itsaq palasiunerit sassaattagaannit naleqarnerujussuarmik sassaatassaqarpoq. ’Savaasammi ussigillu aavisa’ itsaq Israelikkut anersaakkut taama minguiarsinnaappagit, ’angeqqinganik Kristusip . . . aavata tarnissi nalunngissuat minguersassavaa suliat inuussutaanngitsut piiarlugit Guutimut uumasumut kiffaalersillusi.’ — Eprîarit 9:13, 14.

Alla Jesusimik tamanut kiffartulersitsisoq nalissaqanngitsoq tassaavoq toqusuissuseqalersimanera. Israelitoqqami ’palasinngortut . . . amerlaqaat toqup ataavartaalisai’. Jesusimi qanoq piva? Paulus allappoq taanna ’qaangiussanngitsumik palasiussuseqartoq. Tamannalu pillugu aqqutigaluni Guutimut pisut naalluinnarsimasumik annaassinnaavai,  inuuttuinnarami qinnuttassallugit.’ (Eprîarit 7:23-25; Rûmamiut 6:9) Aap, qilammi Guutip talerpiata tungaani tamanut kiffartortoqarpugut ’kingorna toqunaveersoq pilluta sassartartussaq’. Maannakkut uagut iluaqutissatsinnik siunersissaanngitsunik nassataqarpoq.

Jesus nunamiikkallarmat allaat ilaannikkut inuit ikioqqullutik, ungasissumit ornigartarpaat. (Matîuse 4:24, 25) Maanna Jesus qilammiikkami inuiaqatigiinnit tamanit saaffigineqarsinnaalerpoq. Tassani naassaanngitsumik tamanut kiffartortuunissani pitsaanerpaamik naammassisinnaavaa.

Jesus palasiunertut qanoq ippa?

Iivangkiiliunik oqaluttuartut eqqorluartumik Jesus oqaluttuarat inuusoq ilassiortoq, misiginneqataangaartoq imminullu tunulliulluni ikiuiumatooq. Ataasiaannaratik ajoqersukkanilu pisariaqarteqisaminnik qasuersaarniaraluartillutik akornuserneqartarput. Kisianni taamatut akornusiisut paamiginngilai, ikioqqusummi ’nalligingaalerpai’. Allaammi qasugaluarluni, kaakkaluarluni imerusukkaluarlunilu, ’ilassisarpai’ nerinngikkallartarporlu ilumoorlutik ajortiminnik peqqissimissutiginnittut ikiorsinnaagaangamigit. — Mákorse 6:31-34; Lúkarse 9:11-17; Juánase 4:4-6, 31-34.

Jesusip nalliginningaarnerata allat timikkut, misigissutsikkut anersaakkullu pisariaqartitaannik matussusiitittarpaa. (Matîuse 9:35-38; Mákorse 6:35-44) Aammattaaq ilinniartippai iluaallatitsineq tuppallersaallu ataavartoq qanoq nanisinnaaneraat. (Juánase 4:7-30, 39-42) Assersuutigalugu kajungernarsimassaqaaq imatut qaaqqusigami: ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi.’ — Matîuse 11:28, 29.

Jesus inoqatiminut asanningaarami naggataatigut inuiaat ajortillit pillugit inuunini pilliutigaa. (Rûmamiut 5:6-8) Tassunga atatillugu Paulus eqqarsarluarluni isummerpoq Jehova Guutip ’erni allaat erliginngikkaa, tunniukkaali tamatta pilluta; sooq taava taassumunnga ilanngullugit tamanik tunissannginnerpaatigut? . . . Kristus tassaavoq toqusoq, annerungaartumillu tassaavoq makititaasoq Guutillu talerpiata tungaaniittoq qinnullutalu.’ — Rûmamiut 8:32-34.

Palasiuneq misigeqatiginnissinnaasoq

Jesusip nammineq inuttut misigisimavaa kaalluni, imerusulluni qasullunilu, sioorallunilu anniarlunilu toqulluni qanoq innersoq. Misigissutsikkut timikkullu artorsartinneqarsimanerata, immikkut pisinnaassuseqalersippaa inuiannut erloqissuteqartunut palasiunertut kiffartornissaanut. Paulus allappoq: ’Tamanna pillugu qatanngutini tamatigut assigilissavai palasiunerussalluni nallittuisoq ilumoortorlu Guutip piisigut, inuit ajortaat matoorneqartissagamigit. Anniaramimi nammineq usserneqarluni usserneqartut ikiorsinnaavai.’ — Eprîarit 2:17, 18; 13:8.

Jesusip takutippaa pisinnaalluni piumassuseqarlunilu inuit Guutimut qaninnerulernissaannut ikiussallugit. Guutili sukannersuua naakkittaatsuullunilu allaat Jesusimit inunnik isumakkeerfiginninnissaminut kimigiiserfigineqartariaqarluni? Naamik, Biibilimi neriorsoqqissaarneqarpugut Jehova ’avaaginnittuusoq isumakkeerfiginnittarlunilu’. Allassimaffimmi allami allassimavoq: ’Ajortivut anngiiaatigigutsigik, taanna ilumoorlunilu iluartuuvoq, ajortitsinnik isumakkeerfigaluta iluaatsunillu sunik tamanik piiaaffigaluta.’ (Tussiaat 86:5; 1 Juánase 1:9) Ilumoorpoq Jesusip oqaasii suliaalu ajunngitsut Ataataata naakkinnissusianut asanninneranullu ersiutaammata. — Juánase 5:19; 8:28; 14:9, 10.

Ajortuliorsimasut peqqissimisut aniguisitaasutut misigilersinniarlugit Jesus qanoq iliortarpa? Taamaaliortarpoq Guutimit iluarisaajumallutik illumoorlutik noqqaassutiginnittut nuannaarutiginninnissaannut nalerisimaarnissaannullu ikiornerisigut. Kristumioqatiminut tanitanut allakkamini Paulusip pissutsit naalisarlugit ima oqaatigai ’Taamaattumik siooranata sassarniarta saammaassisup issiavissaarsuanut,  nallittorneqaqqulluta saammaannarseqqullutalu pisariaqarfiagut ikiorneqaatissatinnik.’ — Eprîarit 4:14-16.

’Pisariaqarfiagut ikiorneqarneq’

Qanormi iliorsinnaavugut ajornartorsiutinit artorsinneqarluta misigigutta, assersuutigalugu nappaammik ilungersunartumik, pisuusutut misigisimanermik, nikallornermik isumatsangaarnermillu? Taava Jesusitut qinunerup erlinnangaartup immikkut pisinnaatitaaffiunera atorsinnaavarput. Assersuutigalugu taamaaliorpoq pilluta inuunerminik pilliutiginninnissami unnuaani. ’Toqumullu annilaangaarnerup pimmani annermik qinungaalerpoq; kiagunnerili soorlu kusernerit aajusut nunamut nakkaasut.’ (Lúkarse 22:44) Aap, Jesusip nalunngilaa ilungersorluni Guutimut qanoq qinusoqarsinnaasoq. ’Taanna uineqarnermini nillingaarluni qullilillunilu qinnutinik kutsiuutinillu aatsigami issumunnga toqumit annaassisigisinnaasaminut, qussalanerminilu tusarneqarami,’ — Eprîarit 5:7.

Jesusip ilisimavaa qinnutit tusarneqarnerat nakussatsinneqarnerlu qanoq pingaartigisut. (Lúkarse 22:43) Aammattaaq imatut neriorsuivoq: ’Sumik Ataataq qinnuigigussiuk atikkut tuniumaarpaasi. . . . Qinugitsi, pissaasi taava tipaatsussusersi naammatseqqullugu.’ (Juánase 16:23, 24) Taamaattumik tatiginnilluta Guutimut qinusinnaavugut qularinagu iluaqutissatsinnut ernerata oqartussaanini pilliutimilu utertitsissutaasup nalinga atorumaara. — Matîuse 28:18.

Qularissanngilarput Jesusip qilammi oqartussaanini ikiorneqarnissatsinnut piffissaalluartukkut atussagaa. Assersuutigalugu ajortuliorsimagutta ilumoorluta peqqissimissutigisatsinnik, tuppallersaatigisinnavarput qularinnginnatsigu ’Ataatami illersuisoqartugut, Jesusi Kristusimik iluartuusumik’. (1 Juánase 2:1, 2) Qilammi ikiortitta tuppallersaasittalu qinnutissavaatigut atermigut Biibililu naapertorlugu qinnutivut akineqaqqullugit. — Juánase 14:13, 14; 1 Juánase 5:14,15.

Kristusip ikiuinera pingaartiguk

Guutilli ernera tassaaginnanngilaq qinnutitsinnik Guutimut aqqutissiuilluni akunnermiliuttoq. Assersuutaasumik Kristusip inuit silarsuarmiittut tamaasa ’pisiarisimavai’ taakkununngalu naalagaalluni. (Galâsiamiut 3:13; 4:5; 2 Pîtruse 2:1) Kristusi pilluta iliuuserisimasaanut tamanut qujamasuffigisinnaavarput, pigigaatigut akueralugu, nuannaarlutalu qaaqqusinera naalallugu: ’Uannik malinnikkumasoq imminik  isumakkiissavoq, [napasorlu anniartitaaffini NW] ullut nungullugit ersullugu malissavaanga.’ (Lúkarse 9:23) ’Imminik isumakkeerneq’-rup nassatariinnanngilaa nammineq inuunermik aalajangiisinnaanerup oqaatsikkut allamut tunniunnera. Ilumoortumik oqaatigissagaanni, ’[Messiasip] tamaasa toqussutigimmagit tamaasa taava toqusimasoralugit; massalu tamaasa toqussutigai inuusut kingorna imminnut inooqqunagit, uumunngali inooqqullugit pillutik toqusumut.’ (2 Korintumiut 5:14, 15) Utertitsissut pingaartikkutsigu isiginnittaaserput, inuunitsinni anguniakkavut inooriaaserpullu sunnissavai. Kristus Jesusimut ’pilluta imminik tunniuttumut’ naassaanngitsumik qujamasuutissaqarnitta, taassuma Ataataatalu asannittup, Jehova Guutip, ilisarinerulernissaannut kajumilersittariaqarpaatigut. Aammattaaq uppernitta nakussatsinnissaa, Guutip maleruaqqusaasa iluaqutaasut malinnissaat ’ajunngitsuliornermullu ilungersornissarput’ kissaatigisariaqarparput. — Títuse 2:13, 14; Juánase 17:3.

Ilagiit kristumiut aqqutigalugit anersaakkut nerisinneqartarpugut, qiimmassarneqartarluta piffissaalluartukkut ajoqersorneqartarluta. (Matîuse 24:45-47; Eprîarit 10:21-25) Assersuutigalugu anersaakkut napparsimasoqarpat, taassuma ’ilagiit utoqqaanertaat [toqqakkat] qaaqqusinnaavaat’. Jakob nangilluni neriorsuivoq: ’Uppertullu qinnutaagut napparsimasoq annassaaq, [Jehovallu] makitissavaa; ajortuliaqaraluarunilu isumakkeerfigineqassaaq.“ — Jâko 5:13-15.

Tamatuma eqqortuunera pisimasumi Afrikami kujallermiup parnaarussivimmit utoqqaanertamut allagaani erserpoq allakkami: „Guutip Naalagaaffianik inuit ujarlernerannik ikiorniarlugit Jesus Kristusip aallartitaanik Jehovap nalunaajaasuinut tamanut suliamik ajunngitsumik suliaqartunut“ qujamasulluni. Allakkani nangippai: ’Allakkatit tigugakkit nuannaangaarpunga. Anersaakkut ittumik aniguisitaanissara pillugu soqutiginninnerpit killissimavaanga. Jehova Guutip isumataaqqusilluni kajumissaarinerata malinnissaanut suli pissutissaqarnerulersippaanga. Ukiuni 27-ni paatsiveqarnanga taarmiusimavunga  ajortuliorlunga, peqquserlullunga, sualuttumik inatsisaatsuliorlunga, inuunerlullunga, nalorninartunik guutisiorlunga. Jehovap nalunaajaasui ilisarisimalerakkilli misigisimavunga kiisami aqqut ilumoortoq nanillugu! Maanna maliinnassaavara.’

Siunissami qanittumi ikiorneqarneruneq

Silarsuarmi pissutsit ajorsiartuinnartut ersarissumik takussutissaapput piffissap pingaaruteqartup ’annikilliornartup angisuup’ aallartiffissaa sioqqutilaarlugu inuusugut. Tamanna ilutigalugu amerlangaartut inuiaqatigiit, immikkut nagguiqatigiit, immikkullu inuiaat immikkullu oqaasillit iliuuseqarput ’atisatik takisuut savaaqqap aavanik errorpaat qaqorsarlugit’. (sarĸúmersitat 7:9, 13, 14; 2 Timûtiuse 3:1-5) Jesusip utertitsissutitut pilliutaata upperineratigut ajortiminnik isumakkeerfigineqarput Guutimullu qanittumik attaveqalerlutik. Guuti ikinngutigilerpaat. — Jâko 2:23.

Annikilliornartumi angisuumi aniguisussat misigiumaarpaat savaaqqap, Jesus Kristusip ’paarsinera tasiuineralu imermik puilasunut inuunerup piinut; Guutillu qullitik tamaasa allarterumaarai.’ (sarĸúmersitat 7:17) Taava Kristusip palasiunertut suliassani naammassiumaarpai. Guutip ikinngutai tamaasa ’imermik puilasunut inuunerup piinut’ anersaakkut, timikkut, eqqarsaatikkut misigissutsikkullu tamakkiisumik iluaqutiginninnissaannut ikiorumaarpai. Ukiumi 33-mi Jesusip aallartitaa, taamanikkumiillu qilamminngaanit ingerlateqqissimasaa, naammassilluinnarneqassaaq.

Taamaattumik uatsinnut Guutip Kristusillu iliuuserisimasaannik, sulilu iliuuserisaannik pingaartitsingaarnerput qaquguluunniit annaanngisaannartariaqarparput. Apustili Paulus imatut kajumissaarivoq: ’Naalakkami tipaatsuttuinnaritsi. . . . Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ — Filípimiut 4:4, 6, 7.

Jesus Kristusimik, qilammi ikiortitsinnik, immikkut ittumik pingaartitsinissatsinnut periarfissaqarpugut. Ukioq manna pingasunngornermi apriilip 19-ani seqernup tarrinnerata kingorna Kristusip toqunera eqqaaniarlugu Jehovap nalunaajaasui silarsuaq tamakkerlugu katersuutissapput. (Lúkarse 22:19) Najuuttunut tamanut Kristusip utertitsissutitut pilliutaanut pingaartitsinerulernissamut periarfissaassaaq. Illittaaq ataatsimiinnermut qaaqquneqarputit Guutip annannissamik Kristus aqqutigalugu aaqqissuussaa misinnangaartoq qanoq ililluni ilinnut naassaanngitsumik iluaqutaasinnaanera tusarnaariaqqullugu. Najukkanni Jehovap nalunaajaasuinit immikut ittumik katersoqatigiinnissap tamatuma sumi qaqugulu pinissaanut paasissutissat pisinnaavatit. (wE 15/3 2000)

[Qupp. 7-mi assiliartaq]

Jesusip ilungersorluni Guutimut qanoq qinusoqarsinnaasoq nalunngilaa

[Qupp. 8-mi assiliartaq]

Kristusip ajornartorsiutinit artorsinneqarluta misigigutta anigornissaannut ikiorumavaatigut

[Qupp. 9-mi assiliartaq]

Kristusip utoqqaanertanut asannittunut ikiortittarpaatigut