Anneruniajuissuseq pissusiuvoq eqqissisitsisartoq

Tamarmik anneruniajuitsuugaluarpata assut nuannissagaluaqaaq. Inuit piumasaqarpallaassanngikkaluarput, ilaqutariinni kamaattoqarpallaarunnaarluni, niuernerup iluani unammillernersuaqassanngikkaluarluni, inuiaqatigiillu sorsukkumatuujunnginnerussagaluarlutik. Silarsuarmi taamaattumi inoorusuppit?

JEHOVA GUUTIP kiffai ilumoortut silarsuarmi nutaami neriorsuutigisaani inuunissaminnut piareersarput, silarsuaq tamakkerlugu anneruniajuinnerup sanngiinnertuunngitsoq nukittunertut ileqqorinnertullu isigineqarfigisaani. (2 Pîtruse 3:13) Jehovap piumasarimmagu kiffami anneruniajuinnissaat, pissuseq tamanna maannangaaq sulissutigaat. Pruffiiti Mika allappoq: „Illit inuk, [Jehovap] ilisimatereerpaatit suna ajunngitsuusoq, nalunngereerpat suut ilinnit piumasarigai: Iluartumik iliussasutit, ilumoortumik asannissasutit, makitajuillutillu Guutit peqatigalugu inuussasutit.“ — Mika 6:8.

Anneruniajuissuseq assigiingitsunik malunniuttarpoq. Assersuutigalugu imminut nikaginermik imminullu tatiginermik, imaluunniit piginnaanerminik, angusarisimasanik pigisaminilluunniit usorsitsaarniannginnermik malunniussinnaavoq. Qinerlerfissiaq naapertorlugu anneruniajuissuseq aamma isumaqarsinnaavoq  ’ingasaassinaveersaassuseq; naammagittassuseq’. Anneruniajuitsup pissuserissaarnerup killingi qaangerneq ajorpai. Paasilluarsimavaa suliarisariaqakkani sapinngisanilu killissaqartut. Nalunngilaa suut pisinnaatitaaffiginagit. Inuit anneruniajuitsut qaninngoornarput. „Anneruniajuissutsimit piviusumit taama iluarinartigisoqanngilaq,“ taalliortoq tuluk Joseph Addison allappoq.

Anneruniajuissuseq inuit naammalluinnanngitsut inunnguuserinngilaat. Pissuseq tamanna ineriartortinniarlugu iliuuseqartariaqarpugut. Kajumissaarutissatut Biibilimi arlalinnik anneruniajuissutsimut tunngasunik assigiinngitsunik oqaluttuaqarpoq.

Kunngit anneruniajuitsut marluk

David, inuusuttuulluni Israelikkut kunngissaattut tanitaasimasoq, Jehovap kiffaminik ilumoorfiginninnerpaat ilagaat. Saulip kunngiutilluni David annertuumik tatisimavaa qimaasutut inuusariaqarlersillugu toqunniaraluarlugulu. — 1 Samuel 16:1, 11-13; 19:9, 10; 26:2, 3.

Allaat pissutsini taamaattuni Davidip paasilluarsimavaa inuunini illersorniarlugu qanoq iliortariaqarnini killissaqartoq. Ilaanni inoqajuitsumiitillutik Davidip kunngi Saul sinittoq Abisjajimut attoqqunngilaa. David oqarpoq: „[Jehovap] tanitami uannit ajoquserneqarnissaa pinngitsoortikkiliuk.“ (1 Samuel 26:8-11) Davidip nalunngilaa Saul kunngiuffianit peersinnissaa nammineq isumagisassarinagu. Taamaalilluni eqqortumik pissusilersornermikkut pisumi tassani anneruniajuitsuuvoq. Taamatuttaaq ullumi Guutip kiffaasa paasilluarpaat, Jehovap isiginnittaasia tunngavigalugu, sumik iliuinnarsinnaanngitsut, allaat inuunermik naleqassagaluarpalluunniit. — apustilit suliait 15:28, 29; 21:25.

Aammattaaq kunngip Davidip ernera Salomon inuusukkallarami allaanerulaartumik anneruniajuitsuuvoq. Salomon kunnginngorami kunngitut akissussaaffik annertooq nammassinnaanagu misigisimavoq. Jehovamut ima qinuvoq: „Kunnginngortissimavarma ataataga Daavi kingoraartillugu, [Jehova] Guutiga, naak inuusuttunnguugaluartunga qanorlu ilillunga siulersuinissannik ilisimasaqanngikkaluartunga.“ Ersarippoq Salomonip nalunngilluinnaraa piginnaaneqartorsuunani misilittagaqartorsuunanilu. Taamanikkut pingaakujunnanilu imminuinnaq eqqarsaatiginngilaq, anneruniajuillunili. Salomonip Jehova siuneqassutsimik qinnuigaa, taassumalu qinnutaa tusarpaa. — 1 Kunngit 3:4-12.

Messias aqqutissiuisualu

Salomonip kunngiuffiata ukiut 1000-t sinnerlugit kingorna Johannes Kuisisoq Messiasimik aqqutissiuisimavoq. Tanitamut aqqutissiuisutut Johannesip Biibilimit siulittuut eqquutitippaa. Immikkut pisinnaatitaaffik tamanna pingaakujuutiginiarsinnaasimagaluarpaa. Aamma Messias uinikkut eqqarlerigamiuk ataqqineqarnissani anguniarsimasinnaagaluarpaa. Johannesili allanut oqaluttuarpoq Jesusip aloqutaaluunniit qilerussaassallugit qinngaqqulluni. Jesusilu Jordanip kuussuani kuisikkiartormat Johannes oqarpoq: ’Uanga ilinnut kuisittariaqaraluarpunga, taamaattoq illit ornipparma!’ Tamatuma takutippaa Johannes pingaarniakujuttuunngitsoq. Anneruniajuippoq. — Matîuse 3:14; Malaki 3:23; Lúkarse 1:13-17; Juánase 1:26, 27.

Jesus kuisereerami Guutip naalagaaffia pillugu nutaarsiassaq nuannersoq piffissaq tamaat atorlugu oqaluussissutigisalerpaa. Jesus naammalluinnartuugaluarluni oqarpoq: ’Isumannik qanoq-iliorsinnaanngilanga . . . peqqusara pinnagu aallartitsisima peqqusaa piniarakku.’ Jesus inunnit ataqqineqarnissani anguniagarinngilaa. Qanoq iliornerminut tamanut Jehova ataqqinartittarpaa. (Juánase 5:30, 41-44) Anneruniajuissusia naammalluinnartumik maligassaalluarpoq.

Ersarippoq Jehovap kiffai ilumoorfiginnittut — soorlu David, Salomon Johannesilu Kuisisoq, aap allaat inuk naammalluinnartoq Jesus Kristus — anneruniajuissuseqartut. Pingaarniakujunngillat, imminnut angisuutinngillat imaluunniit makitaniartuunatik, ileqqussarlu naapertorlugu killissaq sinnerlugu iliorneq ajorput. Maligassiuilluarnerat ullumikkut Jehovap kiffaanut anneruniajuissutsimik ineriartortitsisariaqarnerannut tunngavissaalluarpoq. Sulili allanik pissutissaqarpoq.

Inuiaat oqaluttuarisaanerani eqqissiviilliornerpaat nalaani inuugatta kristumiunut ilumoortunut anneruiniajuissuseq pissusiuvoq naleqangaartoq. Tamanna Jehova Guuti, inoqativullu eqqisseqatigissallugit namminerlu eqqissisimanissatsinnik ajornannginnerulersitsisarpoq.

Jehova Guuti eqqisseqatigalugu

Guuti eqqisseqatigineqarsinnaavoq aatsaat pallorfiginninnermut ilumoortumut killigititat  iluanniiginnarutta. Siuaasatta siulliit Adam Evalu Jehovap killigititaa qaangersimavaat, siulliullutillu anneruniajuissutsimik amigaateqalersimallutik. Jehovamut attaveqarnertik, angerlarsimaffitsik, siunissartik inuunertillu annaavaat. (1 Moses 3:1-5, 16-19) Ilumut annaasaat annertoqaaq.

Adamip Evallu kukkunerat ilinniutigisariaqarparput. Pallorfiginninnerup ilumoortup qanoq pissusilersorsinnaanerput killilersorpaa. Assersuutigalugu Biibilimi allassimavoq ’uersaasulluunniit guutipilussiortulluunniit arnaanillilluunniit mumingasumilluunniit kanngunartuliorfigitittut kanngunartuliorfiginnittulluunniit tillittulluunniit piumatuulluunniit Guutip naalagaaffia kingornussarissanngikkaat’. (1 Korintumiut 6:9, 10) Jehova ilisimassutsimigut iluaqutissatsinnik killilersuivoq, isumatusaassaagullu taakkua iluanniiginnarutta. (Jesaja 48:17, 18) Ussatit 11:2-mi allassimavoq: „Qanilaartut ilisimassut pigaat.“

Taavami upperisarsioqatigiit allat oqarpata killigititat tamakku qaangerneqarsinnaasut Guutilu eqqisseqatigiinnarsinnaallugu? Taava tammartinniarsarisimassavaatigut. Anneruniajuinnerulli Jehova Guutimut attaveqarnitta ineriartortinnerani ikiussavaatigut.

Inoqativut eqqisseqatigalugit

Anneruniajuissuseq aamma allanut eqqisseqateqarnissatsinnut siuarsaasarpoq. Angajoqqaat maligassiuilluarpata pisariaqartut naammagalugit anersaakkullu tunngasut salliuttarlugit ilimanaateqarneruvoq meeraattaaq pisariaqartunut assingusumik isiginnittaaseqarumaartut. Meeqqat ajornannginnerusumik naammagittarsinnaassuseqarnerussapput naak immaqa piumasatsik tamatigut pisinnaanngikkaluarlugit. Tamanna anneruniajuinnissaannut iluaqutaassaaq ilaqutariinnilu inuuneq eqqissisimanarnerussalluni.

Ingammik ilagiinni nakkutilliisut ilungersortariaqarput anneruniajuitsuuniarlutik oqartussaassusertillu atornerlunnaveersaarlugu. Kristumiut peqquneqarput ’allassimasut qimmullugit isumalioqqunagit.’ (1 Korintumiut 4:6) Ilagiinni utoqqaanertat nalunngilaat namminneq isummatik allanut pinngitsaaliissutigissanagit. Guutilli oqaasia tunngavigisarpaat aqqutigisassakkut eqqortukkut ingerlaqqullugit kajumissaarigaangamik, pissusilersorneq, atisalersorneq, pikineq aliikkutassallu eqqarsaatigalugit. (2 Timûtiuse 3:14-17) Ilagiinni ilaasut takusarunikkit utoqqaanertat Biibilimi killigititat qaangerneq ajoraat, utoqqaanertanut ataqqinninnermik siuarsaassaaq, ilagiillu anersaavanut nuannersumik, asannittumik eqqissinartumillu ilasaataassalluni.

 Nammineq eqqissisimaneq

Anneruniajuilluni inuugaanni ilukkut eqqissinermik akilerneqartarpoq. Anneruniajuitsoq annertuumik angusaqarusussuseqanngilaq. Tamanna isumaqanngilaq nammineq anguniagaqarsinnaanngitsoq. Imaassinnaavoq kiffartuussinermi annerusumik pisinnaatitaaffeqarusuttoq, Jehovali utaqqisariaqarpaa pisinnaatitaaffigilikkanilu Jehovamut ataqqinaatissanngorlugu. Suliami inerneri nammineerluni naammassisimasamisut isiginngilai. Taamatut anneruniajuitsoq Jehovamut, ’Guutimut eqqissisaasumut’ qanimut attaveqarluarnerulersarpoq. — Filípimiut 4:9.

Immaqa ilaannikkut misigisarpugut allanit arajutsineqarluta. Kisianni anneruniajuilluni arajutsineqarneq allanut sammeqqusaarluni anneruniarnerminngarnit pitsaanerunngila? Anneruniajuitsut ingasattumik anguniagaqarusussuseqanngillat. Taamaattumik eqqissisimaneq pigaat, ilorrisimaarnerannullu, timikkut isumakkullu, iluaqutaavoq.

Anneruniajuissuseq ineriartortiguk pigiliullugulu

Adam Evalu anneruiniajuinniarsimanngillat — pissuseq meeqqaminut kingornutsissimasaat. Qanoq ililluta angajoqqaatta siulliit kukkussutaat pinngitsoorsinnaavarput? Qanoq ililluta pissuserinneq anneruniajuissuseq ineriartortissinnaavarput?

Siullermik uagutsinnut ikiuutaassaaq silarsuup Pinngortitsisuanut, Jehovamut naleqqiullugu inissisimaffipput eqqortumik paasilluarutsigu. Suna naammassisimavarput Guutip naammassisimasaanut assersuunneqarsinnaasoq? Jehova kiffaminut aalajaatsumut Jobimut aperivoq: „Taamani uanga nunarsuaq tunngavilerakku illit sumiippit? Paasisimasaqaqiguit tamatuminnga oqaluttuutinnga!“ (Job 38:4) Jobip apeqqut akissutissaqartissimanngilaa. Ilisimassuseq, piginnaasat misilittakkallu eqqarsaatigalugit pisinnaasaata killiligaanerata assinganik killiligaannginnerpugut? Pisinnaasatta killeqarnera nassuerutigigutsigu iluaqutigiinnassannginnerparput?

Biibilimi allassimavoq: „Nunarsuaq taassumaniittullu tamaasa, silarsuaq tassanilu ineqartut [Jehovap] pigai.“ Tassani ilaapput „orpippassuarni uumasut tamaasa, nersutit tusindillit qaqqani ittut.“ Jehova eqqortumik oqarsinnaavoq: ’Sølvi uanga pigaara, kuulti uanga pigaara.’ (Tussiaat 24:1; 50:10; Haggaj 2:8, NV) Sumik takutissinnaasatsinnik pigisaqarpugut Jehovap pigisaanut naleqqiunneqarsinnaasumik? Silarsuarmi pisuunerpaaq allaat Guutimut naleqqiullugu usorsitsaatissaqanngilaq. Taamaattumik silatusaarneruvoq apustili Paulusip Romami kristumiunut isumassarsisitaalluni siunnersuutaa malissallugu: ’Saammaannermi uannut tunniussaq pissutigalugu nungullusi oqarfigaassi immissinnik isumassaq qaangerlugu isumaqarfigeqqunasi.’ — Rûmamiut 12:3.

Jehovap kiffaatut anneruniajuissuseq ineriartortikkumallugu anersaap inerititaanik — asanninnermik, tipaatsunnermik, eqqissinermik, kamajuinnermik, avaaginninngermik, angajoqqaatsernermik, ilumoornermik, qanilaarnermik, piitaajuinnermillu — tuneqqulluta Jehova qinnuigisariaqarparput. (Lúkarse 11:13; Galâsiamiut 5:22, 23) Suna pillugu? Pissutsit tamakku tamarmik anneruniajuinnissarput ajornannginnerulersissavaat. Tullermut asanninnerup ikiorsinnaavaatigut soorlu usorsitsaaqqajaaneq imaluunniit imminut angisuutinniaqqajaaneq akiorniassallugit. Piitaajuinnerup imaluunniit imminut naalakkersinnaanerup noqinnata iliuuseqannginnitsinni unitsissavaatigut eqqarsarteqqaassallutalu.

Mianersortariaqarpugut. Anneruniajuissutsimik amigaateqarnerup nassataanik nakkarfissat eqqumaffigiuartariaqarpavut. Kunngit marluk siusinnerusukkut eqqartukkavut anneruniajuitsuujuaannanngillat. Kunngi David periataarluni Israelikkut innuttai kiseqqullugit aallartitsisimavoq, tamannami Jehovap piumasaanut akerliulluinnarpoq. Kunngi Salomon anneruniartunngorsimavoq allaat guutipilussiortunngorluni. — 2 Samuel 24:1-10; 1 Kunngit 11:1-13.

Aaqqissuussaq manna guutiitsoq atuutsillugu anneruniajuissuseq atatiinnarumallugu eqqumajuarnissaq pisariaqartuassaaq. Tamannali iluaqutaaginnassaaq. Guutip silarsuassaani nutaami taamaallaat anneruniajuitsunik inoqassaaq. Anneruniajuissuseq nukittunertut isigineqassaaq, sanngiinnertuunngitsoq. Ila nuannissusissaa tamarmik, inuit ataasiakkaat ilaqutariillu, anneruniajuissutsip nassataanik eqqissinermik pilluaqquneqarpata. (wE 15/3 2000)

[Qupp. 12-mi assiliartaq]

Jesus qanoq iliornermini tamani anneruniajuilluni Jehova ataqqisarpaa